يُونُسَ 1 - دٜڢْتٜرٜ اَللَّه ڢُلْڢُلْدٜ عَدَمَوَ

يُونُسَ سَلِ طٛوْتَنَاغٛ جَوْمِرَاوٛ

¹ جَوْمِرَاوٛ وٛلْوَنِ يُونُسَ ࢡِي عَمِتَّيْ، وِعِمٛ‏:

² «عُمَّ، يَحْ نِنِوٜ، بٜرْنِوٛلْ مَنغٛلْ؞ وَازَ نغٛلْ کِيتَ عَمْ، نغَمْ حَلّٜىٰندٜ يِمْࢡٜ مَاغٛلْ تُلِّتَکٜ، مِسَڢْتِ لَارُغٛ ندٜ؞»

³ عَمَّا يُونُسَ عُمِّ، وَطِ عَنِّيَ دٛغُّغٛ حَا تَرْسِسْ دَايِيطُمْ عٜ جَوْمِرَاوٛ؞ عٛيٜحِ يَڢٛ، تٛنْ عٛحٜࢡِ کٛومْبٛوَلْ مَنغَلْ جَحَنْنغَلْ تَرْسِسْ؞ عٛيٛࢡِ شٜىٰدٜ جَحَانغَلْ، ندٜنْ عٛنَسْتِ نغَلْ نغَمْ حَا عٛيَحْدَ بٜى يِمْࢡٜ مَاغَلْ حَا تَرْسِسْ، عٛدٛغَّ دَايِيطُمْ عٜ جَوْمِرَاوٛ؞

⁴ عَمَّا جَوْمِرَاوٛ عُمِّنِ حٜنْدُ سَاتُندُ دٛوْ مبٜىٰلَ؞ نَارْغٜوٛلْ شٜمْبِطْنغٛلْ وِڢِ دٛوْ مَاغَ، حَا کٛومْبٛوَلْ ࢡَدَکٜ ڢُسُغٛ؞

⁵ لَاࢩٛوࢡٜ کٛومْبٛوَلْ کُلْتٛرِ، مبٛيِ، کٛو مٛيْ حٜىٰدِ طٛوَنْتٜىٰطٛ مُمْ؞ ࢡٜنغُدِنِ دٛنغْلٜ مَࢡّٜ ندٜرْ مبٜىٰلَ نغَمْ حٛيْنُغٛ تٜدّٜىٰنغَ کٛومْبٛوَلْ؞ عَمَّا يُونُسَ جِݠِّنٛ ندٜرْ رٜىٰدُ مَاغَلْ، وَالِ، طٛنْ طَانٛ طٛيْنغٛلْ لُغُّنغٛلْ؞

⁶ مَوْطٛ کٛومْبٛوَلْ وَرِ حَا مَاکٛ، وِعِمٛ‏: «کٛ وَطِ مَ، طٛيْطِيجٛ؟ عُمَّ، تٛرَ طٛوَنْتٜىٰطٛ مَاطَ‏! تٜىٰمَ عٛيُرْمِنَنْ عٜنْ نغَمْ تَا عٜنْ کَلْکَ؞»

⁷ لَاࢩٛوࢡٜ کٛومْبٛوَلْ مبِعْمبِعْتِرِ‏: «سٜيْ عٜنْ مبَطَ کُرْعُ نغَمْ حٜࢡْتُغٛ مٛيْ وَدَّنِ عٜنْ سَرُّ نغُعُ؞» ࢡٜمبَطِ کُرْعُ، نغُ وَنغِنِ يُونُسَ؞

⁸ ࢡٜمبِعِمٛ‏: «يٜشُّ مِنْ، نغَمْ دَلِيلَ مٛيْ سَرُّ نغُعُ عُکَّنِ عٜنْ؟ کُوغَلْ نغَلٜ کُووَتَ؟ دِغَ تٛيْ نغَرْطَا؟ تٛيْ لٜسْدِ مَ عٜ عُمَّاتٛورٜ مَ؟»

⁹ عٛجَابِ ࢡٜ‏: «مِ عِبْرَنِنغْکٜىٰجٛ، مِ کُلْطٛ اَللَّه جَوْمِرَاوٛ مٛ عَسَمَ، مٛ تَغِ مبٜىٰلَ عٜ لٜسْدِ؞»

¹⁰ ندٜنْ لَاࢩٛوࢡٜ کٛومْبٛوَلْ کُلِ مَسِنْ، مبِعِمٛ‏: «کَيَّ‏! طُمٜ مبَطَّ؟» نغَمْ ࢡٜعَنْدِ عٛطٛنْ دٛغَّ يٜىٰسٛ جَوْمِرَاوٛ، بَنَ عٛعَنْدِنِرِ ࢡٜ؞

¹¹ عَمَّا مبٜىٰلَ طٛنْ ࢡٜسْدَ دِمْبَاغٛ؞ نغَمْ مَاجُمْ ࢡٜࢨَمِمٛ‏: «طُمٜ مِنْ مبَطَتَ مَ نغَمْ حَا مبٜىٰلَ دٜعَّنَ مِنْ؟»

¹² عٛجَابِ‏: «سٜيْ عٛنْ کٛوعَمِّ، عٛنْ شَکِّنَمِّ ندٜرْ ندِيَمْ؞ ندٜنْ کَمْ مبٜىٰلَ دٜعَّنَنْ عٛنْ؞ نغَمْ مِعَنْدِ نَارْغٜوٛلْ شٜمْبِطْنغٛلْ نغٛعٛلْ عُکَّنِ عٛنْ دَلِيلَ عَمْ؞»

¹³ لَاࢩٛوࢡٜ کٛومْبٛوَلْ لَاࢩِ بٜى سٜمْبٜ نغَمْ لٛرْنُغٛ کٛومْبٛوَلْ حَا ڢٛمٛوندٜ؞ عَمَّا ࢡٜمبَاوَايْ، نغَمْ مبٜىٰلَ طٛنْ ࢡٜسْدَ دِمْبَاغٛ بٜى سٜمْبٜ؞

¹⁴ ندٜنْ ࢡٜتٛرِ جَوْمِرَاوٛ‏: «يَا جَوْمِرَاوٛ، عُسٜنِ‏! تَا عَشُّ مِنْ مِنْ کَلْکَ نغَمْ دَلِيلَ يٛنغْکِ غٛرْکٛ عٛو؞ تَا يٛوَنْ مِنْ ࢨِيࢨَمْ غٛطّٛ مٛ وَطَايْ عَيْبٜ؞ نغَمْ عَنْ، يَا جَوْمِرَاوٛ، عَوَطِ کٛ ڢٛتَّنِ مَ؞»

¹⁵ ندٜنْ ࢡٜکٛوعِ يُونُسَ، ࢡٜشَکِّنِمٛ ندٜرْ ندِيَمْ؞ مبٜىٰلَ دٜعِّ، عَشِّ دِمْبَاغٛ؞

¹⁶ نغَمْ مَاجُمْ يِمْࢡٜ کٛومْبٛوَلْ کُلِ جَوْمِرَاوٛ مَسِنْ؞ ࢡٜلِيعَنِمٛ کِرْسَاطِ، ࢡٜتٛغَنِمٛ تٛغَيٜىٰجٜ بٛو؞