وَحَيُ يُحَنَّ 1 - دٜڢْتٜرٜ اَللَّه ڢُلْڢُلْدٜ عَدَمَوَڢُطّٛودٜ 1 ندَا وَحَيُ مٛ اَللَّه حٛکِّ عِيسَى اَلْمَسِيحُ نغَمْ عَنْدِنْغٛ جَغِّيࢡٜ مُمْ کٛ ࢡَدِ وَرْغٛ بٜى دٛولٜ؞ نغَمْ مَاجُمْ اَلْمَسِيحُ نٜلِ مَلَاعِکَاجٛ مُوطُمْ نغَمْ عَنْدِنْغٛ طُمْ جَغِّيطٛ مُوطُمْ يُحَنَّ؞ 2 يُحَنَّ سٜىٰدِ کٛ عٛيِعِ ڢُو، طُمْ وٛلْدٜ اَللَّه عٜ سٜىٰدَمْکُ عِيسَى اَلْمَسِيحُ؞ 3 بَرْکَ لَاتَنْتٛ جَنغَنْطٛ دٜڢْتٜرٜ ندٜعٜ عٜ نَنَنْࢡٜ بٛلّٜ عَنَّبَاکُ نغُعُ، تٛکِّيࢡٜ کٛ وِنْدَ ندٜرْ مَارٜ! نغَمْ وَکَّتِيرٜ ندٜ کُوجٜ طٜعٜ لَاتٛتٛ ࢡَدَکٜ وَرْغٛ؞ کٛوڢْلِ حَا جَمَعَاجٜ مَسِيحِنغْکٜعٜنْ جٛوٜىٰطِطِ 4 مِنْ يُحَنَّ، مِطٛنْ وِنْدَنَ جَمَعَاجٜ نُطِّنْࢡٜ جٛوٜىٰطِطِ حَا لٜسْدِ عَسِيَ: مٛعّٜرٜ عٜ سَلَامَنْ لَاتَنٛ عٛنْ دِغَ اَللَّه، مٛ طٛنْ، مٛ طٛنّٛ ࢡٛويْمَ، مٛ طٛنْ وَرَ بٛو عٜ دِغَ رُوحُوجِ جٛوٜىٰطِطِ غٛنْطِ يٜىٰسٛ لٜىٰسٛ لَامُ مَاکٛ 5 عٜ دِغَ عِيسَى اَلْمَسِيحُ، شٜىٰدٛووٛ غٛونغَاجٛ، عُمِّتِنَاطٛ عَرَنٛ ندٜرْ مَايْࢡٜ، مَوْطٛ لَامْلَامْࢡٜ دُنِيَارُ بٛو؞ کَنغْکٛ عٛيِطِ عٜنْ؞ عٛرِمْطِنِ عٜنْ دِغَ حَکّٜىٰجِ مٜىٰطٜنْ بٜى ࢨِيࢨَمْ مَاکٛ، 6 عٛلَاتِنِ عٜنْ عُمَّاتٛورٜ لَامُ مَاکٛ عٜ لِمَنْعٜنْ اَللَّه، بَابِرَاوٛ مَاکٛ؞ تٜدُّنغَلْ عٜ بَاوْطٜ لَاتَنٛ مٛ حَا عَبَدَ عَبَدِنْ؞ عَامِينَ! 7 ندَا، عٛطٛنْ وَرْدَ بٜى دُولٜ! کٛو مٛيْ ڢُو يِعَنْ مٛ، کٛو يُوْࢡٜ مٛ بٛو؞ يِمْࢡٜ عَسْلِ ندٜرْ دُنِيَارُ ڢُو مبٛيَنْ نغَمْ دَلِيلَ مَاکٛ؞ نِي طُمْ لَاتٛرْتٛ؞ عَامِينَ! 8 جَوْمِرَاوٛ اَللَّه وِعِ: «مِنْ وٛنِ عَلْڢَ عٜ عٛمٜغَ، مٛ طٛنْ عٜ مٛ طٛنّٛ ࢡٛويْمَ، مٛ طٛنْ وَرَ بٛو، مِنْ وٛنِ بَاوْطٛ دٛوْ کٛو طُمٜ ڢُو؞» اَلْمَسِيحُ وَنغَنِ يُحَنَّ 9 مِنْ يُحَنَّ، دٜىٰرْطِرَاوٛ مٛوطٛنْ، کَوْتُطٛ بٜى مٛوطٛنْ ندٜرْ تٛرَّ عٜ لَامُ اَللَّه عٜ تِيطَلْ ندٜرْ عِيسَى، مِ طٛنّٛ حَا دُوندٜ وِعٜتٜىٰندٜ ݠَتْمٛسْ نغَمْ دَلِيلَ وٛلْدٜ اَللَّه عٜ سٜىٰدَمْکُ عِيسَى؞ 10 ࢩَلَادٜ جَوْمِرَاوٛ، رُوحُ نَنغِ يَمْ، مِنَنِ سَوْتُ ࢡَاوٛ عَمْ، بَنَ لُوَلْ، 11 طٛنْ وِعَ: «کٛ نغِعَتَ، وِنْدُ طُمْ ندٜرْ دٜڢْتٜرٜ، نٜلْدُ طُمْ حَا جَمَعَاجٜ نُطِّنْࢡٜ جٛوٜىٰطِطِ غٛنْطٜ حَا عٜڢٜسُسْ عٜ سِمِرْنَ عٜ ݠٜرْغَمٜ عٜ تِيَتِرَ عٜ سَرْدِسْ عٜ ڢِلَدٜلْڢِيَ عٜ لَوْدِکِيَ؞» 12 مِوَيْلِتِ حَا مِلَارَ مٛ طٛنْ وٛلْوَنَمِّ؞ ندٜنْ مِيِعِ جٛعِّنِرْطٜ ݠِتِّرْلَاجِ جٛوٜىٰطِطِ طٜ کَنغّٜىٰرِ؞ 13 شَکَ جٛعِّنِرْطٜ طٜعٜ، نغِعْمِ غٛطّٛ نَنْدُطٛ بٜى نٜطّٛ طٛنْ ࢡٛرْنِ لِمْشٜ جُوتْطٜ حَا نجٛتِّ تٜݠّٜ، عٛطٛنْ حَࢡِّ وِࢡّٜرٜ مَاکٛ بٜى تَادٛرْغٛلْ کَنغّٜىٰرِ؞ 14 حٛورٜ عٜ غَاسَ حٛورٜ مَاکٛ طٛنْ ندَنْوِ تَلْ بَنَ حٛتّٛلّٛ رَنٜىٰحٛ عٜ بَنَ مَلِّمَلّٛوجٜ؞ غِتٜ مَاکٛ نجَيْنِ بَنَ طٜمْنغَلْ يِيتٜ، 15 کٛسْطٜ مَاکٛ طٜلْکِ بَنَ نجَمْندِ مبٛطٜىٰرِ ࢡٛلِنَاندِ ندٜرْ يِيتٜ؞ سَوْتُ مَاکٛ نَنْدِ بٜى حٛولٛ ندِيَمْجِ دِيرْتٛتٛوطِ حَا مَايٛ بٜى سٜمْبٜ ؞ 16 عٛطٛنْ جٛغِ کٛودٜ جٛوٜىٰطِطِ حَا جُنغٛ مَاکٛ ࢩَامٛ، کَاڢَحِ شٜىٰࢡْکِ، مَرْکِ مبٜلْدِيجِ طِطِ وُرْتِ حُنْدُکٛ مَاکٛ؞ يٜىٰسٛ مَاکٛ طٛنْ يَيْنَ بَنَ نَانغٜ يَيْنِرْتَ شَکَ ࢩَلَوْمَ؞ 17 ندٜ مِيِعِمٛ، مِدٛعِّ يٜىٰسٛ مَاکٛ بَنَ مَايْطٛ؞ عٛوَلِّنِ جُنغٛ مَاکٛ ࢩَامٛ دٛوْ حٛورٜ عَمْ، عٛوِعِ: «تَا حُلْ! مِنْ وٛنِ عَرَنٛ عٜ رَغَرٜىٰجٛ؞ 18 مِ غٜىٰتٛ! مِمَايِنٛ، عَمَّا ندَا، مِ غٜىٰتٛ حَا عَبَدَ عَبَدِنْ؞ مِوٛودِ بَاوْطٜ دٛوْ مَايْدٜ عٜ دٛوْ جٛوندٜ مَايْࢡٜ بٛو؞ 19 نغَمْ مَاجُمْ وِنْدُ کٛ نغِعْطَ: کُوجٜ جٛنْتَاجٜ عٜ تَمِّيطٜ وَرْغٛ ࢡَاوٛطٛنْ؞ 20 ندَا سِرِّ کٛودٜ جٛوٜىٰطِطِ طٜ نغِعْطَ حَا جُنغٛ عَمْ ࢩَامٛ عٜ سِرِّ جٛعِّنِرْطٜ ݠِتِّرْلَاجِ جٛوٜىٰطِطِ طٜ کَنغّٜىٰرِ: کٛودٜ جٛوٜىٰطِطِ نغٛنِ مَلَاعِکَعٜنْ جَمَعَاجٜ نُطِّنْࢡٜ جٛوٜىٰطِطِ؞ جٛعِّنِرْطٜ ݠِتِّرْلَاجِ جٛوٜىٰطِطِ بٛو نغٛنِ جَمَعَاجٜ نُطِّنْࢡٜ جٛوٜىٰطِطِ؞» |
Fulfulde Bible Ajamiya © Bible Society of Cameroon, 2016.
Bible Society of Cameroon