يٛسُوَ 1 - دٜڢْتٜرٜ اَللَّه ڢُلْڢُلْدٜ عَدَمَوَ

يٛسُوَ لَاتِ عَرْدِيطٛ إِسْرَاءِيلَ

¹ ࢡَاوٛ مَايْدٜ مُوسَى، جَغِّيطٛ جَوْمِرَاوٛ، جَوْمِرَاوٛ وٛلْوَنِ يٛسُوَ ࢡِي نُونَ، بَلّٛووٛ مُوسَى، وِعِ‏:

² «جَغِّيطٛ عَمْ مُوسَى مَايِ؞ کَدِ عُمَّ، عٜىٰرَ مَايٛ عُرْدُنْ نغٛ، عَنْ عٜ عُمَّاتٛورٜ ندٜعٜ ڢُو، حَا عٛنْ نَسْتَ لٜسْدِ ندِ ندٛکَّنْمِ إِسْرَاءِيلَعٜنْ؞

³ نٛکُّورٜ ندٜ کٛسْطٜ مٛنْ نجَاࢡَتَ ڢُو، مِحٛکِّ عٛنْ ندٜ بَنَ مبِعْمِ مُوسَى؞

⁴ دِغَ لَدّٜ عٜ لِبَنٛنْ طٛ يَحُغٛ ڢُونَانغٜ حَا يٛتّٛ مَايٛ مَنغٛ وِعٜتٜىٰنغٛ عٜڢْرَتِسْ، وَاتٛ لٜسْدِ حٜتِعٜنْ ڢُو، يَحُغٛ حِيرْنَانغٜ بٛو حَا يٛتّٛ مبٜىٰلَ، طُمْ ڢُو طُمْ لَاتٛ مَرَلْ مٛوطٛنْ؞

⁵ بَلْطٜ مَ ڢُو وَلَا دَرْتَنْتٛوطٛ مَ؞ بَنَ مِوٛنْدُنٛ بٜى مُوسَى، بَنَ نٛنْ نغٛنْدِرَنْمِ بٜى مَاطَ بٛو؞ مِعَشَّتَا مَ عٜ مِوُدِنْتَا مَ سَمْ ؞

⁶ سٜمْبِطِطْ، لَاتَ شُوسْطٛ، نغَمْ عَنْ رٛنَّتَ يِمْࢡٜ عُمَّاتٛورٜ ندٜعٜ لٜسْدِ ندِ کُنَنِيمِ کَاکِرَاࢡٜ مَࢡّٜ مِحٛکَّنْ ࢡٜ؞

⁷ سٜيْ عَسٜمْبِطَ، عَلَاتٛ شُوسْطٛ مَسِنْ، عَطٛوْتَنٛ تَوْرٜىٰتَ کَ مُوسَى جَغِّيطٛ عَمْ عُمْرِ مَ ڢُو؞ تَا سٜلْ لَاوٛلْ مَاکَ، کٛو حَا ࢩَامٛ کٛو حَا نَنٛ، نغَمْ کٜࢡَ حَيْرُ کٛو تٛيْ نجَحَتَ ڢُو؞

⁸ تٛکَّ جَنغُغٛ دٜڢْتٜرٜ تَوْرٜىٰتَ ندٜعٜ تُمْ، نُمْتُ ندٜ جٜمَّ بٜى ࢩَلَوْمَ ڢُو، نغَمْ حَا عَطٛوْتَنٛ کٛ وِنْدَ ندٜرْ مَارٜ؞ ندٜنْ کَمْ نُڢَيٜىٰجٜ مَ کِࢡّٛتٛ، عَحٜࢡَنْ حَيْرُ؞

⁹ نَا مِعُمْرِ مَ نَ؟ سٜيْ عَسٜمْبِطَ، عَلَاتٛ شُوسْطٛ؞ تَا حُلْ، تَا دِوْتٛرَ سَمْ، نغَمْ مِنْ، اَللَّه جَوْمِرَاوٛ مَاطَ مِطٛنْ وٛنْدِ بٜى مَاطَ حَا نجَحَتَ ڢُو؞»

تَاسْکَرَ عٜىٰرَاکِ مَايٛ عُرْدُنْ

¹⁰ يٛسُوَ عُمْرِ کَلِيڢَعٜنْ عُمَّاتٛورٜ‏:

¹¹ «نغَنْشٜ ندٜرْ سَنغٜىٰرٜ، عُمْرٜ يِمْࢡٜ عُمَّاتٛورٜ نِعِ‏: تَاسْکَنٜ کٛعٜ مٛنْ نجٛوࢡَارِ، نغَمْ ندٜرْ ࢩَلْطٜ تَتِ عٛنْ تَمِّ عٜىٰرَاغٛ مَايٛ عُرْدُنْ نغٛعٛ، حَا عٛنْ مَرَ لٜسْدِ ندِ اَللَّه جَوْمِرَاوٛ مٛنْ مَرْنَتَ عٛنْ؞»

¹² ندٜنْ يٛسُوَ وٛلْوَنِ يِمْࢡٜ لٜعِ رُبٜنْ عٜ غَدَ عٜ رٜىٰتَ لٜࢩٛلْ مَنَسَّ، عٛوِعِ ࢡٜ‏:

¹³ «شِڢْتٛرٜ کٛ مُوسَى، جَغِّيطٛ جَوْمِرَاوٛ عُمْرِ عٛنْ؞ عٛوِعِ‏: اَللَّه جَوْمِرَاوٛ مٛنْ سِوْتِنَنْ عٛنْ، حٛکَّنْ عٛنْ لٜسْدِ ندِ؞

¹⁴ رٜوْࢡٜ مٛنْ عٜ ࢡِکّٛيْ مٛنْ عٜ دَبَّاجِ مٛنْ نجٛوطٛتٛ ندٜرْ لٜسْدِ ندِ مُوسَى حٛکِّ عٛنْ غَاعٜ عُرْدُنْ؞ عَمَّا عٛنٛنْ حٛنٛوࢡٜ سٜمْبِطْࢡٜ ڢُو عٛنْ عَرْدٛتٛ بَنْدِرَاࢡٜ مٛنْ عٜىٰرَاغٛ، عٛنْ مبَلَّ ࢡٜ بٜى بَلْمِ مٛوطٛنْ،

¹⁵ حَا تٛ جَوْمِرَاوٛ سِوْتِنِ ࢡٜ بَنَ مٛوطٛنْ، حَا تٛ کَمْࢡٜ بٛو ࢡٜمَرِ لٜسْدِ ندِ جَوْمِرَاوٛ، اَللَّه مٛوطٛنْ حٛکَّتَ ࢡٜ؞ ࢡَاوٛ مَنْ عٛنْ لٛرٛ، عٛنْ مَرَ لٜسْدِ ندِ مُوسَى، جَغِّيطٛ جَوْمِرَاوٛ حٛکِّ عٛنْ غَاعٜ عُرْدُنْ غَلْ ڢُونَانغٜ؞»

¹⁶ ࢡٜنجَابِ يٛسُوَ‏: «کٛ عُمْرُطَ مِنْ ڢُو، مِنْ مبَطَنْ طُمْ؞ مِنْ نجَحَنْ کٛو تٛيْ عَنٜلَتَ مِنْ؞

¹⁷ بَنَ مِنْ طٛوْتٛرَنِ مُوسَى ندٜرْ کٛو طُمٜ ڢُو، بَنَ نٛنْ مِنْ طٛوْتَنْتٛ مَ عَنْ بٛو؞ اَللَّه جَوْمِرَاوٛ مَ وٛنْدَنْ بٜى مَاطَ، بَنَ عٛوٛنْدُنٛ بٜى مُوسَى؞

¹⁸ کٛو مٛيْ تُورْتِ، طٛوْتَنَاکِ عُمْرٛوجٜ طٜ عُمْرُطَ مٛ ڢُو، عٛ مبَرٜتٜىٰطٛ؞ عَمَّا عَنْ، لَاتَ عَ شٜمْبِطّٛ، شُوسْطٛ؞»