عِبْرَنِنغْکٜعٜنْ 1 - دٜڢْتٜرٜ اَللَّه ڢُلْڢُلْدٜ عَدَمَوَ

اَللَّه وٛلْوَنِ عٜنْ بٜى حُنْدُکٛ ࢡِطّٛ مُوطُمْ

¹ ࢡٛويْمَ، بٜى کُنْدُطٜ اَلنَّبِعٜنْ، اَللَّه وٛلْوَنِ کَاکِرَاࢡٜ مٜىٰطٜنْ ندٜ طُوطُّمْ بٜى لَابِ ڢٜىٰرٜ ڢٜىٰرٜ؞

² عَمَّا ندٜرْ بَلْطٜ رَغَرٜىٰجٜ طٜعٜ، عٛوٛلْوَنِ عٜنْ بٜى حُنْدُکٛ ࢡِطّٛ مُوطُمْ؞ بٜى مَاکٛ اَللَّه تَغْرِ کٛو طُمٜ ڢُو، عٛوَطِمٛ دٛنٛووٛ کُوجٜ ڢُو؞

³ ࢡِطّٛ عٛو عٛ أَلنّٛورَ تٜدُّنغَلْ اَللَّه، عٛوَنغِنِ نٛ اَللَّه وَعِ ڢُو، عٛطٛنْ جٛغِ کُوجٜ ڢُو بٜى وٛلْدٜ مَاکٛ مَرْندٜ بَاوْطٜ؞ ࢡَاوٛ ندٜ عٛلَࢡِّنِ يِمْࢡٜ دِغَ حَکّٜىٰجِ مُوطُمْعٜنْ، عٛجٛوطِ حَا عَسَمَ حَا ࢩَامٛ اَللَّه، مَرْطٛ مَنغُ ڢُو؞

ࢡِطّٛ ࢡُرِ مَلَاعِکَعٜنْ

⁴ ࢡِطّٛ لَاتِ عٛ ࢡُرْدُطٛ مَلَاعِکَعٜنْ تٜدُّنغَلْ، اَللَّه حٛکِّمٛ عِنْدٜ ࢡُرْندٜ ندٜ مَࢡّٜ؞

⁵ نغَمْ اَللَّه مٜىٰطَايْ وِعْغٛ حَا مَلَاعِکَاجٛ کٛو غٛوتٛ‏: «عَنْ وٛنِ ࢡِطّٛ عَمْ، حَنْدٜ مِدَࢩِ مَ؞» عٛمٜىٰطَايْ بٛو وِعْغٛ‏: «مِلَاتٛتٛ بَابِرَاوٛ مَاکٛ، کَنغْکٛ بٛو عٛلَاتٛتٛ ࢡِطّٛ عَمْ؞»

⁶ عَمَّا ندٜ اَللَّه ࢡَدَکٜ نٜلُغٛ ࢡِطّٛ مُوطُمْ عَڢٛ حَا دُنِيَارُ، عٛوِعِ‏: «مَلَاعِکَعٜنْ اَللَّه ڢُو شُجِدَنَ مٛ؞»

⁷ ندَا کٛ اَللَّه وِعِ دٛوْ مَلَاعِکَعٜنْ‏: «اَللَّه طٛنْ لَاتِنَ مَلَاعِکَعٜنْ مُوطُمْ کٜنِ، جَغِّيࢡٜ مُوطُمْ بٛو طٜمْطٜ يِيتٜ؞»

⁸ عَمَّا دٛوْ ࢡِطّٛ عٛوِعِ‏: «لٜىٰسٛ لَامُ مَاطَ يَا اَللَّه، دُومٛتٛ حَا ڢٛرٛيْ‏! عَطٛنْ لَامٛ بٜى کِيتَ ندَرْنُکَ؞

⁹ عَيِطِ عَدِلَاکُ، عَوَࢩِ حَلّٜىٰندٜ؞ نغَمْ مَنْ اَللَّه، مٛ اَللَّه مَاطَ مٛيْتِ مَ بٜى نٜبَّمْ، حٛکِّ مَ سٜيٛ کٛ ࢡُرِ وٛنْدُࢡٜ بٜى مَاطَ ڢُو؞»

¹⁰ کَدِبٛو عٛوِعِ‏: «عَنْ يَا جَوْمِرَاوٛ، عَتَغِ دُنِيَارُ دِغَ ڢُطَّمْ، عَسَمَنْجِ، طُمْ کُوغَلْ جُوطٜ مَاطَ،

¹¹ کَنْجِ طِ کَلْکَنْ، عَمَّا عَنْ عَتَبِتَنْ؞ طِ ڢُو طِ کِيطَنْ بَنَ لِمْشٜ،

¹² عَتَغَّنْ طِ بَنَ نغَݠَلٜىٰوٛلْ، طِ نغَيْلِتِتّٛ بَنَ لِمْشٜ، عَمَّا عَنْ عَوَيْلِتِتَّاکٛ، دُوࢡِ مَ نجِنَّتَا سَمْ؞»

¹³ اَللَّه مٜىٰطَايْ وِعْغٛ کٛو مٛيْ مَلَاعِکَاجٛ‏: «جٛوطَ حَا ࢩَامٛ عَمْ، حَا تٛ مِلَاتِنِ کٛنّٜعٜنْ مَ جَاࢡْرُطُمْ کٛسْطٜ مَ؞»

¹⁴ ࢡٜيٜ نغٛنِ مَلَاعِکَعٜنْ؟ ࢡٜ رُوحُوجِ، ࢡٜطٛنْ کُووَنَ اَللَّه؞ اَللَّه طٛنْ نٜلَ ࢡٜ نغَمْ حَا ࢡٜمبَلَّ حٜࢡَنْࢡٜ کِسْندَمْ؞