عٜسَايَ 1 - دٜڢْتٜرٜ اَللَّه ڢُلْڢُلْدٜ عَدَمَوَ

¹ ندَا وَحَيُ مٛ عٜسَايَ ࢡِي عَمٛوسَ حٜࢡِ دٛوْ يَحُودَ عٜ عُرُسَلِيمَ ندٜرْ زَمَنُ عُزِّيَ عٜ يٛتَمْ عٜ عَکَسْ عٜ حٜزٜکِيَ، لَامِيࢡٜ يَحُودَ؞

اَللَّه ڢٜلِ يِمْࢡٜ مُوطُمْ

² «عَسَمَنْجِ، نَنٜ‏! لٜسْدِ، حٜطِتَ‏! نغَمْ مِنْ جَوْمِرَاوٛ وٛلْوَتَ؞ مِمَوْنِنِ ࢡِکّٛيْ، مِوُورْنِ کٛيْ، عَمَّا کٛيْ تُورْتَنِ يَمْ؞

³ نغَارِ عَنْدِ مَرْطٛ طُمْ، وَمْندٜ بٛو عَنْدِ نغَࢡَارٜ حَا جَوْمِيرٜ ࢩَامْنَتَ طُمْ؞ عَمَّا کٛو کٛ إِسْرَاءِيلَ عَنْدِ، عُمَّاتٛورٜ عَمْ ڢَامَتَا سَمْ؞»

⁴ بٛنٜ لَاتَنْتٛ عُمَّاتٛورٜ حَکّٜعٜنْ ندٜعٜ، عُمَّاتٛورٜ حٜىٰوْندٜ زُنُوبَ، عَسْنغٛلْ حَلُّࢡٜ، ࢡِࢡّٜ وٛنِّيࢡٜ‏! ࢡٜنغُدِنِ جَوْمِرَاوٛ، ࢡٜنجَوِ شٜنِيطٛ إِسْرَاءِيلَ، ࢡٜندٛکِّتِمٛ ࢡَاوٛ؞

⁵ حَا تٛيْ نغِطّٛنْ غٛطّٛ ڢِيَ عٛنْ ڢَحِنْ، عٛنٛنْ تٛکِّتِنَنْࢡٜ تُورْتٛلْ؟ حٛورٜ ڢُو حٜىٰوِ عٜلٛوطِ، ࢡٜرْندٜ ڢُو طٛنْ ندٜرْ نَاوْطُمْ؞

⁶ تٜݠّٜرٜ حَا حٛورٜ ڢُو يَمْطَايْ سَمْ، سٜيْ نَاوْنٜ عٜ ࢡٛوسْتَنْطٜ عٜ کُودُوجٜ؞ طٜ لَلَّاکَ، طٜ کَࢡَّاکَ، طٜ ندُڢَاکَ نٜبَّمْ؞

⁷ لٜسْدِ مٛنْ لَاتَکٜ لَدّٜ مٜىٰرٜ، يِيتٜ ࢩَامِ بٜرْنِيجِ مٛنْ؞ جَنَنْࢡٜ طٛنْ مبٛنَّ لٜسْدِ مٛنْ حَا يٜىٰسٛ مٛوطٛنْ، طُمْ نَتّٜرٜ ندٜ جَنَنْࢡٜ عُکَّنِ عٛنْ؞

⁸ عُرُسَلِيمَ وَرْتِ بَنَ دَنغْکِ ندٜرْ نغٜسَ عِنَبٛوجٜ، بَنَ دَنغٜلْ ندٜرْ نغٜسَ کُرْشِيجٜ، بَنَ بٜرْنِوٛلْ کِݠَّانغٛلْ؞

⁹ تٛ جَوْمِرَاوٛ حٛنٛوࢡٜ عَسَمَ لُتَّنَايْنٛ عٜنْ يٜىٰطْࢡٜ سٜطَّ، عٜنْ لَاتٛتٛنٛ بَنَ سٛدٛمَ، عٜنْ نَنْدَنّٛ بٜى غٛمٛرَّ؞

عٜوْنَاندُ نغَمْ تُوبُ

¹⁰ نَنٜ وٛلْدٜ جَوْمِرَاوٛ، عٛنٛنْ عَرْدِيࢡٜ سٛدٛمَ‏! حٜطِتَ تَوْرٜىٰتَ اَللَّه، عَنْ غٛمٛرَّ‏!

¹¹ جَوْمِرَاوٛ وِعِ‏: «کٛ يَالِ يَمْ بٜى طُوطٜىٰنغَ کِرْسَاطِ مٛنْ؟ مِسَڢْتِ جَوْطِ غُلَاطِ عٜ ࢡٜلّٜرٜ ࢩَلْبِ؞ مِسٜيٛرْتَاکٛ ࢨِيࢨَمْ غَعِ کَلْحَلِ عٜ بَالِ عٜ جَوْطِ بٜعِ؞

¹² ندٜ نغَرٛتٛنْ سُجِدَنْغٛ يَمْ، مٛيْ عُمْرِ عٛنْ يَاࢡُغٛ دَلْدٜ سَارٜ عَمْ؟

¹³ عَشّٜ وَدُّغٛ دٛکّٜ حَيَمْجٜ؞ عُورْلٜ عُورٛوجٜ طٜ ࢩِدُّطٜ يٜىٰسٛ عَمْ؞ جُولْطٜ لٜوْرُ حٜسْرُ عٜ ࢩَلْطٜ شِوْتٛرْطٜ عٜ مٛوࢡْتُکِ مٛوࢡٛرْلٜ – مِنْ کَمْ، مِوَاوَتَا مُࢩَنْغٛ طُمْ، نغَمْ عٛنْ مبٛنِّ طُمْ ڢُو بٜى حَکّٜىٰجِ مٛنْ؞

¹⁴ مِوَࢩِ جُولْطٜ مٛنْ حَکُّندٜ لٜبِّ عٜ جُولْطٜ مٛنْ غٛطّٜ ڢُو؞ طٜ لَاتَنِ يَمْ دٛنغَلْ، مِسٛمِ رٛونْدَاغٛ نغَلْ؞

¹⁵ تٛ عٛنْ مبٜىٰطِ جُوطٜ مٛوطٛنْ نغَمْ دٛعَاغٛ، مِوِيرْنَنْ غِتٜ عَمْ نغَمْ تَا مِيِعَ عٛنْ؞ کٛو تٛ عٛنْ طُطِّنِ دٛعَاجٜ، مِنَنَتَا نغَمْ جُوطٜ مٛوطٛنْ کٜىٰوِ ࢨِيࢨَمْ؞

¹⁶ نغِيوٜ، لَࢡِّنٜ کٛعٜ مٛوطٛنْ‏! شٛتِّنٜ کُوطٜ مٛنْ کَلُّطٜ يٜىٰسٛ عَمْ، عَشّٜ وَطُغٛ کَلُّطُمْ‏!

¹⁷ عٜکِّتٜ وَطُغٛ کٛ وٛوطِ، طَࢡِّتٜ کٛ ڢٛتِّ‏! ندَرْتِنٜ تٛوࢩٛوࢡٜ، کِيتَنٜ عَتِيمٜىٰجٛ بٜى غٛونغَ، نجِنغٜ رٜوْࢡٜ يُرُمْࢡٜ‏!»

¹⁸ «کَدِ، نغَرٜ حَا کُجّٛتِرٜنْ» – نٛنْ جَوْمِرَاوٛ وِعِ؞ «کٛو تٛ حَکّٜىٰجِ مٛوطٛنْ مبٛوجِ شٛيْ، طِ ندَنْوَنْ بَنَ مَلِّمَلّٛوجٜ؞ تٛ طِ مبٛوجِ بَنَ ࢨِيࢨَمْ، طِ ندَنْوَنْ بَنَ حٛتّٛلّٛ؞

¹⁹ تٛ عٛنْ نجَࢡِ طٛوْتَنَاغٛ يَمْ، عٛنْ ࢩَامَنْ ࢡُرْطُمْ وٛوطُغٛ حَا لٜسْدِ؞

²⁰ عَمَّا تٛ عٛنْ شَلَکٜ، عٛنْ تُورْتِ، ندٜنْ کَمْ کَاڢَحِ ࢩَامَنْ عٛنْ؞» مِنْ جَوْمِرَاوٛ وِعِ طُمْ؞

بٜرْنِوٛلْ کٜىٰوْنغٛلْ حَکّٜ

²¹ کَيْتٛ‏! بٜرْنِوٛلْ کٛولَانغٛلْ نَانٜ لَاتِ بَنَ دٜبّٛ دَاکَارٜىٰجٛ؞ نَانٜ عَدِلِعٜنْ نجٛوطِ تٛنْ، عَمَّا جٛنْتَ سٜيْ مبَرٛوࢡٜ کٛعٜ؞

²² شَرْدِ مَ لَاتَکٜ نجَمْندِ مٜىٰرٜ، عِنَبٛوجَمْ مَ مبٛوطَّمْ جِلِّرَامَ ندِيَمْ؞

²³ عَرْدِيࢡٜ مَ لَاتَکٜ تُورْتٛوࢡٜ، ࢡٜ سٛوبَعٜنْ وُيْࢡٜ؞ ࢡٜ ڢُو ࢡٜنغِطِ شَاحُوجِ رُسِيَ، ࢡٜطٛنْ طَࢡَّ نغٜىٰنَارِ زَمْبَ؞ ࢡٜنجِنغَتَا عَتِيمٜعٜنْ ڢٛدّٜ عَدِلَاکُ، ࢡٜشُکْلَنْتَاکٛ حَالَ رٜوْࢡٜ يُرُمْࢡٜ؞

²⁴ نغَمْ مَاجُمْ، ندَا نِي اَللَّه، جَوْمِرَاوٛ حٛنٛوࢡٜ عَسَمَ، بَاوْطٛ إِسْرَاءِيلَ وِعِ‏: «کَيْ‏! مِڢٜىٰوْتِنَنْ ࢡٜرْندٜ عَمْ دٛوْ وَࢩْࢡٜ يَمْ، مِوَاتٛتٛ کٛنّٜعٜنْ عَمْ؞

²⁵ عَنْ عُرُسَلِيمَ، جُنغٛ عَمْ تٜدَّنْ دٛوْ مَاطَ؞ مِࢡٛلِنْتٜ، مِلَࢡِّنْتٜ، مِوُرْتِنَنْ تُوندِ مَ ڢُو؞

²⁶ مِوَرْتِرَنْ حِيتٛوࢡٜ بَنَ نَانٜ، سَرْوٛوࢡٜ بٛو بَنَ ࢡٛويْمَ؞ ࢡَاوٛطٛنْ ࢡٜعٜوْنٜتٜ بٜرْنِوٛلْ-عَدِلَاکُ عٜ وُرٛ-حٛولَارٜ؞»

²⁷ تٛ سِيٛنَ وَطِ کِيتَ نغٛونغْطُکَ، نغٛلْ حِسْنٜتٜ؞ تٛ يِمْࢡٜ مَاغٛلْ تُوبِ، مبَطِ کٛ ڢٛتَّنْتَ عَدِلَاکُ، ࢡٜ کِسْنٜتٜىٰࢡٜ؞

²⁸ عَمَّا تُورْتٛوࢡٜ عٜ حَکّٜعٜنْ، مَسِيبٛ عُکَّنْتٛ ࢡٜ، عَشُّࢡٜ جَوْمِرَاوٛ بٛو نَتَّنْ؞

²⁹ عٛنْ شٜمْتَنْ نغَمْ عٛنْ ندٜوِ لَبِّ لٜسْ لٜطّٜ مَوْطٜ، عٛنْ کٜىٰوَنْ سٜمْتٜىٰندٜ دَلِيلَ جَرْنٜ لَبِّ طٜ شُࢡْطٛنْ؞

³⁰ عٛنْ لَاتٛتٛ بَنَ لٜطّٜ مَوْطٜ طٜ حَاکٛ مَاجٜ طَيْلِ، بَنَ جَرْنٜ طٜ نغَلَا ندِيَمْ؞

³¹ بَنَ حٛتّٛلّٛ وُلْدَتَ تٛ ڢٜعْتٜرٜ يِيتٜ مٜىٰمِ کٛ، بَنَ نٛنْ سٜمْبِطْࢡٜ نَتِّرْتَ نغَمْ دَلِيلَ کُوطٜ مَࢡّٜ کَلُّطٜ؞ وَلَا کَطَنْطٛ حَلْکٜرٜ؞