جٜکَرِيَ 1 - دٜڢْتٜرٜ اَللَّه ڢُلْڢُلْدٜ عَدَمَوَ

عٜوْنَاندُ نغَمْ تُوبُ

¹ ندٜرْ ندُوࢡُ دَرِيُسْ لَامِيطٛ ݠٜرْسِيَ طِطَࢡُ، ندٜرْ لٜوْرُ جٛوٜىٰتَتَࢡْرُ، جَوْمِرَاوٛ وٛلْوَنِ اَلنَّبِي زَکَرِيَا ࢡِي بٜرٜکِيَ، تَانِرَاوٛ عِدّٛ نِعِ‏:

² «مِنْ جَوْمِرَاوٛ مِتِکَّنِ کَاکِرَاࢡٜ مٛوطٛنْ مَسِنْ؞

³ وِعْ ࢡٜ، ندَا کٛ جَوْمِرَاوٛ حٛنٛوࢡٜ عَسَمَ وِعِ‏: لٛرْتٜ حَا عَمْ، ندٜنْ مِنْ بٛو مِلٛرْتٛتٛ حَا مٛوطٛنْ؞

⁴ تَا لَاتٜ بَنَ کَاکِرَاࢡٜ مٛنْ؞ اَلنَّبِعٜنْ ࢡٛويْمَ نغٛويْنَنِ ࢡٜ‏: ندَا نِي جَوْمِرَاوٛ حٛنٛوࢡٜ عَسَمَ وِعِ‏: لٛرْتٜ عٜ لَابِ مٛوطٛنْ کَلُّطِ، تُوبٜ، عَشّٜ کُوطٜ مٛوطٛنْ کَلُّطٜ‏! عَمَّا ࢡٜنَنَايْ، ࢡٜکَکِّلَنَايْ وٛلْدٜ عَمْ؞

⁵ تٛيْ کَاکِرَاࢡٜ مٛوطٛنْ؟ اَلنَّبِعٜنْ بٛو طٛنْ نغٜىٰطَ حَا ڢٛرٛيْ نَ؟

⁶ عَمَّا مِعُکَّنِ کَاکِرَاࢡٜ مٛوطٛنْ نَالٛوجٜ ڢٛدّٜ بٛلّٜ عَمْ عٜ ڢَرِلَّاجِ عَمْ طُمْ عُمْرُمِ سُکَاࢡٜ عَمْ اَلنَّبِعٜنْ؞ ندٜنْ ࢡٜلٛرْتِ، ࢡٜمبِعِ‏: جَوْمِرَاوٛ حٛنٛوࢡٜ عَسَمَ عَنِّنِنٛ وَطُغٛ مِنْ ڢٛدّٜ لَابِ عَمِنْ عٜ کُوطٜ عَمِنْ، نٛنْ عٛوَطِ بٛو؞»

حَالَ ݠُشِّ

⁷ ࢩَلَادٜ نٛوغَسْ عٜ نَيَࢡْرٜ ندٜرْ لٜوْرُ سَݠّٛ عٜ غٛعٛورُ، وَاتٛ لٜوْرُ سٜبَتْ، ندٜرْ ندُوࢡُ دَرِيُسْ طِطَࢡُ دٛوْ لَامُ، جَوْمِرَاوٛ وٛلْوَنِ اَلنَّبِي زَکَرِيَا ࢡِي بٜرٜکِيَ، تَانِرَاوٛ عِدّٛ بَنَ نِعِ‏:

⁸ حَنغْکِ نغِعْمِ کَيْطِنِيطُمْ‏: غٛطّٛ بَعِّيطٛ ݠُشُّ مبٛطٜىٰوُ طٛنْ دَرِ شَکَ لٜطّٜ عَسُرَاجٜ ندٜرْ لُغّٜرٜ؞ ࢡَاوٛ مَاکٛ وٛودِ ݠُشِّ بٛطٜىٰجِ عٜ ݠُرِ عٜ دَنٜىٰجِ؞

⁹ مِࢨَمِ مَلَاعِکَاجٛ بٛلِدَنْطٛ بٜى عَمْ‏: «ݠُشِّ طِعِ طُمْ طُمٜ، بَرْکَامَ؟» عٛجَابِ يَمْ‏: «مِڢَامْتِنْتٜ حَالَ مَاجِ؞»

¹⁰ بَعِّيطٛ ݠُشُّ شَکَ عَسُرَاجٜ غٛ وِعِ‏: «وَعِّيࢡٜ طِ نغٛنِ ࢡٜ جَوْمِرَاوٛ نٜلِ نغَمْ ࢡٜتَارٛيَ دُنِيَارُ؞»

¹¹ ࢡٜمبٛلْوَنِ مَلَاعِکَاجٛ بَعِّيطٛ ݠُشُّ شَکَ عَسُرَاجٜ غٛ‏: «مِنْ تَارٛيِ دُنِيَارُ ڢُو، ندُ طٛنْ دٜعِّ سِرِوْ؞»

¹² ندٜنْ مَلَاعِکَاجٛ جَوْمِرَاوٛ وِعِ‏: «يَا جَوْمِرَاوٛ حٛنٛوࢡٜ عَسَمَ، ندٜيْ عٜنْطَتَ عُرُسَلِيمَ عٜ غُرٜ يَحُودَ؟ عَتِکَّنِ طٜ دُوࢡِ شَݠَّنْطٜ جٛوٜىٰطِطِ جٛنْتَ؞»

¹³ جَوْمِرَاوٛ جَابِ مَلَاعِکَاجٛ بٛلِدَنْطٛ بٜى عَمْ بٜى بٛلّٜ بٛوطّٜ، دٜعِّتِنٛوجٜ؞

¹⁴ ندٜنْ مَلَاعِکَاجٛ عٛو وِعِ يَمْ‏: «وٛويْنُ نِعِ‏: ندَا کٛ جَوْمِرَاوٛ حٛنٛوࢡٜ عَسَمَ وِعِ‏: مِمَرِ يِيدٜ حَاجُندٜ مَسِنْ دٛوْ عُرُسَلِيمَ عٜ سِيٛنَ؞

¹⁵ مِحٜىٰوِ تِکّٜرٜ دٛوْ عُمَّاتٛوجٜ کٛولْطِنِيطٜ، نغَمْ سَاعِ مِتِکَّنِنٛ بٜرْنِوٛلْ عُرُسَلِيمَ سٜطَّ، عَمَّا طٜ ࢡٜسْدِ سَرُّ مَاغٛلْ؞

¹⁶ نغَمْ مَنْ جَوْمِرَاوٛ وِعِ‏: مِوَرْتَنَنْ عُرُسَلِيمَ بٜى عٜنْطَمْ؞ حَيْکَلِيرُ عَمْ ندٜرْ مَاغٛلْ ࢩِࢡْتٜتٜ، بٜرْنِوٛلْ عُرُسَلِيمَ مَحِتِتّٜ؞ نٛنْ جَوْمِرَاوٛ حٛنٛوࢡٜ عَسَمَ وِعِ؞

¹⁷ کَدِبٛو وٛويْنُ‏: ندَا نِي جَوْمِرَاوٛ حٛنٛوࢡٜ عَسَمَ وِعِ‏: بٜرْنِيجِ عَمْ کٜىٰوَنْ کُوجٜ بٛوطّٜ ڢَحِنْ؞ جَوْمِرَاوٛ دٜعِّتِنَنْ سِيٛنَ، عٛسُࢡَنْ عُرُسَلِيمَ ڢَحِنْ؞»