يٜرٜمِيَ 1 - دٜڢْتٜرٜ اَللَّه ڢُلْڢُلْدٜ عَدَمَوَ

جَوْمِرَاوٛ عٜوْنِ يٜرٜمِيَ

¹ ندَا بٛلّٜ يٜرٜمِيَ ࢡِي حِلْکِيَّ، غٛوتٛ شَکَ لِمَنْعٜنْ عَنَتٛتْ ندٜرْ لٜسْدِ بٜنْيَمِنْ؞

² جَوْمِرَاوٛ وٛلْوَنِ يٜرٜمِيَ ندٜرْ زَمَنُ يُسِيَ ࢡِي عَمٛنْ، لَامِيطٛ يَحُودَ، ندٜرْ ندُوࢡُ لَامُ مَاکٛ سَݠّٛ عٜ تَتَࢡُ؞

³ جَوْمِرَاوٛ وٛلْوَنِمٛ ڢَحِنْ ندٜرْ زَمَنُ يٛويَکِمْ ࢡِي يُسِيَ، لَامِيطٛ يَحُودَ، حَا وَرْغٛ تِمّٛودٜ ندُوࢡُ سَݠّٛ عٜ غٛعٛووُ ندٜرْ لَامُ سٜدٜکِيَ ࢡِي يُسِيَ، لَامِيطٛ يَحُودَ، حَا کٛنّٜعٜنْ ندَحِ يِمْࢡٜ عُرُسَلِيمَ، ندٜرْ لٜوْرُ جٛوَࢡْرُ؞

⁴ جَوْمِرَاوٛ وٛلْوَنِ يَمْ، وِعِ‏:

⁵ «حِدّٜکٛ مِوَطٜ ندٜرْ رٜىٰدُ دَادَ مَ، مِعَنْدِ مَ؞ حِدّٜکٛ عَدَࢩٜ، مِسٜنِ مَ، مِدَرْنِ مَ عَ اَلنَّبِيجٛ نغَمْ عُمَّاتٛوجٜ؞»

⁶ عَمَّا مِنْ مِوِعِ‏: «کَيَّ، يَا جَوْمِرَاوٛ اَللَّه‏! مِعَنْدَا وٛلْوُغٛ، نغَمْ مِ دٜرْکٜىٰجٛ‏!»

⁷ جَوْمِرَاوٛ جَابِ يَمْ‏: «تَا وِعْ‏: مِ دٜرْکٜىٰجٛ؞ عَمَّا يَحْ حَا يِمْࢡٜ ࢡٜ مِنٜلٜتٜ حَا مُوطُمْعٜنْ ڢُو، وِعْ ࢡٜ کٛ مِعُمْرٜتٜ ڢُو؞

⁸ تَا حُلْ ࢡٜ، نغَمْ مِطٛنْ وٛنْدِ بٜى مَ نغَمْ حِسْنُغٛ مَ؞» نٛنْ جَوْمِرَاوٛ وِعِ؞

⁹ ندٜنْ عٛڢٛرْتِ جُنغٛ مَاکٛ، عٛمٜىٰمِ حُنْدُکٛ عَمْ، عٛوِعِ يَمْ‏: «ندَا، مِوَطِ بٛلّٜ عَمْ ندٜرْ حُنْدُکٛ مَاطَ؞

¹⁰ حَنْدٜىٰرٜ ندٜعٜ مِدَرْنِ مَ دٛوْ عُمَّاتٛوجٜ عٜ لَامُوجِ نغَمْ طٛوڢُغٛ عٜ ڢٜعُّغٛ، نغَمْ حَلْکُغٛ عٜ يِبِّنْغٛ، نغَمْ ࢩِࢡْتَاغٛ عٜ جُبَاغٛ؞»

حَالَ لِسَلْ لَوْجَحِ عٜ ڢَيَنْدٜ وَيْوَنْدٜ

¹¹ جَوْمِرَاوٛ وٛلْوَنِ يَمْ، وِعِ‏: «يٜرٜمِيَ، طُمٜ عَيِعَتَ؟» مِجَابِ‏: «مِطٛنْ يِعَ لِسَلْ لَوْجَحِ؞»

¹² جَوْمِرَاوٛ وِعِ‏: «عَيِعِ بٛوطُّمْ، نغَمْ مِطٛنْ حَکِّلَنَ وٛلْدٜ عَمْ حَا مِحِࢡِّنَ ندٜ؞»

¹³ جَوْمِرَاوٛ وٛلْوَنِ يَمْ طِطَوْرٜ، وِعِ‏: «طُمٜ عَيِعَتَ؟» مِجَابِ‏: «مِطٛنْ يِعَ ڢَيَنْدٜ وَيْوَنْدٜ؞ حُنْدُکٛ مَارٜ وُورِ، طٛنْ ࢡُلَ دِغَ وٛيْلَ؞»

¹⁴ جَوْمِرَاوٛ وِعِ يَمْ‏: «دِغَ وٛيْلَ سَرُّ عُکَّنْتٛ يِمْࢡٜ لٜسْدِ ندِعِ ڢُو،

¹⁵ نغَمْ مِطٛنْ عٜوْنٛ يِمْࢡٜ عَسْلِ ڢُو دِغَ لَامُوجِ وٛيْلَ؞» نٛنْ جَوْمِرَاوٛ وِعِ؞ «کَنْجِ طِ نغَرَنْ، طِ نجٛعِّنَ لٜىٰسٜ لَامُ مَاجِ يٜىٰسٛ نَسْتِرْطٜ عُرُسَلِيمَ، يٜىٰسٛ مَحِ تَارِيطِ نغٛلْ ڢُو، طِ کٛنَنْ بٜرْنِيجِ يَحُودَ ڢُو؞

¹⁶ مِدٛعَّنْ يَحُودُعٜنْ کِيتَ دَلِيلَ حَلّٜىٰندٜ مَࢡّٜ ڢُو؞ ࢡٜعَشِّ يَمْ، ࢡٜنغُلَنِ طٛوَنْتٜىٰࢡٜ وٛطْࢡٜ عُورْلٜ، ࢡٜشُجِدَنِ کٛ جُوطٜ مَࢡّٜ مبَطِ؞

¹⁷ عَمَّا عَنْ، تَادَ، يَحْ يٜشُّ ࢡٜ کٛ مِعُمْرٜتٜ ڢُو؞ تَا حُلْتٛرْ دَلِيلَ مَࢡّٜ، نغَمْ تَا مِحُلْنٜ يٜىٰسٛ مَࢡّٜ؞

¹⁸ ندَا، مِدَرْنِ مَ حَنْدٜ عَ بٜرْنِوٛلْ شٜمْبِطْنغٛلْ، عَدَنغْرَنغَلْ نجَمْندِ عٜ غَسٛلْ نجَمْندِ مبٛطٜىٰرِ يٜىٰسٛ لٜسْدِ ڢُو، يٜىٰسٛ لَامِيࢡٜ يَحُودَ عٜ عَرْدِيࢡٜ، يٜىٰسٛ لِمَنْعٜنْ عٜ يِمْࢡٜ لٜسْدِ؞

¹⁹ ࢡٜکٛنٜتٜ، عَمَّا ࢡٜنجَالَتَاکٛ مَ نغَمْ مِطٛنْ وٛنْدِ بٜى مَاطَ نغَمْ حِسْنُغٛ مَ؞» نٛنْ جَوْمِرَاوٛ وِعِ؞