Luka 4 - Dadiya NT

Mammɔ A Tɛl Yesu

¹ Yesu a bǝla tiyo Urdunɔ nǝngǝn nǝn Yʊwa Kwaamaɨ a bʊtɔ gǝn, wʊnɨ a jǝg gǝn a mʊgɔ kuuli.

² Mammɔ a tɛl Yesu wo kumɔ fʊltǝnaal. A kumtɨn gɔ a ja bɔ jǝjalǝn, a dɨltǝmɔ gǝmɨ jʊwanɔ a ta gǝn.

³ Mammɔ a sʊwa gǝn gɔ, “Na mʊ nǝn Bʊla Kwaamaɨ, sʊwa tɛl nɨ a yǝlam kʊkkʊm.”

⁴ Nǝngɔ Yesu a jǝla gɔ, “A mʊla mʊlaɨ gɔ, ‘Ke bɔ nǝn jǝjalǝn kwaagɔ nǝl bʊʊ lɛɨ.’ ”

⁵ A daagɔ nǝngɔ Mammɔ a gwi nǝn gɔ a daa nɨ a deba debaɨ, nǝngɔ a nʊng gǝn fɔlɔn yooligɔ tʌgo a kang gwamɨ.

⁶ Mammɔ a sʊwa gǝn gɔ, “Mǝ nǝ ń nǝ ń kwaan fɔlɔn a dul jʊtǝb nɨ pʌd jǝbɔ dʊʊn jinɔ. Jʊtǝb nɨ ja nɨ ɨ gwam. Mǝ nǝ nǝ nʊ nɨ mǝ swɨ lɛɨ.

⁷ Gwam jʊ nɨ yǝlam a mɔ, na ń jǝla ń jʊng ń nɨ ɨ dʊʊnɨ.”

⁸ Yesu a jǝla gǝn gɔ, “A mʊla mʊlaɨ gɔ, ‘Maa Tɛlalɔ Kwaama mʊnɔ gǝm bǝlátǝm. Nǝn gɔ kwaagɔ mʊ nǝ gǝn dʊʊn nɛɨ.’ ”

⁹ Nǝngɔ Mammɔ a do gǝn a yɔ nǝn gɔ a Urushalimaɨ, a tɨ nǝn gɔ a dʌbʌl Kan Kwaaman nɨ a deba nyɨɨ. A sʊwa gǝn gɔ, “Na mʊ nǝn Bʊla Kwaamaɨ, gǝla mɔ fɔ.

¹⁰ A mʊla mʊlaɨ gɔ, ‘Nǝ nǝ bɛtɔ twama gǝnɔ diil a dul mʊn, sǝ ja kʌshi ń.’

¹¹ A mʊla mʊlaɨ tag gɔ, ‘Jǝ kɔ kɔ kang jinɔ ja kʌshi ń, kage ń ga naa a tɛl.’ ”

¹² Nǝngɔ Yesu a jǝla gɔ, “A mʊla mʊlaɨ gɔ, ‘Ka ń tɛl lɛ Tɛlalɔ mʊnɔ Kwaama.’ ”

¹³ Kwama nɨ Mammɔ a dɨ tɛltǝm gǝnɨ, nǝngɔ a bǝla gǝn dɨnɨ.

Yesu A Tǝl Maajɨgɔ A Galili

¹⁴ Nǝngɔ Yesu a yǝla a Galilii, kwaan Yʊwa Kwaamaɨ wo a daa gɔ woi. Kɛl gǝnɔ a kɛla tǝmɔ gwam.

¹⁵ Mɛla jim lɛ a kantɨn mɛlalɨ. Nǝbɔ gwam bǝlá gǝn nɛ.

Ja Kɔ Yesu A Nazarat

¹⁶ Yesu a shu a Nazarat, a daagɔ a dʊʊlǝmɨ. A dɔ kan mɛlalɨ a Kum Fǝbtǝm kanga gǝ maam lɛɨ. Nǝngɔ a gun sǝ a kiyoi.

¹⁷ Nǝngɔ ja nǝ gǝn langǝn bwangǝn Ishayaɨ, nǝkuwotǝmkǝgagɔ. A kwɨ langǝn bwangǝnɔ, a saa, nǝngɔ a nya daa nɨ ja mʊla gɔ,

¹⁸ “Yʊwa Kwaamaɨ gǝ na jǝbɔ mǝ, nǝn gɔ a jǝg ɨ gɔ ba n kiyo nǝb bʊnǝnɔ gǝm fulon kɛl lǝmɨɨ. Nǝn gɔ a twam ɨ sǝ n ga wulong jǝgtǝm nǝbɔ a golmanɨ, sǝ n wum kululʌmɔ gǝm nu, sǝ n jǝg nǝb nɨ jǝ bǝm ji lɛɨ,

¹⁹ sǝ n sʊwa nǝbɔ mǝʊ, jol yotǝm lǝma Tɛlalɔɨ.”

²⁰ Nǝngɔ a kʊlʊm langǝn bwangǝnɔ a nǝ nʊ nɨ dʌng kan mɛlalɨgɔ lɛɨ, a gǝla a yɨ sǝ a tǝl mɛlalɨgɨɨ. Gwam nǝbɔ wo a kan mɛlalɨɨ ja tal gǝm nu.

²¹ Nǝngɔ a sʊwa ji gɔ, “Mʊlalɨ kɛl Kwaamaɨ a yii dwiyen a lɔl jen.”

²² Gwam jinɔ jǝ woi, jǝ sʊwa kɛl nyan nɛ a dul gǝn. Ja ta kang a nyiyo a kɛl nyantɨn nɨ jela lɛ a nyiyo gǝnɨ. Jǝ bʌbko lɛ gɔ, “Bwɛ nɨ n ke bɔ bʊla Yusufui ka?”

²³ Yesu a sʊwa gɔ, “N nyǝm jǝ́ sʊwa ɨ sʊwa ɨ mʊsǝn kɛl nɨɨ, ‘Nǝ bʊʊ, gung dul mʊnɔ nǝn kang mʊn. Kanjǝl nɨ nǝn nyʊwa mʊ maa a Kafarnahumi, maa fɔ tag a tuulɔ mɔ.’ ”

²⁴ A sʊwa ji gɔ, “N sʊwa jen bɨlǝngkɛlɔ, mɨ nǝn nǝkuwotǝmkǝga nɨ jǝ yo gǝn nɛ a tǝm gǝnɨ.

²⁵ N bɨlǝngǝn mǝ sʊwa jen nɛɨ, a kwama Iliyaɨ, mwɛmɔ a kɔ swiyotǝmɔ jolɔ taal jǝbɔ bwaala nukun. A joltɨn gɔ jʊwanɔ a maa tǝmɔ gwam. Nɔɔtǝmkʊlabɔ wo a lada a tǝm Israila.

²⁶ Kwaama a twam bɔ Iliya nǝkuwotǝmkǝga a daa kaa wo win a kʊm jin. A yɔ a daagɔ kaa nɔɔkʊla nɨ a Zarifati, a tǝm Sidoni.

²⁷ Nǝn kwama nǝkuwotǝmkǝga Elishaɨ, nǝbɔ a mwata mwataɨ a lada a tǝm Israila. Ja gung bɔ nǝl wo win a kʊm jin, na ke bɔ Naaman, bwɛ tǝm Suriyaɨ.”

²⁸ Nǝb nɨ wo a mʊgɔ kan mɛlalɨ ja nyʊwa kɛl nɨɨ, nabwɨlɔ a ta ji gwam.

²⁹ Ja gun, ja jǝg Yesu a gulen, ja shu nǝn gɔ a nyanga yem nɨ ja mɔ tuulɔngɔ woi. Jǝ swɨ lɛ ja tʊng gǝn a yal a ganga.

³⁰ Nǝngɔ a bwɛlam a tɨbǝl jii, a shu a ta gola gǝnɨ.

Nǝ Yʊwa Bwɨla

³¹ Nǝngɔ a shu a tuulɔ Kafarnahum a tǝm Galilii. A dɔ kan mɛlalɨ nǝn Kum Fǝbtǝm mɛla jim lɛ woi.

³² Nǝngɔ ja ta kang a nyiyoi, jʊ a bwɨɨ kɛl gǝnɔ nǝn kwaan fɔlɔn.

³³ A mʊgɔ kan mɛlalɨ kaa nǝl wo nǝn yʊwa bwɨla, nǝngɔ a ga kwaalɨgɔ nǝn kwaan gɔ,

³⁴ “Yesu, bwɛ Nazarat, n wɛ a dǝg ń wo jǝbɔ nǝnɨ? Mʊ bɛ sǝ ba ń jʌbo nǝn ka? N nyǝm mʊ nǝn nuwo! Mʊ nǝ Sagsag Kwaamaɨ.”

³⁵ Yesu a ga yʊwa bwɨlagɔ gǝm wulong gɔ, “Yɨ shig! Jelʌm a bʊtɔ nʊ nɨ gǝm!” Yʊwa bwɨlagɔ a gung gǝn a ga a tǝm a kǝga jinɔ gǝm. A jel a bǝla nʊ nɨ mɨ twɨla wo.

³⁶ Nǝbɔ gwam a ta kang a nyiyo, jǝ sʊwa lɛ gɔ, “Jʊ nɨ n mɛlalɨ wɛ? Nǝn kwaan jǝbɔ fɔlɔn bwɛ nɨ a sʊwa yʊwa bwɨlantɨnɔ kɛl ja jeli!”

³⁷ Jʊ nɨ Yesu a maaɨ, a dǝg ji jǝ sʊwa kɛl gǝnɔ lɛ a tǝmɔ gǝm gwam.

Yesu A Gung Yul Bitrusi

³⁸ Yesu a bǝla kan mɛlalɨgɔ, a shu a lɔ Saminui. Yul Saminui mɨ kwamɨgǝn, bɛshenigɔ a ta gǝn a kwam. Nǝngɔ ja sʊwa Yesu kɛl sǝ a tɨka gǝnɨ.

³⁹ Nǝngɔ Yesu a yɔ a daa gǝ woi, a sʊwa gɔ, “Bɛsheni, bǝla gǝn.” Tʌgo a kang nǝngɔ bɛshenigɔ a bǝla gǝnɨ, nǝngɔ a gun a nǝ ji jǝjalǝnɨ.

Yesu A Gung Nǝbɔ A Lada Nǝn Kwaamɨ

⁴⁰ Nǝn kwama lɛtǝm, ja bɛ gǝm nǝn nǝb nɨ mɨ kwamɨgǝnɨ, nǝngɔ a ke jii, nǝngɔ a gung ji gwamɨ.

⁴¹ Nǝblaamɔ a jel a bʊtɔ nǝbɨɨ a lada nyɔ. Jǝ gaba wulongɔ lɛ gɔ, “Mɔ nǝn Bʊla Kwaamaɨ.” Ja nyǝm gɔ nǝn Kiristii, n jʊ a bwɨ Yesu a ga jim wulongi, nǝngɔ a kaa ji wo a sʊwatǝm kɛlɨ.

Yesu A Shu A Daa Kiyotǝm Fulon Kɛl

⁴² Nǝn tǝmsɛlɨɨ, nǝngɔ Yesu a jel a shu a daa nɨ mɨ nǝb woi. Nǝbɔ saa gǝn nɛ, nǝngɔ ja nya gǝnɨ, nǝngɔ ja kela gǝn gɔ ka ga bǝla ji lɛ ga shu a kaa daa.

⁴³ Nǝngɔ a sʊwa gɔ, “A yǝlam nyɔ n kiyo fulon kɛl lǝmɨ fɔlɔn lɔ Kwaamaɨ a kaam tuulɔtɨnɔ gǝm, jʊ a bwɨɨ n dul kɛl nɨ ja twam ɨɨ.”

⁴⁴ A ja kǝga nǝn kiyotǝm kɛl Kwaamaɨ a kantɨn mɛlalɨ nɨ a tǝm Yahudiyaɨ.