ڢِلِݠِّعٜنْ 2 - دٜڢْتٜرٜ اَللَّه ڢُلْڢُلْدٜ عَدَمَوَ

يَنغْکِنَارٜ اَلْمَسِيحُ عٜ مَنغُ مُوطُمْ

¹ اَلْمَسِيحُ سٜمْبِطِنِ عٛنْ نَ؟ يِيدٜ مَاکٛ سُوسْطِنِ عٛنْ نَ؟ رُوحُ مَاکٛ حَوْتِ عٛنْ نَ؟ عٛنْ طٛنْ نغِطِنْدِرَ نَ؟ عٛنْ طٛنْ عٜنْطِنْدِرَ نَ؟

² تٛ نٛنّٛنْ، ندٜنْ کَمْ تِمِّدِنٜ سٜيٛ عَمْ‏: نجٛوطٛدٜ عٛنْ نَرُّࢡٜ، ندٜرْ يِيدٜ وٛورٜ عٜ ࢡٜرْندٜ وٛورٜ عٜ عَنِّيَ نغٛوتَ؞

³ تَا نغَطٜ کٛو طُمٜ بٜى نُمٛوجِ کَاجُطِ مَلَّ نغَمْ مَنْتٛرَاغٛ کٛعٜ مٛنْ؞ عَمَّا ندٜرْ يَنغْکِنَارٜ، ندَارٜ وٛطْࢡٜ بَنَ ࢡُرْࢡٜ عٛنْ؞

⁴ تَا غٛطّٛ حَکِّلَنَ کٛ نَڢَتَ حٛورٜ مُمْ، عَمَّا کٛ نَڢَتَ وٛطْࢡٜ؞

⁵ نُمٛ مٛوطٛنْ لَاتٛ بَنَ نغٛ عِيسَى اَلْمَسِيحُ‏:

⁶ کَنغْکٛ عٛ اَللَّه، بٜى نٛنْ ڢُو عٛجٛوطٛرَاکِ دَرْندٜ مَاکٛ،

⁷ عٛعَشِّ کٛ عٛمَرْنٛ ڢُو، عٛوَرْتِرِ حٛورٜ مَاکٛ مَشُّطٛ، عٛلَاتِ غٛوتٛ شَکَ يِمْࢡٜ، يِمْࢡٜ عَنْدِتِمٛ عٛ نٜطّٛ؞

⁸ عٛلٜىٰسْتِنِ حٛورٜ مَاکٛ، عٛطٛوْتَنِ اَللَّه حَا يٛتِّ مَايْدٜ، مَايْدٜ دٛوْ لٜغَّلْ غَاڢَانغَلْ؞

⁹ نغَمْ مَنْ اَللَّه ࢡَنغْتِمٛ دٛوْ کٛو طُمٜ، حٛکِّمٛ عِنْدٜ ࢡُرْندٜ عِنْطٜ ڢُو؞

¹⁰ ندٜنْ کَمْ بٜى عِنْدٜ عِيسَى کٛو مٛيْ ندٜرْ عَسَمَ عٜ دٛوْ لٜسْدِ عٜ لٜسْ لٜسْدِ کٛوڢٛ يٜىٰسٛ مَاکٛ

¹¹ عٜ کٛو مٛيْ سٜىٰدَ‏: «عِيسَى اَلْمَسِيحُ وٛنِ جَوْمِرَاوٛ» نغَمْ تٜدُّنغَلْ اَللَّه بَابِرَاوٛ؞

جَيْلِ ندٜرْ دُنِيَارُ

¹² يِطَاࢡٜ عَمْ، سَاعِ مِ طٛنّٛ وٛنْدِ بٜى مٛوطٛنْ، عٛنْ طٛوْتَنِ يَمْ ڢٛرٛيْ؞ کٛو جٛنْتَ ندٜ مِوَلَاطٛنْ بٛو، طٛوْتَنٜىٰطَمْ، مبَنغِنٜ کِسْندَمْ مٛنْ ندٜرْ کُلٛلْ عٜ دِوْنغٛلْ،

¹³ نغَمْ اَللَّه بٜى حٛورٜ مُمْ طٛنْ حُووَ ندٜرْ مُويٛ مٛنْ عٜ ندٜرْ کُوطٜ مٛنْ ڢٛدّٜ عَنِّيَ مُمْ مبٛوطْکَ؞

¹⁴ ندٜرْ کُوطٜ مٛنْ ڢُو تَا نغُرْنغُرْتٜ، تَا نجٛکِّرٜ،

¹⁵ نغَمْ حَا عٛنْ لَاتٛ لَاࢡّٜ ࢡٜنغَلَا عَيْبٜ، عٛنْ ࢡِࢡّٜ اَللَّه تِمُّࢡٜ شَکَ يِمْࢡٜ ڢَاسِکِعٜنْ، وٛنِّيࢡٜ ࢡٜعٜ؞ نجَيْنٜ شَکَ مَࢡّٜ بَنَ جَيْلِ حَا دُنِيَارُ؞

¹⁶ عَنْدِنٜ ࢡٜ وٛلْدٜ نغٜىٰندَمْ، حَا مِحٜࢡَ مَنْتٛرَاغٛ عٛنْ ࢩَنْدٜ ندٜ اَلْمَسِيحُ لٛرٛيْتٛ، نغَمْ تَا کُوغَلْ عَمْ عٜ تٛرَّ عَمْ لَاتٛ مٜىٰرٜ؞

¹⁷ کٛو تٛ ࢨِيࢨَمْ عَمْ لَاتٛتٛ بَنَ دٛکَّلْ دُڢٜتٜىٰنغَلْ دٛوْ کِرْسَاطُمْ عٜ دٜوَلْ مٛنْ ندٜرْ نُطِّنْکِ مٛنْ، مِسٜيٛرْتٛ طُمْ عٜ مِسٜيٛدٛتّٛ بٜى مٛوطٛنْ ڢُو؞

¹⁸ بَنَ نٛنْ شٜيٛرٜ طُمْ عٛنٛنْ بٛو، شٜيٛدٜ بٜى عَمْ؞

تِمٛتٜ عٜ عٜݠَڢْرٛدِتْ

¹⁹ تٛ جَوْمِرَاوٛ عِيسَى مُويِ، مِتَمِّ نٜلُغٛ تِمٛتٜ لَوْ حَا مٛوطٛنْ، نغَمْ حَا عٛدٜعِّتِنَمِّ بٜى کُبَرْ مٛوطٛنْ؞

²⁰ مِوَلَا غٛطّٛ بَنَ مَاکٛ مٛ حَکِّيلٛ مُمْ يَحْدِ بٜى نغٛ عَمْ، مٛ طٛنْ سُکْلَنِ عٛنْ بٜى غٛونغَ؞

²¹ لُتُّࢡٜ ڢُو طٛنْ شُکْلَنِ کٛ نَڢَتَ کٛعٜ مُوطُمْعٜنْ، نَا کٛ نَڢَتَ عِيسَى اَلْمَسِيحُ؞

²² عٛنٛنْ عٛنْ عَنْدِ نٛ حٛولَارٜ مَاکٛ وَنغِرِ؞ بَنَ ࢡِطّٛ کٛمْبِ بَابَ مُمْ، نٛنْ عٛحُووْدِ بٜى عَمْ نغَمْ لِنْجِيلَ؞

²³ نغَمْ مَنْ، مِتَمِّ نٜلُغٛ مٛ حَا مٛوطٛنْ لَوْ، تٛ مِڢَامِ بٜى لَاࢡْطُمْ کٛ لَاتَنْتٛ يَمْ؞

²⁴ مِطٛنْ حٛولِ جَوْمِرَاوٛ بٛو، مِࢡَدَکٜ وَرْغٛ حَا مٛوطٛنْ مِنْ بٜى حٛورٜ عَمْ؞

²⁵ مِلَارِ طُمْ کَاندُطُمْ مِلٛرْنَنَ عٛنْ دٜىٰرْطِرَاوٛ عَمْ عٜݠَڢْرٛدِتْ، کُووْدِطِّرَاوٛ عَمْ، بَلُّطٛ يَمْ ندٜرْ حَࢡْرٜ، نٜلَاطٛ مٛ عٛنْ نٜلْنٛ حَا عَمْ نغَمْ حُمْتُغٛ حَاجٜ عَمْ؞

²⁶ عَمَّا عٛطٛنْ يٜنْوَ عٛنْ مَسِنْ، عٛࢡِلَّکٜ جَمُمْ نغَمْ عٛنْ نَنِ عٛࢩَوْطٛنٛ؞

²⁷ ڢَکَتْ عٛࢩَوِنٛ حَا عٛࢡَدَکٜ مَايُغٛ؞ عَمَّا اَللَّه عٜنْطِمٛ، نَا کَنغْکٛ تَنْ، عَمَّا مِنْ بٛو، نغَمْ تَا سُنٛ طُوطَنَمِّ؞

²⁸ نغَمْ مَنْ مِيَاوْطِ لٛرْنُغٛ مٛ حَا مٛوطٛنْ، حَا عٛنْ شٜيٛ يِعُغٛ مٛ ڢَحِنْ، مِنْ بٛو سَکْلٜرٜ عَمْ عُسْتٛ؞

²⁹ نجَࢡّٜ مٛ بٜى سٜيٛ مَنغٛ ندٜرْ جَوْمِرَاوٛ کَدِ؞ تٜدِّنٜ عِرِنْ يِمْࢡٜ ࢡٜعٜ،

³⁰ نغَمْ عٛࢡَدِنٛ مَايُغٛ نغَمْ کُوغَلْ اَلْمَسِيحُ؞ عٛحَسْدِ کٛو مَايُغٛ، نغَمْ حَا عٛحٜبِّتِنَ کٛ نغَکِّ حَا بَلَّلْ مٛوطٛنْ نغَمْ عَمْ؞