Ibranii 4 - Dadiya NT

Fǝbtǝm A Nǝb Kwaamaɨ

¹ Kanga nɨ swatǝm yaa dɔtǝm daa fǝbtǝm gǝnɔ woi, bɛ bǝ maa dʌngtǝm dangǝn, kage kaa a kʊm jen a gaa dɔtǝmɔ.

² Ja sʊwa bǝn fulon kɛl lǝmɨgɔ kanga ja sʊwa jii. Kɛl nɨ ja sʊwa ji ja maa bɔ maajɨ nǝn, jʊ a bwɨɨ, nǝbɔ a nyʊwaɨ ja kɔ nǝtǝm bɨlǝngkɛl nǝn jʊ ja nyʊwaɨ.

³ Bǝn nɨ bǝ nǝ bɨlǝngkɛlɨ, bǝ dɔ dɔ daa fǝbtǝm nɨɨ. A nǝb nɨ a nǝ bɔ bɨlǝngkɛlɨ a sʊwa gɔ, “Nǝngɔ mǝ wɛɛl wɛɛlɨ a nabwɨl mǝndɨ, mǝ sʊwa mǝʊ, ‘Mɨsɔ jǝ dɔ daa fǝbtǝm mǝndɨ lɛ wo dǝm.’ ” Makajǝng Kwaamaɨ a dɨ dɨɨ a tǝltǝm yooligɔ gǝm sul, ja dɔ bɔ daa fǝbtǝmɔ.

⁴ Jʊ a bwɨ bǝ nyǝm nyɨɨ, a sʊwa kɛl a kaa daa a mʊlalɨ langǝn bwangǝn Kwaamaɨ a dul kum na nʌbʌlɔ gǝm gɔ, “A kum na nʌbʌl Kwaama a fǝb a makajǝng gǝnɔ gǝm a maa gwamɨ.”

⁵ A daa nɨ tag a sʊwa gɔ, “Mɨsɔ jǝ dɔ daa fǝbtǝm mǝndɨ lɛ wo dǝm.”

⁶ Jʊ nɨ gǝ nʊng gɔ, jǝ nǝb nɨ ja tǝl sʊwatǝm jinɔ fulon kɛl lǝmɨgɨɨ, ja gaa dɔtǝmɔ, jʊ a bwɨɨ ja maa bǝngɨ lɔl. Kǝngkǝnɨ tangǝn golagɔ wo, kaamɨ jǝ dɔ dɔ.

⁷ Nǝngɔ tag a yǝla a ya kaa kumi, a jo gɔ, “Dwiyen.” Joltɨnɔ a gǝlala a shui, a sʊwa kɛl a nyiyo Daudaɨ kanga ja kwɛl ja sʊwa gɔ, “Dwiyen, na jǝ́ nyʊwa diil gǝnɨ, ka jǝ́ maa lɛ bǝngɨ lɔl.”

⁸ Na na Joshuwa a yɔ nǝn ji a mʊgɔ daa fǝbtǝm Kwaamaɨ, na Kwaama mɨsɔ sʊwa kɛl lɛ a kǝga nɨ a dul kaa di.

⁹ N dul kɛl nɨ a nʊng gɔ kǝngkɔ kaa tangǝn Kum Fǝbtǝm nǝb Kwaamaɨ wo, kanga Kwaama a fǝb a kum na nʌbʌli.

¹⁰ Jʊ a bwɨɨ nʊ nɨ a dɔ daa fǝbtǝm Kwaamaɨ, a fǝb a makajǝng gǝnɔ gǝm, kanga Kwaama a fǝb a gǝnɔ gǝmɨ.

¹¹ Bɛ bǝ maa kwaan dɔtǝm daa fǝbtǝm nɨ, kage kaa nǝl a gaa dɔtǝmɔ a dul bǝngɨ lɔl kanga tʊgalam bǝnɔ a maamɨ.

¹² Kɛl Kwaamaɨ nǝn kʊlɨ, maa maajɨ lɛ dangǝn. A laa tɔɔgɔ nyiyogɔ yoi jalǝng. Gǝ dɔ dɔ kʊlɨ jǝbɔ mʊgɔ nǝl, jǝbɔ kuto a yɔ nǝn a mʊgɔ fiim. Gǝ nʊng nʊng bʊʊlalɨ nǝlɨ jǝbɔ jʊ swɨ lɛɨ.

¹³ Mɨ kaa jǝ fwaltǝm nɨ wo wuu Kwaama gǝm lɛɨ. Kanjǝlɔ gwam gǝ na a talɨ. Ja mɨɨl gǝn a nu nʊ nɨ bǝ kiyo jʊ lɛ bǝ maaɨ a kǝga gǝnɨ.

Yesu N Gʌleng Dalɨ Nǝkǝla

¹⁴ Kanga bǝ nǝngǝn nǝn gʌleng dalɨ nǝkǝla wʊnɨ a shu a dʌbʌli, nǝn gɔ nǝn Yesu Bʊla Kwaamaɨ, bɛ bǝ tɨ a dul jʊ bǝ nǝ bɨlǝngkɛl nǝnɨ.

¹⁵ Dalɨ nǝkǝla nɨ bǝ nǝngǝnɨ, n ke bɔ nʊ nɨ mɨ ji bʊnǝn bǝnɔ lɛ a gɨyatǝm bǝnɔ gǝmɨ. Mɨ nyɔ. N nʊ ja tɛl gǝn a golantɨnɔ gǝm gwam kanga jǝ tɛl bǝn nɛɨ, a gǝnɔ a maa bɔ bwɨlangkɛl.

¹⁶ A dul kɛl nɨɨ, bɛ bǝ bɛ nǝn dɔɔm a kotere fɔlɔn lǝma Kwaamaɨ, nǝn kwaan bʊtɔ, sǝ a ji bʊnǝn bǝnɔ, sǝ a maa bǝm lǝma nɨ tɨka bǝn nɛɨ a kwama nɨ bǝ saa tɨkalɨ lɛɨ.