Luka 1 - Dadiya NT

Luka A Twam Tiyofalas Gǝm Langǝn Bwangǝn

¹ Nǝbɔ a lada na a saa golagɔ jǝ mʊlam kanjǝl nɨ lɛ a bwɨ a kʊm nǝnɨ.

² Ja mʊla kanjǝl nɨ kanga nɨ nǝn nyʊwa a nyiyo nǝb nɨ wo nǝn tɨkǝga ja kuwo kanjǝl nɨ tag a bwɨ gwamɨ, nǝb maajɨ kɛl Kwaamaɨ.

³ Gǝ na nyɔ mǝ tǝmɨ n kwɛl n fɨɨ fɨɨ kanjǝl nɨ a tǝltǝm jinɔ gǝm. A bʊm nyɔ tǝmɨ n mʊla mʊn kanjǝl nɨ dǝngdǝng, nǝ dʊʊ Tiyofalas,

⁴ sǝ ń nyǝm kanjǝl nɨ ja mɛla mʊnɨ, n bɨlǝngǝn.

Ja Sʊwa Fulon Bʌtʌm Yohanaɨ Nǝ Yʊtǝm Mwɛ Sagsag

⁵ Nǝn kwama nɨ Hiridus n fɔlɔ tǝm Yahudiyaɨ, kaa nǝkǝla wo dunɔ nǝn Zakariya. Gǝ na a nya nǝbkǝlam bǝ Abiyaɨ. Nwala gɔ Alisabatu n nya bǝ Harunaɨ.

⁶ Gwam jinɔ nɨ yoi jǝ nǝb dǝngdǝng a kǝga Kwaamaɨ, jǝ kɨla diiltɨn Tɛlalɔɨ lɛ kanga ja mʊla a langǝn bwangǝn Kwaamaɨ. Mɨ ji nǝn jǝ tuwol.

⁷ Mɨ ji nǝn bɛtɨ. Alisabatu n jolʌm. Gwam jinɔ ja gʌlo.

⁸ Kaa di, nya bǝ Zakariyaɨ nǝji a maajɨɨ, Zakariya nǝn gɔ n nǝ tǝlatǝm twama a Kan Kwaamanɨ.

⁹ A kwamagɔ ja mʊrǝm ji gwam ja jǝgǝm gǝn kanga jǝfʊlǝn jinɔ a sʊwa gɔ ja maaɨ, sǝ ya dɔ daa sagsagɔ lɛ a mʊgɔ lɔng Tɛlalɔɨ ya twɨ yulʌn nɛ a daa twɨtǝm yulʌni.

¹⁰ Kwama twɨtǝm yulʌnɔ a laɨ, nǝbɔ a bɛ a lada maa keli Kwaamaɨ lɛ a yooli.

¹¹ Nǝngɔ bwɛ twama Tɛlalɔɨ a jel a nʊng dul gǝnɔ a daa gǝ woi, a gwanga kang jajǝng a daa twɨtǝm yulʌni.

¹² Nǝn kwama nɨ Zakariya a kuwom gǝnɨ, a kǝlamtǝn dǝbǝr, taalɔ a ta gǝn.

¹³ Nǝngɔ bwɛ twama Kwaamaɨ a sʊwa gǝn gɔ, “Ka ń nyʊwa lɛ taal Zakariya. Kwaama a nyʊwa keli mʊnɔ. Nwala mɔ Alisabatu bʌ mʊn bʌ bwɛ balɨ. Mʊ ja gǝm dunɔ mɔʊ Yohana.

¹⁴ “Yǝlam mʊn jǝ lǝma jǝbɔ fulotǝm nǝl. Nǝbɔ a lada nyʊwa nyʊwa fulotǝm nǝl nǝn bʌtʌm gǝnɔ.

¹⁵ Yǝlam nǝ dʊʊ a kǝga Kwaamaɨ. Mɨsɔ nɔɔ bʊgɛ lɛ jǝbɔ jʊ nɨ maa gǝn nɛɨ. Jʊ a ta nǝn kwama nɨ a fʌl nɛnɛ gɨɨ, Yʊwa Kwaamaɨ gǝ na jǝbɔ gɔ.

¹⁶ Yǝla yǝla nǝn nǝbɔ Israilaɨ a lada a daagɔ Tɛlalɔ Kwaama jinɔ woi.

¹⁷ Ja ja kǝga a Tɛlalɔ gǝm a mʊgɔ yʊwa jǝbɔ kwaan na a Iliyaɨ. Yǝla yǝla nǝn nǝl tɛbɨɨ a daa bɛtɔ lɔ jii woi. Yǝla yǝla nǝn nǝb bǝngɨ lɔlɔ ja bwangtǝn gola nǝb yʊlanɨ jǝbɔ nǝb dǝngdǝngɔ.”

¹⁸ Nǝngɔ Zakariya a bʌ bwɛ twama Kwaamaɨ gɔ, “Mǝ nyǝm nyǝn kɛl nɨ n bɨlǝngkɛl? N gʌlo gʌloi, nwala mɨ tǝgǝn gʌlonɔ a ta gǝn.”

¹⁹ Nǝngɔ bwɛ twama Kwaamaɨ a jǝla gǝn gɔ, “Nǝmǝ mǝ Jibrailu! Mǝ tɨ a kǝga Kwaamaɨ, nǝngɔ a twam ɨ gɔ ba n sʊwa ń fulon kɛl lǝmɨ nɨɨ.

²⁰ Kǝngkǝnɨ nyiyo mʊnɔ nʊng nʊng, mɨsɔ mʊ sʊwa kɛl lɛ, ba la nǝn kwama jʊ nɨ bwɨm lɛɨ, jʊ a bwɨɨ mʊ nǝ bɔ bɨlǝngkɛl nǝn kɛl mǝndɨ wʊnɨ yǝlam bɨlǝngkɛl lɛɨ na kum gǝnɔ a laɨ.”

²¹ Nǝbɔ yam Zakariya lɛ, jǝ bʊʊla lɛ gɔ, “N wɛ a bwɨ ga ta bʊtɔ nyɔ a mʊgɔ Kan Kwaamanɨ?”

²² Kwama nɨ a jelʌm ba nya jii, a nya bɔ kwaan a sʊwa ji kɛl. Ja nyǝm Kwaama a nʊng gǝn a dʊgam nyangnyang a Kan Kwaaman. Nʊng ji kanjǝlɔ lɛ nǝn kang. Nyiyo gǝnɔ a wumo bɔ a sʊwa kɛl.

²³ Kumɔ a tagǝm maajɨ gǝnɨ, nǝngɔ a yǝla a shu a lɔɨ.

²⁴ A kʊta bɔ, nǝngɔ fʌlɔ a ta nwala gɔ Alisabatui. A yʊ fʌlɔ bwaala nʊ a sʊwa bɔ kɛl.

²⁵ Alisabatu a sʊwa gɔ, “Nǝn Tɛlalɔ a maa mɨ jʊ nɨɨ. Nǝn kumtɨn nɨ Kwaama a ji bʊnǝn mɨɨ, a dem mɨ jǝ tuwol a mʊgɔ nǝbɨɨ.”

Bwɛ Twama Kwaamaɨ A Sʊwa Kɛl Bʌtʌm Yesui

²⁶ Fʌl Alisabatui a la bwaala nukuni, nǝngɔ Kwaama a twam bwɛ twama gǝnɔ Jibrailu a tuulɔ Nazaratɨ, a tǝm Galilii,

²⁷ a daa kaa bwɛnɔɔlɨ woi, wʊnɨ a swa yaa jǝbɔ kaa nǝlɨ, dunɔ nǝn Yusufu. A jel a dʊʊm Daudaɨ. Dun bwɛnɔɔlɨ gɨɨ nǝn Maryamu.

²⁸ Nǝngɔ bwɛ twama Kwaamaɨ ya sʊwa gǝn gɔ, “Mǝ yal ń nɛ mʊ nʊ nɨ Kwaama a ya mʊn bwili gǝnɨ. Tɛlalɔ dakini jǝbɔ mɔ.”

²⁹ Kɛl nɨ ga sʊwa nyɨɨ a kom Maryamu. Bʊʊla lɛ gɔ yaltǝm wɛ nyɔ.

³⁰ Nǝngɔ bwɛ twama Kwaamaɨ a sʊwa gǝn gɔ, “Ka ń nyʊwa lɛ taal Maryamu. Ń nya lǝma a daa Kwaama woi!

³¹ Mʊ do do fʌl, mʊ bʌm bwɛ balɨ. Mʊ ja gǝm dunɔ gɔ Yesu.

³² Yǝlam gʌleng nǝlɨ, jǝ jo gǝn gɔ Bʊla nʊ nɨ a Laa Dʊʊlǝnɨ. Tɛlalɔ Kwaama nǝ gǝn nǝ kotere fɔlɔn tʊga gǝ Daudaɨ.

³³ Nǝn gɔ maa fɔlɔn lɔ Yakubui lɛɨ mɨ dɨtǝm wo. Fɔlɔn gǝnɔ mɨ dɨtǝm wo.”

³⁴ Maryamu a bʌ bwɛ twama Kwaamaɨ gɔ, “Jʊ nɨ bwɨ nyǝn? Mǝ lǝga bɔ n nyǝm balɨ.”

³⁵ Nǝngɔ bwɛ twama Kwaamaɨ a jǝla gǝn gɔ, “Yʊwa Kwaamaɨ nǝn gɔ bɛ lɛ a daa mʊ woi. Kwaan nʊ nɨ a Laa Dʊʊlǝnɨ nǝn gɔ ba sum ń nɛɨ. Nǝ sagsag nɨ mʊ bʌ lɛɨ, jǝ jo dun gǝnɔ gɔ Bʊla Kwaamaɨ.

³⁶ Alisabatu nanǝga mʊnɔ wʊnɨ ja sʊwa gɔ n jolʌmi kǝngkǝnɨ nǝngǝn nǝn fʌl bwaala nukun a gʌlotǝm gǝnɔ gǝm.

³⁷ Mɨ jʊ nɨ wo a laa kwaan Kwaamaɨ.”

³⁸ Nǝngɔ Maryamu a jǝla gǝn gɔ, “Mǝ bwɛn jwaalɛ Tɛlalɔɨ. Bɛ a yǝlam mɨ nyɔ kanga mʊ sʊwaɨ.” Nǝngɔ bwɛ twama Kwaamaɨ a bǝla gǝnɨ.

Maryamu A Yɔ Alisabatu Gǝm Fɔla

³⁹ A kumtɨn gɔ Maryamu a gun a fɛka dǝbǝr dǝbǝr a yɔ a kaa tuulɔ a yem Yahudiya.

⁴⁰ Ya dɔ a lɔ Zakariyaɨ, nǝngɔ a yal Alisabatui.

⁴¹ Kwama nɨ Alisabatu a nyʊwam diil Maryamui yal gǝn nɛɨ, nǝngɔ bwɛ nɨ a fʌl gǝnɨ a mǝgaɨ, Yʊwa Kwaamaɨ tag a yii Alisabatu.

⁴² Nǝngɔ a jǝla gǝn nǝn diil gɔ, “Ń nya bwili Kwaamaɨ a kʊm nɔɔtǝmɨ! Bwɛ nɨ mʊ bʌ lɛɨ, a nya bwili Kwaamaɨ tǝgǝn.

⁴³ N lǝma wɛ a nya ɨ nyɨɨ, nyɨya Tɛlalɔ mɨɨ bɛ lɛ fɔ a daa mɨ woi?

⁴⁴ Nǝn kwama nɨ mǝ nyʊwam yaltǝm mʊnɨ, bwɛ dwalɨ nɨ a fʌl mɨɨ, a mǝga nǝn fulotǝm nǝl.

⁴⁵ Bwiligɔ na a mɔ mʊ nʊ nɨ mʊ nǝ bɨlǝngkɛl mɔʊ jʊ Tɛlalɔ a sʊwa ńɨ, bwɨ bwɨ nyɔ.”

Nafɨ Maryamui

⁴⁶ Maryamu gɔ, “Nǝl mǝndɨ dʊʊl Tɛlalɔ lɛ.

⁴⁷ Dʊʊmɨ mǝndɨ gǝ na a bǝlátǝm Kwaamaɨ, Nǝbʊʊlɨ mɨɨ,

⁴⁸ jʊ a bwɨɨ Kwaama a bʊʊla nǝn bwɛn jwaalɛ gǝnɔ, wʊnɨ mɨ gung dul lɛɨ. A kǝga nɨɨ, kaltɨnɔ gwam jo i gɔ nʊ a yo bwili Kwaamaɨ.

⁴⁹ Jʊ a bwɨɨ nǝ kwaanɔ a maa mɨ gʌleng kanjǝl gǝnɔ, dun gǝnɔ n sagsag.

⁵⁰ Bʊnatǝm gǝnɔ gǝ la la nǝb nɨ dʊʊl gǝn nɛɨ, kal jǝbɔ kaltɨn.

⁵¹ A maa gʌleng maajɨ nǝn kang gǝnɔ, a kwɨ nǝb nɨ gung dul lɛɨ nǝn dʌmʌn.

⁵² A shig fɔlɔlɔmɔ a kotere fɔlɔn jinɔ gǝm, a gung nǝb nɨ mɨ a nyiyo jǝlɨ.

⁵³ A ja nǝn nǝb nɨ nyʊwa jʊwan nɛɨ nǝn kanjǝl nyan. A kaa nǝb shilogɔ kangɔ kwakwa.

⁵⁴ A tɨka bwɛ jwaalɛ gǝnɔ Israila, ji bʊnǝn nǝbam gǝnɨ lɛ,

⁵⁵ kanga a swa yaa a daa tʊgalam bǝnɔ woi, a daa Ibrahim woi jǝbɔ dʊʊm gǝnɔ mɨ dɨtǝm wo.”

⁵⁶ Maryamu a yɨ jǝbɔ Alisabatu bwaalagɔ taal. Nǝngɔ a yǝla a shu a lɔɨ.

Ja Bʌ Yohana Nǝ Yʊtǝm Mwɛ Sagsagɔ

⁵⁷ Kwama butotǝm Alisabatui a laɨ, nǝngɔ a bʌ bwɛ balɨɨ.

⁵⁸ Nǝbam gǝnɔ jǝbɔ nǝbɔ yǝm dakini jǝbɔ gɨɨ, ja nyʊwa gɔ Tɛlalɔ a ji bʊnǝn gǝnɔ a ladaɨ, nǝngɔ ja maa fulotǝm nǝl jǝbɔ gɨɨ.

⁵⁹ Kum naalǝbɔ a la kanga ba jǝ biyo bwɛ gǝm mwɛnɔ lɛ jǝbɔ jatǝm duni, jǝ swɨ lɛ ja ja gǝm dun tɨya gɔ Zakariyaɨ,

⁶⁰ nǝngɔ nɛnɛ gɔ a sʊwa ji gɔ, “Mɨ nyɔ, jǝ jo gǝn gɔ Yohana.”

⁶¹ Nǝngɔ ja sʊwa gǝn gɔ, “Mɨ nǝn nʊ nɨ wo a ja dun gɔ a mʊgɔ nanǝgam jeni.”

⁶² Nǝngɔ ja sʊwa tɛtɛ gɔ nǝn kangɨ gɔ, ga sʊwa ji kanga jǝ jam dun bwɛɨ lɛɨ.

⁶³ Nǝngɔ a bʌ ji jʊ gǝ mʊla jim dun bwɛɨ lɛ nǝnɨ, a mʊla gɔ, “Dunɔ nǝn Yohana.” Jʊgɔ a laa kwaan nǝbɨɨ.

⁶⁴ Tʌgo a kang nyiyo gǝnɔ a wumo, ben gǝnɔ a kwɨya. Nǝngɔ a tǝl sʊwatǝm kɛlɨ, bǝlá Kwaama lɛɨ.

⁶⁵ Taalɔ a ta fatǝm yɨm gǝnɔ gwam. Nǝbɔ yǝm a yem Yahudiyaɨ, ja sʊwa kɛl a dul kanjǝl nɨ a bwɨ gwamɨ.

⁶⁶ Nǝb nɨ gwam a nyʊwa jʊ nɨɨ, jǝ bʊʊla lɛ gɔ, “N wɛ bwɛ dwalɨ nɨ yǝlam lɛɨ?” Ja bʌ jʊ nɨ jʊ a bwɨɨ ja kuwo kwaan Tɛlalɔɨ gǝ na jǝbɔ gɔ.

Nafɨ Zakariyaɨ

⁶⁷ Yʊwa Kwaamaɨ a yii tɨya gɔ Zakariyaɨ, nǝngɔ a sʊwa gɔ,

⁶⁸ “Bɛ bǝ bǝlá Tɛlalɔ Kwaama nǝbɔ Israilaɨ! A bɛ sǝ ba jǝg dul nǝbam gǝnɨ.

⁶⁹ A gung bǝm nʊ nɨ ba bʊʊ lɛ nǝn bǝnɨ, jel a lɔ bwɛ jwaalɛ gǝnɔ Daudaɨ.

⁷⁰ (Kanga Kwaama a sʊwa a nyiyo nǝbkuwotǝmkǝga gǝnɔ sagsag galɨgǝnɨ).

⁷¹ Bʊʊ bʊʊ nǝn bǝn a daa nǝb kiim bǝnɔ woi jǝbɔ nǝb nɨ gwam kɔ bǝn nɛɨ,

⁷² sǝ a ji bʊnǝn tʊgalam bǝnɨ, sǝ a bʊʊla nǝn swatǝm yaa sagsag nɨ ga maa jimi.

⁷³ Nǝn gɔ wɛɛlɨgɔ a wɛɛl tɨya bǝn Ibrahim gǝmɨ:

⁷⁴ A wɛɛl gɔ gǝ jǝg bǝn jǝg a kang nǝb kiim bǝnɨ, sǝ bǝ bwang gǝm mɨ nyʊwatǝm taal wo,

⁷⁵ a gola yɨm sagsag jǝbɔ bwangtǝm Kwaamaɨ dǝngdǝng a kǝga Kwaamaɨ mɨ dɨtǝm wo.

⁷⁶ Mɔ, mʊ bʊla mɨ, jǝ jo ń jo ń gɔ nǝkuwotǝmkǝga nʊ a Laa Dʊʊlǝnɨ, nǝmɔ mʊ ja kǝga lɛ a Tɛlalɔ gǝmɨ, sǝ ń fɛka gǝm golagɨɨ,

⁷⁷ sǝ ń sʊwa nǝbam gǝnɔ kɛl bʊʊtǝm jinɔ, a gola kǝlǝmtǝm bwɨlangkɛl jinɔ gǝm.

⁷⁸ Kwaama bǝnɔ a bʊʊ nǝn bǝn nyɔ a dul gʌleng bʊnatǝm gǝnɔ gǝm. A gola bʊnatǝm gǝnɔ, nyalǝmɔ won won a dʌbʌl a gǝla a dul bǝn,

⁷⁹ sǝ a won a nǝb nɨ yǝm a kumtojilii jǝbɔ nǝb nɨ a nyiyo bwaaɨ, sǝ a yɔ nǝn bǝn a gola yɨm kwamɨgǝn.”

⁸⁰ Nǝngɔ bwɛ dwalɨ nɨ a dʊʊl a mʊgɔ kʊlɨɨ. A yɨ a mʊgɔ kuul, a bɛ nǝn a kumɔ a nʊng dul gǝnɔ a daa nǝbɔ Israilaɨ woi.