مَلَکِيَ 1 - دٜڢْتٜرٜ اَللَّه ڢُلْڢُلْدٜ عَدَمَوَ

جَوْمِرَاوٛ يِطِ إِسْرَاءِيلَ

¹ ندَا کٛنغٛلْ نغٛلْ جَوْمِرَاوٛ وٛلْوِ بٜى حُنْدُکٛ مَلَکِيَ‏:

² جَوْمِرَاوٛ وِعِ‏: «مِيِطِ عٛنْ؞» عَمَّا عٛنٛنْ عٛنْ طٛنْ ࢨَمَ‏: «طُمٜ حٛلَّتَ عَيِطِ مِنْ؟» جَوْمِرَاوٛ طٛنْ جَابٛ‏: «نَا عِسُوَ وٛنِ دٜىٰرْطُ يَعْقُوبُ؟ عَمَّا يَعْقُوبُ نغِطْمِ،

³ عِسُوَ کَمْ مِوَࢩِ طُمْ؞ مِوَرْتِرِ کٛوسٜىٰجٜ مَاکٛ بِلّٜ مٜىٰرٜ، مِحٛکِّ شُولِ مَرَلْ مَاکٛ؞»

⁴ تٛ عٜدٛومِعٜنْ مبِعِ‏: «ࢡٜمبِلِ مِنْ غُرٜ، عَمَّا مِنْ مَحِتِتّٛ بِلّٜ عَمِنْ»، ندٜنْ کَمْ جَوْمِرَاوٛ حٛنٛوࢡٜ عَسَمَ وِعَنْ‏: «بٛوطُّمْ، کَمْࢡٜ ࢡٜمَحَنْ، عَمَّا مِنْ مِيِبِّنَنْ طُمْ؞» نغَمْ مَاجُمْ يِمْࢡٜ عٜوْنٛتٛ عٜدٛومْ لٜسْدِ حَلّٜىٰندٜ عٜ عُمَّاتٛورٜ ندٜ جَوْمِرَاوٛ تِکَّنِ حَا ڢٛرٛيْ؞

⁵ غِتٜ مٛوطٛنْ نغِعَنْ طُمْ؞ ندٜنْ عٛنْ مبِعَنْ‏: «جَوْمِرَاوٛ وٛنِ مَوْطٛ، کٛو غَطَ کٜىٰرِ إِسْرَاءِيلَ بٛو؞»

ڢٜلٛورٜ دٛوْ لِمَنْعٜنْ

⁶ جَوْمِرَاوٛ حٛنٛوࢡٜ عَسَمَ وِعِ لِمَنْعٜنْ‏: «ࢡِطّٛ تٜدِّنَنْ بَابَ مُمْ، مَشُّطٛ بٛو تٜدِّنَنْ جَوْمُمْ؞ ندٜ نِي مِ بَابِرَاوٛ، تٛيْ تٜدُّنغَلْ نغَلْ حَانْدَنِ يَمْ؟ ندٜ نِي مِ جَوْمِرَاوٛ، تٛيْ تٜدِّنٛورٜ ندٜ حَانْدَنِ يَمْ؟ عٛنٛنْ لِمَنْعٜنْ، عٛنْ طٛنْ نجَوٛ عِنْدٜ عَمْ؞ عَمَّا عٛنْ طٛنْ مبِعَ‏: بٜى طُمٜ مِنْ نجَوْرِ ندٜ؟

⁷ بٜى لِيعَاغٛ ࢩَامْدُ سٛࢡْندُ دٛوْ حِرْسِرْدٜ عَمْ؞ عَمَّا عٛنْ طٛنْ مبِعَ‏: بٜى طُمٜ مِنْ شٛࢡْنِرِ مَ؟ بٜى نُمُغٛ‏: تَابَلْ جَوْمِرَاوٛ وٛنِ حُوندٜ مٜىٰرٜ؞

⁸ تٛ عٛنْ لِيعَنَکٜ يَمْ دَبَّاجِ بُمْطِ کِرْسٜتٜىٰطِ، نَا طُمْ کَلُّطُمْ نَ؟ تٛ عٛنْ لِيعَنِ يَمْ دَبَّاجِ بٛوسْطِ عٜ ࢩَاوْطِ، نَا طُمْ کَلُّطُمْ نَ؟ سٜيْ عٛنْ نجَحَ، عٛنْ ندٛکَّ طُمْ نغٛمْنَ مٛوطٛنْ؞ عٛنْ تَمِّ طُمْ ڢٛتَّنَنْ مٛ نَ؟ کٛو عٛيٜرْدٛتٛ عٛنْ نَ؟» نٛنْ جَوْمِرَاوٛ حٛنٛوࢡٜ عَسَمَ وِعِ؞

⁹ جٛنْتَ تٛرٜ اَللَّه حَا عٛمٛعَّنَ عٜنْ؞ ندٜ نِي عٛنْ لِيعَنَکٜ مٛ دٛکّٜ بَنَ نِي، کَنغْکٛ عٛيٜرْدٛتٛ عٛنْ نَ؟ نٛنْ جَوْمِرَاوٛ حٛنٛوࢡٜ عَسَمَ وِعِ؞

¹⁰ «عَيّٜ‏! ࢡُرَنّٛ تٛ غٛوتٛ مٛنْ مَࢡِّ دَمُّطٜ حَيْکَلِيرُ، نغَمْ تَا عٛنْ کُࢡَّ يِيتٜ مٜىٰرٜ دٛوْ حِرْسِرْدٜ عَمْ‏! مِسٜيٛرَاکِ عٛنْ سَمْ، مِجَࢡَتَا دٛکَّلْ دِغَ جُوطٜ مٛوطٛنْ؞ نٛنْ جَوْمِرَاوٛ حٛنٛوࢡٜ عَسَمَ وِعِ؞

¹¹ نغَمْ دِغَ ڢُطِرْدٜ نَانغٜ حَا مُتِرْدٜ مَاغٜ، عُمَّاتٛوجٜ طٛنْ تٜدِّنَ عِنْدٜ عَمْ مَوْندٜ؞ کٛو تٛيْ ڢُو يِمْࢡٜ طٛنْ نغُلَ عُورْلٜ نغَمْ عِنْدٜ عَمْ، ࢡٜطٛنْ لِيعَنٛ يَمْ دٛکّٜ لَاࢡْطٜ نغَمْ عِنْدٜ عَمْ مَوْندٜ شَکَ عُمَّاتٛوجٜ؞ نٛنْ جَوْمِرَاوٛ حٛنٛوࢡٜ عَسَمَ وِعِ؞

¹² عَمَّا عٛنٛنْ عٛنْ طٛنْ شٛࢡْنَ عِنْدٜ عَمْ بٜى وِعُغٛ‏: تَابَلْ جَوْمِرَاوٛ سٛࢡِ، ࢩَامْدُ دٛوْ مَاغَلْ بٛو لَاتِ مٜىٰرٜ؞

¹³ عٛنْ طٛنْ مبِعَ بٛو‏: کَيَّ، تٛرَّ مٜىٰرٜ نٛنْ‏! عٛنْ طٛنْ نجَوٛ يَمْ؞ نٛنْ جَوْمِرَاوٛ حٛنٛوࢡٜ عَسَمَ وِعِ؞ عٛنْ طٛنْ نغَدَّ دَبَّاجِ طِ عٛنْ نغُجِّ مَلَّ بٛوسْطِ عٜ ࢩَاوْطِ، حَا عٛنْ لِيعَنٛ يَمْ طِ کِرْسٜتٜىٰطِ؞ عٛنْ تَمِّ مِجَࢡَنْ طِ دِغَ جُوطٜ مٛوطٛنْ نَ؟ نٛنْ جَوْمِرَاوٛ وِعِ؞

¹⁴ نَالٛورٜ دٛوْ رِکِشِيجٛ مَرْطٛ نجَوْدِرِ ندِ عٛتٛغَنِ يَمْ ندٜرْ تٛکّٜرٜ مَاکٛ، عَمَّا عٛلِيعَنِ يَمْ کَلُّندِ؞ نغَمْ مِ لَامِيطٛ مَوْطٛ، عِنْدٜ عَمْ بٛو ندٜ حُلْنِيندٜ شَکَ عُمَّاتٛوجٜ؞» نٛنْ جَوْمِرَاوٛ حٛنٛوࢡٜ عَسَمَ وِعِ؞