عٜزٜکِيٜلْ 1 - دٜڢْتٜرٜ اَللَّه ڢُلْڢُلْدٜ عَدَمَوَ

عٜزٜکِيٜلْ يِعِ تٜدُّنغَلْ اَللَّه

^1-3 جَوْمِرَاوٛ وٛلْوَنِ عٜزٜکِيٜلْ لِمَنْجٛ، ࢡِي بُجِ حَا مَايٛ کٜبَرْ ندٜرْ لٜسْدِ کَلْدِيَ؞ عٜزٜکِيٜلْ وِعِ‏: «ندَا کٛ لَاتِ ندٜرْ ندُوࢡُ عَمْ شَݠَّنْطٜ تَتَࢡُ، لٜوْرُ نَيَࢡْرُ، ࢩَنْدٜ جٛوَࢡْرٜ مَارُ؞ سَاعِ مَنْ مِ طٛنّٛ شَکَ دَحَاࢡٜ حَا مَايٛ کٜبَرْ؞ ࢩَنْدٜ جٛوَࢡْرٜ غٛ ندٜرْ ندُوࢡُ نجٛوَࢡُ ࢡَاوٛ دَحٜىٰکِ لَامِيطٛ يٛويَکِنْ، عَسَمَنْجِ مَࢡِّتِ، اَللَّه يِعْنِ يَمْ وَحَيُوجِ؞ تٛنْ حَا مَايٛ، جُنغٛ جَوْمِرَاوٛ نَنغِ يَمْ؞

⁴ «مِلَارِ، ندَا حٜنْدُ سَاتُندُ طٛنْ وَرَ دِغَ وٛيْلَ، نٛنْ بٛو رُولْدٜ مَوْندٜ بٜى يِيتٜ حُࢡَّنْنغٜ؞ جَيْنغٛلْ تَارِ رُولْدٜ مَنْ؞ حَا شَکَ يِيتٜ، وٛودِ طٜلْکٛوجُمْ بَنَ طٜلْکٛ نجَمْندِ؞

⁵ حَا شَکَ شَکْ وٛودِ تَغْلٜ غٜىٰتٜ نَيِ، طٜ نَنْدِ بٜى نٜطّٛ؞

⁶ تَغْدِ ڢُو وٛودِ غٜىٰسٜ نَيِ عٜ بِلٜىٰجِ نَيِ؞

⁷ کٛسْطٜ مَاجٜ دَرْنُطٜ شِرْ، جَاࢡْرُطٜ مَاجٜ لَاتِ بَنَ طٜ ࢩَلَحٛلْ، طٜ طٛنْ طٜلْکَ بَنَ نجَمْندِ مبٛطٜىٰرِ؞

⁸ طٜ نغٛودِ جُوطٜ بَنَ طٜ يِمْࢡٜ لٜسْ بِلٜىٰجِ مَاجٜ نَيِ حَا بُتُّلِ مَاجٜ نَيِ؞ تَغْلٜ نَيِ ڢُو نغٛودِ غٜىٰسٜ عٜ بِلٜىٰجِ بَنَ نِعِ‏:

⁹ بِلٜىٰجِ مَاجٜ مٜىٰمِنْدِرِ؞ تٛ طٜ طٛنْ نجَحَ، وَلَا حَاجٜ طٜ نغَيْلِتٛ، تَغْدِ ڢُو طٛنْ تِيتِ شِرْ غَلْ يٜىٰسٛ مُوطُمْ؞

¹⁰ غٜىٰسٜ مَاجٜ نَنْدِ بٜى يٜىٰسٛ نٜطّٛ؞ حَا وَکٜىٰرٜ ࢩَامْرٜ، تَغْلٜ نَيِ ڢُو نغٛودِ غٜىٰسٜ بَنَ يٜىٰسٛ مبَرٛوغَ، حَا وَکٜىٰرٜ نَنْدٜ بٛو، بَنَ يٜىٰسٛ نغَارِ کَلْحَلْدِ، طٜ نَيِ ڢُو طٜ نغٛودِ يٜىٰسٛ بَنَ نغٛ دُتَلْ؞

¹¹ بِلٜىٰجِ مَاجٜ طِطِ مبٜعِّتِ غَلْ دٛوْ، طِ مٜىٰمِنْدِرِ، طِطِ غٛطِّ بٛو مبِيرْنِ ࢡَلِّ مَاجٜ؞

¹² تَغْدِ ڢُو تِيتِ يٜىٰسٛ مُوطُمْ؞ حَا رُوحُ يِطِ يَحُغٛ ڢُو، تٛنْ طٜ نجَحَتَ؞ تٛ طٜ طٛنْ نجَحَ، طٜ نغَيْلِتِتَّاکٛ؞

¹³ شَکَ تَغْلٜ طٜعٜ، مِيِعِ غٛطُّمْ بَنَ ࢨُلْࢡٜ يِيتٜ، بَنَ جَمٜ طٜ طٛنْ ندِمْبٛ بَنَ تٛسْتِلَمْجِ طٛنْ نغَانْشَ شَکَ تَغْلٜ غٜىٰتٜ طٜعٜ؞ يِيتٜ نغٜعٜ طٛنْ طٜلْکَ، مَعّٜ طٛنْ نغُرْتٛ عٜ مَاغٜ بٛو؞

¹⁴ تَغْلٜ غٛ طٛنْ نجَحَ، طٛنْ لٛرْتٛ بٜى جَاوَلْ، طُمْ طٛنْ بَنَ مَعّٜ؞

¹⁵ «مِ طٛنّٛ لَارَ تَغْلٜ طٜعٜ؞ ندَا، ڢَلّٛورٜ مُرْلٜرٜ طٛنْ حَا لٜسْدِ حَا کٛمْبِ تَغْدِ ڢُو، حَا يٜىٰسٛ غٜىٰسٜ مَارِ نَيِ؞

¹⁶ ݠَلّٛوجٜ طٜعٜ طٛنْ طٜلْکَ بَنَ حَيْرٜ کِرِسٛلِتِ، نَيِ ڢُو طٛنْ نَنْدِ؞ وٛودِ ڢَلّٛورٜ وٛطْندٜ ندٜرْ ڢَلّٛورٜ ڢُو؞

¹⁷ طٜ طٛنْ نجَحَ غَلْ عَلْکِبِلَاجِ نَيِ ڢُو، وَلَا حَاجٜ طٜ نغَيْلِتٛ ندٜرْ يَحْدُ مَاجٜ؞

¹⁸ طٜ تَارَامَ بٜى تَلِّرْطٜ مَوْطٜ مَسِنْ؞ مِيِعِ تَلِّرْطٜ مَنْ کٜىٰوِ غِتٜ حَا ڢِيلْتِ؞

¹⁹ تٛ تَغْلٜ طٜعٜ طٛنْ نجَحَ، ݠَلّٛوجٜ بٛو طٛنْ تَلَّ بَنغٜ مَاجٜ؞ تٛ تَغْلٜ طٜعٜ طٛنْ عٜىٰنغَ دِغَ لٜسْدِ، ݠَلّٛوجٜ بٛو طٛنْ عٜىٰنغَ؞

²⁰ حَا رُوحُ يَحَتَ ڢُو، تٛنْ تَغْلٜ طٜعٜ نجَحَتَ، ݠَلّٛوجٜ بٛو عٜىٰنغِدَنْ بٜى مَاجٜ، نغَمْ رُوحُ تَغْلٜ طٜعٜ طٛنْ ندٜرْ ݠَلّٛوجٜ؞

²¹ تٛ تَغْلٜ طٜعٜ طٛنْ ندِلَّ، ݠَلّٛوجٜ بٛو طٛنْ تَلَّ؞ تٛ تَغْلٜ ندَرَکٜ، ݠَلّٛوجٜ بٛو طٛنْ ندَرٛ؞ تٛ تَغْلٜ طٛنْ عٜىٰنغَ دِغَ لٜسْدِ، ݠَلّٛوجٜ بٛو عٜىٰنغِدَنْ بٜى مَاجٜ، نغَمْ رُوحُ تَغْلٜ طٛنْ ندٜرْ ݠَلّٛوجٜ؞

²² «حَا دٛوْ کٛعٜ تَغْلٜ طٜعٜ، وٛودِ عِرِنْ کِݠّٛلْ کُلْنِينغٛلْ، نغٛلْ طٛنْ طٜلْکَ بَنَ حَيْرٜ جَلْبِتَنْدٜ، نغٛلْ طٛنْ وٜعِّتِ دٛوْ کٛعٜ تَغْلٜ؞

²³ بِلٜىٰجِ مَاجٜ طٛنْ مبٜعِّتِ لٜسْ کِݠّٛلْ نغٛعٛلْ، مٜىٰمِنْدِرِ؞ تَغْدِ ڢُو وٛودِ بِلٜىٰجِ طِطِ نغَمْ وِيرْنُغٛ ࢡَنْدُ مَارِ؞

²⁴ سَاعِ طٜ نجَحَتَ، مِ طٛنّٛ نَنَ حٛولٛ بِلٜىٰجِ مَاجٜ بَنَ عِيدَانغٛ ندِيَمْجِ مَوْطِ، بَنَ سَوْتُ اَللَّه بَاوْطٛ، بَنَ حٛولٛ مٛوࢡْرٜ طُوطْندٜ مَلَّ ندٜ سَنغٜىٰرٜ کٛنُ؞ تٛ طٜ ندَرَکٜ، طٜ طٛنْ لٜىٰسْتِنَ بِلٜىٰجِ مَاجٜ؞

²⁵ حٛولٛ عِوِ حَا نٛکُّورٜ دٛوْ کِݠّٛلْ بٜعِّتِينغٛلْ دٛوْ کٛعٜ مَاجٜ غٛ، تٛ طٜ ندَرَکٜ، طٜ طٛنْ نجِݠِّنَ بِلٜىٰجِ مَاجٜ؞

²⁶ «دٛوْ کِݠّٛلْ غٛنْنغٛلْ دٛوْ کٛعٜ مَاجٜ غٛ، نغِعْمِ حُوندٜ بَنَ حَيْرٜ سَڢِرَ، ندٜ نَنْدِ بٜى لٜىٰسٛ لَامُ؞ دٛوْ لٜىٰسٛ نغٛعٛ بٛو، نَنْدُطٛ بٜى نٜطّٛ طٛنْ جٛوطِ؞

²⁷ دِغَ حَدّٛرْدٜ مَاکٛ يَحُغٛ دٛوْ، نغِعْمِ طٜلْکٛ بَنَ نجَمْندِ، يِيتٜ تَارِ طُمْ؞ دِغَ حَدّٛرْدٜ مَاکٛ يَحُغٛ لٜسْ، نغِعْمِ کٛ نَنْدِ بٜى يِيتٜ؞ جَيْنغٛلْ تَارِ جَاتِ مَاکٛ ڢُو؞

²⁸ جَيْنغٛلْ مَنْ نَنْدِ بٜى تِمٛتِمٛونغَلْ بَنغَنْنغَلْ ندٜرْ دُولٜ، سَاعِ عِيٜىٰندٜ طٛنْ تٛࢡَ؞ بَنَ نٛنْ تٜدُّنغَلْ اَللَّه وَنغِرِ؞ «ندٜ نغِعْمِ طُمْ، مِسُجِدِ، مِنَنِ غٛطّٛ طٛنْ وٛلْوَ؞»