عَمٛسْ 1 - دٜڢْتٜرٜ اَللَّه ڢُلْڢُلْدٜ عَدَمَوَ

کِيتَ دٛوْ حٜىٰدِّطِّرَاࢡٜ إِسْرَاءِيلَ

¹ ندَا بٛلّٜ عَمٛسْ غٛوتٛ شَکَ وَيْنَاࢡٜ بَالِ حَا لٜسْدِ تٜکٛعَ؞ ندَا کٛ جَوْمِرَاوٛ يِعْنِمٛ دٛوْ إِسْرَاءِيلَ ندٜرْ زَمَنُ عُزِّيَ، لَامِيطٛ يَحُودَ عٜ يٜرٛبٛعَمْ ࢡِي يٛعَسْ، لَامِيطٛ إِسْرَاءِيلَ، دُوࢡِ طِطِ دِغَ لٜسْدِ دِمْبَاکِ تَوٛنْ؞

² عٛوِعِ‏: «جَوْمِرَاوٛ طٛنْ عُبَّ بَنَ مبَرٛوغَ دِغَ سِيٛنَ، طٛنْ حٛولَ دِغَ عُرُسَلِيمَ؞ نغَمْ مَاجُمْ دُرْدُطٜ وَيْنَاࢡٜ طَيْلَنْ، يٜىٰرٜىٰرٜ حٛوسٜىٰرٜ کَرْمٜلْ بٛو يٛورَنْ؞»

³ ندَا نِي جَوْمِرَاوٛ وِعِ‏: «يِمْࢡٜ دَمَسْ مبَطِ عَيْبٜ دٛوْ عَيْبٜ، ڢَکَتْ مِحِيتٛتٛ ࢡٜ نغَمْ ࢡٜمبٛنِّ لٜسْدِ غِلٜعَتْ بٜى شٛرْࢡِرْطُمْ نجَمْندِ؞

⁴ نغَمْ مَاجُمْ نٜلَنْمِ يِيتٜ ندٜرْ سَارٜ حَزَيٜلْ، نغٜ ࢩَامَ شُوطِ بٜنْحَدَتْ شٜمْبِطِّ؞

⁵ مِيٜوَنْ جَمْطٜ ݠَلْدُطٜ دَمُّغَلْ دَمَسْ، مِنَتِّنَنْ جٛوطِيࢡٜ حَا وَادِوٛلْ-حَکّٜ عٜ لَامِيطٛ سَارٜ-وٜلْوٜلٛ، سِرِيَعٜنْ ࢡٜ ندَحٜتٜىٰࢡٜ حَا کِيرْ؞» نٛنْ جَوْمِرَاوٛ وِعِ؞

⁶ ندَا نِي جَوْمِرَاوٛ وِعِ‏: «يِمْࢡٜ غَازَ مبَطِ عَيْبٜ دٛوْ عَيْبٜ، ڢَکَتْ مِحِيتٛتٛ ࢡٜ نغَمْ ࢡٜندَحِ نَنغَاࢡٜ ڢُو، ࢡٜندٛکِّ ࢡٜ حَا جُوطٜ عٜدٛومِعٜنْ؞

⁷ نغَمْ مَاجُمْ نٜلَنْمِ يِيتٜ دٛوْ مَحِ تَارِيطِ غَازَ، نغٜ ࢩَامَ شُوطِ مَاغٛلْ شٜمْبِطِّ؞

⁸ مِنَتِّنَنْ جٛوطِيࢡٜ حَا عَسْدٛدْ عٜ لَامِيطٛ عَسْکَلٛنْ؞ مِوَيْلِتَنْ جُنغٛ عَمْ دٛوْ عٜکُرُونْ، لُتُّࢡٜ ڢِلِسْتِعٜنْ کَلْکَنْ؞» نٛنْ اَللَّه جَوْمِرَاوٛ وِعِ؞

⁹ ندَا نِي جَوْمِرَاوٛ وِعِ‏: «يِمْࢡٜ تِرُسْ مبَطِ عَيْبٜ دٛوْ عَيْبٜ، ڢَکَتْ مِحِيتٛتٛ ࢡٜ نغَمْ ࢡٜندٛکِّ نَنغَاࢡٜ ڢُو حَا جُوطٜ عٜدٛومِعٜنْ، ࢡٜشِڢْتٛرَايْ عَلْکَوَلْ دٜىٰرْطِرَاغُ؞

¹⁰ نغَمْ مَاجُمْ نٜلَنْمِ يِيتٜ دٛوْ مَحِ تَارِيطِ تِرُسْ، نغٜ ࢩَامَ شُوطِ مَاغٛلْ شٜمْبِطِّ؞»

¹¹ ندَا نِي جَوْمِرَاوٛ وِعِ‏: «يِمْࢡٜ عٜدٛومْ مبَطِ عَيْبٜ دٛوْ عَيْبٜ، ڢَکَتْ مِحِيتٛتٛ ࢡٜ نغَمْ ࢡٜتَاسْنِ بَنْدِرَاࢡٜ مَࢡّٜ بٜى کَاڢَحِ، ࢡٜنغَلَا عٜنْطَمْ سَمْ؞ تِکّٜرٜ مَࢡّٜ تِمَّتَا، ࢡٜرْنُکِ مَࢡّٜ طٛنْ دُورَ حَا ڢٛرٛيْ؞

¹² نغَمْ مَاجُمْ نٜلَنْمِ يِيتٜ ندٜرْ بٜرْنِوٛلْ تٜمَنْ، نغٜ ࢩَامَ شُوطِ بٛسْرَ شٜمْبِطِّ؞»

¹³ ندَا نِي جَوْمِرَاوٛ وِعِ‏: «يِمْࢡٜ عَمّٛونْ مبَطِ عَيْبٜ دٛوْ عَيْبٜ، ڢَکَتْ مِحِيتٛتٛ ࢡٜ نغَمْ ࢡٜشٜىٰکِ رٜىٰدُعٜنْ حَا غِلٜعَتْ نغَمْ ࢡٜنجَاجِنَ کٜىٰرِ مَࢡّٜ؞

¹⁴ نغَمْ مَاجُمْ کُࢡَّنْمِ يِيتٜ حَا مَحِ تَارِيطِ رَبَّ، نغٜ ࢩَامَ شُوطِ مَاغٛلْ شٜمْبِطِّ، بٜى حٛولٛ کٛنُ ندٜرْ ࢩَنْدٜ حَࢡْرٜ، شَکَ نَارْغٜوٛلْ ندٜرْ ࢩَنْدٜ دُلُورُ؞

¹⁵ لَامِيطٛ مَاغٛلْ عٛ دَحٜتٜىٰطٛ، کَنغْکٛ عٜ عَرْدِيࢡٜ مَاکٛ ڢُو؞» نٛنْ جَوْمِرَاوٛ وِعِ؞