يٛوعٜلْ 1 - دٜڢْتٜرٜ اَللَّه ڢُلْڢُلْدٜ عَدَمَوَ

عَسَرْ غَرْکِ بَࢡَّتِّ

¹ جَوْمِرَاوٛ وٛلْوَنِ يٛعٜلْ ࢡِي ݠٜتُوٜلْ، وِعِ‏:

² عٛنٛنْ ندٛتِّعٜنْ، نَنٜ کٛ مبِعَنْمِ‏! عٛنٛنْ جٛوطِيࢡٜ لٜسْدِ يَحُودَ ڢُو، کٜطِتٜ‏! عِرِنْ طُعُمْ مٜىٰطِ لَاتَاغٛ ندٜرْ ࢩَلْطٜ مٛوطٛنْ کٛو ندٜرْ ࢩَلْطٜ کَاکِرَاࢡٜ مٛوطٛنْ نَ؟

³ نغٜشّٜ طُمْ ࢡِࢡّٜ مٛوطٛنْ، ࢡِࢡّٜ مٛوطٛنْ بٛو نغٜشَّ طُمْ ࢡِࢡّٜ مُوطُمْعٜنْ؞ کَمْࢡٜ ڢَحِنْ نغٜشَّ طُمْ يِدٜرٜ وَرَنْدٜ ࢡَاوٛطٛنْ؞

⁴ کٛ ࢩَامٛووُ عَشِّ، مبَࢡَّتُّ ࢩَامِ طُمْ؞ کٛ مبَࢡَّتُّ عَشِّ، نغِلْنغُ مَاغُ ࢩَامِ طُمْ؞ کٛ نغِلْنغُ عَشِّ، ندٛعُ ࢩَامِ طُمْ؞

⁵ عٛنٛنْ وُيْکٛوࢡٜ، ݠِنٜ، مبٛيٜ‏! عٛنٛنْ يَرٛوࢡٜ عِنَبٛوجَمْ، مبٛيٜ، نغَمْ عِنَبٛوجَمْ کٜسَمْ عِتَّامَ عٜ کُنْدُطٜ مٛوطٛنْ‏!

⁶ عُمَّاتٛورٜ سٜمْبِطْندٜ، ندٜ وَلَا لِمْغَلْ، عُکَّنِ لٜسْدِ عَمْ؞ ࢩِيعٜ مَارٜ نَنْدِ بٜى ࢩِيعٜ بَرٛوطٜ، ࢨَکِّرْطٜ مَارٜ بَنَ طٜ مبَرٛوغَ ندٜوَ؞

⁷ ندٜ وِلِ عِنَبٛحِ عَمْ، ندٜ يٜوِ عِبِّ عَمْ، ندٜ ࢡٛلْتِ کِ ڢُو، لِشٜ مَاکِ ڢُو ݠُرْطِ؞

⁸ عٛنٛنْ يِمْࢡٜ، سٜيْ عٛنْ مبٛيَ بَنَ دٜرْکٜىٰجٛ دٜبّٛ ࢡٛرْنِيطٛ لِمْشٜ بُحُوجٜ بٛيَنْطٛ غٛرُمْ کٛوْطٛ طُمْ؞

⁹ دٛکّٜ ࢩَامْدُ عٜ دٛکّٜ دُڢٜتٜىٰطٜ نغٛودَا حَا سُودُ جَوْمِرَاوٛ؞ لِمَنْعٜنْ جَغَّنٛوࢡٜ جَوْمِرَاوٛ طٛنْ شُنٛ؞

¹⁰ غٜسٜ مبٛنِّ، لٜسْدِ طٛنْ سُنٛ، عَلْکَمَارِ نَتِّ، عِنَبٛوجَمْ کٜسَمْ عٜ نٜبَّمْ کٜسَمْ بٛو جِنِّ؞

¹¹ عٛنٛنْ رٜمٛوࢡٜ، شٜمْتٜ‏! عٛنٛنْ رٜمٛوࢡٜ عِنَبٛوجٜ، مبٛيٜ‏! سَعِيرُورِ عٜ عَلْکَمَارِ عٜ ࢨَامْلٜ غٜسٜ ڢُو مبٛنِّ؞

¹² عِنَبٛحِ يٛورِ، عِبِّ طَيْلِ، رُمَّانٛوحِ عٜ دِبِنٛوحِ عٜ لٜکِّ دِمَنْکِ ࢡِࢡّٜ بٜلْطٜ عٜ لٜطّٜ حَا نغٜسَ ڢُو نجٛورِ؞ نٛنّٛنْ، کٛ سٜيْنَتَ ࢡِࢡّٜ عَادَمَ، طَيْلِ؞

¹³ کَدّٜ لِمْشٜ بُحُوجٜ، مبٛيٜ، عٛنٛنْ لِمَنْعٜنْ‏! عُومٜ، عٛنٛنْ جَغِّيࢡٜ حَا حِرْسِرْدٜ جَوْمِرَاوٛ‏! نغَرٜ، مبَالٜ ندٜرْ مٜتَّمْࢡٜرَمْ، عٛنٛنْ جَغَّنٛوࢡٜ اَللَّه عَمْ‏! نغَمْ دٛکّٜ ࢩَامْدُ عٜ دٛکّٜ دُڢٜتٜىٰطٜ نغٛودَا حَا سُودُ اَللَّه مٛوطٛنْ؞

¹⁴ تَاسْکَنٜ سُومَيٜ، عٜوْنٜ يِمْࢡٜ نغَمْ ࢡٜمٛوࢡٛ، مٛوࢡْتٜ ندٛتِّعٜنْ عٜ جٛوطِيࢡٜ ندٜرْ لٜسْدِ ڢُو حَا سُودُ اَللَّه جَوْمِرَاوٛ مٛوطٛنْ، نغٛوکَنٜ مٛ‏!

¹⁵ ࢩَلَادٜ جَوْمِرَاوٛ ࢡَدِتَکٜ‏! ندٜ وَرَنْ دِغَ اَللَّه بَاوْطٛ بَنَ حَلْکٜرٜ؞ کَيْتٛ ࢩَلَادٜ ندٜعٜ‏!

¹⁶ ࢩَامْدُ حَلْکِ يٜىٰسٛ مٜىٰطٜنْ، سٜيٛ عٜ غِمِ نجِنِّ ندٜرْ سُودُ اَللَّه مٜىٰطٜنْ؞

¹⁷ عَاوْرٜ يٛورِ حَا نغٜسَ، شِغٛرْطِ ݠٜرْوِ، بٜىٰمبٜ نغِبِّنَامَ، نغَمْ عَلْکَمَارِ طَيْلِ؞

¹⁸ دَبَّاجِ طٛنْ مبٛوکَ؞ تٛکّٜ نَعِ طٛنْ نغِيلٛ، طِ نغَلَا دُرْدُطٜ؞ کٛو تٛکّٜ دَمّٛوجِ بٛو طٛنْ نجَرَ بٛنٜ؞

¹⁹ يَا جَوْمِرَاوٛ، مِطٛنْ تٛرٛ مَ، نغَمْ يِيتٜ ࢩَامِ دُرْدُطٜ ندٜرْ لَدّٜ، طٜمْنغَلْ يِيتٜ وُلِ لٜطّٜ لَدّٜ ڢُو؞

²⁰ کٛو دَبَّاجِ لَدّٜ بٛو طٛنْ لَاحَ حٜىٰدِ مَاطَ، نغَمْ مَاحٛيْ ࢡٜىٰࢡِ، يِيتٜ ࢩَامِ دُرْدُطٜ ندٜرْ لَدّٜ؞