نٜحٜمِيَ 1 - دٜڢْتٜرٜ اَللَّه ڢُلْڢُلْدٜ عَدَمَوَ

نٜحٜمِيَ نَنِ حَبَرُ عُرُسَلِيمَ

¹ ندَا حَالَ نٜحٜمِيَ ࢡِي حَکَلِيَ‏: ندٜرْ لٜوْرُ کِسْلٜوْ، ندُوࢡُ لَامِيطٛ عَرْتَحَسْتَ نٛوغَسْوُ، مِ طٛنّٛ حَا سُوزَ، لَامٛرْدٜ سُوزَ؞

² سَاعِ مَنْ حَنَنِ، غٛوتٛ شَکَ دٜىٰرْطِرَاࢡٜ عَمْ وَرْدِ بٜى وٛطْࢡٜ دِغَ يَحُودَ؞ مِࢨَمِ ࢡٜ حَالَ يَحُودُعٜنْ حِسْࢡٜ، لُتُّࢡٜ دَحَاࢡٜنٛ عٜ حَالَ عُرُسَلِيمَ؞

³ ࢡٜنجَابِ يَمْ‏: «لُتُّࢡٜ تٛنْ ندٜرْ لٜسْدِ، حِسْࢡٜ دَحٜىٰکِ طٛنْ بٜى بٛنٜىٰجِ نَاوْطِ عٜ تٛسْکَارٜ؞ غِبّٜ نغَطَامَ حَا مَحٛلْ تَارِينغٛلْ عُرُسَلِيمَ، دَمُّطٜ مَاغٛلْ نغُلَامَ بٜى يِيتٜ؞»

تٛرْندٜ نٜحٜمِيَ

⁴ ندٜ مِنَنِ حَالَ کَ مِجٛوطِ، مِوٛيِ، مِ شُنِيطٛ ࢩَلْطٜ طُوطّٜ، مِسُومِ، مِتٛرِ اَللَّه مٛ عَسَمَ،

⁵ مِوِعِ‏: «يَا اَللَّه جَوْمِرَاوٛ مٛ عَسَمَ، اَللَّه مَوْطٛ کُلْنِيطٛ‏! عَطٛنْ حَکِّلَنَ عَلْکَوَلْ مَ عٜ عَطٛنْ وَطَنَ يِطْࢡٜ مَ عٜ طٛوْتَنِيࢡٜ عُمْرٛوجٜ مَ مبٛوطٜىٰنغَ؞

⁶ عُسٜنِ، لَارْ، حٜطِتَ، جَࢡْ تٛرْندٜ مَشُّطٛ مَ ندٜ مِتٛرٛتٛ مَ حَنْدٜ جٜمَّ عٜ نَانغٜ نغَمْ إِسْرَاءِيلَعٜنْ مَشُّࢡٜ مَ؞ مِطٛنْ وَنغِنَ حَکّٜىٰجِ إِسْرَاءِيلَعٜنْ يٜىٰسٛ مَ؞ مِنْ مبَطِ حَکّٜ دٛوْ مَاطَ، مِنْ بٜى حٛورٜ عَمْ عٜ يِمْࢡٜ سَارٜ بَابَ عَمْ بٛو؞

⁷ مِنْ مبَطِ کَلُّطُمْ مَسِنْ دٛوْ مَاطَ، مِنْ طٛوْتَنَاکِ ڢَرِلَّاجِ عٜ عُمْرٛوجٜ عٜ کِيتَاجِ طِ عُمْرُطَ جَغِّيطٛ مَ مُوسَى؞

⁸ عُسٜنِ، سِڢْتٛرْ وٛلْدٜ ندٜ عُمْرُطَ جَغِّيطٛ مَ مُوسَى؞ عَوِعِمٛ‏: تٛ عٛنْ زَمْبَکٜ يَمْ، مِسَنغْکِتَنْ عٛنْ ندٜرْ عُمَّاتٛوجٜ؞

⁹ عَمَّا تٛ عٛنْ لٛرْتَکٜ حَا عَمْ، تٛ عٛنْ طٛوْتَنَکٜ عُمْرٛوجٜ عَمْ، ندٜنْ کَمْ مِمٛوࢡْتَنْ سَنغْکِتَاࢡٜ مٛوطٛنْ کٛو حَا کٜىٰرِ دُنِيَارُ ڢُو، مِحٛورَنْ ࢡٜ حَا نٛکُّورٜ ندٜ شُࢡْمِ نغَمْ تَبِتِنْغٛ عِنْدٜ عَمْ تٛنْ؞ –

¹⁰ ࢡٜ مَشُّࢡٜ مَ عٜ عُمَّاتٛورٜ مَ؞ عَسٛوتِّ ࢡٜ بٜى بَاوْطٜ مَ مَوْطٜ عٜ جُنغٛ مَ سٜمْبِطْنغٛ؞

¹¹ يَا جَوْمِرَاوٛ، حٜطِتَ تٛرْندٜ مَشُّطٛ مَ عٜ تٛرْطٜ مَشُّࢡٜ مَ، يِطْࢡٜ حُلُغٛ عِنْدٜ مَ ڢُو؞ عُسٜنِ، مَشُّطٛ مَ حٜࢡَ سَاعَ حَنْدٜ، وَطْ حَا مِحٜࢡَ مٛعّٜرٜ حَا غٛرْکٛ عٛو؞» نغَمْ مِنْ مِ دٛکّٛووٛ لَامِيطٛ نجَرَمْجِ؞