Yakubu 2 - Dadiya NT

Gʊtǝm Lɔl A Dul Nʊngtǝm Dʌmʌn

¹ Kɛtǝlam mɨ, ka jǝ́ nʊng lɛ swɨtǝm dul a kʊm jen, jʊ a bwɨɨ jǝ́ kwɛl jǝ́ ya nǝtǝm bɨlǝngkɛl jenɔ a daagɔ Tɛlalɔ bǝn Yesu Kiristi woi, nʊ nɨ nǝn Tɛlalɔ Nǝ dʊʊlǝnɨ.

² Jǝ mɛlalɨgɔ n wɔ, na kaa nǝ shilo a dɔ a mʊgɔ mʊrkalɨ jen, a dǝg kanjǝl mʊn jǝbɔ bɛllɛ bʊmǝntɨn. Nǝngɔ kaa nǝ bʊnǝn a dɔ nǝn bɛllɛ nɨ a wʊlala wʊlalaɨ,

³ jǝ́ nǝ nǝ nʊ nɨ a dʊʊ dʊʊl nyanɨ dʊʊn. Jǝ́ sʊwa jengɔ, “Nǝ dʊʊ, kotere nyanɔ wɔ, yɨ wo.” Jǝ́ sʊwa nǝ bʊnǝnɔ jengɔ, “Yɔ ya tɨ fʌlen,” na mɨ nyɨɨ, “Yɨ a tǝm.”

⁴ Na jǝ́ maa nyɨɨ, jǝ́ nʊng bɔ swɨtǝm dul a kʊm jen ka? Wɛ a bwɨ jǝ́ mwatɨ borangɔ lɛ nǝn bʊʊlalɨ bwɨlanɨ?

⁵ Jǝ́ nyʊwa, kɛtǝlam mɨ nɨ mǝ swɨ lɛɨ! Ke bɔ nǝb bʊnǝn yooli nɨ Kwaama a jǝgam sǝ a yǝlam nǝb shilo a nǝtǝm bɨlǝngkɛl a daa Yesu woi ka? Ke bɔ ji jǝ wɔɔ kʊla fɔlɔn nɨ lɛ ga maa nǝb nɨ gǝm swɨ gǝn nɛɨ gǝm swatǝm yaaɨ ka?

⁶ A jenɔ jǝ́ soga nǝb bʊnǝnɔ. Ke bɔ nǝb shilogɔ nǝ jen gaalan nɛɨ ka? Ke bɔ ji jǝ gʊ jen nɛ jǝ yɔ nǝn jen a kan borangɨ ka?

⁷ Ke bɔ ji tag jǝ sʊwa kɛl sogan nɛ a dul dun nyan gǝnɔ ja nyǝm jen nǝnɨ ka?

⁸ Bʊm bʊm na jǝ́ bwangtǝn diil fɔlɔn lɔ Kwaamaɨ, wʊnɨ ja mʊla a mʊgɔ mʊlalɨ kɛl Kwaamaɨ sʊwa lɛ gɔ, “Bɛ swɨ fwalɨ yɨm mʊnɔ na dul mʊnɔ.”

⁹ Na jǝ́ nʊng swɨtǝm duli, jǝ́ maa bwɨlangkɛl. A mʊgɔ diil Musaɨ, jǝ́ yǝlam nǝb kǝltǝm diil.

¹⁰ Nʊ nɨ a kɨla diiltɨnɔ gwam, a kǝl wini, a kǝl pʌd.

¹¹ Nʊ nɨ a sʊwa gɔ, “Ka ń maa lɛ buloni,” nǝn gɔ a sʊwa tag gɔ, “Ka jʌ lɛ dul.” Na mʊ maa bɔ buloni, na ń jʌ nǝlɨ, ń kwɛl ń yǝlam nǝ kǝltǝm diil Kwaamaɨ.

¹² Bɛ kɛl jenɔ jǝbɔ maajɨ jenɔ a nʊng jǝ́ nǝb nɨ jǝ maa jem borang lɛ a dul diil nɨ nǝ jen jǝgtǝm dul lɛɨ.

¹³ Jʊ a bwɨɨ nǝn kwama mwɛlɔ, Kwaama mɨsɔ ji bʊnǝn nʊ nɨ lɛ mɨ nǝn bʊnatǝmɨ. Jʊ a bwɨɨ bʊnatǝmɔ laa laa kwaan mwɛlɔ.

Nǝtǝm Bɨlǝngkɛl Jǝbɔ Maajɨ

¹⁴ Kɛtǝlam mɨ, n wɛ nǝl nya lɛ na nǝl a nʊng gɔ gǝ nǝn nǝtǝm bɨlǝngkɛl, na maajɨ nyantɨn gǝnɔ a nʊng bɔ nyɨɨ. Nǝtǝm bɨlǝngkɛl gǝnɔ dwal dwal a bʊʊ nǝn gǝ ka?

¹⁵ Na kɛ balɨ jǝbɔ kɛ nɔɔlɨ mɨ ji nǝn bɛllɛ jǝbɔ jǝjalǝn dwiyeni,

¹⁶ nǝngɔ kaa win a kʊm jen a sʊwa ji gɔ, “Jǝ́ ya kwamɨgǝn. Bɛ Kwaama a nǝ jen jǝjalǝnɔ jǝbɔ jǝ dʊtǝmɔ.” A maa bɔ kaa jǝl a jʊ nɨ ja gaa nyatǝmɨ, n wɛ jʊ nɨ nʊng lɛɨ?

¹⁷ Gǝ na nyɔ, nǝtǝm bɨlǝngkɛl nɨ mɨ nǝn maajɨ nɨ nʊng lɛɨ, ke bɔ kaa jǝl.

¹⁸ Kaa nǝl sʊwa sʊwa gɔ, “Mɔ nǝngǝn nǝn nǝtǝm bɨlǝngkɛl, mǝ nǝngǝn nǝn maajɨtɨn.” Nʊng ɨ nǝtǝm bɨlǝngkɛl mʊnɔ nɨ mɨ nǝn maajɨ nyantɨnɨ, mǝ nʊng ń nʊng ń nǝtǝm bɨlǝngkɛl mǝndɨ nǝn maajɨ nyantɨn.

¹⁹ Ń nǝ bɨlǝngkɛl Kwaama win ka? N dǝngdǝng. Nǝblaamɔ tʌji a nǝ bɨlǝngkɛl nyɔ. Bʊtɔ jinɔ ka lɛ kʌbkʌb nǝn taal.

²⁰ Mɔ nǝ swɛlalɨ! Mʊ swɨ lɛ n nʊng ń kanga nǝtǝm bɨlǝngkɛl nɨ mɨ nǝn maajɨɨ n ke bɔ kaa jǝlɨ ka?

²¹ Nǝn kwama tʊga bǝn Ibrahim a nǝ bʊla gɔ Ishaku a daa twɨtǝm yulʌni, n kɛl dul maajɨ dǝngdǝng gǝnɔ Kwaama a nya gǝn bɔ nǝn bwɨlangkɛlɨ, mɨ nyɔ ka?

²² Ń kuwo kanga nǝtǝm bɨlǝngkɛl gǝnɔ yɔ lɛ dǝngdǝng jǝbɔ maajɨ nyantɨn gǝnɨ, maajɨ nyantɨn gǝnɔ a nʊng nǝtǝm bɨlǝngkɛl gǝnɔ n dǝngdǝng.

²³ N daa nɨ ja yii mʊlalɨ kɛl Kwaamaɨ sʊwa lɛ gɔ, “Ibrahim a nǝ bɨlǝngkɛl a daagɔ Kwaama woi, n kɛl dul nǝtǝm bɨlǝngkɛl gǝnɔ Kwaama a kiyo gǝn n nǝ dǝngdǝngɨ.” N jʊ a bwɨ jǝ jo gǝn nɛ gɔ, Ibrahim nǝn fwal Kwaamaɨ.

²⁴ Jǝ́ kuwo Kwaama a nya gǝn bɔ nǝn bwɨlangkɛl a dul maajɨ nyan gǝnɔ gǝm. Ke bɔ a dul nǝtǝm bɨlǝngkɛl kwaagɔ.

²⁵ Gǝ na nyɔ tag, nɔɔlɨ bulon nɨ, Rahab, nǝn kwama a yʊm nǝb jatɔl nɨɨ, a tɨka ji ja bʊʊ a kaa golaɨ. N gola maajɨ nya, Kwaama nya gǝn bɔ nǝn bwɨlangkɛlɨ, mɨ nyɔ ka?

²⁶ Kanga bʊtɔ nǝlɨ mɨ nǝn kʊlɨ n bʌlʌni, nǝtǝm bɨlǝngkɛl nɨ mɨ nǝn maajɨ nyantɨnɨ, gǝ na na bʌlʌn.