يَاکُبَ 1 - دٜڢْتٜرٜ اَللَّه ڢُلْڢُلْدٜ عَدَمَوَ

کٛوڢْنغٛلْ

¹ مِنْ، يَاکُبَ مَشُّطٛ اَللَّه عٜ جَوْمِرَاوٛ مٜنْ عِيسَى اَلْمَسِيحُ، مِحٛوڢْنِ لٜعِ إِسْرَاءِيلَ سَݠّٛ عٜ طِطِ شَنغْکِتِيطِ حَا دُنِيَارُ؞

نُطِّنْکِ عٜ حِکْمَ

² دٜىٰرْطِرَاࢡٜ عَمْ، شٜيٜ مَسِنْ ندٜ جَرِّبٛوجٜ ڢٜىٰرٜ ڢٜىٰرٜ کٜࢡِ عٛنْ ڢُو؞

³ نغَمْ عٛنْ عَنْدِ ݠٛونْدُکِ نُطِّنْکِ مٛوطٛنْ وَدَّنْ مُࢩَلْ؞

⁴ عَمَّا سٜيْ مُࢩَلْ مٛوطٛنْ وَنغَ لَاࢡْطُمْ، نغَمْ حَا عٛنْ لَاتٛ تِمُّࢡٜ، بِلَا ڢٜلٛورٜ، تَا کٛو طُمٜ نغَکَّنَ عٛنْ؞

⁵ تٛ حِکْمَ نغَکَّنِ غٛوتٛ شَکَ مٛوطٛنْ، سٜيْ عٛتٛرٛ اَللَّه دٛکَّنْطٛ کٛو مٛيْ بٜى شَاحَاکِ عٜ بِلَا ڢٜلٛورٜ، عٛحٛکَّنْ مٛ کَ؞

⁶ عَمَّا سٜيْ عٛتٛرٛ بٜى نُطِّنْکِ، بِلَا سٜکٛ سَمْ، نغَمْ مٛ طٛنْ سٜکَ نَنْدِ بٜى ࢨُوغٜ وٜىٰندُ طٜ حٜنْدُ دِمْبِنْتَ عٜ ࢡَنغْتَتَ؞

⁷ تَا عِرِنْ غٛطّٛ عٛو تَمّٛ حٜࢡُغٛ کٛو طُمٜ حَا جَوْمِرَاوٛ،

⁸ نغَمْ تُمْ عٛ شَکْلِيطٛ، نُطِّنْکِ مَاکٛ دَرَاکِ دٛوْ غٛوتُمْ سَمْ؞

لَاڢٜرٜ عٜ رِسْکُ

⁹ سٜيْ دٜىٰرْطِرَاوٛ لٜىٰسْطٛ سٜيٛ تٛ اَللَّه ࢡَنغْتِمٛ،

¹⁰ دٜىٰرْطِرَاوٛ دِسْکُطٛ بٛو سٜيٛ تٛ اَللَّه لٜىٰسْنِمٛ؞ نغَمْ عٛسَالٛتٛ بَنَ ݠِنْدِ حُطٛ؞

¹¹ تٛ نَانغٜ ࢡَنغْتِ، وُلِ جَوْ، حُطٛ يٛورَنْ، ݠِنْدِ مُمْ شَامَنْ، مبٛوطِرْکَ مَنْ ڢُو حَلْکَنْ؞ بَنَ نٛنْ بٛو دِسْکُطٛ حَلْکِرْتَ ندٜرْ کُوطٜ مُوطُمْ؞

جَرِّبٛوجٜ عٜ عٜسْتٛ

¹² بَرْکَ لَاتَنْتٛ غٛطّٛ مٛ مُࢩَنِ جَرِّبٜىٰکِ، نغَمْ ࢡَاوٛ ݠٛونْدٛلْ نغٛعٛلْ، عٛحٜࢡَنْ وٛرٛنْدٜ نغٜىٰندَمْ ندٜ اَللَّه عِينَنِ يِطْࢡٜ مٛ؞

¹³ تٛ غٛطّٛ جَرِّبَامَ، تَا عٛوِعَ‏: «اَللَّه جَرِّبَکٜ يَمْ؞» نغَمْ غٛطّٛ وَاوَتَا جَرِّبَاغٛ اَللَّه حَا عٛوَطَ حَلّٜىٰندٜ، کَنغْکٛ بٛو عٛجَرِّبَتَاکٛ غٛطّٛ؞

¹⁴ عَمَّا جَرَّبَ طٛنْ نَنغَ غٛطّٛ تٛ سُونٛ مُمْ عٜسْتِ طُمْ، نَنغِ طُمْ؞

¹⁵ ࢡَاوٛطٛنْ، تٛ سُونٛ مَنْ مَوْنِ، رِمَنْ حَکّٜ؞ تٛ حَکّٜ مَوْنِ بٛو، رِمَنْ مَايْدٜ؞

¹⁶ دٜىٰرْطِرَاࢡٜ عَمْ يِطَاࢡٜ، تَا زَمْبٜ کٛعٜ مٛنْ‏!

¹⁷ شَاحُ مبٛوطْنغُ عٜ دٛکَّلْ تِمُّنغَلْ ڢُو عِوِ دِغَ دٛوْ، طُمْ عِوِ حَا اَللَّه تَغْطٛ جَيْلِ عَسَمَ؞ عٛوَيْلَتَاکٛ، ࢩِࢡُّکِ لَاتَتَاکٛ حَا مَاکٛ بَنَ حَا جَيْلِ مَنْ؞

¹⁸ ندٜرْ مُويٛ مَاکٛ عٛحٛکِّ عٜنْ نغٜىٰندَمْ بٜى وٛلْدٜ مَاکٛ غٛونغَارٜ، نغَمْ حَا جٛوندٜ مٜىٰطٜنْ ࢡُرَ جٛولٜ تَغْلٜ مَاکٛ ڢُو؞

نَنُغٛ وٛلْدٜ اَللَّه عٜ وَطُغٛ کٛ ندٜ وِعِ

¹⁹ دٜىٰرْطِرَاࢡٜ عَمْ يِطَاࢡٜ، ݠَامٜ طُعُمْ‏: سٜيْ کٛو مٛيْ ڢُو تَاسْکَنٛ نَنُغٛ، عَمَّا تَا عٛيَاوَ وٛلْوُغٛ، تَا عٛيَاوَ تِکُّغٛ بٛو؞

²⁰ نغَمْ تِکّٜرٜ نٜطّٛ حِࢡِّنْتَا عَدِلَاکُ اَللَّه؞

²¹ نغَمْ مَاجُمْ، نغُدِنٜ کٛ سٛࢡِ عٜ کُوطٜ کَلُّطٜ ڢُو؞ نجَࢡٜ بٜى يَنغْکِنَارٜ وٛلْدٜ ندٜ اَللَّه عَاوِ ندٜرْ ࢡٜرْطٜ مٛوطٛنْ، نغَمْ ندٜ وَاوَنْ حِسْنُغٛ عٛنْ؞

²² تَا زَمْبٜ کٛعٜ مٛوطٛنْ بٜى وِعْغٛ‏: نَنُغٛ وٛلْدٜ اَللَّه تَنْ حٜعِ؞ عَمَّا مبَطٜ کٛ ندٜ وِعِ عٛنْ؞

²³ نغَمْ کٛو مٛيْ نَنِ وٛلْدٜ اَللَّه، عٛوَطَايْ کٛ ندٜ وِعِ، عٛنَنْدِ بٜى دَارْطٛ يٜىٰسٛ مُمْ ندٜرْ دَارٛرْغَلْ،

²⁴ عٛيِعِ نٛ عٛوَعِ، عٛدِلِّ، لَوْ عٛيٜجِّتِ نٛ عٛوَعْنٛ؞

²⁵ عَمَّا تٛ غٛطّٛ طٛنْ لِنْشِتَ تَوْرٜىٰتَ اَللَّه تِمُّکَ، دِمْطِنَنْکَ يِمْࢡٜ، عٛطٛنْ تٛکَّ جٛغَاغٛ کَ، عٛيٜجِّتِتَّا کٛ عٛنَنِ، عٛطٛنْ وَطَ کٛ کَ وِعِمٛ، غٛطّٛ عٛو حٜࢡَنْ بَرْکَ ندٜرْ کٛ عٛوَطَتَ ڢُو؞

²⁶ تٛ غٛطّٛ طٛنْ نُمَ عٛ غٛطّٛ دِينَ، عَمَّا عٛحَکِّلَنْتَا کٛ عٛوٛلْوَتَ، دِينَ مَاکٛ لَاتِ مٜىٰرٜ، عٛڢٜوَنِ حٛورٜ مَاکٛ؞

²⁷ ندَا کٛ حٛلَّتَ دِينَ غٛونغَاحَ عٜ شٜنِيکَ يٜىٰسٛ اَللَّه بَابِرَاوٛ‏: حَکِّلَنْغٛ عَتِيمٜعٜنْ عٜ رٜوْࢡٜ يُرُمْࢡٜ ندٜرْ ࢡِلَّارٜ مَࢡّٜ عٜ عَيْنُغٛ حٛورٜ مُوطُمْ نغَمْ تَا دُنِيَارُ سٛࢡْنَ طُمْ؞