ڢِلٜمٛنْ 1 - دٜڢْتٜرٜ اَللَّه ڢُلْڢُلْدٜ عَدَمَوَ

کٛوڢْنغٛلْ

¹ مِنْ ݠٛلْ، کَࢡَّاطٛ نغَمْ دَلِيلَ عِيسَى اَلْمَسِيحُ عٜ تِمٛتٜ، دٜىٰرْطِرَاوٛ مٜنْ، يَحُغٛ حَا ڢِلٜمٛنْ، غِطَاطٛ عٜ کُووْدِطِّرَاوٛ عَمِنْ

² عٜ حَا عَڢِيَ، دٜىٰرْطِرَاوٛ مٜىٰطٜنْ دٜبّٛ عٜ عَرْکِݠُّسْ، کَوْتِطِّرَاوٛ مٜىٰطٜنْ ندٜرْ حَࢡْرٜ عٜ نُطِّنْࢡٜ مٛوࢡْتٛتٛوࢡٜ ندٜرْ سَارٜ مَ‏:

³ اَللَّه بَابِرَاوٛ مٜنْ عٜ عِيسَى اَلْمَسِيحُ جَوْمِرَاوٛ مٜنْ ندٛکَّ عٛنْ مٛعّٜرٜ عٜ سَلَامَنْ؞

يِيدٜ ڢِلٜمٛنْ عٜ نُطِّنْکِ مُوطُمْ

⁴ دٜىٰرْطَمْ ڢِلٜمٛنْ، کٛو ندٜيْ مِتٛرٛتٛ اَللَّه، مِطٛنْ سِڢْتٛرٜ، مِطٛنْ يٜتَّ مٛ،

⁵ نغَمْ مِطٛنْ نَنَ نٛ عَيِطِرِ سٜنَاࢡٜ اَللَّه ڢُو، نٛ نُطِّنْکِ مَ وَعِ ندٜرْ عِيسَى اَلْمَسِيحُ بٛو؞

⁶ مِطٛنْ تٛرٛ اَللَّه، حَا کَوْتَلْ مٜىٰطٜنْ ندٜرْ نُطِّنْکِ لَاتِنَ عٜنْ نَڢٛوࢡٜ بٜى وَطُغٛ مبٛوطٜىٰنغَ نغَمْ دَلِيلَ اَلْمَسِيحُ؞

⁷ يِيدٜ مَ سٜيْنِ يَمْ عٜ سُوسْطِنِ يَمْ مَسِنْ، عَدٜعِّتِنِ بٛو ࢡٜرْطٜ يِمْࢡٜ اَللَّه ڢُو؞

ݠٛلْ تٛرِ ڢِلٜمٛنْ نغَمْ عٛنٜسِمُسْ

⁸ نغَمْ مَاجُمْ، کٛو تٛ مِطٛنْ بٜى ندِمُ ندٜرْ اَلْمَسِيحُ نغَمْ عُمْرُغٛ مَ کٛ حَانِ،

⁹ عَمَّا نغَمْ دَلِيلَ يِيدٜ مِطٛنْ تٛرٛ مَ، مِنْ ݠٛلْ، ندٛتِّيجٛ، جٛنْتَ بٛو مِ کَࢡَّاطٛ نغَمْ عِيسَى اَلْمَسِيحُ‏:

¹⁰ مِطٛنْ تٛرٛ مَ نغَمْ عٛنٜسِمُسْ، لَاتِيطٛ ࢡِنغٜلْ عَمْ حَا طٛ ندٜرْ ڢُرْسِنَ، نغَمْ مِنْ مِنَسْتِنِمٛ نُطِّنْکِ؞

¹¹ نَانٜ عٛنَڢَايْنٛ مَ، عَمَّا جٛنْتَ عٛنَڢٜتٜ، عٛنَڢَتَمْ مِنْ بٛو؞

¹² جٛنْتَ مِطٛنْ لٛرْنَ مٛ حَا مَاطَ؞ کَنغْکٛ، عٛلَاتِ غِطَاطٛ عَمْ مَسِنْ؞

¹³ مِࢡُرَنّٛ يِطُغٛ عٛجٛوطٛدٛ بٜى عَمْ مبَتُّدِ مَ حَا عٛوَلَّمِّ جٛنْتَ ندٜرْ ڢُرْسِنَ کَ نغٛنْمِ نغَمْ دَلِيلَ لِنْجِيلَ؞

¹⁴ عَمَّا مِيِطَا وَطُغٛ طُمْ بِلَا يٜرْدُيٜ مَ، نغَمْ تَا مِدٛولٜ حُووُغٛ کُوغَلْ بٛوطْنغَلْ نغَعَلْ؞ حُووْ نغَلْ بٜى نغِطَ مَ؞

¹⁵ تٜىٰمَ عٛنٜسِمُسْ سٜىٰدِ بٜى مَ نغَمْ وَکَّتِ سٜطَّ نغَمْ حَا کٜࢡْتَ مٛ نغَمْ ڢٛرٛيْ،

¹⁶ تَا عٛلَاتٛ مَشُّطٛ مَ تَنْ ڢَحِنْ، عَمَّا مٛ ࢡُرِ مَشُّطٛ، وَاتٛ دٜىٰرْطِرَاوٛ مَ غِطَاطٛ ندٜرْ نُطِّنْکِ؞ مِنْ مِيِطِمٛ مَسِنْ، عَمَّا مِتَمِّ عَنْ عَࢡُرَتَمْ يِطُغٛ مٛ ݠِوْ، نَا ڢٛدّٜ طَبِيَ نٜطّٛ تَنْ، عَمَّا ڢٛدّٜ نُطِّنْکِ ندٜرْ اَلْمَسِيحُ بٛو؞

¹⁷ نغَمْ مَاجُمْ، تٛ عَلَارِ ڢَکَتْ مِ کَوْتِطِّرَاوٛ مَ، ندٜنْ کَمْ جَࢡَّ مٛ بَنَ نٛ عَجَࢡّٛرْتٛ يَمْ، مِنْ بٛو؞

¹⁸ تٛ عٛوَطِنٛ مَ کَلُّطُمْ، تٛ وٛودِ کٛ تٛکِّيطَ مٛ، مِنْ عَࢨَمَتَ؞

¹⁹ ندَا، مِوِنْدِ بٜى جُنغٛ عَمْ‏: مِنْ ݠٛلْ، مِيٛࢡٜتٜ؞ عَعَنْدِ تٛ مِيِطِنٛ، مِوَاوَنّٛ تٛکَّاغٛ مَ نغَمْ يٛنغْکِ مَ؞

²⁰ عُسٜنِ، دٜىٰرْطَمْ، وَطَنَمْ طُمْ نغَمْ يِيدٜ جَوْمِرَاوٛ؞ دٜعِّتِنْ ࢡٜرْندٜ عَمْ نغَمْ دَلِيلَ کَوْتَلْ مٜىٰطٜنْ ندٜرْ اَلْمَسِيحُ‏!

²¹ مِطٛنْ وِنْدَنٜ نغَمْ مِعَنْدِ ڢَکَتْ عَطٛوْتَنْتٛ يَمْ؞ مِعَنْدِ عَوَطَنْ کٛ ࢡُرَ؞

²² جٛنْتَ بٛو، تَاسْکِتَنَمْ وٜىٰرْدٜ، نغَمْ مِتَمِّ اَللَّه جَࢡَنْ تٛرْطٜ مٛوطٛنْ، عٛلٛرْنَتَمْ حَا مٛوطٛنْ؞

کٛوڢْلِ رَغَرٜىٰجِ

²³ عٜݠَڢْرَسْ غٛنْدُطٛ بٜى عَمْ ندٜرْ ڢُرْسِنَ نغَمْ دَلِيلَ عِيسَى اَلْمَسِيحُ حٛوڢْنِ مَ؞

²⁴ مَرْکُسْ عٜ عَرِسْتَرْکُسْ عٜ دٜمَسْ عٜ لُکَ حُووْدِطِّرَاࢡٜ عَمْ بٛو کٛوڢْنِ مَ؞

²⁵ مٛعّٜرٜ جَوْمِرَاوٛ مٜىٰطٜنْ عِيسَى اَلْمَسِيحُ وٛنْدَ بٜى مٛوطٛنْ ڢُو؞