ڢَرِلَّاجِ لٜوِعٜنْ 1 - دٜڢْتٜرٜ اَللَّه ڢُلْڢُلْدٜ عَدَمَوَ

عُمْرٛوجٜ دٛوْ کِرْسٜتٜىٰطِ عٜ غُلٜتٜىٰطِ

¹ جَوْمِرَاوٛ عٜوْنِ مُوسَى، وٛلْوَنِمٛ ندٜرْ لَيْمَارُ ڢٛتِّرْدٜ، وِعِمٛ‏:

² «عُمْرُ إِسْرَاءِيلَعٜنْ عُمْرٛوجٜ دٛوْ کِرْسٜتٜىٰطِ مَࢡّٜ، وِعْ ࢡٜ‏: تٛ غٛطّٛ يِطِ لِيعَنَاغٛ جَوْمِرَاوٛ دٛکَّلْ، سٜيْ عٛحٛوعَ نغَلْ حَا نَعِ مَاکٛ مَلَّ دَمّٛوجِ مَاکٛ؞

³ تٛ عٛيِطِ لِيعَاغٛ نغُلٜتٜىٰنغَ ندٜرْ نَعِ مَاکٛ، سٜيْ عٛحٛوعَ نغَارِ کَلْحَلْدِ ندِ وَلَا عَيْبٜ؞ سٜيْ عٛلِيعٛ ندِ حَا دَمُّغَلْ لَيْمَارُ ڢٛتِّرْدٜ، نغَمْ حَا جَوْمِرَاوٛ يٜرْدٛ ندِ؞

⁴ عٛيٛوَ جُوطٜ مَاکٛ دٛوْ حٛورٜ مَارِ، جَوْمِرَاوٛ بٛو جَࢡَنْ ندِ نغَمْ عٛيَاڢٛ حَکّٜىٰجِ غٛطّٛ عٛو؞

⁵ عٛحِرْسَ نغَارِ مَنْ تٛنْ يٜىٰسٛ جَوْمِرَاوٛ؞ لِمَنْعٜنْ دَࢩْغٛلْ هَـٰرُونَ کٛوعَ ࢨِيࢨَمْ مَارِ، مبِشَّ طَمْ حَا حِرْسِرْدٜ دَرِيندٜ يٜىٰسٛ لَيْمَارُ ڢٛتِّرْدٜ، حَا بَکٜىٰجٜ مَارٜ نَيِ ڢُو؞

⁶ ندٜنْ عٛࢡٛلَ ندِ، عٛسٜنْدَ ندِ غٜࢡٜ غٜࢡٜ؞

⁷ لِمَنْعٜنْ دَࢩْغٛلْ هَـٰرُونَ کُࢡَّ يِيتٜ دٛوْ حِرْسِرْدٜ، نجٛوْنْدِنْدِرَ لٜطّٜ دٛوْ مَاغٜ؞

⁸ ندٜنْ ࢡٜکٛوعَ غٜࢡٜ نغَارِ حَوْتَادٜ بٜى حٛورٜ مَارِ عٜ ࢡٜلّٜرٜ مَارِ، ࢡٜمبَلِّنَ طٜ دٛوْ يِيتٜ حِرْسِرْدٜ؞

⁹ سٜيْ غٛطّٛ غٛ لٛوتَ تٜتٜکِ مَارِ عٜ کٛلْشٜ مَارِ شَکِتِيطٜ بٜى ندِيَمْ؞ ندٜنْ لِمَنْجٛ وُلَ طُمْ ڢُو دٛوْ حِرْسِرْدٜ؞ کَنْجُمْ وٛنِ نغُلٜتٜىٰنغَ؞ عُورٜىٰنغٛلْ مَاغَ بٜلْنغٛلْ ڢٛتَّنَنْ جَوْمِرَاوٛ؞

¹⁰ «تٛ غٛطّٛ يِطِ لِيعَاغٛ نغُلٜتٜىٰنغَ ندٜرْ بَالِ مُمْ مَلَّ بٜعِ مُمْ، سٜيْ عٛحٛوعَ نجَوْدِرِ ندِ وَلَا عَيْبٜ؞

¹¹ عٛحِرْسَ ندِ حَا وَکٜىٰرٜ حِرْسِرْدٜ وٛيْلَارٜ يٜىٰسٛ جَوْمِرَاوٛ؞ لِمَنْعٜنْ دَࢩْغٛلْ هَـٰرُونَ مبِشَّ ࢨِيࢨَمْ مَارِ حَا بَکٜىٰجٜ مَارٜ نَيِ ڢُو؞

¹² عٛسٜنْدَ ندِ غٜࢡٜ غٜࢡٜ، لِمَنْجٛ بٛو وَلِّنَ غٜࢡٜ مَارِ ڢُو حَوْتَادٜ بٜى حٛورٜ مَارِ عٜ ࢡٜلّٜرٜ مَارِ دٛوْ يِيتٜ حِرْسِرْدٜ؞

¹³ سٜيْ غٛطّٛ غٛ لٛوتَ تٜتٜکِ مَارِ عٜ کٛلْشٜ مَارِ شَکِتِيطٜ بٜى ندِيَمْ؞ ندٜنْ لِمَنْجٛ لِيعَنٛ جَوْمِرَاوٛ طُمْ ڢُو، وُلَ طُمْ دٛوْ حِرْسِرْدٜ؞ کَنْجُمْ وٛنِ نغُلٜتٜىٰنغَ؞ عُورٜىٰنغٛلْ مَاغَ بٜلْنغٛلْ ڢٛتَّنَنْ جَوْمِرَاوٛ؞

¹⁴ «تٛ غٛطّٛ يِطِ لِيعَاغٛ سٛنْدُ وُلٜتٜىٰندُ، سٜيْ عٛحٛوعَ ݠٛولَ مَسَرْ مَلَّ ݠٛولَ ڢٜىٰرٜ؞

¹⁵ لِمَنْجٛ وَدَّ نغَ حَا حِرْسِرْدٜ، عِتَّ حٛورٜ مَاغَ، وُلَ ندٜ دٛوْ حِرْسِرْدٜ؞ ندٜنْ عٛࢡِطَّ نغَ حَا وُتُّدُ حِرْسِرْدٜ نغَمْ وُرْتِنْغٛ ࢨِيࢨَمْ مَاغَ؞

¹⁶ سٜيْ عٛعِتَّ وَيْوٛودٜ مَاغَ بٜى کٛ وٛنِ ندٜرْ مَارٜ، عٛسَکِّنَ طُمْ حَا نٛکُّورٜ ندٛونْدِ کِرْسَاطِ، حَا ڢُونَانغٜ حِرْسِرْدٜ؞

¹⁷ عٛنَنغَ بِلٜىٰجِ ݠٛولَ، عٛڢٛوطَ طِ حَا عٛسٜىٰکَ ࢡَنْدُ مَاغَ، عَمَّا تَا عٛسٜنْدَ ندُ غٜࢡٜ طِطِ؞ ندٜنْ عٛوُلَ نغَ دٛوْ حِرْسِرْدٜ؞ کَنْجُمْ وٛنِ غُلٜتٜىٰطُمْ؞ عُورٜىٰنغٛلْ مَنْ بٜلْنغٛلْ ڢٛتَّنَنْ جَوْمِرَاوٛ؞»