عَسْتَ 1 - دٜڢْتٜرٜ اَللَّه ڢُلْڢُلْدٜ عَدَمَوَ

جُولْدٜ مَوْندٜ حَا سُوزَ

¹ ندَا کٛ لَاتِ ندٜرْ زَمَنُ عَحَسُوٜرُسْ‏: وَکَّتِ مَنْ عٛلَامَنِ لٜسْطٜ تٜىٰمٜرّٜ عٜ نٛوغَسْ عٜ جٛوٜىٰطِطِ (127)، دِغَ عِنْدِيَ حَا يٛتِّ عٜتِيٛݠِيَ؞

² سَاعِ عٛطٛنْ حَا لَامٛرْدٜ سُوزَ دٛوْ لٜىٰسٛ لَامُ مَاکٛ،

³ عٛوَطِ ࢩَامْدُوجِ نغَمْ مَوْࢡٜ مَاکٛ عٜ سَرَاکِعٜنْ مَاکٛ ڢُو؞ حٛنٛوࢡٜ عِوْࢡٜ ݠٜرْسِيَ عٜ مٜدِيَ عٜ تٜدَّ-عَسْلِعٜنْ عٜ عَرْدِيࢡٜ لٜسْطٜ مَاکٛ نغَرِ يٜىٰسٛ مَاکٛ؞ عٛوَطِ طُمْ ندٜرْ ندُوࢡُ لَامُ مَاکٛ تَتَࢡُ؞

⁴ ࢩَلْطٜ تٜىٰمٜرّٜ عٜ شَݠَّنْطٜ جٛوٜىٰتَتِ (180) عٛحٛلِّ ࢡٜ رِسْکُ لَامُ مَاکٛ ݠَنْتُنغُ عٜ تٜدُّنغَلْ مَنغُ مَاکٛ کَايٜىٰڢِيوَلْ؞

⁵ ندٜ وَکَّتِ مَنْ سَالِ، عٛوَطِ ࢩَامْدُوجِ ڢٜىٰرٜ نغَمْ يِمْࢡٜ ندٜرْ لَامٛرْدٜ سُوزَ ڢُو، مَوْࢡٜ عٜ لٜىٰسْࢡٜ؞ طُمْ وَطِ ࢩَلْطٜ جٛوٜىٰطِطِ حَا دَلْدَلْ جَرْنٜ لَامٛرْدٜ؞

⁶ وِيرْندَلّٛوجِ دَنٜىٰجِ عٜ شَرْوِنَاطِ طٛنْ ࢡِلِ بٜى کَلَغَاجٜ شَرْدِ حَا ࢡٛغِّ دَنٜىٰجِ طِغُّطِ عٜ بٛطٜىٰجِ شَکَ دَنغْرَنغٜ کَاعٜ دَنٜىٰجٜ؞ لٜىٰسٜ کَنغّٜىٰرِ عٜ شَرْدِ طٛنْ مبٜعِّتِ دٛوْ تَنغْکٛلْ بَطَانغٛلْ بٜى کَاعٜ شٜحَاطٜ طٜلْکٛوجٜ عٜ دَنٜىٰجٜ عٜ عٛولٜ عٜ ࢡَلٜىٰجٜ؞

⁷ يِمْࢡٜ نجَرِ نجَرَمْ ندٜرْ نجَرْدُکٛيْ کَنغّٜىٰرِ ڢٜىٰرٜ ڢٜىٰرٜ؞ لَامِيطٛ حٛکِّ ࢡٜ عِنَبٛوجَمْ نغُيْکِنٛوجَمْ طُوطَّمْ ڢٛدّٜ شَاحَاکِ لَامِيࢡٜ؞

⁸ کٛو مٛيْ يَرِ بَنَ ࢡٜرْندٜ مُوطُمْ يِطِ؞ لَامِيطٛ عُمْرُنٛ وَکِيلِعٜنْ سَارٜ مُمْ ࢡٜمبَطَنَ عٜوْنَاطٛ ڢُو کٛ عٛيِطِ؞

⁹ وَسْتِ، دٜبّٛ لَامِيطٛ، کَنغْکٛ بٛو عٛوَطِ ࢩَامْدُوجِ نغَمْ رٜوْࢡٜ ندٜرْ لَامٛرْدٜ عَحَسُوٜرُسْ؞

تٛسْکَارٜ دٜبّٛ لَامِيطٛ عَحَسُوٜرُسْ

¹⁰ ࢩَنْدٜ جٛوٜىٰطِطَوْرٜ، ندٜ لَامِيطٛ يَرِ، عٛسٜيِ، عٛعُمْرِ مٜحُمَنْ عٜ بِزّٜتَ عٜ حَرْبٛنَ عٜ بِغٜتَ عٜ عَبَغَتَ عٜ زٜتَرْ عٜ کَرْکَسْ، سٛرْتَاࢡٜ حُووَنٛوࢡٜ مٛ نجٛوٜىٰطِطٛ،

¹¹ ࢡٜنغَدَّ وَسْتِ دٜبّٛ مَاکٛ يٜىٰسٛ مَاکٛ، مٜىٰتِيطٛ مٜىٰتَلٜىٰوٛلْ لَامُ؞ لَامِيطٛ يِطْنٛ حٛلُّغٛ عُمَّاتٛوجٜ عٜ مَوْࢡٜ نٛ دٜبّٛ عٛو وٛوطِرِ، نغَمْ عٛ نغَرْنِيطٛ مَسِنْ؞

¹² عَمَّا وَسْتِ، دٜبّٛ لَامِيطٛ سَلِ طٛوْتَنَاغٛ عُمْرٛورٜ ندٜ سٛرْتَاࢡٜ نغٜشِّمٛ، عٛوَرَايْ؞ نغَمْ مَاجُمْ ࢡٜرْندٜ لَامِيطٛ مٜتِّ، عٛࢡٜرْنِ مَسِنْ؞

¹³ ندٜنْ عٛسَرْوٛتِرِ بٜى دَوْرٛوࢡٜ مَاکٛ عَنْدُࢡٜ نٛ غٛطّٛ حُووْرَتَ وَکَّتِيجِ ڢُو، نغَمْ طُمْ عَلْعَادَ لَامِيطٛ عٛسَرْوٛتِرَ حَالَ ڢُو بٜى عَنْدُࢡٜ عُمْرٛوجٜ عٜ کِيتَ؞

¹⁴ ندَا عِنْطٜ دَوْرٛوࢡٜ مَاکٛ ࢡُرْࢡٜ ࢡَدَاغٛ مٛ‏: کَرْسٜنَ عٜ سٜتَرْ عٜ عَدَمَتَ عٜ تَرْسِسْ عٜ مٜرٜسْ عٜ مَرْسٜنَ عٜ مٜمُکَنْ، مَوْࢡٜ ݠٜرْسِيَ عٜ مٜدِيَ نجٛوٜىٰطِطٛ، حٛولَاࢡٜ لَامِيطٛ، مَرْࢡٜ جٛولٜ ࢡُرْطٜ تٜدُّغٛ ندٜرْ لَامُ مَاکٛ؞

¹⁵ لَامِيطٛ ࢨَمِ ࢡٜ‏: «ڢٛدّٜ عُمْرٛوجٜ مٜنْ، طُمٜ مبَطٜتٜنْ دٜبّٛ عَمْ وَسْتِ مٛ طٛوْتَنَاکِ وٛلْدٜ عَمْ ندٜ سٛرْتَاࢡٜ نغٜشِّ طُمْ؟»

¹⁶ مٜمُکَنْ جَابِ لَامِيطٛ عٜ مَوْࢡٜ‏: «وَسْتِ، دٜبّٛ لَامِيطٛ وَطِ کَلُّطُمْ، نَا دٛوْ لَامِيطٛ تَنْ، عَمَّا دٛوْ مَوْࢡٜ عٜ عُمَّاتٛوجٜ ندٜرْ لٜسْطٜ لَامِيطٛ عَحَسُوٜرُسْ ڢُو؞

¹⁷ نغَمْ رٜوْࢡٜ ڢُو عَنْدَنْ کٛ عٛوَطِ، ࢡٜنجَوٛتٛ وٛرْࢡٜ مَࢡّٜ، ࢡٜمبِعَ‏: لَامِيطٛ عَحَسُوٜرُسْ عُمْرِ وَدُّغٛ دٜبّٛ مُمْ وَسْتِ يٜىٰسٛ مُوطُمْ، عَمَّا عٛوَرَايْ؞

¹⁸ حَنْدٜ رٜوْࢡٜ مَوْࢡٜ ندٜرْ ݠٜرْسِيَ عٜ مٜدِيَ، نَنْࢡٜ کٛ دٜبّٛ لَامِيطٛ وَطِ، مبِعَنْ وٛرْࢡٜ مَࢡّٜ ڢُو بَنَ نٛنْ، يَوَارٜ عٜ تِکّٜرٜ طُوطَنْ؞

¹⁹ تٛ طُمْ ڢٛتَّنِ مَ، بَرْکَامَ، وَطْ عُمْرٛورٜ، ندٜ وِنْدٜ ندٜرْ عُمْرٛوجٜ ݠٜرْسِيَعٜنْ عٜ مٜدِيَعٜنْ نغَمْ تَا ندٜ وَيْلٛ؞ ندٜ وِعَ‏: تَا وَسْتِ مٜىٰتَ وَنغُغٛ يٜىٰسٛ لَامِيطٛ عَحَسُوٜرُسْ، لَامِيطٛ تَمِّ حٛکُّغٛ تٜدُّنغَلْ مَاکٛ حَا دٜبّٛ ڢٜىٰرٜ، ࢡُرَنْطٛ مٛ وٛوطُغٛ؞

²⁰ تٛ عَوٛويْنِ عُمْرٛورٜ ندٜعٜ ندٜرْ نجَاجِرْکَ لَامُ مَاطَ ڢُو، بَرْکَامَ، رٜوْࢡٜ ڢُو تٜدِّنَنْ وٛرْࢡٜ مُوطُمْعٜنْ، کٛو مَوْطٛ کٛو لٜىٰسْطٛ؞»

²¹ حَالَ مَنْ ڢٛتَّنِ لَامِيطٛ عٜ مَوْࢡٜ، لَامِيطٛ وَطِ کٛ مٜمُکَنْ سَرْوِنِمٛ؞

²² عٛنٜلْدِ بَتَاکٜىٰجِ ندٜرْ لٜسْطٜ مَاکٛ ڢُو – حَا لٜسْدِ کٛو ندِيٜ بٜى بِنْدٛلْ مُمْ عٜ عُمَّاتٛورٜ کٛو ندٜيٜ بٜى وٛلْدٜ مُمْ – نغَمْ حَا غٛرْکٛ ڢُو تَبِتَ عٛ جَوْمُ سَارٜ مَاکٛ، عٛوٛلْوَ بٛو وٛلْدٜ مَاکٛ؞