دَنِيٜلْ 1 - دٜڢْتٜرٜ اَللَّه ڢُلْڢُلْدٜ عَدَمَوَ

دَنِيٜلْ عٜ سٛوبِرَاࢡٜ مُوطُمْ حَا بَابِلَ

¹ ندٜرْ ندُوࢡُ لَامُ يٜحٛيَکِمْ، لَامِيطٛ يَحُودَ، تَتَࢡُ، نَبُکٛدٛنٛسٛرْ، لَامِيطٛ بَابِلَ، وَرِ، حِݠِّ عُرُسَلِيمَ؞

² جَوْمِرَاوٛ حٛکِّمٛ يٜحٛيَکِمْ، لَامِيطٛ يَحُودَ، نٛنْ بٛو يٜࢡْرٜ کُووْرُطٜ غٛنْطٜ ندٜرْ حَيْکَلِيرُ اَللَّه؞ نَبُکٛدٛنٛسٛرْ يَحْرِ طٜ حَا سُودُ طٛوَنْتٜىٰࢡٜ مُوطُمْ حَا لٜسْدِ سِنٜعَرْ، نَسْتِنِ طٜ ندٜرْ ندٜسَارِ طٛوَنْتٜىٰࢡٜ مُمْ؞

³ ندٜنْ عٛعُمْرِ عَسْݠٜنَسْ، مَوْطٛ سَرَاکِعٜنْ مَاکٛ، عٛسُࢡَ شَکَ إِسْرَاءِيلَعٜنْ، دٜرْکٜعٜنْ وٛطْࢡٜ دِغَ دَࢩْغٛلْ لَامِيطٛ عٜ تٜدَّ-عَسْلِعٜنْ؞

⁴ ࢡٜنْ نغَلَا بَتّٜ، نغَرْنِيࢡٜ، مَرْࢡٜ ڢَامُ عٜ حِکْمَ ڢُو، جَنغُࢡٜ، حَکِّلْࢡٜ، ڢٛتَنْࢡٜ نغَمْ کُوغَلْ ندٜرْ سَارٜ لَامِيطٛ؞ سٜيْ ࢡٜعٜکِّتٛ بٛو وٛلْدٜ عٜ بِنْدٛلْ کَلْدِيَعٜنْ؞

⁵ لَامِيطٛ دَرْنِ‏: کَلَ ࢩَلَادٜ ڢُو عٛيٜطِ ࢡٜ دِغَ ࢩَامْدُ عٜ نجَرَمْ مَاکٛ، ࢡٜنجَنغَ دُوࢡِ تَتِ، ࢡَاوٛطٛنْ ࢡٜݠُطَّنْ کُوغَلْ يٜىٰسٛ لَامِيطٛ؞

⁶ وٛودِ شَکَ مَࢡّٜ يَحُودُعٜنْ وٛطْࢡٜ‏: دَنِيٜلْ، حَنَنِيَ، مِيسَيٜلْ عٜ عَزَرِيَ؞

⁷ مَوْطٛ سَرَاکِعٜنْ حٛکِّ ࢡٜ عِنْطٜ کٜسٜ؞ عٛعٜوْنِ دَنِيٜلْ بٜلْتٜسَشَرْ، حَنَنِيَ بٛو سَدَرَکْ، مِيسَيٜلْ بٛو مٜىٰسَکْ، عَزَرِيَ بٛو عَبٜدْ-نٜغٛ؞

⁸ دَنِيٜلْ عَنِّنِ تَا عٛسٛࢡْنَ حٛورٜ مَاکٛ بٜى ࢩَامْدُ عٜ نجَرَمْ لَامِيطٛ؞ نغَمْ مَنْ عٛتٛرِ مَوْطٛ سَرَاکِعٜنْ تَا عٛدٛولَ مٛ سٛࢡْنُغٛ حٛورٜ مَاکٛ؞

⁹ اَللَّه حٜࢡْنِمٛ مٛعّٜرٜ عٜ حِنُّيٜ حَا مَوْطٛ سَرَاکِعٜنْ عٛو؞

¹⁰ عَمَّا عٛوِعِ دَنِيٜلْ‏: «مِطٛنْ حُلَ جَاغٛرْطٛ عَمْ لَامِيطٛ؞ کَنغْکٛ عُمْرِ کٛ عٛنْ ࢩَامَتَ عٜ کٛ عٛنْ نجَرَتَ؞ مِوٛنَنْ ندٜرْ جٛوتٜ مَايْدٜ تٛ عٛيِعِ غٜىٰسٜ مٛوطٛنْ مبٛوطَايْ بَنَ غٜىٰسٜ نغٛرْغِرَاࢡٜ مٛوطٛنْ؞»

¹¹ ندٜنْ دَنِيٜلْ وِعِ کَلِيڢَاجٛ مٛ مَوْطٛ سَرَاکِعٜنْ جٛعِّنِ دٛوْ دَنِيٜلْ عٜ حَنَنِيَ عٜ مِيسَيٜلْ عٜ عَزَرِيَ؞

¹² عٛوِعِمٛ‏: «ڢٛونْدُ مَشُّࢡٜ مَ ࢩَلْطٜ سَݠّٛ؞ عَشُّ مِنْ ࢩَامَ حَاکٛوجِ تَنْ عٜ مِنْ نجَرَ بٛو ندِيَمْ تَنْ؞

¹³ ࢡَاوٛطٛنْ عَلَارَ جَاتِ عَمِنْ بٜى جَاتِ دٜرْکٜعٜنْ ࢩَامَنْࢡٜ ࢩَامْدُ لَامِيطٛ؞ ندٜنْ وَطْ مِنْ ڢٛدّٜ کٛ تَمِّيطَ يِعُغٛ؞»

¹⁴ کَلِيڢَاجٛ غٛ جَࢡَنِ ࢡٜ، عٛڢٛونْدِ ࢡٜ ࢩَلْطٜ سَݠّٛ؞

¹⁵ ندٜ ࢩَلْطٜ مَنْ تِمِّ، عٛتَوِ جَاتِ مَࢡّٜ ࢡُرِ جَاتِ دٜرْکٜعٜنْ ࢩَامْࢡٜ ࢩَامْدُ لَامِيطٛ ڢُو وٛوطُغٛ عٜ تٜکُّغٛ؞

¹⁶ عٛعِتِّ غٜطَلْ ࢩَامْدُ عٜ نجَرَمْ مَࢡّٜ، عٛࢩَامْنِ ࢡٜ حَاکٛوجِ تَنْ؞

¹⁷ دٜرْکٜعٜنْ نَيٛ ࢡٜعٜ، اَللَّه حٛکِّ ࢡٜ عَنْدَلْ عٜ ڢَامُ ندٜرْ بِنْدِ عٜ ندٜرْ حِکْمَ ڢُو؞ دَنِيٜلْ وَاوِ ڢَسِّتِرْغٛ کٛيْطِ عٜ وَحَيُوجِ ڢُو؞

¹⁸ ندٜ سَاعِيرٜ ندٜ لَامِيطٛ تَعُنٛ نغَمْ حَا ࢡٜنغَدَّ دٜرْکٜعٜنْ ڢُو يٜىٰسٛ مَاکٛ يٛتِّ، مَوْطٛ سَرَاکِعٜنْ يَحْرِ ࢡٜ؞

¹⁹ لَامِيطٛ وٛلِدِ بٜى مَࢡّٜ، عَمَّا وَلَا کٛو غٛوتٛ مَࢡّٜ ڢٛتِ بٜى دَنِيٜلْ عٜ حَنَنِيَ عٜ مِيسَيٜلْ عٜ عَزَرِيَ؞ نغَمْ مَنْ ࢡٜݠُطِّ کُوغَلْ يٜىٰسٛ لَامِيطٛ؞

²⁰ کٛو ندٜيْ لَامِيطٛ ࢨَمِ ࢡٜ ڢُو، عٛتَوِ ࢡٜࢡُرِ لَارٛوࢡٜ عٜ وَطٛوࢡٜ حَتِّ ندٜرْ لَامُ مَاکٛ ڢُو حِکْمَ عٜ حَکِّيلٛ ندٜ سَݠّٛ؞

²¹ دَنِيٜلْ جٛوطِ تٛنْ حَا وَرْغٛ حِتَاندٜ ندٜ کٛورٜسْ لَامَنِ بَابِلَ؞