بَلْندِ 1 - دٜڢْتٜرٜ اَللَّه ڢُلْڢُلْدٜ عَدَمَوَ

تِيتٛرْدٜ بَلْندِ

¹ ندَا بَلْندِ سُلَيْمَـٰنُ ࢡِي دَاوُدَ، لَامِيطٛ إِسْرَاءِيلَ،

² نغَمْ عَنْدُغٛ حِکْمَ عٜ نٜعَارٜ، نغَمْ ڢَامُغٛ بٛلّٜ کَکِّلْطٜ،

³ نغَمْ حٜࢡُغٛ عَنْدَلْ لَاࢡْنغَلْ، نغَمْ وَطُغٛ کٛ ڢٛتِّ، کٛ غٛونغْطِ، کٛ وٛوطِ،

⁴ نغَمْ حٛکُّغٛ حُمَکِعٜنْ حَکِّيلٛ، دٜرْکٜعٜنْ بٛو عَنْدَلْ عٜ کِرْسٜىٰکُ؞

⁵ سٜيْ حِکْمَاجٛ حٜطِتٛ، ࢡٜسْدَ عَنْدَلْ، بٛلّٜ طٜعٜ طٛوَ مَرْطٛ عَنْدَلْ،

⁶ نغَمْ حَا عٛڢَامَ بَلْندِ عٜ حَالَ لُغُّکَ، بٛلّٜ حِکْمَعٜنْ عٜ عَنْدِتَنَمْجِ مَࢡّٜ؞

سَوَرِ نغَمْ دٜرْکٜعٜنْ

⁷ کُلٛلْ جَوْمِرَاوٛ وٛنِ ڢُطَّمْ عَنْدَلْ، عَمَّا ڢَاتَاࢡٜ طٛنْ نجَوٛ حِکْمَ عٜ نٜعَارٜ؞

⁸ ࢡِنغٜلْ عَمْ، نَنْ عٜلْتٛ بَابَ مَ، تَا سَلَ وَسُيٜىٰجِ دَادَ مَ؞

⁹ عَنْدِنٛلْ مَࢡّٜ مٛعِّنْتٜ بَنَ مٜىٰتَلٜىٰوٛلْ دٛوْ حٛورٜ مَ، بَنَ کٛطٛيْ حَا دَاندٜ مَ؞

¹⁰ ࢡِنغٜلْ عَمْ، تٛ وَطٛوࢡٜ حَکّٜ عٜسْتِ مَ، تَا تٛکَّ ࢡٜ؞

¹¹ تٜىٰمَ ࢡٜمبِعٜتٜ‏: «يَحْدُ بٜى عَمِنْ، عٜنْ مبَالْتَنٛ يِمْࢡٜ وٛطْࢡٜ، عٜنْ مبَرَ ࢡٜ، نغَمْ ڢِجُغٛ تَنْ؞

¹² تٛ عٜنْ تَوِ ࢡٜ، ࢡٜ يٜىٰطْࢡٜ؞ عَمَّا تٛ عٜنْ تِمِّنِ ࢡٜ، ࢡٜنَسْتَنْ نغَسْکَ؞

¹³ عٜنْ کٜࢡَنْ کُوجٜ طُوطّٜ مَرْطٜ سَمَنْ، عٜنْ کٜبِّنَنْ شُوطِ مٜنْ بٜى کٜࢡَلْ؞

¹⁴ وَرْ، حَوْتُ بٜى عَمِنْ، عٜنْ شٜنْدَ کٜࢡَلْ، عَنْ بٛو عَحٜࢡَ غٜطَلْ مَاطَ؞»

¹⁵ ࢡِنغٜلْ عَمْ، تَا يَحْدُ بٜى مَࢡّٜ، نَنغْتُ کٛسْطٜ مَ، تَا تٛکَّ ࢡٜ؞

¹⁶ نغَمْ کٛسْطٜ مَࢡّٜ طٛنْ نجَاوَنَ حَلّٜىٰندٜ، ࢡٜطٛنْ نجَاوْطَنٛ رُڢُغٛ ࢨِيࢨَمْ؞

¹⁷ طُمْ نَڢَتَا تٛ غٛطّٛ تُوڢْنَکٜ تُوڢٛرْغٛلْ يَاکٜ شٛلِّ طٛنْ ندَارَ،

¹⁸ عَمَّا کَمْࢡٜ ࢡٜطٛنْ تُوڢَنٛ کٛعٜ مَࢡّٜ، ڢَکَتْ ࢡٜمَايَنْ ندٜرْ تُوڢٛرْغٛلْ مَࢡّٜ؞

¹⁹ نغُيْکَ طٛنْ حَلْکَ نغٜىٰندَمْ غُجّٛ، عِرِنْ طُعُمْ لَاتَنْتٛ مَرْࢡٜ سُونٛ ڢُو؞

دٜىٰنْتِنْکِ حِکْمَ

²⁰ نَنٜ‏! حِکْمَ طٛنْ يٜىٰيْنَ حَا لَابِ، کَ طٛنْ تٛوْنَ سَوْتُ مَاکَ حَا بَبٜ ڢُو؞

²¹ کَ طٛنْ عٜوْنٛ حَا نٛکُّوجٜ حٛولٛ، حَا جٛلْطٜ بٜرْنِوٛلْ کَ طٛنْ وٛلْوَ حَالَ مَاکَ‏:

²² «عٛنٛنْ حُمَکِعٜنْ، ندٜيْ عٛنْ عَشَّتَ حُمَکَاکُ؟ حَا ندٜيٜ جَنْشٛوࢡٜ تٛکَّتَ سٜيٛرَاغٛ جَنْشُکِ؟ حَا ندٜيٜ ڢَاتَاࢡٜ تٛکَّتَ وَࢩُغٛ عَنْدَلْ؟

²³ کَکِّلَنٜ ڢٜلٛورٜ عَمْ، سَاعِ مِطٛنْ ڢَامْتِنَ عٛنْ حَکِّيلٛ عَمْ، مِطٛنْ عَنْدِنَ عٛنْ سَوَرِ عَمْ؞

²⁴ مِعٜوْنِ عٛنْ، عَمَّا عٛنْ شَلِ نٛوتَاغٛ؞ مِڢٛرْتِ جُنغٛ عَمْ حٜىٰدِ مٛوطٛنْ، عَمَّا عٛنْ کَکِّلَايْ؞

²⁵ عٛنْ نغُدِنِ کٛ مبِعْمِ عٛنْ ڢُو، عٛنْ نغِطَانٛ نَنُغٛ ݠٜلٛوجٜ عَمْ؞

²⁶ نغَمْ مَاجُمْ مِجَلَنْ دٛوْ سَرُّ مٛنْ، مِجَنْشَنْ عٛنْ تٛ کُلْتٛرٜىٰنغٛلْ عُکَّنَکٜ عٛنْ،

²⁷ تٛ نغٛلْ عُکَّنَکٜ عٛنْ بَنَ نَارْغٜوٛلْ، تٛ سَرُّ مٛنْ وَرِ بَنَ دُلُورُ، تٛ ࢡِلَّارٜ عٜ کُلٛلْ نغَرِ دٛوْ مٛوطٛنْ؞

²⁸ ندٜنْ کَمْ عٛنْ عٜوْنٛتٛ يَمْ، عَمَّا مِجَابَتَاکٛ؞ عٛنْ طَࢡِّتِتَّمْ، عَمَّا عٛنْ تَوَتَا يَمْ؞

²⁹ عٛنْ مٜىٰطَايْ نَڢْتٛرَاغٛ عَنْدَلْ، عٛنْ طٛنْ شَلٛ حُلُغٛ جَوْمِرَاوٛ ڢٛرٛيْ؞

³⁰ عٛنْ نغِطَا مِدَوْرَنَ عٛنْ، عٛنْ کَکِّلَنَايْ ݠٜلٛوجٜ عَمْ؞

³¹ نغَمْ مَاجُمْ عٛنْ ࢩَامَنْ نَڢُودَ حَلّٜىٰندٜ مٛنْ، عٛنْ کَارَنْ دَبَرٜىٰجِ مٛنْ کَلُّطِ؞

³² نغَمْ تُورْتٛلْ حُمَکِعٜنْ مبَرَنْ ࢡٜ، سٛويْندٜ دٜىٰنْتَاکِ ڢَاتَاࢡٜ حَلْکَنْ ࢡٜ؞

³³ عَمَّا کٛو مٛيْ حٜطِتَکٜ يَمْ، جٛوطٛتٛ جَمْ، عٛدٜعِّتَنْ، عٛحُلَتَا سَرُّ؞»