غَازٛووٛ 1 - دٜڢْتٜرٜ اَللَّه ڢُلْڢُلْدٜ عَدَمَوَ

مٜىٰرٜىٰجُمْ مٜىٰرٜ

¹ ندَا بٛلّٜ غَازٛووٛ ࢡِي دَاوُدَ، لَامِيطٛ حَا عُرُسَلِيمَ‏:

² غَازٛووٛ وِعِ‏: مٜىٰرٜىٰجُمْ مٜىٰرٜ‏! مٜىٰرٜ کٛرٛسْ‏! کٛو طُمٜ ڢُو وٛنِ مٜىٰرٜ؞

³ نَڢُودَ کَيٜ نٜطّٛ حٜࢡَتَ حَا تٛرَّ کُوغَلْ نغَلْ عٛحُووَتَ حَا دُنِيَارُ ڢُو؟

⁴ يِدٜرٜ سَالٛ، يِدٜرٜ وٛطْندٜ وَرَ، عَمَّا دُنِيَارُ طٛنْ تَبِتِ حَا ڢٛرٛيْ؞

⁵ نَانغٜ ڢُطَ، مُتَ، يَاوْطَ لٛرَاغٛ حَا نٛکُّورٜ ندٜ نغٜ ڢُطَتَ؞

⁶ حٜنْدُ يَحَ ڢٛمْبِنَ، تَارٛ حَا وٛيْلَ، ندُ تَارٛ تَارٛ، ندُ ڢُطِّتَ تَارَاغٛ؞

⁷ مَاجٜ ڢُو طٛنْ عِلَ حَا مبٜىٰلَ، عَمَّا مبٜىٰلَ حٜىٰوَتَا؞ غَلْ نٛکُّورٜ مَاجٜ عِلَتَ، تٛنْ طٜ عِلَتَ ڢَحِنْ؞

⁸ کُوجٜ ڢُو شٛمْنَنْ حَا ࢡُرَ تِنْدِنٛورٜ؞ يِيتٜرٜ سٛمَتَا يِعُغٛ، نٛڢْرُ سَڢْتَتَا نَنُغٛ؞

⁹ کٛ لَاتِ نَانٜ، کَنْجُمْ لَاتٛتٛ؞ کٛ وَطِ نَانٜ، کَنْجُمْ وَطٛتٛ ڢَحِنْ؞ وَلَا کٜسُمْ حَا دُنِيَارُ سَمْ‏!

¹⁰ تٛ وٛودِ حُوندٜ ندٜ ࢡٜمبِعَتَ‏: «ندَا طُمْ کٜسُمْ»، عَسٜى بٛو طُمْ عَارْتِ عٜنْ لَاتَاغٛ ندٜرْ زَمَنُوجِ ࢡٛويْمَاجِ؞

¹¹ عَمَّا وَلَا مٛ سِڢْتٛرْتَ ࢡٛويْمَاجُمْ؞ نٛنْ بٛو کٛ سَالٛتٛ ندٜرْ بَلْطٜ غَرَنْطٜ، وَرَنْࢡٜ ࢡَاوٛ بٛو شِڢْتٛرْتَا طُمْ؞

کٛ غَازٛووٛ حٜࢡْتِ

¹² مِنْ غَازٛووٛ، مِلَاتِنٛ لَامِيطٛ إِسْرَاءِيلَ حَا عُرُسَلِيمَ؞

¹³ مِوَطِ عَنِّيَ طَࢡِّتِتْغٛ عٜ لِࢩُغٛ بٜى حِکْمَ کٛ طٛنْ سَالٛ لٜسْ عَسَمَ ڢُو؞ تَوْمِ‏: اَللَّه سُکْلِ ࢡِࢡّٜ عَادَمَ بٜى سُکْلٜرٜ نَاوْندٜ؞

¹⁴ مِيِعِ کُوطٜ کُووَاطٜ حَا دُنِيَارُ ڢُو؞ ندَا، طُمْ ڢُو طُمْ مٜىٰرٜ، طُمْ نَنغُغٛ حٜنْدُ؞

¹⁵ لٜلِيطُمْ لٜلْتَتَاکٜ، مَجُّطُمْ لِمَتَاکٜ؞

¹⁶ مِنُمِ‏: ندَا، مِࢡٜسْدِ حِکْمَ، مِطُطِّنِ کَ کٛ ࢡُرِ لَامَنِيࢡٜ عُرُسَلِيمَ عَارْتُنٛوࢡٜ يَمْ ڢُو؞ ڢَکَتْ مِعَنْدِ کٛ وٛنِ حِکْمَ طُوطْکَ عٜ عَنْدَلْ لُغُّنغَلْ؞

¹⁷ مِوَطِ عَنِّيَ عَنْدُغٛ حِکْمَ نٛنْ بٛو نغِنَّاکُ عٜ ڢَاتَارٜ؞ تَوْمِ‏: کَنْجُمْ بٛو طُمْ نَنغُغٛ حٜنْدُ؞

¹⁸ نغَمْ حِکْمَ طُوطْکَ طٛنْ بٜى مٜتّٜىٰنغَ طُوطْنغَ، طُطِّنْغٛ عَنْدَلْ بٛو طُطِّنَنْ بٛنٜ؞