يِمْرٜ سُلَيْمَـٰنُ 1 - دٜڢْتٜرٜ اَللَّه ڢُلْڢُلْدٜ عَدَمَوَ

¹ ندَا يِمْرٜ سُلَيْمَـٰنُ ࢡُرْندٜ وٛوطُغٛ ندٜرْ غِمٜ ڢُو؞

نغٜىٰوْتَ حَکُّندٜ يِطِندِرْࢡٜ طِطٛ ݠَاࢩٛ دٜبّٛ‏:

² حٜبَّمْ کٜبَّاطٜ بٜى حُنْدُکٛ‏! يِيدٜ مَ ࢡُرِ عِنَبٛوجَمْ وٜلُغٛ؞

³ عُورٜىٰنغٛلْ عُورْلٜ مَاطَ وٜلِ مَسِنْ، عِنْدٜ مَاطَ وٛنِ عُورْدِ عِلَنْدِ، نغَمْ دَلِيلَ مَنْ ڢَاࢩْࢡٜ ڢُو نغِطِ مَ؞

⁴ ڢٛوطَمْ ࢡَاوٛ مَ، نجَاوٜنْ بٜى ݠَرْغَلْ‏! لَامِيطٛ نَسْتِنِ يَمْ ندٜرْ شُوطِ مُمْ؞ عٜنْ نغٛنَنْ ندٜرْ وٜلْوٜلٛ عٜ سٜيٛ نغَمْ بَرْکَ مَاطَ، عٜنْ مَنغْتَنْ يِيدٜ مَ کٛ ࢡُرِ عِنَبٛوجَمْ؞ بٜى دَلِيلَ لَاࢡْکَ رٜوْࢡٜ ڢُو نغِطِ مَ؞

⁵ ندَا، مِࢡَلْوِ، عَمَّا مِ نغَرْنِيطٛ بٛو، عٛنٛنْ ڢَاࢩْࢡٜ رٜوْࢡٜ ندٜرْ عُرُسَلِيمَ ڢُو؞ بَنَ لَيْمَاجِ حَا کٜىٰدَرْ مِࢡَلْوِرِ، بَنَ وِيرْندَلّٛوجِ سُلَيْمَـٰنُ مِوٛوطِرِ؞

⁶ تَا ࢡَلْوَلْ ࢡَنْدُ عَمْ سُکْلَ عٛنْ، طُمْ نَانغٜ ࢡَلْوِنِ يَمْ‏! دٜىٰرْطِرَاࢡٜ عَمْ تِکَّنِ يَمْ، ࢡٜندٛولِ يَمْ عَيْنُغٛ غٜسٜ عِنَبٛوجٜ، نغٜسَ عِنَبٛوجٜ عَمْ کَمْ، مِعَيْنَايْ کَ؞

⁷ عَنْ مٛ ࢡٜرْندٜ عَمْ يِطِ طُمْ، عَنْدِنَمْ‏: تٛيْ عَدُرَتَ تٛکّٜرٜ بَالِ مَ؟ تٛيْ عَسِوْتِنْتَ طِ شَکَ نَانغٜ بٛو؟ نغَمْ تَا مِلَاتٛ بَنَ دٜبّٛ نٛوتٛووٛ حَا کٛمْبِ تٛکّٜ نغٛرْغِرَاࢡٜ مَ؞

يِمٛوࢡٜ‏:

⁸ تٛ عَعَنْدَا نٛکُّورٜ مَنْ سَمْ، عَنْ بٛو، عَنْ مٛ ࢡُرِ رٜوْࢡٜ ڢُو وٛوطُغٛ، ندٜنْ کَمْ تٛکَّ بَتّٜ دَمّٛوجِ نٛنْ، مبٜعٛيْ مَاطَ ندٜحٛيْ، عَيَحْرَ کٛيْ دُرُغٛ تٛنْ، حَا نٛکُّورٜ وَيْنَاࢡٜ ڢُو نجٛوطٛتٛ؞

سُکَاجٛ‏:

⁹ بٜى ݠُشُّ ندٜوُ حَا مٛوتَ ڢِرْعَوْنَ، بَنَ نِي نَنْدِنْمَامِ، غِطَاطٛ عَمْ؞

¹⁰ غٛلٜ مَاطَ طٜ مبٛوطِ بٜى يٜرِ مَ، نٛنْ بٛو دَاندٜ مَ شَکَ کٛطٛيْ مَ؞

¹¹ سٜيْ مِنْ مبَطَنٜ کٛطٜلْ کَنغّٜىٰرِ بٛو، بٜى جَاغْنٛرْطٜ شَرْدِيجٜ نغٜلْ جَاغْنٛرٛ؞

ݠَاࢩٛ دٜبّٛ‏:

¹² يَاکٜ لَامِيطٛ عَمْ طٛنْ ࢩَامَ، نَرْدِ عَمْ وَطَنْ عُورٜىٰنغٛلْ بٛو؞

¹³ بَنَ حَڢْرٜ بَطَادِ، نٛنْ غِطَاطٛ عَمْ، حَڢْرٜ مَاجُمْ طٛنْ وَالِ شَکَ عٜنْطِ عَمْ؞

¹⁴ کَنغْکٛ لَاتِ بَنَ وُکُّرُ ݠِنْدِ نَلّٜىٰحِ ندٜرْ غٜسٜ عِنَبٛوجٜ حَا عٜنْ-غٜدِ؞

سُکَاجٛ‏:

¹⁵ عَنْ عَ نغَرْنِيطٛ مَسِنْ، عَنْ غِطَاطٛ عَمْ، عَ نغَرْنِيطٛ مَسِنْ‏! غِتٜ مَاطَ طٛنْ مبٛوطِ بَنَ ݠٛولِ؞

ݠَاࢩٛ دٜبّٛ‏:

¹⁶ عَنْ عَ نغَرْنِيطٛ، عَ بٜلْطٛ، عَنْ غِطَاطٛ عَمْ، حَاکٛ حٜشّٛ تَنْ لَاتٛ بٜعِّتّٜ مٜنْ؞

¹⁷ لٜطّٜ شٜمْبِطّٜ نغٛنِ کَاتَاکٛوجٜ شُوطِ مٜنْ، لٜطّٜ بٛوطّٜ شُدِّ مَحِ مٜنْ؞