Ibranii 11 - Dadiya NT

Nǝtǝm Bɨlǝngkɛl

¹ Nǝtǝm bɨlǝngkɛlɔ nǝn gɔ jʊ nɨ bǝ ya nǝl tʌgo a dul gǝn mɨ nyǝmatǝm woi. Nǝn gɔ n jǝlatǝm nǝn jʊ nɨ bǝ kuwo bɨɨ.

² N gola nǝtǝm bɨlǝngkɛl tʊgalam bǝnɔ a nya jǝlatǝm Kwaamaɨ.

³ N gola nǝtǝm bɨlǝngkɛl bǝ nyǝm gɔ n sʊwatǝm kɛl nǝn nyiyo Kwaama a fwal yooligɨɨ. Bǝ nyǝm tag Kwaama a fwal kanjǝl nɨ bǝ kuwo lɛɨ, a mʊgɔ kanjǝl nɨ mɨ bǝ kuwo lɛɨ.

⁴ N gola nǝtǝm bɨlǝngkɛl Habila a tǝla Kwaama gǝm twama a laa a Kayinui bʊmǝnɨ. N gola nǝtǝm bɨlǝngkɛl a nya jǝlatǝm Kwaamaɨ gɔ, gǝ nǝ dǝngdǝngɨ, jʊ a bwɨɨ Kwaama a jǝla nǝn gɔ, a yo tǝlatǝm twama gǝnɨ. Habila a bʊla bʊlaɨ, n gola nǝtǝm bɨlǝngkɛl gǝn sʊwa kɛl lɛ ba la nǝn a kɔkɔ dwiyeni.

⁵ N gola nǝtǝm bɨlǝngkɛl Kwaama a do Anuhu a dʌbʌl nǝn kʊlɨɨ, a kuwo bɔ bwaagɔ. Ja nya gǝn bɔ, jʊ a bwɨɨ nǝn Kwaama a do gǝnɨ. Nǝn kwama Kwaama a lǝga bɔ a do gǝnɨ, ja nǝ nyiyo gɔ fulo Kwaama gǝm nǝl lɛ.

⁶ Na ke bɔ gola nǝtǝm bɨlǝngkɛlɨ, mɨsɔ nǝfili fulo Kwaama gǝm nǝl lɛ. Jʊ a bwɨɨ nʊ nɨ swɨ lɛ a bɛ nǝn dɔɔm a daagɔ Kwaama woi, bɛ ga nǝ bɨlǝngkɛl gɔ Kwaama wo, bɛ ga nǝ bɨlǝngkɛl gɔ Kwaama tal tal bwili a nǝb nɨ saa gǝn nɛɨ.

⁷ N gola nǝtǝm bɨlǝngkɛl Nuhui, nǝn kwama nɨ Kwaama a gʊ gǝm lɔl a dul kanjǝl nɨ ja kuwo bɔ dɨnɨ, nyʊwa taal Kwaamaɨ lɛ. Nǝngɔ a swiyo gʌleng tɨyamwɛngɔ sǝ a bʊʊ nǝn nǝbɔ lɔ gɨɨ. N gola nǝtǝm bɨlǝngkɛl tag a nʊng yooligɔ bwɨlangkɛl gǝnɨ, a yǝlam nǝ dǝngdǝng a kǝga Kwaamaɨ wʊnɨ nyatǝm gǝnɔ gǝ na a gola nǝtǝm bɨlǝngkɛlɨ.

⁸ N gola nǝtǝm bɨlǝngkɛl, Ibrahim a maa shigtǝm dul nǝn kwama ja jo gǝn gɔ a jel a tǝm gǝnɨ sǝ ga shu a kaa tǝm wʊnɨ gǝ yo kʊla gǝnɔ lɛɨ. Nǝngɔ a jeli, a nyǝm bɔ daagɔ yilom woi.

⁹ N gola nǝtǝm bɨlǝngkɛl tag a maa faabǝn a tǝm nɨ ja swam gǝm yaaɨ a maa na tǝm Bʌtʌbi. Gǝ yɨ a mʊgɔ gushitɨn. N kanga Ishaku jǝbɔ Yakubu a maam tʌjii, nǝbɔ Kwaama a maa jim swatǝm yaa nɨ nyɔ dakini.

¹⁰ Yam tuulɔ nɨ lɛ wʊnɨ nǝn fʌlʌmi, wʊnɨ nǝ sʊwatǝm gǝnɔ jǝbɔ nǝ mɔtǝm gǝnɔ nǝn Kwaamaɨ.

¹¹ N gola nǝtǝm bɨlǝngkɛl Saratu nǝn dul gǝn a nya kwaan dotǝm fʌl nǝn kwama nɨ ga shu kwaan dotǝm fʌli. A kwɛl a jǝla gɔ nʊ nɨ a maa gǝm swatǝm yaa nɨɨ n nǝ yiitǝm swatǝm yaa.

¹² A gola nǝfili win, wʊnɨ nǝn galɨgǝn gǝ jǝbɔ bʌlʌnɔ jǝ wini, a fwal dʊʊmɔ a lada nyɔ na nyanyamɨtɨnɨ a kwama, a maa na swiyoti tag a kʌng wɨmaɨ.

¹³ Nǝb nɨ gwam a bʊla a mʊgɔ nǝtǝm bɨlǝngkɛl jin. Ja nya bɔ kanjǝl nɨ ja maa jim swatǝm yaaɨ. Ja kuwo a daa kʊtangɨ, nǝngɔ ja maa fulotǝm nǝl nǝn kuwotǝm jini. Ja jǝla gɔ jǝ faabǝm, jǝ Bʌtʌb a yooli.

¹⁴ Nǝb nɨ sʊwa kɛl nɨ lɛ nyɨɨ, ja nʊng a talɨ, jǝ saa kaa tǝm nɨ na a jii.

¹⁵ Na na jǝ maa gom tǝm leni lɛ ja bǝlaɨ, na jǝ nya nya gola yǝlatǝm wo.

¹⁶ Jǝ ya nǝl lɛ a kaa tǝm nɨ a laa bʊmǝnɨ. Nǝn gɔ nʊ nɨ a dʌbʌl kwamaɨ. A dul kɛl nɨ, Kwaama mɨ nyʊwa gunidul lɛ ja jo gǝn gɔ Kwaama jin, jʊ a bwɨɨ, a fɛka jim tuulɔ.

¹⁷ N gola nǝtǝm bɨlǝngkɛl Ibrahimi, nǝn kwama Kwaama a tɛl gǝn gɔ a twɨ yulʌn nǝn bʊla gɔ Ishakui, Ibrahim n nʊ nɨ a ta swatǝm yaa nɨɨ. A maa fɛkalɨ twɨtǝm bʊla gɨɨ nɨ win swarɨ.

¹⁸ Wʊnɨ a dul gǝn Kwaama a sʊwa gɔ, “N gola Ishakui jǝ kiyo dʊʊm mʊnɔ lɛɨ.”

¹⁹ Ibrahim a jǝla nǝn gɔ Kwaama nǝn kwaan gung gung nǝl a bwaa. Bǝ sʊwa sʊwa bǝngɔ a yǝla a yo Ishaku a bwaa.

²⁰ N gola nǝtǝm bɨlǝngkɛl, Ishaku a dǝg Yakubu jǝbɔ Isuwa gǝm bwili a kanjǝl nɨ bɛ lɛɨ.

²¹ N gola nǝtǝm bɨlǝngkɛl Yakubui, nǝn kwama a nyiyo bwaaɨ, a dǝg bɛtɔ lɔ Yusufui gǝm bwili pʌd yoi. A li a dwam gǝnɔ gǝm, a bǝlá Kwaamaɨ.

²² N gola nǝtǝm bɨlǝngkɛl, Yusufu nǝn kwama nɨ kum bwaa gǝnɔ a dwamaɨ, a sʊwa kɛl futǝm nǝbɔ Israilaɨ. A kiyo jim fʌl gǝnɔ kanga jǝ fʌlʌm kuto gǝnɔ lɛɨ.

²³ N gola nǝtǝm bɨlǝngkɛl nǝn kwama ja bʌm Musaɨ, tɛtǝlam gǝnɔ a yʊ gǝn bwaala taal, jʊ a bwɨɨ ja kuwo gǝn a bʊm a shu kwaan. Ja nyʊwa bɔ taal diil fɔlɔgɨɨ.

²⁴ N gola nǝtǝm bɨlǝngkɛl Musaɨ, nǝn kwama a dʊʊlǝmɨ, a jǝla bɔ ja jo gǝn gɔ gǝ nǝn bʊla bwɛnɔɔlɨ Firaunaɨ.

²⁵ A kuwo a laa gǝm jǝl gǝ nɔɔ gaalan jǝbɔ nǝbam Kwaamaɨ a dul lǝma bwɨlangkɛl nɨ mɨsɔ tɨm dɨtǝm lɛɨ.

²⁶ A jǝla gɔ gaalanɔ a dul Kiristii, n jǝ shilo a daa gǝ woi, a laa shilogɔ a tǝm Masarɨ. A ya nu gǝnɔ a jʊ gǝ nya lɛɨ.

²⁷ N gola nǝtǝm bɨlǝngkɛl a bǝla Masarɨ, a nyʊwa bɔ taal nabwɨl fɔlɔgɨɨ. A bwa nǝl maamɔ a kuwo nʊ nɨ mɨ jǝ kuwo lɛɨ.

²⁸ N gola nǝtǝm bɨlǝngkɛl a kɨla Dikulom Yabtǝmɔ, a wata tʊʊm yʊwalɔ a nyanga kanɨ, kage nʊ nɨ jʌbo bɛtɔ tɨkǝgagɔ lɛɨ a ke nǝbɔ Israilaɨ.

²⁹ N gola nǝtǝm bɨlǝngkɛl ja yab Wɨma Feligɔ na tǝm kʊshɨɨ. Nǝn kwama nɨ nǝbɔ Masarɨ a swɨ maatǝm nyɨɨ, nǝngɔ mwɛmɔ a fʌl jii.

³⁰ N gola nǝtǝm bɨlǝngkɛl kwalɨ Yerikogɔ a kʌboi, nǝn kwama ja kɛlam gǝn kumɔ nʌbʌli.

³¹ N gola nǝtǝm bɨlǝngkɛl, Rahab nɔɔlɨ bulon nɨ ja jʌ gǝn bɨɨ, jʊ a bwɨɨ a yo nǝb jatɔl nɨ na fatǝm. Ja jʌbo nǝb nɨ a maa Kwaama gǝm bǝngɨ lɔlɨ.

³² N wɛ mǝ sʊwa lɛ tagɨ? Kwamagɔ shu i shu i a nǝtǝm fulon bǝ Gidiyoni, jǝbɔ Barak, jǝbɔ Samson, jǝbɔ Yefta, jǝbɔ Dauda, jǝbɔ Samaila jǝbɔ tangǝn nǝbkuwotǝmkǝgagɔ.

³³ Nǝb nɨ n gola nǝtǝm bɨlǝngkɛl ja ja lɔ fɔlɔntɨnɔ, ja maa jʊ nɨ dǝngdǝngɨ, ja nya yiitǝm swatǝm yaaɨ, ja nʊngǝm nyiyo tulʌmtɨnɨ.

³⁴ Nǝb nɨ n gola nǝtǝm bɨlǝngkɛl tag ja dum ben kǝlaɨ, ja bʊʊ jatǝm nyiyo gulʌni, jǝ nǝb nɨ mɨ ji nǝn kwaanɨ ja yǝlam nǝb kwaan, jǝ nǝb tatǝm kun, ja kaa kaam nǝb tatǝm kun tuulɔtɨnɔ.

³⁵ Ja yǝla ja nǝ kaam nɔɔtǝmɔ batǝlam jinɔ nɨ a bʊlalaɨ wʊnɨ ja gung ji nǝn kʊlɨ tagɨ. Kaam nǝbɔ ja nǝ ji gaalan nɨ a yǝlam jim bwaaɨ, ja kɔ kanatǝm nǝtǝm bɨlǝngkɛl jinɔ sǝ ja jǝg ji, jʊ a bwɨɨ sǝ ja nya guntǝm nyan a bwaa.

³⁶ Kaamɨ a nya mogtǝm jǝbɔ banjangɨ, ja bwa ji ja mal a lɔsomi.

³⁷ Ja jʌbo ji nǝn tɛl. Ja mwata ji yo. Ja jʌbo ji nǝn gulʌn. Jǝ bola nǝn tɛ kwamɨtɨn jǝbɔ tɛ bɨntɨn. Jǝ yɨ yɨm bʊnǝn, jǝbɔ gʌtǝm jǝbɔ nyʊwatǝm gaalan.

³⁸ Yooligɔ n ke bɔ daa yɨm jin. Jǝ bola a kwaran jǝbɔ yemtɨn. Jǝ daa a mʊgɔ gaatɛ jǝbɔ bʊwantɨn.

³⁹ Nǝb nɨ gwam, Kwaama a yo ji a nǝtǝm bɨlǝngkɛl jinɔ gǝm sul, mɨ nʊ nɨ wo a yo yiitǝm swatǝm yaagɨɨ.

⁴⁰ Jʊ a bwɨɨ Kwaama a fɛka bǝm kaa jʊ nɨ a bʊm bʊmɨ. Jǝ yii yii nyɔ na bǝ dakini bǝnɔ jii.