Yakubu 1 - Dadiya NT

Yaltǝm

¹ Nǝmǝ mǝ Yakubu, bwɛ jwaalɛ Kwaamaɨ jǝbɔ a Tɛlalɔ Yesu Kiristii. Mǝ mʊla langǝn bwangǝn nɨ mǝ tʊng a daagɔ dʊʊm nɨ a bel kʊb jeli yo a kwɨya tǝmɔ nǝn kwan a mʊgɔ yooli nɨɨ. Mǝ yal jen nɛ.

Nǝtǝm Bɨlǝngkɛl Jǝbɔ Yɨm Nǝn Yʊlan

² Kɛtǝlam mɨ, bɛ jǝ́ dǝg gaalantɨn nɨ tɛl nǝtǝm bɨlǝngkɛl jenɔ lɛɨ a yǝlam jǝ fulotǝm nǝl.

³ Jǝ́ nyǝm gaalan nɨ gǝ tɛl tɛl nǝtǝm bɨlǝngkɛl jenɔ, sǝ a dǝg jen jǝ́ yɨ nǝn kʊtǝm nǝl.

⁴ Bɛ jǝ́ bǝla kʊtǝm nǝl jenɔ a yii maajɨ gǝnɔ, sǝ a yɔ nǝn jen a yɨm tatǝm dul jǝbɔ yɨm nyangǝn, jǝ́ gaa bɔ kaa jǝl.

⁵ Na kaa nǝl a kʊm jen saa nyǝmtǝm lɛɨ, bɛ ga kela Kwaama nɨ gǝ nǝ nǝbɔ lɛ gwam nǝlɔ win mɨ jongʌn woi, nǝ gǝn nǝ.

⁶ Bɛ ga kel nǝn nǝtǝm bɨlǝngkɛl, mɨ nyǝmatǝm wo, jʊ a bwɨɨ, nǝ nyǝmatǝm gǝ na na mwɛ nɨ mʊla lɛ a wɨmaɨ, wʊnɨ yʊwagɔ gung lɛ yǝla lɛ nǝn gɔ kanga swɨm lɛɨ.

^7-8 Na nǝfili nɨ nǝn nǝlɔ yoi, wʊnɨ mɨ ya bʊʊlalɨ gǝnɔ lɛ daagɔ win a maajɨ gǝnɔ gǝmɨ, nʊ gɔ ka ga ya lɛ nǝl gɔ, gǝ yo yo kaa jǝl a daagɔ Tɛlalɔ woi.

Shilo Jǝbɔ Bʊnǝn

⁹ Bɛ kɛ nɨ n nǝ bʊnǝnɨ ya maa lɨyal lɛ gɔ, Kwaama a nǝ gǝn dʊʊn.

¹⁰ Nǝ shilo, bɛ ga maa lɨyal nǝn shigtǝm dul gǝnɔ. Jʊ a bwɨɨ, nǝ shilo gǝ kʊshɨ kʊshɨ na fɨlǝn yǝla.

¹¹ Kanga na nu kwamagɔ a gwi a shilo nyangǝnɨ, gǝ dǝg dǝg yǝlagɔ a kʊshɨ, fɨlǝn gǝnɔ gǝ yal yal, bʊmǝn gǝnɔ a lɛlam. Gǝ na nyɔ nǝ shilo bʊla bʊla a gola lʌbʌrtǝm a tentǝm jǝbɔ miyotǝm a gamdʌbo.

Gaalan Jǝbɔ Tɛltǝm

¹² Bwiligɔ na a nʊ nɨ a kʊ nǝl a mʊgɔ gaalan gǝnɔ gǝmɨ, jʊ a bwɨɨ, yo yo lǝma kʊlɨ nɨ mɨ dɨtǝm woi, wʊnɨ Kwaama a maa swatǝm yaa gɔ gǝ nǝ nǝ nǝb nɨ gwam swɨ gǝn nɛɨ.

¹³ Na tɛltǝm a nya nǝlɨ, bɛ ka sʊwa lɛ gɔ, nǝn Kwaama tɛl gǝn nɛɨ. Jʊ a bwɨɨ Kwaama mɨ gǝ tɛl nǝl lɛ. Mɨsɔ maa lɛ ja tɛl gǝn nǝn bwɨlang jǝl.

¹⁴ Nǝl gǝ yal yal a mʊgɔ tɛltǝm nǝn kwama bwɨlang wɛl gǝnɔ a swag gǝnɨ, a gʊ gǝn tagɨ.

¹⁵ Bwɨlang wɛlɔ na a do fʌli, gǝ bʌm bwɨlangkɛl. Bwɨlangkɛlɔ na a dʊʊlɨ, gǝ bʌm bwaa.

¹⁶ Kɛtǝlam mɨ nɨ mǝ swɨ lɛɨ, ka jǝ́ jǝla lɛ ja swag jen.

¹⁷ Nǝtǝm jǝ nyan, jǝbɔ yiitǝm lǝma a bɛ a dʌbʌl a daagɔ Tɛtɛ Kwaama woi, wʊnɨ a fwal nyalǝmɔ pʌd a dʌbʌl kwamaɨ. Mɨ gǝ fʌto lɛ wo. Mɨ duuli gǝnɔ gǝ yǝla lɛ wo.

¹⁸ Kwaama a do a mʊgɔ nǝl gǝn gɔ gǝ dǝg bǝn bǝ yǝlam bɛtɔ lɔ gɨɨ a gola nǝtǝm bǝn kɛl bɨlǝngkɛl gǝnɔ, sǝ a dǝg bǝn bǝ yǝlam nǝb dʊʊm a kanjǝl nɨ ga fwalɨ.

Nyʊwatǝm Jǝbɔ Bwangtǝm Kɛl Kwaamaɨ

¹⁹ Kɛtǝlam mɨ nɨ mǝ swɨ lɛɨ, bɛ jǝ́ fɛ jǝ́ nyʊwa a bʊm, ka jǝ́ yǝlam lɛ nǝb sʊwatǝm kɛl jǝbɔ maatǝm nabwɨl yagɨ yagɨ.

²⁰ Nabwɨl nǝlɨ mɨ gǝ yɔ lɛ nǝn gɔ a yɨm dǝngdǝng nɨ Kwaama swɨ lɛɨ.

²¹ Bɛ jǝ́ tǝlam bʊʊlalɨ bwɨla nɨ n bwɨlangkɛl jǝbɔ kanjǝl shili. Jǝ́ yo kɛl nɨ ja kwal a nǝl jeni a mʊgɔ shigtǝm dul, wʊnɨ yɔ lɛ nǝn jen a nyatǝm bʊʊtǝmɨ.

²² Ka jǝ́ swag lɛ dul jenɔ. Ka jǝ́ yǝlam lɛ nǝb nyʊwatǝm kɛl Kwaamaɨ nǝn kwan. Bɛ jǝ́ yǝlam nǝb maatǝm gǝn tag.

²³ Nʊ nɨ gǝ nyʊwam ka kɛl mɨ maa lɛɨ, gǝ na na nʊ nɨ a dʌng kǝga gǝnɔ a bwaalaɨ.

²⁴ Nǝn kwama a dʌngʌm kǝga gǝnɨ, mɨ gǝ ta bʊtɔ lɛ, gǝ twabǝm twabǝm nǝn kǝga gǝnɔ.

²⁵ A nʊ nɨ a dǝg bʊʊlalɨ gǝnɔ a diil nɨ bɛ lɛ nǝn jǝgtǝm nyanɨ, a ja kǝga nǝn maatǝmɨ, ke bɔ nʊ nɨ nyʊwa lɛ a yǝla a twabǝmɨ, maa lɛɨ, nya nya bwili a mʊgɔ kanjǝl nɨ gǝ maa lɛ gwamɨ.

²⁶ Na kaa nǝl bʊʊla lɛ gɔ gǝ nǝn jǝfʊlǝnɨ, mɨ ta nyiyo gǝnɔ lɛɨ, gǝ swag dul gǝn. Jǝfʊlǝn gǝnɔ jǝl nǝn kwan.

²⁷ Jǝfʊlǝn nɨ Kwaama Tɛtɛ a jǝla nǝn sagsag n bɨlǝngkɛlɨ nǝn gɔ, bɛ jǝ́ dʌng nɔɔtǝmkʊlabɔ, jǝbɔ bɛtɔ kwɛlǝnɔ a mʊgɔ gaalan jinɔ gǝm. Bɛ jǝ́ ta dul jenɔ ka jǝ́ maa lɛ jǝ bwɨlan a yooli nɨ.