Ibranii 3 - Dadiya NT

Yesu A Laa Musa Dʊʊn

¹ A dul kɛl nɨ, kɛtǝlam sagsag, jen nɨ jǝ́ mʊrka dul jǝbɔ mǝ a jotǝm Kwaamaɨ, jǝ́ ya bʊʊlalɨ jenɔ win a daa Yesu woi, bwɛ twama jǝbɔ dalɨ nǝkǝla na nǝtǝm bɨlǝngkɛl nɨ bǝ yoi.

² Gǝ nɨ n nǝ tatǝm swatǝm yaa a nʊ nɨ a ya gǝnɨ, kanga Musa a ta swatǝm yaa Kwaamaɨ a nǝb gǝnɔ gǝm gwamɨ.

³ A kuwo Yesu a daa tʌgo a bǝlátǝm a laa Musa a kʊta, kanga nǝ mɔtǝm lɔngɔ a laa lɔngɔ bʊmǝnɨ.

⁴ Gwam lɔtɨnɔ nǝn nǝbɔ a mɔba ji. Nǝ mɔtǝm kanjǝlɔ gwam nǝn Kwaama.

⁵ Musa n nǝ tatǝm swatǝm yaa na bwɛ jwaalɛ a mʊgɔ lɔ Kwaamaɨ gwam. N nǝ nǝtǝm nyiyo a dul jʊtǝb nɨ jǝ sʊwa kɛl jinɔ lɛ a kǝgaɨ.

⁶ A Kiristii n nǝ yiitǝm swatǝm yaa, n bwɛ fɔlɔn a mʊgɔ lɔ Kwaamaɨ. Bǝn bǝ lɔ gɔ, na bǝ tɨɨ nǝn kwaan, bǝ dem bɔ yatǝm nǝlɨ.

Gʊtǝm Lɔl A Dul Kɔtǝm Daa Fǝbtǝm Kwaamaɨ

⁷ N dul kɛl nɨ, kanga Yʊwa Kwaamaɨ a sʊwa gɔ, “Dwiyen na jǝ́ nyʊwa diil gǝnɨ,

⁸ ka jǝ́ maa lɛ bǝngɨ lɔl, kanga jǝ́ maam nǝn kwama jǝ́ kɔm bwangtǝm diil Kwaamaɨ, a kwama tɛltǝm a mʊgɔ kuuli.

⁹ Tʊgalam jenɔ a maa mɨ tɛltǝm jolɔ fʊltǝnaal, jǝ kuwo maajɨ mǝndɨ.

¹⁰ N dul kɛl nɨ mǝ maa nabwɨl jǝbɔ kal gɨɨ, mǝ sʊwa mǝʊ, ‘Kwangkwang nǝl jinɔ a tangǝm tangǝmɨ, ja nyǝm bɔ golantɨn mǝndɨ.’

¹¹ Nǝngɔ mǝ wɛɛl wɛɛlɨ nǝn nabwɨl mǝ sʊwa mǝʊ, ‘Mɨsɔ jǝ dɔ daa fǝbtǝm mǝndɨ lɛ wo, dǝm.’ ”

¹² Kambɔ, bɛ jǝ́ nyǝm kage bwɨlang bʊʊlalɨ jǝbɔ nǝl nɨ a nǝ bɔ bɨlǝngkɛlɨ a yǝlam nǝn kaa nǝl a kʊm jen a daa Kwaama kʊlɨ woi.

¹³ Ya jǝ́ kʊʊka nǝl lɛ kwangkwang, kanga kaa kwama wo jǝ jo lɛ gɔ, “Dwiyeni,” kage bwɨlangkɛlɔ a swag kaam jenɔ ja maa bǝngɨ lɔl.

¹⁴ Bǝ yǝlam nǝb mʊrkatǝm dul jǝbɔ Kiristi, na bǝ tɨ nǝn kwaan a yotǝm nɨ bǝ maa nǝn tɨkǝgaɨ, a yɔ nǝn a dɨltǝmɨ.

¹⁵ Kanga ja sʊwa gɔ, “Dwiyen na jǝ́ nyʊwa diil gǝnɨ, ka jǝ́ maa lɛ bǝngɨ lɔl, kanga jǝ́ maam nǝn kwama jǝ́ kɔm bwangtǝm diil Kwaamaɨ.”

¹⁶ Na bǝ wo a nyʊwa a maa bǝngɨ lɔlɨ? N ke bɔ nǝbɔ a jel a tǝm Masarɨ, wʊnɨ Musa a bwangtǝn nǝn jii ka?

¹⁷ A maa nabwɨl jǝbɔ wo jolɔ fʊltǝnaalɨ? N ke bɔ jǝbɔ nǝbɔ a maa bwɨlangkɛlɨ ka? N ke bɔ jǝbɔ nǝb nɨ bʌlʌn jinɔ a tǝla a kuuli ka?

¹⁸ A wɛɛlǝm bǝ wo tag gɔ, mɨsɔ jǝ dɔ daa fǝbtǝm gǝnɔ lɛɨ? N ke bɔ jǝbɔ nǝb bǝngɨ lɔl nɨ ka?

¹⁹ Nǝngɔ bǝ kuwo bǝngɔ n kɔtǝm nǝtǝm bɨlǝngkɛl jinɔ ja gaa dɔtǝmɨ.