غِمٜ بٛيْکِ 1 - دٜڢْتٜرٜ اَللَّه ڢُلْڢُلْدٜ عَدَمَوَ

بٛجِّ عُرُسَلِيمَ

¹ کَيْتٛ‏! بٜرْنِوٛلْ عُرُسَلِيمَ يٜىٰوَامَ، نَانٜ نغٛلْ حٜىٰوِ يِمْࢡٜ‏! نَانٜ عُمَّاتٛوجٜ تٜدِّنِ نغٛلْ، جٛنْتَ نغٛلْ لَاتِ بَنَ دٜبّٛ جُرُمْطٛ؞ نغٛلْ لَامَنِنٛ لٜسْطٜ، جٛنْتَ نغٛلْ نَسْتِ نجٜيَانغُ؞

² جٜمَّ ڢُو نغٛلْ طٛنْ وٛيَ، غٛنْطِ طٛنْ دٛوْ غَلَنغٜ مَاغٛلْ؞ يِطْࢡٜ نغٛلْ ڢُو، وَلَا کٛو غٛوتٛ مَࢡّٜ دٜعِّتِنْتَ نغٛلْ؞ سٛوبَعٜنْ مَاغٛلْ ڢُو زَمْبِ نغٛلْ، لَاتِ کٛنّٜعٜنْ مَاغٛلْ؞

³ يِمْࢡٜ يَحُودَ ڢُو ندَحَامَ، لَاتِ مَشُّࢡٜ، تٛرَّاࢡٜ؞ ࢡٜطٛنْ نجٛوطِ ندٜرْ لٜسْطٜ جَنَنّٜ، ࢡٜنغَلَا سِوْتَارٜ؞ کٛنّٜعٜنْ طٛنْ تَارٛ ࢡٜ، لَاوٛلْ دَطُغٛ وٛودَا؞

⁴ لَابِ سِيٛنَ ݠٜرْوِ، نغَمْ وَلَا غَرَنْطٛ حَا جُولْطٜ؞ وَلَا کٛو غٛطّٛ حَا دَمُّطٜ بٜرْنِوٛلْ، لِمَنْعٜنْ طٛنْ عُومَ، ڢَاࢩْࢡٜ رٜوْࢡٜ طٛنْ شُنٛ، سِيٛنَ طٛنْ ندٜرْ مٜتَّمْࢡٜرَمْ؞

⁵ ࢡِلّٛوࢡٜ نغٛلْ نجَالِ نغٛلْ، کٛنّٜعٜنْ مَاغٛلْ طٛنْ بٜى جَمْ؞ جَوْمِرَاوٛ يَرْنِ نغٛلْ بٛنٜ نغَمْ حَکّٜىٰجِ مَاغٛلْ طُوطِّ؞ کٛنّٜعٜنْ نَنغِ ࢡِکّٛيْ مَاغٛلْ، دَحِ کٛيْ؞

⁶ دَرَجَ عُرُسَلِيمَ عِتَّکٜ؞ مَوْࢡٜ مَاغٛلْ نَنْدِ بٜى لٜلْجِ دٛغَّنْطِ يٜىٰسٛ لٛوحٛووٛ، طِ تَمْݠُطِ نغَمْ طِ تَوَايْ دُرْدُطٜ؞

⁷ ندٜرْ ࢩَلْطٜ ࢡِلَّارٜ عٜ غَانْشِ مَاغٛلْ، نغٛلْ طٛنْ سِڢْتٛرَ دَرَجَ مَاغٛلْ نَانٜ؞ ندٜ کٛنّٜعٜنْ ࢩَامِ نغٛلْ، وَلَا بَلُّطٛ نغٛلْ؞ ࢡِلّٛوࢡٜ نغٛلْ شٜيٛرِ دٛعّٜرٜ مَاغٛلْ، نجَانْشِ نغٛلْ؞

⁸ بٜرْنِوٛلْ عُرُسَلِيمَ وَطِ حَکّٜىٰجِ نَاوْطِ، نغٛلْ لَاتِ بَنَ جِدّٜرٜ؞ تٜدِّنْࢡٜ نغٛلْ نَانٜ نغِعِ تٜمْبُکِ مَاغٛلْ، طٛنْ نجَوٛ نغٛلْ؞ نغٛلْ طٛنْ عُومَ، نغٛلْ وَيْلِتِ ࢡَاوٛ؞

⁹ شٛࢡْکِ مَاغٛلْ طٛنْ تَکّٛ غَوَرْلٜ لِمْشٜ مَاغٛلْ، نغٛلْ نُمَايْ تِمّٛودٜ مَاغٛلْ؞ نغٛلْ دٛعِّ دٛعّٜرٜ نَاوْندٜ، وَلَا مٛ دٜعِّتِنْتَ نغٛلْ؞ نغٛلْ طٛنْ تٛرٛ جَوْمِرَاوٛ عٜنْطَ نغٛلْ، نغَمْ کٛنّٜعٜنْ نجَالِ نغٛلْ؞

¹⁰ ࢡِلّٛوࢡٜ نغٛلْ نجَࢡْتِ ندٜسَاجٜ مَاغٛلْ ڢُو؞ نغٛلْ يِعِ نٛ سَادٛونِعٜنْ نَسْتِرِ سُودُ سٜنِيندُ کٛو ندٜ جَوْمِرَاوٛ حَطْنٛ ࢡٜنَسْتُغٛ ندٜرْ مٛوࢡْرٜ يِمْࢡٜ مُمْ؞

¹¹ يِمْࢡٜ عُمَّاتٛورٜ مَاغٛلْ ڢُو طٛنْ عُومَ، طٛنْ طَࢡِّتَ ࢩَامْدُ؞ ࢡٜطٛنْ ندٛکَّ جَوْدِ مَࢡّٜ نغَمْ ࢡٜکٜࢡَ ࢩَامْدُ، ࢡٜنغٜىٰطَ؞ بٜرْنِوٛلْ طٛنْ تٛرٛ جَوْمِرَاوٛ‏: «لَارْ نٛ ࢡٜنجَوٛرِ يَمْ‏!»

¹² «عٛنٛنْ سَالٛتٛوࢡٜ ڢُو، تَا سَرُّ نغُعُ حٜࢡَ عٛنْ‏! وٛودِ نَاوٛرْلَ بَنَ نَاوٛرْلَ عَمْ نَ، کَ جَوْمِرَاوٛ يَرْنَتَمِّ ندٜرْ وَکَّتِ تِکّٜرٜ مُمْ؟

¹³ عٛجِݠِّنِ يِيتٜ، نغٜ وُلِ ندٜرْ عَمْ؞ عٛتُوڢَنِ يَمْ تُوڢٛرْغٛلْ، عٛلٛرْنِ يَمْ ࢡَاوٛ؞ عٛلَاتِنِ يَمْ غٜىٰوَاطٛ، مِ ࢩَوْطٛ ڢٛرٛيْ؞

¹⁴ عٛلَارِ حَکّٜىٰجِ عَمْ ڢُو، عٛحَࢡِّ طِ کَࢡّٛلْ، عٛيٛوِ طِ دٛوْ دَاندٜ عَمْ، تٜدّٜىٰنغَ مَاجِ تَمْݠِنِ يَمْ؞ جَوْمِرَاوٛ حٛکِّ يَمْ حَا جُوطٜ ࢡُرْدَنْࢡٜ يَمْ سٜمْبٜ؞

¹⁵ جَوْمِرَاوٛ وُدِنِ حٛنٛوࢡٜ سٜمْبِطْࢡٜ وٛنْࢡٜ ندٜرْ عَمْ ڢُو؞ عٛنٜلِ جَمَعَارٜ کٛنُ دٛوْ عَمْ، ندٜ نَمَ سُکَعٜنْ عَمْ؞ عٛࢡِطِّ يَمْ بَنَ عِنَبٛوجٜ ندٜرْ ࢡِطِّرْدٜ؞

¹⁶ نغَمْ مَاجُمْ مبٛيَنْمِ، غِتٜ عَمْ طٛنْ عِلْنَ غٛنْطِ؞ دٜعِّتِنٛووٛ يَمْ، غٜىٰطِتِنْطٛ يٛنغْکِ عَمْ دَايَکٜ؞ ࢡِکّٛيْ عَمْ طٛنْ شَکْلٛ، نغَمْ کٛنّٜعٜنْ ࢡُرْدِ کٛيْ سٜمْبٜ؞

¹⁷ مِطٛنْ وٜىٰطَ جُوطٜ عَمْ، عَمَّا بَلّٛووٛ يَمْ وٛودَا؞ جَوْمِرَاوٛ مٛوࢡْتِ دٛوْ عَمْ ࢡِلّٛوࢡٜ تَارِيࢡٜ يَمْ؞ ࢡٜطٛنْ ندَارَمِّ بَنَ حُوندٜ ࢩِدُّندٜ؞

¹⁸ عَمَّا جَوْمِرَاوٛ عٛ عَدِلِيجٛ، کٛو تٛ مِتُورْتَنِ عُمْرٛوجٜ مَاکٛ؞ نَنٜىٰطَمْ، عٛنٛنْ عُمَّاتٛوجٜ ڢُو، ندَارٜ بٛنٜ عَمْ؞ ڢَاࢩْࢡٜ رٜوْࢡٜ عَمْ عٜ سُکَعٜنْ عَمْ ندَحَامَ؞

¹⁹ مِعٜوْنِ يِطْࢡٜ يَمْ، عَمَّا ࢡٜزَمْبِ يَمْ؞ لِمَنْعٜنْ عٜ ندٛتِّعٜنْ مَايِ دٛوْ لَابِ عَمْ، سَاعِ ࢡٜطٛنْ طَࢡِّتَ ࢩَامْدُ حَا ࢡٜنغٜىٰطَ؞

²⁰ يَا جَوْمِرَاوٛ، لَارْ ࢡِلَّارٜ عَمْ، تٜتٜکِ عَمْ طٛنْ نغُلَ، ࢡٜرْندٜ عَمْ تَعِ نغَمْ دَلِيلَ تُورْتٛلْ عَمْ؞ کَاڢَحِ مبَرِ ࢡِکّٛيْ عَمْ حَا يَاسِ، وَادٜ نَسْتِ شُوطِ ڢُو؞

²¹ يِمْࢡٜ نَنِ عُومَالِ عَمْ، عَمَّا وَلَا مٛ دٜعِّتِنِ يَمْ؞ کٛنّٜعٜنْ عَمْ طٛنْ شٜيٛرٛ سَرُّ نغُ عُکَّنْطَامِ؞ وَدُّ ࢩَلَادٜ ندٜ نغٛويْنُطَ، حَا ࢡٜلَاتٛ بَنَ عَمْ؞

²² حَلّٜىٰندٜ مَࢡّٜ ڢُو وَرَ يٜىٰسٛ مَ؞ حِيتَ ࢡٜ بَنَ کِيتٛرِيطَ مِ نغَمْ دَلِيلَ حَکّٜىٰجِ عَمْ؞ نغَمْ عُومَالِ عَمْ طُوطِ، ࢡٜرْندٜ عَمْ ࢩَوِ؞»