مِکَ 1 - دٜڢْتٜرٜ اَللَّه ڢُلْڢُلْدٜ عَدَمَوَ

کِيتَ دٛوْ سَمَرِيَ عٜ عُرُسَلِيمَ

¹ جَوْمِرَاوٛ وٛلْوَنِ مِکَ مٛ مٛرَسٜتْ ندٜرْ زَمَنُ يٛتَمْ عٜ عَکَسْ عٜ حٜزٜکِيَ، لَامِيࢡٜ يَحُودَ؞ ندَا کٛ مِکَ يِعِ دٛوْ سَمَرِيَ عٜ عُرُسَلِيمَ‏:

² نَنٜ، عٛنٛنْ عُمَّاتٛوجٜ ڢُو‏! حٜطِتَ، عَنْ لٜسْدِ عٜ کٛ حٜبِّنِ مَ‏! اَللَّه جَوْمِرَاوٛ وُلّٛتٛ عٛنْ دِغَ حَيْکَلِيرُ مُوطُمْ سٜنِيندُ‏!

³ ندَا، جَوْمِرَاوٛ طٛنْ وُرْتٛ نٛکُّورٜ مُوطُمْ، طٛنْ جِݠّٛ، طٛنْ يَاࢡَ دٛوْ تٛوْندِيجٜ دُنِيَارُ؞

⁴ کٛوسٜىٰجٜ طٛنْ ࢡٛلْوَ لٜسْ ݠَالَنْطٜ مَاکٛ، وَادِيجِ طٛنْ شٜىٰکَ بَنَ تَارِ ندٜرْ يِيتٜ، بَنَ ندِيَمْ عِلَنْطَمْ حَا دِيرْتٛرْدٜ؞

⁵ طُمْ ڢُو طُمْ لَاتِ دَلِيلَ تُورْتٛلْ يَعْقُوبُ عٜ حَکّٜىٰجِ عُمَّاتٛورٜ إِسْرَاءِيلَ؞ طُمٜ وٛنِ تُورْتٛلْ يَعْقُوبُ؟ نَا طُمْ سَمَرِيَ؟ عٜ طٜيٜ نغٛنِ نٛکُّوجٜ يَحُودَ تٛوْطٜ؟ نَا طُمْ عُرُسَلِيمَ؟

⁶ جَوْمِرَاوٛ وِعِ‏: «مِلَاتِنَنْ سَمَرِيَ وَاغَارٜ کَاعٜ حَا نغٜسَ عٜ نٛکُّورٜ نغَمْ جُبَاغٛ عِنَبٛوجٜ؞ مِوُبٛتٛ کَاعٜ بٜرْنِوٛلْ سَمَرِيَ حَا لٜسْ ندٜرْ وَادِوٛلْ، مِوَنغِنَنْ شَࢡَّاجٜ مَاغٛلْ؞

⁷ ࢡٜݠُسَنْ لَبِّ مَاغٛلْ شٜحَاطِ ڢُو؞ نغٜىٰنَارِ مَاغٛلْ ڢُو وُلٜتٜ بٜى يِيتٜ عٜ مِيِبِّنَنْ لَبِّ مَاغٛلْ ڢُو، نغَمْ نغٛلْ حٜࢡْرِ طِ بٜى نغٜىٰنَارِ دَاکَارٜىٰکُ، طِ نغَرْتَنْ بٛو نغٜىٰنَارِ دَاکَارٜىٰکُ؞»

⁸ نغَمْ مَاجُمْ مبٛيَنْمِ، نغٛوکَنْمِ، نجَحَنْمِ مِتٜمْبٛ، بِلَا ݠَطٜ؞ مِوَطَنْ غٛوکَالِ بَنَ شُولِ، مِوَطَنْ بٛجِّ بَنَ دَبِّ؞

⁹ نغَمْ حُودُورٜ مَاغٛلْ حُرْغَتَاکٛ، ندٜ لَيِ حَا يَحُودَ، ندٜ يٛتِّ حَا دَمُّغَلْ عُمَّاتٛورٜ عَمْ، حَا عُرُسَلِيمَ‏!

کٛنّٜعٜنْ طٛنْ ࢡَدِتٛ عُرُسَلِيمَ

¹⁰ تَا نغٛويْنٜ طُمْ حَا غَاتْ، تَا مبٛيٜ سَمْ؞ تَلّٜ ندٜرْ مبُلْوُلْدِ حَا بَيْتِ-لٜعَڢْرَ؞

¹¹ عَنْ جٛوطِيطٛ حَا سَڢِرْ، سَالَ، عَتٜمْبٛ، تٛسْکَاطٛ؞ جٛوطِيطٛ حَا شَعَنَنْ وُرْتَتَاکٛ؞ دَلِيلَ غٛوکَالِ بٜرْنِوٛلْ بَيْتِ-عٜسٜلْ، عٛنْ عِتَّنَامَ بَلَّلْ مَاغٛلْ؞

¹² جٛوطِيطٛ حَا مَارٛتْ طٛنْ حُلَ نغَمْ تَا جَمْ مُوطُمْ عِتّٜ، نغَمْ سَرُّ جِݠِّ دِغَ جَوْمِرَاوٛ، يٛتِّ دَمُّغَلْ عُرُسَلِيمَ؞

¹³ عَنْ جٛوطِيطٛ حَا لَکِسْ، حَࢡُّ ݠُشِّ مٛوتَاجِ مَ؞ نغَمْ لَکِسْ، عَنْ وٛنِ ڢٛڢٛودُ حَکّٜىٰجِ عُرُسَلِيمَ، عَنَسْتِنِ إِسْرَاءِيلَ ندٜرْ تُورْتٛلْجِ؞

¹⁴ نغَمْ مَاجُمْ دٛولٜ عَسٜنْدِرَ بٜى مٛرَسٜتْ-غَاتْ؞ شِعٜ عَکِزِبْ لَاتَنْتٛ لَامِيࢡٜ إِسْرَاءِيلَ دَلِيلَ تٛسْکَارٜ؞

¹⁵ عَنْ جٛوطِيطٛ حَا مَرٜسَ، ڢَحِنْ مِوَدَّنْتٜ جَالٛتٛوطٛ مَ؞ تٜدُّنغَلْ إِسْرَاءِيلَ يَحَنْ حَا عَدُلَّمْ؞

¹⁶ لَࢡُ حٛورٜ مَ‏! عِتُّ غَاسَ مَ نغَمْ دَلِيلَ ࢡِࢡّٜ مَ يِطَاࢡٜ‏! وَرْتِرْ ندٜ بَنَ حٛورٜ جِغَاوَلْ، نغَمْ ࢡِࢡّٜ مَ ندَحَامَ دَايِيطُمْ بٜى مَاطَ‏!