حَغَّيْ 1 - دٜڢْتٜرٜ اَللَّه ڢُلْڢُلْدٜ عَدَمَوَ

عُمْرٛورٜ ࢩِࢡْتَاغٛ حَيْکَلِيرُ

¹ ندٜرْ ندُوࢡُ لَامِيطٛ دَرِيُسْ طِطَࢡُ، لٜوْرُ جٛوٜىٰغٛورُ، ࢩَنْدٜ غٛعٛورٜ مَارُ، جَوْمِرَاوٛ وٛلْوَنِ زٛرٛبَابِلَ ࢡِي سَلَتِيٜلْ، نغٛمْنَ دٛوْ يَحُودَ عٜ يٛسُوَ ࢡِي يٛشَدَکْ، حٛورٜىٰجٛ لِمَنْعٜنْ، بٜى حُنْدُکٛ اَلنَّبِي حَغَّيْ؞ عٛوِعِ‏:

² «ندَا نِي جَوْمِرَاوٛ حٛنٛوࢡٜ عَسَمَ وِعِ‏: عُمَّاتٛورٜ ندٜعٜ طٛنْ وِعَ، وَکَّتِ ࢩِࢡْتَاغٛ حَيْکَلِيرُ جَوْمِرَاوٛ وَطَايْ تَوٛنْ؞»

³ ندٜنْ جَوْمِرَاوٛ وِعِ بٜى حُنْدُکٛ اَلنَّبِي حَغَّيْ‏:

⁴ «طُمْ سَاعِ نغَمْ مٛوطٛنْ حَا نجٛوطٛوطٛنْ ندٜرْ شُوطِ ࢡَسَاطِ لٜطّٜ، عَسٜى بٛو حَيْکَلِيرُ عَمْ طٛنْ وِلِ نَ؟

⁵ جٛنْتَ ندَا نِي جَوْمِرَاوٛ حٛنٛوࢡٜ عَسَمَ وِعِ‏: نُمْتٜ کُوطٜ مٛنْ‏!

⁶ عٛنْ عَاوِ طُوطُّمْ، عَمَّا عٛنْ شٛدِ ݠَمَرُمْ؞ عٛنْ ࢩَامِ، عَمَّا عٛنْ کَارَايْ؞ عٛنْ نجَرِ، عَمَّا طَمْ عِتَّايْ سُونٛ مٛوطٛنْ؞ عٛنْ طٛنْ ࢡٛرْنِ، عَمَّا عٛنْ طٛنْ مَاتَ جَانغٛلْ؞ کُووَنْطٛ نغَمْ نغٜىٰنَارِ طٛنْ جَࢡَ رُڢَ ندِ ندٜرْ بٛورٛ سُمْݠِتَانغٛ؞

⁷ ندَا نِي جَوْمِرَاوٛ حٛنٛوࢡٜ عَسَمَ وِعِ‏: نُمْتٜ کُوطٜ مٛنْ‏!

⁸ مبَعّٜ دٛوْ حٛوسٜىٰرٜ، نغَدّٜ لٜطّٜ، ࢩِࢡْتٜ حَيْکَلِيرُ؞ کَنْجُمْ سٜيْنَتَمِّ، طُمْ تٜدِّنْتَمْ بٛو؞

⁹ عٛنْ تَمِّ عٛنْ کٜࢡَنْ طُوطُّمْ، عَمَّا ندَا، عٛنْ کٜࢡِ ݠَمَرُمْ؞ ندٜ عٛنْ کٛورِ طُمْ حَا سَارٜ، مِوِڢْتِ طُمْ؞ نغَمْ طُمٜ کُووْمِ طُمْ؟ نغَمْ حَيْکَلِيرُ عَمْ لَاتِيندُ بِلّٜ، سَاعِ عٛنْ طٛنْ شُکْلِ بٜى شُوطِ مٛوطٛنْ؞

¹⁰ نغَمْ مَاجُمْ عَسَمَنْجِ نجٛغِتَنِ عٛنْ سَاوَوْرٜ، لٜسْدِ بٛو جٛغِتَنِ عٛنْ ࢨَامْلٜ؞

¹¹ مِعُمْرِ حٛکّٜرٜ وَطَ دٛوْ لٜسْدِ عٜ کٛوسٜىٰجٜ عٜ دٛوْ دٜمٜتِرْلٜ عٜ کٛ لٜسْدِ ڢُطْنَتَ ڢُو؞ نغَمْ دَلِيلَ حٛکّٜرٜ مَنْ، عِنَبٛوجَمْ عٜ نٜبَّمْ ݠَمْطِتِ، يِمْࢡٜ عٜ دَبَّاجِ بٛو نجَرِ بٛنٜ، کُوطٜ طٜ کُووْطٛنْ ڢُو مبٛنِّ؞»

¹² زٛرٛبَابِلَ ࢡِي سَلَتِيٜلْ عٜ يٛسُوَ ࢡِي يٛشَدَکْ، حٛورٜىٰجٛ لِمَنْعٜنْ عٜ يِمْࢡٜ لُتُّࢡٜ ندٜرْ عُمَّاتٛورٜ ڢُو نَنَنِ جَوْمِرَاوٛ اَللَّه مُوطُمْعٜنْ، وَاتٛ بٛلّٜ طٜ جَوْمِرَاوٛ اَللَّه مَࢡّٜ نٜلِ اَلنَّبِي حَغَّيْ وٛلْوَنْغٛ ࢡٜ؞ عُمَّاتٛورٜ ڢُو طٛوْتَنِ جَوْمِرَاوٛ؞

¹³ ندٜنْ حَغَّيْ، نٜلَاطٛ جَوْمِرَاوٛ يٜشِّ يِمْࢡٜ عُمَّاتٛورٜ نِعِ‏: «جَوْمِرَاوٛ وِعِ‏: مِطٛنْ وٛنْدِ بٜى مٛوطٛنْ؞»

¹⁴ جَوْمِرَاوٛ سُوسْطِنِ زٛرٛبَابِلَ ࢡِي سَلَتِيٜلْ، نغٛمْنَ دٛوْ يَحُودَ عٜ يٛسُوَ ࢡِي يٛشَدَکْ حٛورٜىٰجٛ لِمَنْعٜنْ عٜ يِمْࢡٜ لُتُّࢡٜ ندٜرْ عُمَّاتٛورٜ ڢُو؞ ࢡٜنغَرِ، ࢡٜکُووِ حَا حَيْکَلِيرُ جَوْمِرَاوٛ حٛنٛوࢡٜ عَسَمَ؞

¹⁵ طُمْ وَطِ ندٜرْ ࢩَنْدٜ نٛوغَسْ عٜ نَيَࢡْرٜ حَا لٜوْرُ جٛوٜىٰغٛعٛورُ، ندٜرْ ندُوࢡُ لَامِيطٛ دَرِيُسْ طِطَࢡُ؞