سٜڢَنِيَ 1 - دٜڢْتٜرٜ اَللَّه ڢُلْڢُلْدٜ عَدَمَوَ

ࢩَلَادٜ تِکّٜرٜ جَوْمِرَاوٛ

¹ جَوْمِرَاوٛ وٛلْوَنِ سٜڢَنِيَ ࢡِي کُسِ ࢡِي غٜدَلِيَ ࢡِي عَمَرِيَ ࢡِي حٜزٜکِيَ، ندٜرْ زَمَنُ يُسِيَ ࢡِي عَمٛنْ، لَامِيطٛ يَحُودَ، وِعِ‏:

² «مِنَتِّنَنْ کٛ وٛنِ دٛوْ لٜسْدِ ڢُو؞

³ مِنَتِّنَنْ يِمْࢡٜ عٜ دَبَّاجِ، مِنَتِّنَنْ شٛلِّ نٛنْ بٛو لِطِّ ندٜرْ مَايٛ؞ مِنَتِّنَنْ حَلُّࢡٜ عٜ کٛ ڢٜرْغَتَ ࢡٜ، مِنَتِّنَنْ بٛو يِمْࢡٜ دٛوْ لٜسْدِ؞

⁴ مِڢٛرْتَنْ جُنغٛ عَمْ نغَمْ حٛنُغٛ يَحُودَ عٜ جٛوطِيࢡٜ حَا عُرُسَلِيمَ؞ مِنَتِّنَنْ لُتُّطُمْ دِينَ بَعَلْ حَا نٛکُّورٜ ندٜعٜ، مِحَلْکَنْ عِنْطٜ لِمَنْعٜنْ لَوْرُ ندُعُ؞

⁵ مِحَلْکَنْ وَعّٛتٛوࢡٜ دٛوْ سٛورٛوٛلْ نغَمْ سُجِدَنْغٛ جَيْلِ عَسَمَنْجِ عٜ سُجِدَنٛوࢡٜ حُنٛرْتٛوࢡٜ ندٜغٛ بٜى عِنْدٜ جَوْمِرَاوٛ عٜ ندٜغٛ بٛو بٜى عِنْدٜ لَوْرُ مِلْکٛمْ؞

⁶ مِحَلْکَنْ لٛرِيࢡٜ، عَشُّࢡٜ يَمْ، نغَمْ ࢡٜنغِطَا طَکّٛتِرْغٛ بٜى عَمْ، ࢡٜنغِطَا سَرْوَاغٛ يَمْ سَمْ؞»

⁷ شِرْوٜ يٜىٰسٛ جَوْمِرَاوٛ اَللَّه‏! نغَمْ ࢩَلَادٜ مَاکٛ ࢡَدِتَکٜ؞ عٛتَاسْکِتِنِ کِرْسٜتٜىٰنغَ، عٛسٜنِ عٜوْنَاࢡٜ مَاکٛ؞

⁸ جَوْمِرَاوٛ وِعِ‏: «ࢩَلَادٜ ندٜ لِيعٛتٛومِ کِرْسٜتٜىٰنغَ، مِحِيتٛتٛ سَرَاکِعٜنْ عٜ يٜرِمَعٜنْ عٜ ࢡٛرْنِيࢡٜ لِمْشٜ جَنَنّٜ ڢُو؞

⁹ ࢩَلَادٜ مَنْ کِيتٛتٛومِ دِوَنْࢡٜ لٜسْ دَمُّغَلْ، حٜبِّنَنْࢡٜ سَارٜ جَاغٛرْطٛ مُوطُمْعٜنْ بٜى کُوجٜ تٛوࢩَارٜ عٜ رِکِشِ؞»

¹⁰ جَوْمِرَاوٛ وِعِ‏: «ࢩَلَادٜ مَنْ غٛوکَالِ مبَطَنْ حَا دَمُّغَلْ بِعٜتٜىٰنغَلْ دَمُّغَلْ لِطِّ عٜ بٛجِّ حَا ڢَتُّدٜ حٜسْرٜ عٜ حَرَکَ دٛوْ تٛوْندِيجٜ؞

¹¹ مبٛيٜ، عٛنٛنْ جٛوطِيࢡٜ ڢَتُّدٜ لٜىٰسْندٜ نغَمْ ڢِلٛوࢡٜ مَجِّ، عَوْنٛوࢡٜ شَرْدِ نَتِّدِ؞

¹² «سَاعِ مَنْ مبِطِتِتّٛومِ عُرُسَلِيمَ بٜى ݠِتِّرْلَاجِ، مِحِيتٛ مبَاتٜىٰندَمْعٜنْ حٛولْطِنِيࢡٜ؞ کَمْࢡٜ ࢡٜطٛنْ مبِعَ حَا ࢡٜرْطٜ مَࢡّٜ‏: جَوْمِرَاوٛ وَطَتَا کٛ وٛوطِ مَلَّ کٛ حَلِّ‏!

¹³ وٛطْࢡٜ نجَࢡْتَنْ جَوْدِ مَࢡّٜ، مبِلَنْ شُوطِ مَࢡّٜ؞ ندٜنْ ࢡٜࢩِࢡْتٛتٛ شُوطِ، عَمَّا ࢡٜنجٛوطَتَاکٛ تٛنْ؞ ࢡٜنجُبٛتٛ عِنَبٛوجٜ، عَمَّا ࢡٜنجَرَتَا عِنَبٛوجَمْ مَاجٜ؞»

¹⁴ ࢩَلَادٜ جَوْمِرَاوٛ مَوْندٜ ࢡَدِتَکٜ، طٛنْ وَرَ بٜى جَاوْطُمْ؞ تٛ حٛولٛ مَارٜ وَطِ، کٛو عَنْدُطٛ کٛنُ بٛو وٛوکَنْ؞

¹⁵ ندٜ لَاتٛتٛ ࢩَلَادٜ تِکّٜرٜ، ࢩَلَادٜ ࢡِلَّارٜ عٜ بٛنٜ، ࢩَلَادٜ بٛنّٛنْدَ عٜ بٛنُّکِ، ࢩَلَادٜ ࢩِࢡْرٜ عٜ ࢩِࢡُّکِ، ࢩَلَادٜ دُولٜ عٜ ࢩِࢡْرٜ ࢡَلٜىٰرٜ کُرُمْ،

¹⁶ ࢩَلَادٜ لُوَلْ کٛنُ عٜ حٛولٛ دٛوْ بٜرْنِيجِ شٜمْبِطِّ عٜ کِسْرُطٜ تٛوْطٜ؞

¹⁷ جَوْمِرَاوٛ وِعِ‏: «مِحُلْنَنْ يِمْࢡٜ حَا ࢡٜنجَحَ بَنَ وُمْࢡٜ، نغَمْ ࢡٜمبَطِ حَکّٜ دٛوْ عَمْ؞ ࢨِيࢨَمْ مَࢡّٜ وَانجٜتٜ کٛو تٛيْ بَنَ مبُلْوُلْدِ، تٜتٜکِ مَࢡّٜ بٛو بَنَ مبُووْرِ؞»

¹⁸ شَرْدِ مَࢡّٜ عٜ کَنغّٜىٰرِ مَࢡّٜ کِسْنَتَا ࢡٜ ࢩَلَادٜ ندٜ تِکّٜرٜ جَوْمِرَاوٛ وَنغَتَ، ندٜ يِيتٜ کَاجَلْ مَاکٛ ࢩَامَتَ دُنِيَارُ؞ نغَمْ عٛتِمِّنَنْ يِمْࢡٜ لٜسْدِ، لَوْ عٛتِمِّنْتَ ࢡٜ؞ طُمْ لَاتٛتٛ کُلْنِيطُمْ مَسِنْ‏!