3 يُحَنَّ 1 - دٜڢْتٜرٜ اَللَّه ڢُلْڢُلْدٜ عَدَمَوَ

ڢُطّٛودٜ

¹ مِنْ ندٛتِّيجٛ، مِطٛنْ وِنْدَنَ سٛوبَاجٛ عَمْ غَيُسْ مٛ نغِطْمِ بٜى غٛونغَ بَتَاکٜوٛلْ نغٛعٛلْ؞

² سٛوبَاجٛ عَمْ غِطَاطٛ، مِطٛنْ يٜلَنٛ مَ حَيْرُ ندٜرْ کٛو طُمٜ ڢُو، عَيَمْطَ بَنَ نٛ ࢡٜرْندٜ مَ بٛو طٛنْ ࢡٜسْدٛرٛ ندٜرْ حَيْرُ؞

³ مِسٜيِ مَسِنْ ندٜ دٜىٰرْطِرَاࢡٜ نغَرِ، شٜىٰدِ غٛونغَ مَاطَ، نٛ عَيٜىٰطِرِ ندٜرْ غٛونغَ؞

⁴ وَلَا کٛ ࢡُرِ سٜيْنُغٛ يَمْ بَنَ نَنُغٛ ࢡِکّٛيْ عَمْ طٛنْ نغٜىٰطَ ندٜرْ غٛونغَ؞

يُحَنَّ مَنِ غَيُسْ

⁵ سٛوبَاجٛ عَمْ غِطَاطٛ، عَطٛنْ حُووَ بٜى غٛونغَاکُ نغَمْ وَلُّغٛ دٜىٰرْطِرَاࢡٜ، کٛو جَنَنْࢡٜ؞

⁶ کَمْࢡٜ شٜىٰدِ حَالَ يِيدٜ مَاطَ يٜىٰسٛ جَمَعَارٜ نُطِّنْࢡٜ؞ طُمْ وٛوطَنْ تٛ عَوَلِّ ࢡٜ دٛوْ حَاجٜ جَحَانغَلْ مَࢡّٜ بَنَ کٛ ڢٛتَّنْتَ اَللَّه؞

⁷ نغَمْ ࢡٜطٛنْ مبَطَ جَحَانغَلْ نغَعَلْ نغَمْ اَلْمَسِيحُ، بِلَا جَࢡُغٛ کٛو طُمٜ دِغَ تَمْݠَ-دِينَعٜنْ؞

⁸ عٜنٜنْ بٛو، سٜيْ عٜنْ نجَࢡّٛ عِرِنْ يِمْࢡٜ ࢡٜعٜ، نغَمْ حَا عٜنْ کُووْدَ بٜى مَࢡّٜ ندٜرْ کُوغَلْ نُطِّنْکِ؞

دِيٛتٜرٜڢٜسْ بٜى دٜمٜتِرِيُسْ

⁹ وٛودِ کٛ مِوِنْدَنِ جَمَعَارٜ نُطِّنْࢡٜ، عَمَّا دِيٛتٜرٜڢٜسْ مٛ يِطِ لَاتَاغٛ مَوْطٛ ندٜرْ جَمَعَارٜ مَنْ، جَࢡَّاکِ مِنْ؞

¹⁰ نغَمْ مَنْ، تٛ مِوَرِ، مِوَنغِنَنْ کُوطٜ طٜ عٛحُووِ، وَاتٛ ݠٜوٜ عٜ بٛلّٜ کَلُّطٜ طٜ عٛوٛلْوَتَ دٛوْ عَمِنْ؞ نَا کَنْجُمْ تَنْ، عَمَّا عٛجَࢡَّتَاکٛ دٜىٰرْطِرَاࢡٜ تٛ ࢡٜنغَرِ، عٛطٛنْ حَطَ يِطْࢡٜ جَࢡَّاغٛ ࢡٜ، عٛطٛنْ ڢَارْتَ ࢡٜ دِغَ جَمَعَارٜ نُطِّنْࢡٜ؞

¹¹ سٛوبَاجٛ عَمْ غِطَاطٛ، تَا تٛکَّ حَلّٜىٰندٜ، عَمَّا تٛکَّ مبٛوطٜىٰنغَ؞ بَطَنْطٛ مبٛوطٜىٰنغَ وٛنِ غٛطّٛ اَللَّه، بَطَنْطٛ حَلّٜىٰندٜ مٜىٰطَايْ عَنْدُغٛ اَللَّه؞

¹² يِمْࢡٜ ڢُو نغٜرْدِ دٜمٜتِرِيُسْ؞ کٛو ڢٛدّٜ غٛونغَاکُ بٛو عٛ بٛوطّٛ؞ ندٜنْ مِنِنْ بٛو مِنْ طٛنْ شٜىٰدٛ طُمْ؞ عَعَنْدِ سٜىٰدَمْکُ عَمِنْ، طُمْ غٛونغَ؞

کٛوڢْلِ رَغَرٜىٰجِ

¹³ وٛودِ کُوجٜ طُوطّٜ طٜ مِيِطِ وِنْدَنغٛ مَ، عَمَّا مِيِطَا وِنْدُغٛ طٜ دٛوْ طٜرٜىٰوٛلْ؞

¹⁴ مِتَمِّ عٜنْ نغِيدَنْ نِي سٜطَّ؞ عٜنْ نغٜىٰوْتِدَنْ حُنْدُکٛ بٜى حُنْدُکٛ؞

¹⁵ سَلَامَنْ لَاتَنٛ مَ‏! سٛوبِرَاࢡٜ مَ کٛوڢْنِ مَ؞ عَنْ بٛو حٛوڢْنُ سٛوبِرَاࢡٜ مٜىٰطٜنْ حَا تٛنْ غٛوتٛ غٛوتٛ؞