لِمْلٜ 1 - دٜڢْتٜرٜ اَللَّه ڢُلْڢُلْدٜ عَدَمَوَ

لِمْکِ إِسْرَاءِيلَعٜنْ

¹ ندٜرْ ندُوࢡُ طِطَࢡُ ࢡَاوٛ غُرْتَاکِ إِسْرَاءِيلَعٜنْ دِغَ لٜسْدِ مِصْرَ، لٜوْرُ طِطَࢡْرُ، ࢩَنْدٜ غٛعٛورٜ مَارُ، جَوْمِرَاوٛ وٛلْوَنِ مُوسَى ندٜرْ لَيْمَارُ ڢٛتِّرْدٜ حَا لَدّٜ حَمَادَارٜ سِنَ؞ عٛوِعِ‏:

^2-3 «عَنْ عٜ هَـٰرُونَ، مبَطٜ بِنْدٛلْ‏: مبِنْدٜ لِمْغَلْ يِمْࢡٜ جَمَعَارٜ إِسْرَاءِيلَ ڢُو ڢٛدّٜ عَسْلِ مُوطُمْعٜنْ عٜ شِعٜ مُوطُمْعٜنْ، مبِنْدٜ عِنْطٜ وٛرْࢡٜ ڢُو، وَاوَنْࢡٜ حٛوعُغٛ بَلْمِ کٛنُ، ࢡٜ دُوࢡِ نٛوغَسْ عٜ کٛ ࢡُرِ، کٛو مٛيْ ندٜرْ مٛوࢡْرٜ کٛنُ مُوطُمْ؞

⁴ حَا لٜࢩٛلْ ڢُو بَابَ-سَارٜ غٛوتٛ وَلَّنْ عٛنْ؞

⁵ ندَا عِنْطٜ وَلَّنْࢡٜ عٛنْ‏: ندٜرْ لٜࢩٛلْ رُبٜنْ، عٜلِشُرُ ࢡِي سٜدٜوُرْ؞

⁶ ندٜرْ لٜࢩٛلْ سِمٜيٛنْ، سٜلُمِيٜلْ ࢡِي شُرِسَدَّيْ؞

⁷ ندٜرْ لٜࢩٛلْ يَحُودَ، نَحَسُنُ ࢡِي عَمِّنَدَبُ؞

⁸ ندٜرْ لٜࢩٛلْ عِسَّکَرْ، نٜتَنٜيٜلْ ࢡِي شُعَرْ؞

⁹ ندٜرْ لٜࢩٛلْ زَبُلٛنْ، عٜلِيَبُ ࢡِي حٜلٛنْ؞

¹⁰ ندٜرْ لٜࢩٛلْ عٜڢْرَيِمْ ࢡِي يُوسُڢُ، عٜلِيسَمَ ࢡِي عَمِّحُدُ عٜ حَا لٜࢩٛلْ مَنَسَّ بٛو، غَمَلِيٜلْ ࢡِي ݠٜدَشُرُ؞

¹¹ ندٜرْ لٜࢩٛلْ بٜنْيَمِنْ، عَبِدَنْ ࢡِي غِدِعٛنِ؞

¹² ندٜرْ لٜࢩٛلْ دَنْ، عَحِعٜزٜرْ ࢡِي عَمِّسَدَّيْ؞

¹³ ندٜرْ لٜࢩٛلْ عَسٜرْ، ݠَغِيٜلْ ࢡِي عٛکْرَنْ؞

¹⁴ ندٜرْ لٜࢩٛلْ غَدَ، عٜلِيَسَڢْ ࢡِي دٜعُوٜلْ؞

¹⁵ ندٜرْ لٜࢩٛلْ نٜڢْتَلِ، عَحِيرَ ࢡِي عٜنَنْ؞»

¹⁶ کَمْࢡٜ نغٛنِ وٛرْࢡٜ سُࢡَاࢡٜ ندٜرْ جَمَعَارٜ، عَرْدِيࢡٜ لٜعِ مُوطُمْعٜنْ، ࢡٜ عَرْدِيࢡٜ عُجِنٜىٰجٜ إِسْرَاءِيلَ؞

¹⁷ مُوسَى عٜ هَـٰرُونَ کٛوعِ يِمْࢡٜ سُࢡَاࢡٜ عِنْدٜ بٜى عِنْدٜ ࢡٜعٜ؞

¹⁸ ࢡٜمٛوࢡْتِ جَمَعَارٜ ڢُو ࢩَنْدٜ غٛعٛورٜ ندٜرْ لٜوْرُ طِطَࢡْرُ؞ إِسْرَاءِيلَعٜنْ ڢُو مبِنْدَامَ ندٜرْ دٜڢْتٜ ڢٛدّٜ عَسْلِ عٜ شِعٜ مُوطُمْعٜنْ؞ ࢡٜمبِنْدِ عِنْطٜ وٛرْࢡٜ ࢡٜ دُوࢡِ نٛوغَسْ عٜ کٛ ࢡُرِ ڢُو، غٛوتٛ غٛوتٛ،

¹⁹ مُوسَى لِمِ يِمْࢡٜ ندٜرْ لَدّٜ حَمَادَارٜ سِنَ بَنَ جَوْمِرَاوٛ عُمْرُنٛ مٛ؞

²⁰ وٛرْࢡٜ ࢡٜ دُوࢡِ نٛوغَسْ عٜ کٛ ࢡُرِ، وَاوَنْࢡٜ حٛوعُغٛ بَلْمِ کٛنُ ڢُو مبِنْدَامَ عِنْدٜ عِنْدٜ، ڢٛدّٜ عَسْلِ مُوطُمْعٜنْ عٜ شِعٜ مُوطُمْعٜنْ؞ ࢡٜݠُطِّرِ بٜى لٜࢩٛلْ رُبٜنْ، عَڢٛ إِسْرَاءِيلَ؞

²¹ لِمْغَلْ لِمَاࢡٜ ندٜرْ لٜࢩٛلْ رُبٜنْ وَطِ عُجِنٜ شَݠَّنْطٜ نَيٛ عٜ نجٛوٜىٰغٛ عٜ تٜىٰمٜطّٜ نجٛوٛ (46,500)؞

^22-23 لٜࢩٛلْ سِمٜيٛنْ‏: عُجِنٜ شَݠَّنْطٜ نجٛوٛ عٜ نجٛوٜىٰنَيٛ عٜ تٜىٰمٜطّٜ تَتٛ (59,300)؞

^24-25 لٜࢩٛلْ غَدَ‏: عُجِنٜ شَݠَّنْطٜ نَيٛ عٜ نجٛوٛ عٜ تٜىٰمٜطّٜ نجٛوٜىٰغٛ عٜ شَݠَّنْطٜ نجٛوٛ (45,650)؞

^26-27 لٜࢩٛلْ يَحُودَ‏: عُجِنٜ شَݠَّنْطٜ نجٛوٜىٰطِطٛ عٜ نَيٛ عٜ تٜىٰمٜطّٜ نجٛوٜىٰغٛ (74,600)؞

^28-29 لٜࢩٛلْ عِسَّکَرْ‏: عُجِنٜ شَݠَّنْطٜ نجٛوٛ عٜ نَيٛ عٜ تٜىٰمٜطّٜ نَيٛ (54,400)؞

^30-31 لٜࢩٛلْ زَبُلٛنْ‏: عُجِنٜ شَݠَّنْطٜ نجٛوٛ عٜ نجٛوٜىٰطِطٛ عٜ تٜىٰمٜطّٜ نَيٛ (57,400)؞

^32-33 لٜࢩٛلْ عٜڢْرَيِمْ ࢡِي يُوسُڢُ‏: عُجِنٜ شَݠَّنْطٜ نَيٛ عٜ تٜىٰمٜطّٜ نجٛوٛ (40,500)؞

^34-35 لٜࢩٛلْ مَنَسَّ ࢡِي يُوسُڢُ‏: عُجِنٜ شَݠَّنْطٜ تَتٛ عٜ طِطٛ عٜ تٜىٰمٜطّٜ طِطٛ (32,200)؞

^36-37 لٜࢩٛلْ بٜنْيَمِنْ‏: عُجِنٜ شَݠَّنْطٜ تَتٛ عٜ نجٛوٛ عٜ تٜىٰمٜطّٜ نَيٛ (35,400)؞

^38-39 لٜࢩٛلْ دَنْ‏: عُجِنٜ شَݠَّنْطٜ نجٛوٜىٰغٛ عٜ طِطٛ عٜ تٜىٰمٜطّٜ نجٛوٜىٰطِطٛ (62,700)؞

^40-41 لٜࢩٛلْ عَسٜرْ‏: عُجِنٜ شَݠَّنْطٜ نَيٛ عٜ نغٛعٛ عٜ تٜىٰمٜطّٜ نجٛوٛ (41,500)؞

^42-43 لٜࢩٛلْ نٜڢْتَلِ‏: عُجِنٜ شَݠَّنْطٜ نجٛوٛ عٜ تَتٛ عٜ تٜىٰمٜطّٜ نَيٛ (53,400)؞

^44-46 بَنَ نِي مُوسَى عٜ هَـٰرُونَ عٜ بَابَ-شِعٜعٜنْ لَاتِيࢡٜ عَرْدِيࢡٜ لٜعِ سَݠّٛ عٜ طِطِ لِمِ وٛرْࢡٜ إِسْرَاءِيلَعٜنْ ࢡٜ دُوࢡِ نٛوغَسْ عٜ کٛ ࢡُرِ وَاوَنْࢡٜ حٛوعُغٛ بَلْمِ کٛنُ ڢُو، ڢٛدّٜ شِعٜ مَࢡّٜ؞ لِمْغَلْ مَࢡّٜ ڢُو وَطِ عُجِنٜ تٜىٰمٜطّٜ نجٛوٜىٰغٛ عٜ تَتٛ عٜ تٜىٰمٜطّٜ نجٛوٛ عٜ شَݠَّنْطٜ نجٛوٛ (603,550)؞

⁴⁷ عَمَّا لٜࢩٛلْ لٜوِعٜنْ، ڢٛدّٜ لٜࢩٛلْ بَابِرَاࢡٜ مُوطُمْعٜنْ لِمْدَاکَ بٜى مَࢡّٜ،

⁴⁸ نغَمْ جَوْمِرَاوٛ وِعْنٛ مُوسَى‏:

⁴⁹ «تَا مبِنْدٜ لٜࢩٛلْ لٜوِ، تَا لِمُ نغٛلْ شَکَ إِسْرَاءِيلَعٜنْ؞

⁵⁰ عَمَّا حَلْڢِنْ لٜوِعٜنْ کُوغَلْ ندٜرْ جٛوطٛرْدٜ سٜىٰدَمْکُ عَلْکَوَلْ، نٛنْ بٛو کُووْرُطٜ غٛنْطٜ ندٜرْ مَارٜ ڢُو؞ ࢡٜندٛونْدٛ جٛوطٛرْدٜ عٜ کُووْرُطٜ مَارٜ، ࢡٜکُووَ ندٜرْ مَارٜ عٜ ࢡٜشَنغِنَ ندٜرْ تَارْدٜ مَارٜ بٛو؞

⁵¹ سٜيْ لٜوِعٜنْ ݠِيسْتَ جٛوطٛرْدٜ سَاعِ ندٜ جَحَانغَلْ عُمّٛتٛ ڢُو؞ ندٜ شَنغِنْتٛنْ ڢُو بٛو، ࢡٜندَرْنَ ندٜ ڢَحِنْ؞ تٛ غٛطّٛ ڢٜىٰرٜ ࢡَدِتَکٜ ندٜ، عٛ مبَرٜتٜىٰطٛ؞

⁵² إِسْرَاءِيلَعٜنْ لُتُّࢡٜ شَنغِنَ حَا نٛکُّوجٜ مُوطُمْعٜنْ، کٛو مٛيْ بٜى مٛوࢡْرٜ کٛنُ مُمْ، بَنغٜ تُوتَوَلْ ڢٛدّٜ يٜࢡْرٜ مُمْ؞

⁵³ لٜوِعٜنْ کَمْ شَنغِنَ ندٜرْ تَارْدٜ جٛوطٛرْدٜ، نغَمْ تَا تِکّٜرٜ عَمْ عُکّٛ دٛوْ جَمَعَارٜ إِسْرَاءِيلَ؞ ࢡٜشُکْلَنْتٛ کُوطٜ ندٜرْ جٛوطٛرْدٜ سُنْدُکْرُ عَلْکَوَلْ؞»

⁵⁴ إِسْرَاءِيلَعٜنْ مبَطِ ڢُو کَلْ-کَلْ بَنَ نٛ جَوْمِرَاوٛ عُمْرُنٛ مُوسَى؞