Ibranii 1 - Dadiya NT

Kwaama A Sʊwa Kɛl A Daa Bʊla Gɔ Woi

¹ Nǝn galɨgǝn, Kwaama a sʊwa tʊgam tʊgalam bǝnɨ kɛl naagɔ a gǝlala, a golantɨnɔ gǝm a lada nǝn dʌmʌn a nyiyo nǝbkuwotǝmkǝgagɨɨ.

² A kumtɨn dɨltǝmɔ gǝmɨ, nǝngɔ a sʊwa bǝn kɛl a daagɔ Bʊla gǝ woi, wʊnɨ a ya gǝn nǝn gɔ nǝ kʊla kanjǝlɔ gwamɨ, wʊnɨ n daa gǝ woi a fwal yooligɨɨ.

³ Bwɛ nǝn gɔ nyalǝm dʊʊlǝn Kwaamaɨ, n jelkalǝng gǝn dangǝn, nǝn gɔ a ta kanjǝlɔ gwam nǝn kwaan sʊwatǝm gǝnɨ. A saalǝm bwɨlangkɛl bǝnɨ, nǝngɔ a yɨ a kang jajǝng Nǝ dʊʊgɨɨ a fɔlɔn dʌbʌli.

Yesu A Laa Bɛtɔ Twama Kwaamaɨ Dʊʊn

⁴ N gola nɨ a laam bɛtɔ twama Kwaamaɨ dʊʊnɨ, kanga dun gǝnɔ ja nǝ gǝnɨ a kʊta a laa a jini.

⁵ Nuwo a mʊgɔ bɛtɔ twama Kwaamaɨ, Kwaama a sʊwa gǝn wo gɔ, “Mɔ nǝn bʊla mɨɨ, dwiyen n yǝlam Tɛtɛ mʊɨ”? A yǝla a sʊwa wo tag gɔ, “N yǝlam Tɛtɛ mɔ, mɔ tǝmʊn ń yǝlam Bʊla mɨɨ”?

⁶ Nǝn kwama Kwaama a bɛ nǝn bwɛ tɨkǝga gǝnɔ a yooli nɨɨ, nǝngɔ a sʊwa tag gɔ, “Gwam bɛtɔ twama Kwaamaɨ bɛ ja maa gǝm bǝlátǝm.”

⁷ Kwaama a sʊwa kɛl a dul bɛtɔ twama gǝnɨ gɔ, “N fʌto bɛtɔ twama mɨ a yǝlam yʊwatɨn. N fʌto bɛtɔ twama mɨ a yǝlam ben kǝlatɨn.”

⁸ A dul Bwɛɨ, nǝngɔ a sʊwa gɔ, “Kwaama, kotere fɔlɔn mʊnɔ tɨ tɨ mɨ dɨtǝm wo. Dwam fɔlɔn mʊnɔ n dǝngdǝng dangǝn.

⁹ Ń swɨ maajɨ nɨ dǝngdǝngɨ, ń kɔ bwɨlang maajɨgɔ. A dul kɛl nɨ, Kwaama, Kwaama mʊnɔ a ya mʊn nwangɔ, nǝn gɔ a nǝ ń dʊʊn a dul katǝlam mʊnɨ.”

¹⁰ A sʊwa tag gɔ, “Mɔ, Tɛlalɔ, nǝmɔ mʊ swa fʌlʌm yooligɔ a tǝltǝmɔ gǝmɨ. Dʌbʌltɨnɔ n maajɨ kang mʊn.

¹¹ Jǝ kala kala, a mʊnɔ, mɨsɔ mʊ dɨ lɛ wo. Gwam jǝ gʌlo gʌlo na dwang.

¹² Mʊ kʊlʊm ji kʊlʊm na dwang kwabtǝm. Jǝ fʌto fʌto tag na dwang dʊʊl. A mʊnɔ mɨsɔ mʊ fʌto lɛ wo. Joltɨn mʊnɔ mɨsɔ dɨ lɛ wo.”

¹³ A kʊm bɛtɔ twama Kwaamaɨ, nuwo Kwaama a sʊwa wo gɔ, “Yɨ fɔ a kang jajǝng mɨ, ba la nǝn kwama nɨ mǝ dǝg nǝb kiim mʊnɔ lɛ ja yǝlam daa fatǝm naa mʊnɨ”?

¹⁴ N ke bɔ bɛtɔ twama Kwaamaɨ gwam n nǝb maajɨ yʊwa wʊnɨ Kwaama gǝ twam lɛ sǝ ja maa nǝbɔ gǝm nya bʊʊlɨ lɛɨ gǝm maajɨɨ ka?