رُوتْ 1 - دٜڢْتٜرٜ اَللَّه ڢُلْڢُلْدٜ عَدَمَوَ

عٜغُّکِ عٜلِمٜلٜکْ عٜ يِمْࢡٜ مُمْ

¹ زَمَنُ عَلْکَالِعٜنْ طٛنّٛ طٛوَ إِسْرَاءِيلَ، وٜىٰلٛ وَطِ؞ نغَمْ مَاجُمْ غٛطّٛ عِوْطٛ بَيْتِلَامَ ندٜرْ لٜسْدِ يَحُودَ يٜحِ نغَمْ ڢَࢡّٛيْغٛ ندٜرْ لٜسْدِ مٛعَبْ، کَنغْکٛ عٜ دٜبّٛ مُمْ عٜ ࢡِࢡّٜ مُمْ وٛرْࢡٜ طِطٛ؞

² عِنْدٜ غٛرْکٛ عٛو، عٜلِمٜلٜکْ؞ عِنْدٜ دٜبّٛ مَاکٛ، نَعٛمِ؞ عِنْطٜ ࢡِࢡّٜ مَاکٛ بٛو، مَحَلٛنْ عٜ کِلِيٛنْ؞ ࢡٜ عٜڢْرَتِعٜنْ عِوْࢡٜ بَيْتِلَامَ ندٜرْ لٜسْدِ يَحُودَ؞ ࢡٜنجٛتِّ لٜسْدِ مٛعَبْ، ࢡٜطٛنْ نجٛوطِ تٛنْ؞

³ ندٜنْ عٜلِمٜلٜکْ، غٛرْکٛ نَعٛمِ، مَايِ؞ نَعٛمِ لُتِّدِ بٜى ࢡِࢡّٜ مُوطُمْ طِطٛ؞

⁴ کَمْࢡٜ ࢡٜتٜعِ ࢡِࢡّٜ رٜوْࢡٜ مٛعَبِعٜنْ؞ عِنْدٜ عٛو، عٛرْݠَ، عِنْدٜ عٛيَ بٛو، رُوتْ؞ ࢡٜنجٛوطِ تٛنْ بَاکِنْ دُوࢡِ سَݠّٛ؞

⁵ ندٜنْ مَحَلٛنْ عٜ کِلِيٛنْ مَايِ، ࢡٜ طِطٛ ڢُو؞ نَعٛمِ لُتِّ ڢٜىٰرٜ مُوطُمْ، عٛسٛويِ غٛرِيکٛ، عٛسٛويِ بٛو ࢡِࢡّٜ مَاکٛ طِطٛ؞

نَعٛمِ عٜ رُوتْ لٛرْتِ بَيْتِلَامَ

⁶ نَعٛمِ عُمِّ لٜسْدِ مٛعَبْ بٜى عٜسِرَاࢡٜ مُوطُمْ، وَرْتِ لٜسْدِ يَحُودَ نغَمْ عٛنَنِنٛ جَوْمِرَاوٛ وٛونَنِ يِمْࢡٜ مُمْ، حٛکِّ ࢡٜ ࢩَامْدُ؞

⁷ نغَمْ مَاجُمْ ࢡٜعَشِّ نٛکُّورٜ حَا ࢡٜنغٛنّٛ، کَنغْکٛ عٜ عٜسِرَاࢡٜ مَاکٛ طِطٛ ڢُو، ࢡٜنَنغِ لَاوٛلْ لٛرْتُغٛ لٜسْدِ يَحُودَ؞

⁸ ندٜنْ نَعٛمِ وِعِ عٜسِرَاࢡٜ مُمْ‏: «ندِلّٜ، لٛرْتٜ کٛو مٛيْ مٛوطٛنْ حَا سَارٜ دَادَ مُمْ؞ جَوْمِرَاوٛ وٛونَنَ عٛنْ، بَنَ کٛ عٛنْ نغَطَنِ مَايْࢡٜ عٜ کٛ عٛنْ نغَطَنِ يَمْ؞

⁹ جَوْمِرَاوٛ حٛکَّ کٛو مٛيْ مٛوطٛنْ سِوْتَارٜ حَا سَارٜ غٛرْکٛ مُمْ؞» ندٜنْ عٛجَࢡِّتِ ࢡٜ؞ ࢡٜمبٛيِ مَسِنْ،

¹⁰ ࢡٜمبِعِمٛ‏: «نَا نٛنْ، مِنْ نجَحْدَنْ بٜى مَاطَ حَا يِمْࢡٜ مَ؞»

¹¹ عَمَّا نَعٛمِ وِعِ‏: «کٛوتٜ، ࢡِکّٛيْ عَمْ‏! نغَمْ طُمٜ نجَحْدٛتٛنْ بٜى عَمْ؟ کَدِ مِوَاوَنْ دَࢩُغٛ ࢡِࢡّٜ وٛرْࢡٜ، حَا ࢡٜلَاتٛ وٛرْࢡٜ مٛنْ ڢَحِنْ نَ؟

¹² کٛوتٜ، ࢡِکّٛيْ عَمْ، ندِلّٜ، نغَمْ مِ نَيْوِ، مِوَاوَتَا تٜعٜىٰغٛ؞ کٛو تٛ مِوِعِ‏: تَمُّندٜ طٛنْ حَا غٛرْکٛ وٛنْدَ بٜى عَمْ جٜمَّارٜ ندٜعٜ، تٛ مِدَࢩِ ࢡِࢡّٜ وٛرْࢡٜ بٛو،

¹³ عٛنٛنْ عٛنْ ندٜىٰنَنْ حَا ࢡٜمَوْنَ نَ؟ عٛنْ شَلٛتٛ تٜعٜىٰغٛ نَ؟ نَا نٛنْ، ࢡِکّٛيْ عَمْ‏! سُنٛ عَمْ طُوطِ مَسِنْ، ࢡُرِ نغٛ مٛوطٛنْ، نغَمْ کٛ جَوْمِرَاوٛ وَطَنِ يَمْ ࢡُرِ يَمْ سٜمْبٜ؞»

¹⁴ ࢡٜمبٛيِ ڢَحِنْ؞ ندٜنْ عٛرْݠَ جَࢡِّتِ عٜسِرَاوٛ مُمْ، حٛوتِ؞ عَمَّا رُوتْ طَکّٛتِرِ بٜى مَاکٛ؞

¹⁵ نَعٛمِ وِعِمٛ‏: «ندَا، عٜىٰکِرَاوٛ مَ لٛرْتِ حَا عُمَّاتٛورٜ مُمْ عٜ طٛوَنْتٜىٰࢡٜ مُمْ؞ عَنْ بٛو حٛوتُ، تٛکَّ مٛ؞»

¹⁶ عَمَّا رُوتْ جَابِ‏: «تَا دٛولَمْ، مِعَشّٜ، مِدِلَّ؞ حَا نجَحَتَ نجَحَنْمِ، حَا مبَالَتَ مبَالَنْمِ؞ عُمَّاتٛورٜ مَاطَ لَاتِ عُمَّاتٛورٜ عَمْ، اَللَّه مَاطَ بٛو اَللَّه عَمْ؞

¹⁷ حَا مَايَتَ مَايَنْمِ، ࢡٜعُوَمِّ تٛنْ بٛو؞ سٜيْ مَايْدٜ تَنْ سٜنْدِرْتَ عٜنْ؞ تٛ نَا نٛنْ، جَوْمِرَاوٛ حِيتٛ يَمْ بٜى شَاتَلْ ڢُو‏!»

¹⁸ ندٜ نَعٛمِ ڢَامِ عَنِّيَ رُوتْ يَحْدُغٛ بٜى مَاکٛ تَبِتِ، عٛعَشِّ ࢡِلُّغٛ مٛ؞

¹⁹ بَنَ نِي ࢡٜنجَحْدِ ࢡٜ طِطٛ ڢُو حَا ࢡٜنجٛتِّ بَيْتِلَامَ؞ ندٜ ࢡٜنَسْتِ بَيْتِلَامَ، بٜرْنِوٛلْ ڢُو حَيْطِنِ، ندٜنْ رٜوْࢡٜ ࢨَمِ‏: «طُمْ نَعٛمِ نَ؟»

²⁰ نَعٛمِ وِعِ ࢡٜ‏: «تَا مبِعٜىٰطَمْ نَعٛمِ، مبِعٜىٰطَمْ مَارَ، نغَمْ اَللَّه بَاوْطٛ لَسْکِنِ يَمْ ࢡٜرْندٜ مَسِنْ؞

²¹ مِوُرْتِنٛ طٛ بٜى مَرْدِ طُوطْندِ، عَمَّا جَوْمِرَاوٛ وَرْتِرِ يَمْ جُنغٛ مٜىٰرٜ؞ کٛنِ مبِعٛتٛنْ يَمْ شٜيِيطٛ؟ جَوْمِرَاوٛ تِکَّنِ يَمْ، اَللَّه بَاوْطٛ عُکَّنِ يَمْ سَرُّ؞»

²² بَنَ نِي نَعٛمِ وَرْدِ بٜى رُوتْ، عٜسُمْ مٛعَبِيجٛ دِغَ لٜسْدِ مٛعَبْ؞ ࢡٜنجٛتِّ بَيْتِلَامَ سَاعِ يِمْࢡٜ ݠُطِّ وَعْغٛ سَعِيرُورِ؞