تٛوکْتَاکِ تَوْرٜىٰتَ 1 - دٜڢْتٜرٜ اَللَّه ڢُلْڢُلْدٜ عَدَمَوَ

إِسْرَاءِيلَعٜنْ حَا کٜىٰرٛلْ لٜسْدِ کَنَانَ

¹ ندَا بٛلّٜ طٜ مُوسَى وٛلْوَنِ إِسْرَاءِيلَعٜنْ ڢُو حَا ڢُونَانغٜ مَايٛ عُرْدُنْ ندٜرْ لَدّٜ حَا عَرَبَ يٜىٰسٛ سُوڢْ حَکُّندٜ ݠَرَنْ عٜ تٛڢٛلْ عٜ لَبَنْ عٜ حَسٜرٛتْ عٜ دِزَحَبْ؞

² جَحَانغَلْ دِغَ حٛوسٜىٰرٜ حٛرٜبْ حَا کَادٜسْ-بَرْنٜعَ غَلْ لَاوٛلْ جَحْرَنْنغٛلْ حَا لٜسْدِ کٛوسٜىٰجٜ سٜعِرْ، وَطِ ࢩَلْطٜ سَݠّٛ عٜ غٛعٛ؞

³ ندٜرْ ندُوࢡُ شَݠَّنْطٜ نَيَࢡْرُ ࢡَاوٛ غُرْتَاکِ مَࢡّٜ لٜسْدِ مِصْرَ، لٜوْرُ سَݠّٛ عٜ غٛعٛورُ، ࢩَنْدٜ غٛعٛورٜ مَارُ، مُوسَى يٜشِّ إِسْرَاءِيلَعٜنْ کٛ جَوْمِرَاوٛ عُمْرِمٛ وِعُغٛ ࢡٜ ڢُو؞

⁴ طُمْ لَاتِ ࢡَاوٛ جَوْمِرَاوٛ جَالِ سِحٛنْ، لَامِيطٛ عَمٛورِعٜنْ مٛ جٛوطِنٛ ندٜرْ بٜرْنِوٛلْ حٜسْبٛنْ عٜ عٛوکْ عٜ لَامِيطٛ بَاسَنْ مٛ جٛوطِنٛ ندٜرْ بٜرْنِيجِ عَسْتَرٛتْ عٜ عٜدِرٜيْ؞

⁵ حَا ڢُونَانغٜ مَايٛ عُرْدُنْ، ندٜرْ لٜسْدِ مٛعَبْ، مُوسَى ڢُطِّ ڢَامْتِنْغٛ ࢡٜ تَوْرٜىٰتَ کَعَ؞ عٛوِعِ‏:

⁶ «سَاعِ عٜنْ طٛنّٛ حَا حٛوسٜىٰرٜ سِنَ، جَوْمِرَاوٛ، اَللَّه مٜىٰطٜنْ وِعِ عٜنْ‏: ڢَࢡُّغٛ مٛوطٛنْ حَا حٛوسٜىٰرٜ ندٜعٜ حٜعِ؞

⁷ عُمّٜ، لٛرْتٜ دٛوْ لَاوٛلْ مٛنْ؞ نجٜحٜ حَا لٜسْدِ کٛوسٜىٰجٜ عَمٛورِعٜنْ عٜ حَا حٜىٰدِّطِّرَاࢡٜ مَࢡّٜ ڢُو، حَا عَرَبَ دٛوْ کٛوسٜىٰجٜ عٜ حَا لٜسْدِ لٜىٰسْندِ عٜ حَا لٜسْدِ ڢٛمْبِنَ عٜ حَا سٜرَ مبٜىٰلَ، لٜسْدِ کَنَانِعٜنْ عٜ لِبَنٛنْ حَا عٛنْ نجٛتّٛ مَايٛ مَنغٛ نغٛ عٜڢْرَتِسْ؞

⁸ ندَارٜ، مِجٛعِّنِ لٜسْدِ ندِعِ يٜىٰسٛ مٛوطٛنْ؞ نجٜحٜ کٛوشٜ مَرٜ ندِ، طُمْ لٜسْدِ ندِ مِنْ، جَوْمِرَاوٛ، مِحُنِ مِحٛکَّنْ کَاکِرَاࢡٜ مٛوطٛنْ إِبْرَاهِيمَ عٜ إِسْحَاقَ عٜ يَعْقُوبُ عٜ دَࢩْغٛلْ مَࢡّٜ ࢡَاوٛ مَࢡّٜ‏!»

مُوسَى دَرْنِ عَلْکَالِعٜنْ

⁹ مُوسَى وِعِ‏: «سَاعِ مَنْ مِوِعِ عٛنْ‏: مِوَاوَتَا طٛوُغٛ عٛنْ ڢٜىٰرٜ عَمْ؞

¹⁰ جَوْمِرَاوٛ، اَللَّه مٛوطٛنْ طُطِّنِ عٛنْ، حَنْدٜ عٛنْ طُوطْࢡٜ بَنَ کٛودٜ عَسَمَ؞

¹¹ جَوْمِرَاوٛ، اَللَّه کَاکِرَاࢡٜ مٛوطٛنْ ࢡٜسْدَ طُطِّنْغٛ عٛنْ ندٜ عُجِنٜىٰرٜ، عٛبَرْکِطِنَ عٛنْ ڢٛدّٜ عَلْکَوَلْ مَاکٛ بٜى مٛوطٛنْ؞

¹² عَمَّا بَنَ نٛيْ مِوَاوْرَتَ رٛونْدَاغٛ سَکْلٜرٜ عٜ دٛنغْلٜ عٜ حَالَ کِيتَ مٛوطٛنْ ڢٜىٰرٜ عَمْ؟

¹³ کٛوعٜ وٛرْࢡٜ حَکِّلْࢡٜ عٜ مَرْࢡٜ ڢَامُ، عَنْدَاࢡٜ ندٜرْ لٜعِ مٛنْ، مِدَرْنَ ࢡٜ حٛورٜعٜنْ دٛوْ مٛوطٛنْ؞

¹⁴ عٛنْ نجَابِ يَمْ، عٛنْ مبِعِ‏: وٛلْدٜ ندٜ عَوٛلْوِ وٛوطِ مَسِنْ؞

¹⁵ مِحٛوعِ حٛورٜعٜنْ لٜعِ مٛوطٛنْ، وٛرْࢡٜ حَکِّلْࢡٜ عٜ عَنْدَاࢡٜ، مِدَرْنِ ࢡٜ حٛورٜعٜنْ دٛوْ مٛوطٛنْ‏: حٛورٜعٜنْ دٛوْ يِمْࢡٜ عُجِنٜىٰرٜ، حٛورٜعٜنْ دٛوْ يِمْࢡٜ تٜىٰمٜرّٜ، حٛورٜعٜنْ دٛوْ يِمْࢡٜ شَݠَّنْطٜ نجٛوٛ عٜ حٛورٜعٜنْ دٛوْ يِمْࢡٜ سَݠّٛ؞ مِدَرْنِ بٛو کَلِيڢَعٜنْ نغَمْ لٜعِ مٛوطٛنْ؞

¹⁶ «سَاعِ مَنْ مِعُمْرِ حِيتٛوࢡٜ عٛنْ؞ مِوِعِ ࢡٜ‏: نَنٜ حَالَ جٛکِّرْلِ حَکُّندٜ بَنْدِرَاࢡٜ مٛنْ؞ مبَطَنٜ ࢡٜ کِيتَ نغٛونغْطُکَ، حَکُّندٜ غٛطّٛ بٜى دٜىٰرْطُمْ مَلَّ بٜى جَنَنّٛ غٛنْدُطٛ بٜى مُوطُمْ؞

¹⁷ تَا شٜنْدِندِرٜ يِمْࢡٜ يٜىٰسٛ کِيتَ، نَنٜ حَالَ ݠَمَرٛ عٜ مَوْطٛ ڢُو؞ تَا کُلٜ غٛطّٛ، نغَمْ کِيتَ کَ مبَطٛتٛنْ، طُمْ کِيتَ اَللَّه؞ تٛ وٛودِ کٛ سَلٛرِ عٛنْ، نغَدّٜ طُمْ يٜىٰسٛ عَمْ مِنَنَ؞

¹⁸ سَاعِ مَنْ مِحٛکِّ عٛنْ عُمْرٛوجٜ دٛوْ کُوجٜ طٜ مبَطٛتٛنْ ڢُو؞»

نٜلْکِ حٛرٛوࢡٜ عٜ سٛويْندٜ طٛوْتَارٜ إِسْرَاءِيلَعٜنْ

¹⁹ عٜنْ عُمِّ حٛرٜبْ عٜنْ نغَنْشِ لَدّٜ مَوْندٜ حُلْنِيندٜ ندٜعٜ ڢُو، عٜنْ نجٜحِ لٜسْدِ کٛوسٜىٰجٜ عَمٛورِعٜنْ؞ بَنَ نٛ جَوْمِرَاوٛ، اَللَّه مٜىٰطٜنْ عُمْرِ عٜنْ، عٜنْ نجٛتِّ کَادٜسْ-بَرْنٜعَ،

²⁰ مِوِعِ عٛنْ‏: عٛنْ نجٛتَّکٜ لٜسْدِ کٛوسٜىٰجٜ عَمٛورِعٜنْ ندِ جَوْمِرَاوٛ اَللَّه مٜىٰطٜنْ حٛکَّتَ عٜنْ؞

²¹ ندَارٜ لٜسْدِ ندِ جَوْمِرَاوٛ، اَللَّه کَاکِرَاࢡٜ مٛنْ حٛکَّتَ عٛنْ؞ نجٜحٜ، ࢩَامٜ ندِ بَنَ عٛعُمْرِ عٛنْ؞ تَا کُلٜ، تَا کُلْتٛرٜ سَمْ‏!

²² عَمَّا عٛنٛنْ ڢُو عٛنْ ࢡَدِتِ يَمْ، عٛنْ مبِعِ‏: سٜيْ نٜلٜنْ وٛطْࢡٜ يٜىٰسٛ مٜىٰطٜنْ، ࢡٜکٛرَ لٜسْدِ، ࢡٜعَنْدِنَ عٜنْ لَاوٛلْ نغٛلٜ نَسْتِرْتٜنْ ندِ عٜ بٜرْنِيجِ حَا نجَحْتٜنْ؞

²³ حَالَ مَنْ ڢٛتَّنِ يَمْ؞ نغَمْ مَاجُمْ شُࢡْمِ وٛرْࢡٜ سَݠّٛ عٜ طِطٛ شَکَ مٛوطٛنْ، غٛوتٛ ندٜرْ لٜࢩٛلْ کٛو نغٛلٜ ڢُو؞

²⁴ ࢡٜنَسْتِ لٜسْدِ کٛوسٜىٰجٜ، ࢡٜکٛرِ ندِ حَا يٛتِّ وَادِوٛلْ عٜسْکٛلْ؞

²⁵ ࢡٜکٛوعِ ࢡِࢡّٜ لٜطّٜ غٛطّٜ تٛنْ، ࢡٜنغَدِّ طٜ حَا مٜىٰطٜنْ؞ ࢡٜنغٜشِّ عٜنْ‏: لٜسْدِ ندِ جَوْمِرَاوٛ، اَللَّه مٜىٰطٜنْ تَمِّ حٛکُّغٛ عٜنْ، ندِ وٛوطِ؞

²⁶ عَمَّا عٛنْ نغِطَانٛ نَسْتُغٛ ندِ، عٛنْ تُورْتَنِ عُمْرٛورٜ جَوْمِرَاوٛ، اَللَّه مٛوطٛنْ؞

²⁷ عٛنْ نغُرْنغُرْتِ ندٜرْ لَيْمَاجِ مٛنْ، عٛنْ مبِعِ‏: جَوْمِرَاوٛ طٛنْ وَࢩَ عٜنْ؞ نغَمْ مَاجُمْ عٛوُرْتِنِ عٜنْ مِصْرَ، حَا عٜنْ مَايَ ندٜرْ جُوطٜ عَمٛورِعٜنْ، ࢡٜنَتِّنَ عٜنْ؞

²⁸ تٛيْ نجَحْتٜنْ؟ بَنْدِرَاࢡٜ مٜىٰطٜنْ نٜلَاࢡٜ تَمْݠِنِ عٜنْ بٜى وِعُغٛ‏: يِمْࢡٜ عُمَّاتٛورٜ ندٜعٜ ࢡُرْدِ عٜنْ طُوطٜىٰنغَ عٜ سٜمْبٜ؞ بٜرْنِيجِ مَࢡّٜ مَوْنِ، مَحِ مَاجِ تٛوِ حَا نجٛتِّ عَسَمَ؞ ࢡٜنغِعِ عٜنَکِعٜنْ، وَاتٛ مَاݠِنْدِعٜنْ بٛو؞

²⁹ مِنْ مِوِعِ عٛنْ‏: «تَا ندِوْنٜ، تَا کُلٜ يِمْࢡٜ ࢡٜعٜ‏!

³⁰ جَوْمِرَاوٛ، اَللَّه مٛوطٛنْ عَرْدٛتٛ عٛنْ؞ کَنغْکٛ عٛحَࢡَنْ نغَمْ مٛوطٛنْ بَنَ عٛنْ نغِعِ عٛوَطِ عٛنْ حَا مِصْرَ؞

³¹ حَا لَدّٜ بٛو، عٛنْ نغِعِ جَوْمِرَاوٛ، اَللَّه مَاطَ عٜڢْتِ مَ بَنَ بَابَ عٜڢْتِرْتَ ࢡِنغٜلْ مُمْ دٛوْ لَاوٛلْ نغٛلْ عٛنْ تٛکِّ ڢُو حَا عٛنْ نجٛتِّ نٛکُّورٜ ندٜعٜ؞

³² بٜى مَنْ ڢُو عٛنْ کٛولَاکِ جَوْمِرَاوٛ، اَللَّه مٛوطٛنْ،

³³ عَرْدِيطٛ عٛنْ ڢٛرٛيْ نغَمْ عٛلَارَنَ عٛنْ نٛکُّورٜ سَنغٜىٰرٜ؞ بٜى جٜمَّ عٛعَرْدِ عٛنْ ندٜرْ يِيتٜ يَيْنَنْنغٜ دٛوْ لَاوٛلْ مٛنْ، ࢩَلَوْمَ بٛو ندٜرْ رُولْدٜ نَنْدُندٜ بٜى دَنغْرَنغَلْ؞»

اَللَّه حِيتِ إِسْرَاءِيلَ

³⁴ «جَوْمِرَاوٛ نَنِ حَالَ مٛنْ کَعَ، عٛتِکِّ؞ عٛحُنِ حُنَيٜىٰرٜ، عٛوِعِ‏:

³⁵ ڢَکَتْ وَلَا کٛو غٛوتٛ ندٜرْ يِمْࢡٜ يِدٜرٜ حَلُّندٜ ندٜعٜ يِعَتَ لٜسْدِ مبٛوندِ ندِ کُنِيمِ حٛکُّغٛ کَاکِرَاࢡٜ مٛوطٛنْ؞

³⁶ سٜيْ کَالٜبْ ࢡِي يٜڢُنَّ تَنْ يِعَتَ ندِ؞ حَا مَاکٛ عٜ دَࢩْغٛلْ مَاکٛ ندٛکَّنْمِ لٜسْدِ ندِ عٛحٛرِ، نغَمْ عٛتٛکِّ يَمْ بٜى حٛولَارٜ؞

³⁷ کٛو مِنْ بٛو، جَوْمِرَاوٛ تِکَّنِ يَمْ دَلِيلَ مٛوطٛنْ، عٛوِعِ‏: عَنْ مُوسَى بٛو عَيِعَتَا لٜسْدِ مَنْ؞

³⁸ عَمَّا سُکَ مَ يٛسُوَ ࢡِي نُونَ نَسْتَنْ ندِ؞ سٜمْبِطِنْ مٛ، نغَمْ کَنغْکٛ عٛسٜنْدَنَنْ ندِ إِسْرَاءِيلَ نغَمْ مَرَلْ؞

³⁹ «ࢡِکّٛيْ مٛنْ کٛيْ عَنْدَا سٜنْدِندِرْغٛ بٛوطُّمْ بٜى کَلُّطُمْ تَوٛنْ، کٛيْ مبِعْطٛنْ کٛنّٜعٜنْ نجَࢡْتَنْ کٛيْ، کَنغْکٛيْ کٛيْ نَسْتَنْ لٜسْدِ؞ مِحٛکَّنْ کٛيْ ندِ، کٛيْ مَرَنْ ندِ؞

⁴⁰ عَمَّا عٛنٛنْ، نغَيْلِتٜ ࢡَاوٛ، لٛرٜ ندٜرْ لَدّٜ يَحُغٛ مَايٛ مَالِيَ؞»

عَمٛورِعٜنْ نجَالِ إِسْرَاءِيلَ

⁴¹ «عٛنْ نجَابِ، عٛنْ مبِعِ يَمْ‏: مِنْ مبَطِ حَکّٜ دٛوْ جَوْمِرَاوٛ؞ عَمَّا جٛنْتَ مِنْ نجَحَنْ حَࢡٛيْغٛ، بَنَ جَوْمِرَاوٛ عُمْرِ مِنْ؞ ندٜنْ کٛو مٛيْ مٛوطٛنْ تَاسْکَنِ حَࢡْرٜ، عٛنْ ندَارِ بَنَ وَعَّاغٛ کٛوسٜىٰجٜ طُمْ کٛيْطُمْ؞

⁴² عَمَّا جَوْمِرَاوٛ وِعِ يَمْ‏: رٜىٰنْتِنْ ࢡٜ، تَا ࢡٜنَسْتَ حَࢡْرٜ، نغَمْ مِوٛنْدَتَا بٜى مَࢡّٜ، کٛنّٜعٜنْ مَࢡّٜ نجَالٛتٛ ࢡٜ؞

⁴³ مِيٜشِّ عٛنْ طُمْ، عَمَّا عٛنْ شَلِ طٛوْتَنَاغٛ عُمْرٛورٜ جَوْمِرَاوٛ؞ عٛنْ تُورْتَنِمٛ، عٛنْ مَوْنِتِ، عٛنْ نجٜحِ حَا لٜسْدِ کٛوسٜىٰجٜ؞

⁴⁴ ندٜنْ عَمٛورِعٜنْ جٛوطِيࢡٜ تٛنْ نغُرْتِ بَنَ ࢩَاکِ نغَمْ ڢٛتُّغٛ بٜى مٛوطٛنْ، ࢡٜتَاسْنِ عٛنْ، ࢡٜتٛرِّ عٛنْ دِغَ سٜعِرْ حَا يٛتِّ حٛرْمَ؞

⁴⁵ عٛنْ لٛرِ عٛنْ مبٛيِ يٜىٰسٛ جَوْمِرَاوٛ نغَمْ تٜڢُغٛ بَلَّلْ، عَمَّا عٛنَنَنَايْ عٛنْ، عٛحَکِّلَنَايْ عٛنْ؞

⁴⁶ کَنْجُمْ وَطِ عٛنْ نجٛوطِ حَا کَادٜسْ حَا نٜىٰࢡِ مَسِنْ؞»