تِتُسْ 1 - دٜڢْتٜرٜ اَللَّه ڢُلْڢُلْدٜ عَدَمَوَ

کٛوڢْنغٛلْ

¹ مِنْ ݠٛلْ، مَشُّطٛ اَللَّه، نٜلَاطٛ عِيسَى اَلْمَسِيحُ، نغَمْ وَدُّغٛ سُࢡَاࢡٜ اَللَّه حَا ࢡٜعَنْدَ غٛونغَ، ࢡٜنغٜىٰطَ ندٜرْ کُلٛلْ اَللَّه،

^2-4 بٜى تَمُّندٜ نغٜىٰندَمْ ندُومِيطَمْ، مِطٛنْ وِنْدَنٜ تِتُسْ، ࢡِنغٜلْ عَمْ ندٜرْ نُطِّنْکِ کَوْتُکِ عٜنْ‏: اَللَّه بَابِرَاوٛ عٜ عِيسَى اَلْمَسِيحُ، کِسْنٛووٛ مٜنْ ندٛکّٜ مٛعّٜرٜ عٜ سَلَامَنْ؞ دِغَ زَمَنُوجِ ࢡٛويْمَاجِ اَللَّه مٛ ڢٜوَتَا عِينِ حٛکُّغٛ عٜنْ نغٜىٰندَمْ طَعَمْ؞ ندٜرْ سَاعِيرٜ تَعَاندٜ بٛو، اَللَّه کِسْنٛووٛ مٜىٰطٜنْ وَنغِنِ وٛلْدٜ مُوطُمْ، حَلْڢِنِ يَمْ کُوغَلْ وَازَاغٛ ندٜ ڢٛدّٜ عُمْرٛورٜ مُوطُمْ؞

کُوغَلْ تِتُسْ حَا کٜرٜتَ

⁵ نغَمْ دَلِيلَ مَنْ، مِعَشِّ مَ حَا کٜرٜتَ، نغَمْ حَا عَمٛعِّنَ کٛ لُتِّ مٛعِّتِنٜىٰغٛ، عَدَرْنَ ندٛتِّعٜنْ جَمَعَارٜ نُطِّنْࢡٜ ندٜرْ غُرٜ ڢُو؞ سِڢْتٛرْ کٛ مِعُمْرِ مَ‏:

⁶ سٜيْ ندٛتِّيجٛ جَمَعَارٜ نُطِّنْࢡٜ وٛنَ غٛطّٛ مٛ وَلَا ڢٜلٛورٜ، مَرْطٛ دٜبّٛ غٛوتٛ، ࢡِࢡّٜ مَاکٛ بٛو ࢡٜ نُطِّنْࢡٜ، تَا غٛطّٛ حٜࢡَ ڢٜلُغٛ ࢡٜ نغَمْ دَلِيلَ دَاکَارٜىٰکُ مَلَّ نغَمْ نَنَرُ مَࢡّٜ؞

⁷ سٜيْ عَرْدِيطٛ جَمَعَارٜ نُطِّنْࢡٜ وٛنَ غٛطّٛ مٛ وَلَا ڢٜلٛورٜ، نغَمْ اَللَّه حَلْڢِنِمٛ جَمَعَارٜ مُمْ؞ تَا عٛلَاتٛ عٜلٜوْطٛ مَلَّ تِکّٛووٛ مَلَّ غُيْکٛووٛ مَلَّ نغَلّٛووٛ مَلَّ شُونَاطٛ رِبَ،

⁸ عَمَّا عٛلَاتٛ بٜىٰرْنٛووٛ حٛطْࢡٜ، غِطّٛ مبٛوطٜىٰنغَ، کَکِّلْطٛ، عَدِلِيجٛ، شٜنَاطٛ، نَنغْتِيطٛ؞

⁹ سٜيْ عٛحَکِّلَنَ کُبَرُوٛلْ کٛولْنِينغٛلْ دٜيْدٜيْ عٜکِّتِنٛلْ نغٛلْ عٛعٜکِّتِ، نغَمْ حَا عٛلَاتٛ بَاوْطٛ وَسَاغٛ جَمَعَارٜ ڢٛدّٜ عٜکِّتِنٛلْ غٛونغَوٛلْ عٜ وَنغِنْغٛ عَيْبٜىٰجِ دَرْتَنْتٛوࢡٜ غٛونغَ؞

¹⁰ نغَمْ وٛودِ يِمْࢡٜ طُوطْࢡٜ، ࢡُرْنَ مَࢡّٜ ندٜرْ يَحُودُعٜنْ نُطِّنْࢡٜ، ࢡٜ تُورْتٛوࢡٜ، وَابٛتٛوࢡٜ عٜ تٛکِّيࢡٜ حَالَاجِ بَاطِّ؞

¹¹ سٜيْ عَسُکَّ کُنْدُطٜ مَࢡّٜ، نغَمْ ࢡٜطٛنْ مبٛنَّ نُطِّنْکِ يِمْࢡٜ ندٜرْ شِعٜ بٜى عٜکِّتِنْغٛ کٛ حَانَايْ؞ ࢡٜطٛنْ مبَطَ طُمْ نغَمْ حَا ࢡٜکٜࢡَ رِبَ کَلُّکَ؞

¹² غٛطّٛ ندٜرْ اَلنَّبِعٜنْ مَࢡّٜ وِعِ‏: «کٜرٜتَعٜنْ طٛنْ ݠٜوَ ڢٛرٛيْ؞ ࢡٜ دَبَّاجِ کَلُّطِ، مبَاتٜىٰندَمْعٜنْ، سُکْلَنْتٛوࢡٜ دٜىٰطِ مُوطُمْعٜنْ تَنْ؞»

¹³ کٛ عٛوِعِ، طُمْ غٛونغَ‏! نغَمْ مَاجُمْ ڢٜلْ ࢡٜ بٜى شَاتَلْ، نغَمْ حَا ࢡٜتَبِتَ ندٜرْ نُطِّنْکِ غٛونغَاحِ؞

¹⁴ سٜيْ ࢡٜعَشَّ سُکْلَنَاغٛ کِشَّاجِ يَحُودُعٜنْ، تَا ࢡٜتٛکّٛ ڢَرِلَّاجِ يِمْࢡٜ سٜلْࢡٜ، عَشُّࢡٜ غٛونغَ؞

¹⁵ حَا لَاࢡَ-ࢡٜرْطٜعٜنْ، کٛو طُمٜ ڢُو لَاࢡِ؞ عَمَّا حَا سٛࢡّٜ عٜ سٛويْࢡٜ نُطِّنْکِ، وَلَا کٛ لَاࢡِ، نغَمْ حَکِّيلٛوجِ مَࢡّٜ عٜ نُمٛ ࢡٜرْطٜ مَࢡّٜ شٛࢡِ؞

¹⁶ ࢡٜطٛنْ مبِعَ ࢡٜعَنْدِ اَللَّه، عَمَّا کُوطٜ مَࢡّٜ طٛنْ نغٜدَّ مٛ؞ ࢡٜ ࢩِدُّࢡٜ، تُورْتٛوࢡٜ، ࢡٜمبَاوَتَا حُووُغٛ کُوغَلْ بٛوطْنغَلْ کٛو نغَلٜ؞