غُرْتَاکِ 1 - دٜڢْتٜرٜ اَللَّه ڢُلْڢُلْدٜ عَدَمَوَ

بٛنٜ إِسْرَاءِيلَعٜنْ حَا مِصْرَ

¹ ندَا عِنْطٜ ࢡِࢡّٜ يَعْقُوبُ، وَاتٛ إِسْرَاءِيلَعٜنْ يَحْدُࢡٜ حَا مِصْرَ بٜى بَابَ مُوطُمْعٜنْ، کٛو مٛيْ ڢُو بٜى سَارٜ مُوطُمْ‏:

² رُبٜنْ، سِمٜيٛنْ، لٜوِ عٜ يَحُودَ،

³ عِسَّکَرْ، زَبُلٛنْ عٜ بٜنْيَمِنْ،

⁴ دَنْ عٜ نٜڢْتَلِ، غَدَ عٜ عَسٜرْ؞

⁵ لِمْغَلْ دَࢩْغٛلْ يَعْقُوبُ ڢُو، وَطِ يِمْࢡٜ شَݠَّنْطٜ نجٛوٜىٰطِطٛ (70)؞ يُوسُڢُ کَمْ طٛنّٛ حَا مِصْرَ تٛنْ؞

⁶ يُوسُڢُ عٜ دٜىٰرْطِرَاࢡٜ مُوطُمْ ڢُو مَايِ، نٛنْ بٛو مٛوࢡْغَلْ يِدٜرٜ مَࢡّٜ ڢُو؞

⁷ إِسْرَاءِيلَعٜنْ ندَࢩْندَࢩْتِرِ، ࢡٜطٛنْ ࢡٜسْدٛ، ࢡٜطٛنْ طُوطَ، بَاوْطٜ مَࢡّٜ بٛو ࢡٜسْدِ مَسِنْ؞ ࢡٜکٜبِّنِ لٜسْدِ مِصْرَ؞

⁸ ندٜنْ لَامِيطٛ کٜسٛ لَامِ دٛوْ لٜسْدِ مِصْرَ؞ کَنغْکٛ عٛعَنْدَا يُوسُڢُ؞

⁹ عٛوِعِ عُمَّاتٛورٜ مَاکٛ‏: «ندَارٜ، عُمَّاتٛورٜ إِسْرَاءِيلَ ࢡُرْدِ عٜنْ طُوطُغٛ عٜ سٜمْبٜ؞

¹⁰ سٜيْ عٜنْ کٜࢡَ دَبَرٜ نغَمْ حَطُغٛ ندٜ طُوطُغٛ؞ نغَمْ تٛ ندٜ طُوطِ، تٛ کٛنُ وَطِ، ندٜ حَوْتَنْ بٜى کٛنّٜعٜنْ مٜىٰطٜنْ، ندٜ حَࢡَنْ بٜى مٜىٰطٜنْ، ندٜ وُرْتٛتٛ لٜسْدِ؞»

¹¹ مِصْرَعٜنْ لَاتِنِ إِسْرَاءِيلَعٜنْ مَشُّࢡٜ، ندَرْنِ کَلِيڢَعٜنْ دٛوْ مَࢡّٜ نغَمْ تٛرُّغٛ ࢡٜ بٜى کُوغَلْ شَاتُنغَلْ؞ إِسْرَاءِيلَعٜنْ ࢩِࢡَنِ ڢِرْعَوْنَ بٜرْنِيجِ شِغٛرْطِ طِعِ‏: ݠِتٛمْ عٜ رَعْمٜسٜسْ؞

¹² بَنَ نِي کٛو ندٜ مِصْرَعٜنْ طُطِّنِ تٛوࢩَانغٜ دٛوْ مَࢡّٜ، کَمْࢡٜ ࢡٜࢡُرْتِ ࢡٜسْدَاغٛ، ࢡٜطُوطِ حَا مِصْرَعٜنْ کُلِ ࢡٜ؞

¹³ مِصْرَعٜنْ کُووْنِ إِسْرَاءِيلَعٜنْ بٜى شَاتَلْ؞

¹⁴ ࢡٜلَسْکِنِ جٛوندٜ مَࢡّٜ بٜى کُوطٜ شَاتُطٜ طٜعٜ‏: جِيࢡُغٛ لٛوݠٜ، تَݠُّغٛ بِرِکْجٜ عٜ حُووُغٛ کُوطٜ غٜسٜ؞ ࢡٜندٛولِ ࢡٜ حُووُغٛ کُوطٜ شَاتُطٜ کٛو طٜيٜ ڢُو؞

¹⁵ لَامِيطٛ مِصْرَ حٛکِّ عُمْرٛورٜ ندٜعٜ حَا سِڢِرَ عٜ ݠُعَ، رٜوْࢡٜ ࢡٜسْنِنٛوࢡٜ حَا عِبْرَنِنغْکٜعٜنْ،

¹⁶ عٛوِعِ ࢡٜ‏: «تٛ عٛنْ طٛنْ ࢡٜسْنِنَ رٜوْࢡٜ عِبْرَنِنغْکٜعٜنْ، ندَارٜ بٛوطُّمْ، تٛ طُمْ ࢡِنغٜلْ غٛرْغٜلْ، مبَرٜ نغٜلْ، تٛ طُمْ دٜيٜلْ بٛو، عَشّٜ نغٜلْ يٜىٰطَ؞»

¹⁷ عَمَّا ࢡٜسْنِنٛوࢡٜ غٛ کُلِ اَللَّه، ࢡٜطٛوْتَنَاکِ عُمْرٛورٜ لَامِيطٛ مِصْرَ؞ ࢡٜعَشِّ ࢡِکّٛيْ نغٛرْکٛيْ نغٜىٰطَ؞

¹⁸ ندٜنْ لَامِيطٛ مِصْرَ عٜوْنِ ࢡٜ، ࢨَمِ‏: «کٛنِ کُووْطٛنْ بَنَ نِي؟ کٛنِ عٛنْ عَشِّ ࢡِکّٛيْ نغٛرْکٛيْ نغٜىٰطَ؟»

¹⁹ ࢡٜنجَابِ ڢِرْعَوْنَ‏: «رٜوْࢡٜ عِبْرَنِنغْکٜعٜنْ لَاتَاکِ بَنَ رٜوْࢡٜ مِصْرَعٜنْ، ࢡٜ سٜمْبِطْࢡٜ؞ حِدّٜکٛ ࢡٜسْنِنٛووٛ وَرَ حَا مَࢡّٜ، ࢡٜندَࢩِ؞»

²⁰ بَنَ نِي اَللَّه وٛونَنِ رٜوْࢡٜ ࢡٜسْنِنٛوࢡٜ ࢡٜعٜ، إِسْرَاءِيلَعٜنْ ࢡٜسْدِ طُوطُغٛ، بَاوْطٜ مَࢡّٜ بٛو ࢡٜسْدِ مَسِنْ؞

²¹ اَللَّه حٛکِّ رٜوْࢡٜ غٛ دَࢩْغٛلْ، نغَمْ ࢡٜکُلِ اَللَّه؞

²² ندٜنْ ڢِرْعَوْنَ عُمْرِ عُمَّاتٛورٜ مُوطُمْ ڢُو، عٛوِعِ‏: «غٛرْغٜلْ دَࢩَانغٜلْ ندٜرْ سَارٜ يَحُودُوجٛ ڢُو، شَکِّنٜ نغٜلْ ندٜرْ مَايٛ نِيلْ؞ ندٜحٛيْ کَمْ، عَشّٜ کٛيْ نغٜىٰطَ؞»