2 تِمٛتٜ 1 - دٜڢْتٜرٜ اَللَّه ڢُلْڢُلْدٜ عَدَمَوَ

¹ مِنْ ݠٛلْ نٜلَاطٛ عِيسَى اَلْمَسِيحُ ڢٛدّٜ مُويٛ اَللَّه، نغَمْ دَلِيلَ عِينَوٛلْ نغٜىٰندَمْ نغٛنْطَمْ ندٜرْ عِيسَى اَلْمَسِيحُ؞

² مِطٛنْ وِنْدَنٜ تِمٛتٜ، ࢡِطّٛ عَمْ غِطَاطٛ‏: اَللَّه بَابِرَاوٛ عٜ جَوْمِرَاوٛ مٜنْ عِيسَى اَلْمَسِيحُ ندٛکّٜ مٛعّٜرٜ عٜ حِنُّيٜ عٜ سَلَامَنْ؞

يٜتّٛورٜ عٜ تِطِّنْکِ

³ مِطٛنْ يٜتَّ اَللَّه مٛ نجَغَّنْتٛومِ بٜى نُمٛ ࢡٜرْندٜ لَاࢡْنغٛ، بَنَ کَاکِرَاࢡٜ عَمْ؞ مِعَشَّتَا سِڢْتٛرْغٛ مَ ندٜرْ دٛعَاجٜ عَمْ جٜمَّ عٜ نَانغٜ ڢُو؞

⁴ مِسِڢْتٛرِ غٛنْطِ مَ، مِيٜنْوِ يِعُغٛ مَ، نغَمْ حَا ࢡٜرْندٜ عَمْ حٜىٰوَ سٜيٛ؞

⁵ مِسِڢْتٛرِ نُطِّنْکِ مَ کِ وَلَا نَاڢِکَارٜ؞ عَرَنْ، نُطِّنْکِ کِعِ طٛنّٛ ندٜرْ ࢡٜرْندٜ لٛوِسْ مَامَ مَ دٜبّٛ عٜ ندٜرْ ࢡٜرْندٜ عٜوْنِکٜ دَادَ مَ؞ مِتَبِتِنِ کِ طٛنْ ندٜرْ مَاطَ بٛو؞

⁶ نغَمْ دَلِيلَ مَنْ مِطٛنْ سِڢْتِنٛرٜ‏: ࢡٜسْدُ حَکِّلَنْغٛ دٛکَّلْ اَللَّه نغَلْ کٜࢡْطَ ندٜ مبَلِّنْمِ جُوطٜ دٛوْ مَاطَ؞

⁷ نغَمْ نَا رُوحُ کُلٛلْ اَللَّه حٛکِّ عٜنْ، عَمَّا رُوحُ سٜمْبٜ عٜ يِيدٜ عٜ نَنغْتَارٜ؞

⁸ نغَمْ مَاجُمْ، تَا سٜمْتُ سٜىٰدَنَاغٛ جَوْمِرَاوٛ مٜنْ، تَا سٜمْتُ بٛو دَلِيلَ عَمْ، مِنْ کَࢡَّاطٛ نغَمْ دَلِيلَ مَاکٛ؞ عَمَّا مُࢩَنْ بٛنٜ بَنَ عَمْ نغَمْ دَلِيلَ لِنْجِيلَ، بٜى بَاوْطٜ طٜ اَللَّه حٛکِّ مَ؞

⁹ کَنغْکٛ حِسْنِ عٜنْ، عٜوْنِ عٜنْ حَا عٜنْ لَاتٛ يِمْࢡٜ مَاکٛ سٜنَاࢡٜ، نَا نغَمْ دَلِيلَ کُوطٜ مٜنْ بٛوطّٜ، عَمَّا نغَمْ دَلِيلَ مُويٛ مَاکٛ عٜ مٛعّٜرٜ مَاکٛ ندٜ عٛمٛعَّنِ عٜنْ ندٜرْ عِيسَى اَلْمَسِيحُ دِغَ زَمَنُوجِ شِوَانٛ سَمْ؞

¹⁰ جٛنْتَ مٛعّٜرٜ مَنْ وَنغِ بٜى غَرْکِ عِيسَى اَلْمَسِيحُ، کِسْنٛووٛ مٜنْ؞ کَنغْکٛ عٛنَتِّنِ بَاوْطٜ وَادٜ، عٛوَنغِنِ نغٜىٰندَمْ عٜ دُومَارٜ بٜى لِنْجِيلَ؞

¹¹ نغَمْ دَلِيلَ لِنْجِيلَ کَعَ، اَللَّه وَطِ يَمْ مِ غٛويْنٛووٛ عٜ نٜلَاطٛ عٜ عٜکِّتِنٛووٛ؞

¹² نغَمْ دَلِيلَ مَنْ، مِطٛنْ يَرَ بٛنٜىٰجِ طِعِ؞ عَمَّا طِ شٜمْتِنْتَا يَمْ، نغَمْ مِعَنْدِمٛ نُطِّنْمِ؞ مِطٛنْ حٛولِمٛ عٛ بَاوْطٛ عَيْنُغٛ کٛ عٛحَلْڢِنِ يَمْ، حَا تٛ ࢩَلَادٜ کِيتَ وَرِ؞

¹³ جٛغَ بٛلّٜ غٛونغَاجٜ طٜ نَنْطَ حَا عَمْ، طٜ لَاتَنٛ مَ مِسَالُ، عَتَبِتَ ندٜرْ نُطِّنْکِ عٜ يِيدٜ ندٜرْ عِيسَى اَلْمَسِيحُ؞

¹⁴ عٜکِّتِنٛلْ بٛوطْنغٛلْ نغٛلْ کَلْڢِنَاطَ، جٛغَ نغٛلْ بٜى بَاوْطٜ رُوحُ شٜنِيطٛ غٛنْطٛ ندٜرْ مَاطَ؞

¹⁵ عَعَنْدِ، وٛنْࢡٜ ندٜرْ لٜسْدِ عَسِيَ ڢُو عَشِّ يَمْ، ڢِغٜلُسْ عٜ حٜرْمٛغٜنٜسْ بٛو طٛنْ شَکَ مَࢡّٜ؞

¹⁶ جَوْمِرَاوٛ حِنّٛ سَارٜ عٛنٜسِڢٛرُسْ، نغَمْ عٛسُوسْطِنِ يَمْ ندٜ طُوطُّمْ؞ عٛسٜمْتِرَايْ يَمْ، کٛو ندٜ مِ کَࢡَّاطٛ ندٜرْ ڢُرْسِنَ؞

¹⁷ ندٜ عٛيٛتِّ رٛمَ، عٛڢُطِّ تٜڢُغٛ يَمْ بٜى تِينَارٜ طُوطْندٜ، حَا عٛحٜࢡْتِ يَمْ؞

¹⁸ جَوْمِرَاوٛ حٛکَّ مٛ حِنُّيٜ مُمْ ندٜرْ ࢩَلَادٜ کِيتَ؞ حَا عٜڢٜسُسْ عٛحُووَنِ يَمْ کُوطٜ طُوطّٜ، عَنْ عَعَنْدِ طُمْ بٛوطُّمْ؞