يَحُودَ 1 - دٜڢْتٜرٜ اَللَّه ڢُلْڢُلْدٜ عَدَمَوَ

کٛوڢْنغٛلْ

¹ مِنْ يَحُودَ، مَشُّطٛ عِيسَى اَلْمَسِيحُ، دٜىٰرْطِرَاوٛ يَاکُبَ، مِطٛنْ وِنْدَنَ عٛنْ عٛنٛنْ عٜوْنَاࢡٜ، يِطَاࢡٜ اَللَّه بَابِرَاوٛ عٜ عَيْنَاࢡٜ عِيسَى اَلْمَسِيحُ؞

² حِنُّيٜ عٜ سَلَامَنْ عٜ يِيدٜ طُوطَنَ عٛنْ؞

کِيتَ عٜکِّتِنٛوࢡٜ ݠٜوٜ

³ سٛوبِرَاࢡٜ عَمْ يِطَاࢡٜ، مِيٜلِنٛ مَسِنْ وِنْدَنغٛ عٛنْ دٛوْ حَالَ کِسْندَمْ طَمْ عٜنْ ڢُو عٜنْ کَوْتِ ندٜرْ مُوطُمْ؞ نغَمْ مَاجُمْ، دٛولٜ مِوِنْدَنَ عٛنْ نغَمْ سُوسْطِنْغٛ عٛنْ ندٜرْ حَࢡْرٜ نغَمْ نُطِّنْکِ کِ اَللَّه حٛکِّ يِمْࢡٜ مُوطُمْ ندٜ وٛورٜ، کِ حٜعِ حَا ڢٛرٛيْ؞

⁴ نغَمْ حَلُّࢡٜ شٛرْکَکٜ شَکَ مٛوطٛنْ؞ کِيتَ دٛوْ مَࢡّٜ وِنْدَامَ دِغَ ࢡٛويْمَ؞ ࢡٜنغَيْلِ حَبَرُ مٛعّٜرٜ اَللَّه نغَمْ ࢡٜکٜࢡَ حُجَّ وَطُغٛ دَاکَارٜىٰکُ، ࢡٜنغٜدِّ عِيسَى اَلْمَسِيحُ مٛ وٛنِ جَوْمِرَاوٛ عٜ جَاغٛرْطٛ مٜىٰطٜنْ ڢٜىٰرٜ مُوطُمْ؞

⁵ کٛو ندٜ عٛنْ عَنْدِ کُوجٜ طٜعٜ ڢُو، مِيِطِ سِڢْتِنٛرْغٛ عٛنْ نٛ جَوْمِرَاوٛ حِسْنِرِ إِسْرَاءِيلَعٜنْ دِغَ لٜسْدِ مِصْرَ، عَمَّا ࢡَاوٛطٛنْ عٛحَلْکِ ࢡٜ نغَمْ ࢡٜنُطِّنَايْ مٛ؞

⁶ شِڢْتٛرٜ حَالَ مَلَاعِکَعٜنْ ࢨَࢡُّࢡٜ کٜىٰرٛلْ بَاوْطٜ طٜ اَللَّه حٛکُّنٛ ࢡٜ، ࢡٜعَشِّ جٛوندٜ مَࢡّٜ؞ اَللَّه مَࢡِّ ࢡٜ ندٜرْ ࢩِࢡْرٜ لٜسْ، حَࢡِّ ࢡٜ بٜى شَلَّلُّوجِ طِ ݠِيسْتَتَاکٜ حَا ڢٛرٛيْ؞ ࢡٜطٛنْ ندٜىٰنَ ࢩَنْدٜ کِيتَ مَࢡّٜ تٛنْ؞

⁷ بَنَ نٛنْ بٛو سٛدٛمَ عٜ غٛمٛرَّ بٜى بٜرْنِيجِ ݠِلْتُطِ؞ يِمْࢡٜ مَاجِ مبَطِ بَنَ مَلَاعِکَعٜنْ غٛ مبَطِ، ࢡٜتٛکِّ وَطُغٛ دَاکَارٜىٰکُ، ࢡٜمبَطِ بَالْدَلْ نغَلْ لُوتِ طَبِيَ؞ کِيتَ يِيتٜ دُومِينغٜ طٛنْ تٛرَّ ࢡٜ، طُمْ لَاتِ دٜىٰنْتِنْکِ نغَمْ يِمْࢡٜ ڢُو؞

⁸ بَنَ نِي بٛو، يِمْࢡٜ سٛرْکُࢡٜ شَکَ مٛوطٛنْ غٛ، ندٜرْ رَايُ مَࢡّٜ، ࢡٜطٛنْ شٛࢡْنَ ࢡَلِّ مَࢡّٜ؞ ࢡٜطٛنْ نجَوٛ بَاوْطٜ اَللَّه، ࢡٜطٛنْ مبٛلْوَ کَلُّکَ دٛوْ تٜدُّࢡٜ عَسَمَ؞

⁹ کٛو مِيکَاعِيلَ، مَوْطٛ مَلَاعِکَعٜنْ، سَاعِ عٛوَابٛتِرِ بٜى سَيْطَانُ دٛوْ ࢡَنْدُ مُوسَى، عٛحُلِ وٛلْوُغٛ کَلُّکَ دٛوْ مَاکٛ، نغَمْ مَاجُمْ عٛوِعِمٛ‏: «جَوْمِرَاوٛ تٜلْࢡَنٜ‏!»

¹⁰ عَمَّا يِمْࢡٜ ࢡٜعٜ ࢡٜطٛنْ مبٛلْوَ کَلُّکَ دٛوْ کٛ ࢡٜݠَامَايْ؞ ࢡٜنغَلَا حَکِّيلٛ بَنَ دَبَّاجِ، کٛ سُونٛوجِ مَࢡّٜ عَنْدِنْتَ ࢡٜ، کَنْجُمْ يَحْرَتَ ࢡٜ حَا حَلْکٜرٜ؞

¹¹ کَيْتٛ‏! بٛنٜ لَاتَنْتٛ ࢡٜ نغَمْ ࢡٜتٛکَّکٜ لَاوٛلْ کَيِنُ؞ کَدِبٛو ࢡٜنجٛوڢِ کٛعٜ مَࢡّٜ ندٜرْ مَجّٜرٜ نغَمْ حٜࢡُغٛ شٜىٰدٜ بَنَ کٛ بَلَامَ وَطْنٛ؞ ࢡٜتُورْتِ بَنَ کٛورَ تُورْتِرْنٛ، ࢡٜکَلْکِ؞

¹² سَاعِ عٛنْ طٛنْ ࢩَامْدَ، ࢡٜطٛنْ نجِيࢡَ کَوْتَلْ مٛوطٛنْ، ࢡٜشٜمْتَتَا سَمْ، ࢡٜطٛنْ کٜبِّنَ دٜىٰطِ مَࢡّٜ تَنْ؞ ࢡٜنَنْدِ بٜى دُولٜ طٜ حٜنْدُ سٛغَّتَ مٜىٰرٜ، طٜ نغَلَا عِيٜىٰندٜ؞ ࢡٜنَنْدِ بٜى لٜطّٜ طٜ ندِمَتَا کٛو تٛ سَاعِ رِمُغٛ يٛتَّکٜ؞ ࢡٜنَنْدِ بٜى لٜطّٜ طٛوڢَاطٜ، بَاتْطٜ؞

¹³ ࢡٜنَنْدِ بٜى ࢨُوغٜ شَاتُطٜ حَا مَايٛ، ࢡٜطٛنْ مبَنغِنَ کُوطٜ مَࢡّٜ شٜمْتِنِيطٜ بَنَ نغُوڢٛ ࢨُوغٜ مَنْ؞ ࢡٜنَنْدِ بٜى کٛودٜ مَجُّطٜ طٜ عَنْدَا لَابِ مَاجٜ؞ اَللَّه تَاسْکَنِ ࢡٜ نٛکُّورٜ ندٜرْ ࢩِࢡْرٜ ࢡُرَنْدٜ ࢩِࢡُّغٛ حَا ڢٛرٛيْ؞

¹⁴ عَنُحُ مٛ يٜىٰطِ ندٜرْ يِدٜرٜ جٛوٜىٰطِطَوْرٜ حَا دَࢩْغٛلْ ءَادَمُ، وَطِ عَنَّبَاکُ دٛوْ مَࢡّٜ دِغَ ࢡٛويْمَ، عٛوِعِ‏: «ندَا، جَوْمِرَاوٛ وَرَنْ بٜى مَلَاعِکَعٜنْ مُوطُمْ سٜنَاࢡٜ عُجِنٜىٰجٜ طُوطّٜ

¹⁵ نغَمْ عٛحِيتٛ يِمْࢡٜ ڢُو؞ عٛحِيتٛتٛ حَکّٜعٜنْ، يٜدُّࢡٜ اَللَّه ڢُو ڢٛدّٜ کُوطٜ مَࢡّٜ کَلُّطٜ ڢُو، عٛحِيتٛتٛ ࢡٜ نغَمْ بٛلّٜ مَࢡّٜ عٜلٜوْطٜ طٜ ࢡٜمبٛلْوِ دٛوْ مَاکٛ ڢُو‏!»

¹⁶ يِمْࢡٜ ࢡٜعٜ طٛنْ نغُرْنغُرْتٛ، ࢡٜطٛنْ شِنغْکَ، ࢡٜطٛنْ تٛکّٛ سُونٛوجِ مَࢡّٜ، کُنْدُطٜ مَࢡّٜ طٛنْ کٜىٰوِ بٛلّٜ مَوْنِتِيطٜ، ࢡٜطٛنْ نجٛبِّتٛ يِمْࢡٜ نغَمْ ࢡٜکٜࢡَ کٛ ࢡٜنغِطِ؞

کَکِّلٜنْ

¹⁷ عَمَّا عٛنٛنْ، سٛوبِرَاࢡٜ عَمْ يِطَاࢡٜ، شِڢْتٛرٜ کٛ نٜلَاࢡٜ جَوْمِرَاوٛ مٜىٰطٜنْ عِيسَى اَلْمَسِيحُ نغٜشُّنٛ عٛنْ دِغَ ࢡٛويْمَ؞

¹⁸ نغَمْ ࢡٜطٛنّٛ مبِعَ عٛنْ‏: «حَا بَلْطٜ رَغَرٜىٰجٜ، جَنْشٛوࢡٜ مبَنغَنْ، ࢡٜنجَنْشَنْ عٛنْ، ࢡٜتٛکّٛتٛ سُونٛوجِ مَࢡّٜ کَلُّطِ؞»

¹⁹ يِمْࢡٜ ࢡٜعٜ مبَطَنْ شٜنْدُکِ شَکَ يِمْࢡٜ؞ سٜيْ طَبِيَ مَࢡّٜ تَنْ ࢡٜتٛکّٛتٛ، ࢡٜنغَلَا رُوحُ اَللَّه؞

²⁰ عَمَّا عٛنٛنْ، سٛوبِرَاࢡٜ عَمْ يِطَاࢡٜ، شٜمْبِطِنٜ کٛعٜ مٛوطٛنْ ندٜرْ عٜکِّتِنٛلْ ࢡُرْنغٛلْ سٜنَاغٛ نغٛلْ عٛنْ عٜکِّتِ؞ تٛرٜ بٜى بَاوْطٜ رُوحُ شٜنِيطٛ،

²¹ تَبِتٜ ندٜرْ يِيدٜ اَللَّه، ندٜ عٛنْ طٛنْ ندٜىٰنَ حَا جَوْمِرَاوٛ مٜىٰطٜنْ عِيسَى اَلْمَسِيحُ حِنّٛ عٛنْ، حٛکَّ عٛنْ نغٜىٰندَمْ ندُومِيطَمْ؞

²² نجُرْمِنٜ سٜکَنْࢡٜ؞

²³ وٛطْࢡٜ، مبِڢْتٜ ࢡٜ دِغَ يِيتٜ، کِسْنٜ ࢡٜ؞ وٛطْࢡٜ بٛو، نجُرْمِنٜ ࢡٜ، عَمَّا ندٜىٰنْتٜ بٜى مَࢡّٜ، تَا مٜىٰمٜ کٛو لِمْشٜ مَࢡّٜ نغَمْ تَا شٛࢡْکِ مَࢡّٜ رَاࢡَ عٛنْ؞

يٜتّٛورٜ

^24-25 تٜدُّنغَلْ عٜ مَنغُ عٜ لَامُ عٜ بَاوْطٜ لَاتَنٛ اَللَّه غٛوتٛ، کِسْنٛووٛ عٜنْ بٜى عِيسَى اَلْمَسِيحُ جَوْمِرَاوٛ مٜىٰطٜنْ، بَاوْطٛ عَيْنُغٛ عٛنْ نغَمْ تَا عٛنْ ندٛعّٛ، حَا عٛنْ مبَنغَ عٛنْ سٜيِيࢡٜ، لَاࢡّٜ يٜىٰسٛ تٜدُّنغَلْ مَاکٛ، دِغَ زَمَنُوجِ شِوَا، نٛنْ بٛو جٛنْتَ عٜ حَا ڢٛرٛيْ؞ عَامِينَ‏!