عَلْکَالِعٜنْ 1 - دٜڢْتٜرٜ اَللَّه ڢُلْڢُلْدٜ عَدَمَوَ

جٛوندٜ إِسْرَاءِيلَ حَا کَنَانَ

¹ ࢡَاوٛ مَايْدٜ يٛسُوَ، إِسْرَاءِيلَعٜنْ ࢨَمِ جَوْمِرَاوٛ‏: «لٜࢩٛلْ نغٛلٜ ندٜرْ لٜعِ عَمِنْ عَارْتَتَ يَحُغٛ حَا کَنَانِعٜنْ نغَمْ حَࢡُغٛ بٜى مَࢡّٜ؟»

² جَوْمِرَاوٛ جَابِ‏: «لٜࢩٛلْ يَحُودَ عَارْتَ يَحُغٛ؞ مِحٛکِّ نغٛلْ لٜسْدِ مَنْ؞»

³ يِمْࢡٜ يَحُودَ مبِعِ يِمْࢡٜ سِمٜيٛنْ بَنْدِرَاࢡٜ مُوطُمْعٜنْ‏: «عٜنْ نجَحْدَ حَا غٜطَلْ لٜسْدِ نغَلْ لَاتَنِ مِنْ، عٜنْ کَࢡَ بٜى کَنَانِعٜنْ؞ ندٜنْ مِنِنْ بٛو مِنْ نجَحْدَنْ بٜى مٛوطٛنْ حَا غٜطَلْ مٛنْ؞» ندٜنْ يِمْࢡٜ لٜࢩٛلْ سِمٜيٛنْ کَوْتِ بٜى لٜࢩٛلْ يَحُودَ؞

⁴ ندٜنْ ࢡٜندِلِّ حَࢡٛيْغٛ بٜى مَࢡّٜ؞ جَوْمِرَاوٛ حٛکِّ ࢡٜ کَنَانِعٜنْ عٜ ݠٜرٜزِّعٜنْ؞ ࢡٜمبَرِ وٛرْࢡٜ عُجِنٜ سَݠّٛ (10,000) حَا بٜزٜکْ؞

⁵ ندٜرْ بٜرْنِوٛلْ نغٛعٛلْ، ࢡٜتَوِ عَدٛنِ-بٜزٜکْ، ࢡٜکَࢡِ بٜى مَاکٛ، ࢡٜنجَالِ کَنَانِعٜنْ عٜ ݠٜرٜزِّعٜنْ؞

⁶ عَدٛنِ-بٜزٜکْ دٛغِّ، عَمَّا ࢡٜتَاسْنِمٛ، ࢡٜنَنغِمٛ، ࢡٜتَعِمٛ کٛولِ غٛرْطِ، جُوطٜ عٜ کٛسْطٜ ڢُو؞

⁷ ندٜنْ عٛوِعِ‏: «لَامِيࢡٜ شَݠَّنْطٜ نجٛوٜىٰطِطٛ تَعَاࢡٜ کٛولِ غٛرْطِ، جُوطٜ عٜ کٛسْطٜ طٛنّٛ شُࢡْتَ ݠِشِّتٜ شٛلْطٜ لٜسْ تَابَلْ عَمْ؞ جٛنْتَ اَللَّه وَاتَنِ يَمْ بَنَ کُووْمِ ࢡٜ‏!» کَدِبٛو ࢡٜنجَحْرِ لَامِيطٛ عٛو حَا عُرُسَلِيمَ حَا عٛمَايِ تٛنْ؞

يِمْࢡٜ يَحُودَ ࢩَامِ عُرُسَلِيمَ عٜ حٜبُرُونْ

⁸ يِمْࢡٜ يَحُودَ کِݠِّ بٜرْنِوٛلْ عُرُسَلِيمَ، ࢡٜࢩَامِ نغٛلْ، ࢡٜمبَرِ وٛنْࢡٜ تٛنْ بٜى کَاڢَحِ، ࢡٜنغُلِ نغٛلْ؞

⁹ ࢡَاوٛ مَنْ ࢡٜندِيرْتِ حَا لٜسْدِ کٛوسٜىٰجٜ، لٜسْدِ ڢٛمْبِنَ عٜ حَا لٜسْدِ تٛوْندِيجٜ نغَمْ حَࢡُغٛ بٜى کَنَانِعٜنْ؞

¹⁰ ࢡٜعُمِّنِ کٛنُ دٛوْ جٛوطِيࢡٜ حَا حٜبُرُونْ، ࢡٛويْمَ ࢡٜطٛنّٛ مبِعَ بٜرْنِوٛلْ نغٛلْ‏: کِرِيَتْ-عَرْبَ؞ تٛنْ ࢡٜمبَرِ سٜسَيْ عٜ عَکِمَنْ عٜ تَلْمَيْ؞

عٛتْنِيٜلْ ࢩَامِ بٜرْنِوٛلْ دٜبِرْ

¹¹ ࢡٜعُمِّ تٛنْ ࢡٜندِلِّ ࢡٜکِݠِّ جٛوطِيࢡٜ حَا دٜبِرْ، ࢡٛويْمَ ࢡٜطٛنّٛ مبِعَ بٜرْنِوٛلْ نغٛلْ‏: کِرِيَتْ-سٜڢٜرْ؞

¹² کَالٜبْ وِعِ‏: «مِتٜعْنَنْ عَکْسَ ࢡِيَمْ دٜبّٛ حَا مٛ جَالِ، ࢩَامِ کِرِيَتْ-سٜڢٜرْ؞»

¹³ عٛتْنِيٜلْ ࢡِي کٜنَسْ، مِࢩِرَاوٛ کَالٜبْ، ࢩَامِ نغٛلْ؞ کَالٜبْ تٜعْنِمٛ عَکْسَ ࢡِيُمْ دٜبّٛ؞

¹⁴ ندٜ عٛيٛتِّ حَا کٛمْبِ عٛتْنِيٜلْ، عٛࢡِلِّمٛ، عٛتٛرٛ بَابَ مَاکٛ نغٜسَ، ࢡَاوٛ مَنْ عٛجِݠِّ وَمْندٜ مَاکٛ، کَالٜبْ ࢨَمِمٛ کٛ عٛيِطِ؞

¹⁵ عٛجَابِ‏: «يٜرْدَنَمْ کٛ مِتٛرٛتٛ مَ؞ عَحٛکِّ يَمْ لٜسْدِ ڢٛمْبِنَ نجٛورْندِ، حٛکَّمْ شٜىٰࢡٛوجٜ ندِيَمْ بٛو؞» نغَمْ مَاجُمْ کَالٜبْ حٛکِّمٛ سٜىٰࢡٛورٜ حَا دٛوْ حٛوسٜىٰرٜ عٜ سٜىٰࢡٛورٜ حَا لٜسْ مَارٜ؞

لٜعِ يَحُودَ عٜ بٜنْيَمِنْ ࢩَامِ لٜسْدِ

¹⁶ کٜنِعٜنْ، عَسْنغٛلْ عٜسِرَاوٛ مُوسَى، عُمّٛدِ دِغَ بٜرْنِوٛلْ-دِبِنٛوجٜ، بٜى يِمْࢡٜ يَحُودَ، ࢡٜنغَرِ ࢡٜنجٛوطِ حَا لَدّٜ حَمَادَارٜ ڢٛمْبِنَ لٜسْدِ يَحُودَ، حَا ڢٛمْبِنَ عَرَتْ؞ ࢡٜنجٜحِ ࢡٜنجٛوطِ شَکَ عُمَّاتٛورٜ عَمَلٜکِعٜنْ؞

¹⁷ يِمْࢡٜ يَحُودَ نجَحْدِ بٜى يِمْࢡٜ لٜࢩٛلْ سِمٜيٛنْ دٜىٰرْطِرَاوٛ يَحُودَ، ࢡٜکَࢡِ بٜى کَنَانِعٜنْ جٛوطِيࢡٜ حَا سَڢَتْ، ࢡٜنجَالِ ࢡٜ؞ ࢡٜنَتِّنِ بٜرْنِوٛلْ مَنْ، ࢡٜعِنْدِ نغٛلْ حٛرْمَ بَنَ وِعُغٛ نَتّٜرٜ؞

¹⁸ ࢡَاوٛ مَنْ يِمْࢡٜ يَحُودَ ࢩَامِ بٜرْنِيجِ طِعِ‏: غَازَ، عَسْکَلٛنْ عٜ عٜکُرُونْ عٜ نٛنْ بٛو غُرٜ تَارِيطٜ بٜرْنِيجِ طِنْ؞

¹⁹ جَوْمِرَاوٛ طٛنّٛ وٛنْدِ بٜى مَࢡّٜ، ࢡٜࢩَامِ لٜسْدِ کٛوسٜىٰجٜ؞ عَمَّا ࢡٜمبَاوَايْ رِيوُغٛ جٛوطِيࢡٜ حَا وَادِيجِ، نغَمْ يِمْࢡٜ مَنْ طٛنّٛ بٜى مٛوتَاجِ نجَمْطٜ بٜى ݠُشِّ؞

²⁰ ࢡٜندٛکِّ حٜبُرُونْ حَا کَالٜبْ بَنَ مُوسَى عُمْرُنٛ، کَالٜبْ رِيوِ ࢡِࢡّٜ عٜنَکْ تَتٛ جٛوطِنٛوࢡٜ تٛنْ؞

²¹ عَمَّا يِمْࢡٜ بٜنْيَمِنْ ندِيوَايْ يٜبُسِعٜنْ جٛوطِنٛوࢡٜ حَا عُرُسَلِيمَ عٜ حَا حَنْدٜ يِمْࢡٜ ࢡٜطٛنْ نجٛوطٛدِ بٜى يِمْࢡٜ بٜنْيَمِنْ؞

يِمْࢡٜ يُوسُڢُ ࢩَامِ بَيْتِلَ

²² يِمْࢡٜ دَࢩْغٛلْ يُوسُڢُ، ندِلِّ حٛنُغٛ بَيْتِلَ، جَوْمِرَاوٛ وٛنْدِ بٜى مَࢡّٜ؞

²³ ࢡٜعَارْتِ نٜلُغٛ يِمْࢡٜ نغَمْ حٛرٛيْغٛ بٜرْنِوٛلْ بِعٜتٜىٰنغٛلْ لُوسْ ࢡٛويْمَ؞

²⁴ حٛرٛوࢡٜ نغِعِ غٛطّٛ غُرْتِيطٛ نغٛلْ؞ ࢡٜمبِعِمٛ‏: «حٛلُّ مِنْ نٛ مِنْ نَسْتِرْتَ بٜرْنِوٛلْ نغٛلْ، ندٜنْ کَمْ مِنْ مبٛونَنْتٜ؞»

²⁵ غٛطّٛ عٛو حٛلِّ ࢡٜ ݠٜلّٜلْ نَسْتُغٛ؞ بَنَ نِي يِمْࢡٜ دَࢩْغٛلْ يُوسُڢُ مبَرْدِ يِمْࢡٜ بٜرْنِوٛلْ مَنْ بٜى کَاڢَحِ؞ عَمَّا ࢡٜعَشِّ غٛطّٛ غٛ دِلِّ جَمْ بٜى سَارٜ مُوطُمْ ڢُو؞

²⁶ غٛطّٛ عٛو دِلِّ جٛوطِ حَا لٜسْدِ حٜتِعٜنْ، عٛمَحِ بٜرْنِوٛلْ، عٛعِنْدِ نغٛلْ لُوسْ، طُمْ لَاتِ عِنْدٜ مَاغٛلْ حَا وَرْغٛ حَنْدٜ؞

يِمْࢡٜ ࢡٜ إِسْرَاءِيلَعٜنْ ندِيوَايْ

²⁷ يِمْࢡٜ مَنَسَّ ندِيوَايْ يِمْࢡٜ بَيْتِ-سٜعَنْ عٜ تَعَنَکْ دٛورْ عٜ يِبْلٜعَمْ عٜ مٜغِدّٛ عٜ جٛوطِيࢡٜ حَا غُرٜ تَارِيطٜ بٜرْنِيجِ طِعِ؞ کَنَانِعٜنْ کَسْدِ جٛوطَاغٛ ندٜرْ لٜسْدِ مَنْ؞

²⁸ ندٜ إِسْرَاءِيلَعٜنْ ࢡٜسْدِ سٜمْبٜ، ࢡٜلَاتِنِ کَنَانِعٜنْ مَشُّࢡٜ مَࢡّٜ، ࢡٜندِيوَايْ ࢡٜ ڢُو؞

²⁹ يِمْࢡٜ عٜڢْرَيِمْ بٛو ندِيوَايْ کَنَانِعٜنْ جٛوطِيࢡٜ حَا غٜزٜرْ؞ يِمْࢡٜ ࢡٜتٛکِّ جٛوطَاغٛ شَکَ يِمْࢡٜ عٜڢْرَيِمْ حَا تٛنْ؞

³⁰ يِمْࢡٜ زَبُلٛنْ ندِيوَايْ کَنَانِعٜنْ جٛوطِيࢡٜ حَا کِتِرٛنْ عٜ نَحَلٛلْ؞ يِمْࢡٜ ࢡٜعٜ تٛکِّ جٛوطَاغٛ شَکَ مَࢡّٜ؞ يِمْࢡٜ لٜࢩٛلْ زَبُلٛنْ لَاتِنِ ࢡٜ مَشُّࢡٜ مُوطُمْعٜنْ؞

³¹ يِمْࢡٜ عَسٜرْ ندِيوَايْ جٛوطِيࢡٜ حَا عَکّٛ عٜ سِدٛنْ عٜ عَحَلَبْ عٜ عَکِزِبْ عٜ حٜلْبَ عٜ عَڢِکْ عٜ رٜحٛبْ؞

³² نغَمْ مَاجُمْ ࢡٜنجٛوطِ شَکَ کَنَانِعٜنْ جٛوطِيࢡٜ حَا لٜسْدِ مَنْ؞

³³ يِمْࢡٜ نٜڢْتَلِ ندِيوَايْ کَنَانِعٜنْ جٛوطِيࢡٜ حَا بَيْتِ-سٜمٜسْ عٜ بَيْتِ-عَنَتْ؞ ࢡٜنجٛوطٛدِ حَا لٜسْدِ مَنْ، عَمَّا ࢡٜلَاتِنِ ࢡٜ مَشُّࢡٜ مَࢡّٜ؞

³⁴ عَمٛورِعٜنْ نغٜرْࢡِ يِمْࢡٜ دَنْ حَا غَلْ حٛوسٜىٰرٜ، ࢡٜندُنغَنَاکِ ࢡٜجِݠَّاغٛ ندٜرْ وَادِوٛلْ؞

³⁵ عَمٛورِعٜنْ تٛکِّ جٛوطَاغٛ حَا عٜلٛونْ عٜ سَالْبِيمَ، نٛنْ بٛو حَا حٛوسٜىٰرٜ حٜرٜسْ؞ عَمَّا يِمْࢡٜ يُوسُڢُ لَامَنِ ࢡٜ بٜى شَاتَلْ، ࢡٜلَاتِنِ ࢡٜ مَشُّࢡٜ مَࢡّٜ؞

³⁶ کٜىٰرٛلْ عَمٛورِعٜنْ يٜحِ دِغَ وَعّٛرْدٜ عَکْرَبِّيمَ، دِغَ سَلَ حَا يَحُغٛ دٛوْ؞