2 تٜسَّلٛنِکِعٜنْ 1 - دٜڢْتٜرٜ اَللَّه ڢُلْڢُلْدٜ عَدَمَوَ

¹ مِنْ ݠٛلْ، حَوْتَادٜ بٜى سِلَسْ عٜ تِمٛتٜ، مِنْ طٛنْ مبِنْدَنَ عٛنْ، عٛنٛنْ جَمَعَارٜ نُطِّنْࢡٜ حَا تٜسَّلٛنِيکِ، ࢡٜ اَللَّه، بَابِرَاوٛ مٜىٰطٜنْ عٜ جَوْمِرَاوٛ مٜىٰطٜنْ عِيسَى اَلْمَسِيحُ‏:

² اَللَّه بَابِرَاوٛ عٜ جَوْمِرَاوٛ مٜىٰطٜنْ عِيسَى اَلْمَسِيحُ، ندٛکَّ عٛنْ مٛعّٜرٜ عٜ سَلَامَنْ؞

کِيتَ سَاعِ لٛرَاکِ اَلْمَسِيحُ

³ عٛنٛنْ دٜىٰرْطِرَاࢡٜ، سٜيْ مِنْ نغٜتَّ اَللَّه ڢٛرٛيْ نغَمْ دَلِيلَ مٛوطٛنْ؞ طُمْ ݠٛتُّطُمْ، نغَمْ نُطِّنْکِ مٛوطٛنْ طٛنْ مَوْنَ مَسِنْ، يِيدٜ ندٜ مَرْطٛنْ حَکُّندٜ مٛوطٛنْ بٛو طٛنْ ࢡٜسْدٛ يٜىٰسٛ يٜىٰسٛ؞

⁴ کَنْجُمْ وَطِ مِنْ طٛنْ مَنْتٛرٛ عٛنْ ندٜرْ جَمَعَاجٜ يِمْࢡٜ اَللَّه غٛطّٜ، نغَمْ عٛنْ طٛنْ تَبِتِ ندٜرْ نُطِّنْکِ مٛوطٛنْ، کٛو ندٜ عٛنْ طٛنْ مُࢩَنَ تٛوࢩَانغٜ عٜ بٛنٜىٰجِ؞

⁵ بٛنٜىٰجِ طِعِ نغٛنِ عَلَامَ کِيتَ اَللَّه نغٛونغْطُکَ؞ کَنْجِ لَاتِنْتَ عٛنْ حٜࢨِيࢡٜ نَسْتُغٛ لَامُ اَللَّه، نغُ نجَرٛتٛنْ بٛنٜ دَلِيلَ مُمْ؞

⁶ اَللَّه عٛ عَدِلِيجٛ‏: عٛتٛرَّنْ تٛرَّنْࢡٜ عٛنْ؞

⁷ عٛحٛکَّنْ عٛنْ سِوْتَارٜ، عٛنٛنْ تٛرَّاࢡٜ حَوْتَادٜ بٜى عَمِنْ سَاعِ جَوْمِرَاوٛ مٜىٰطٜنْ عِيسَى وَنغَتَ دِغَ عَسَمَ عٜ مَلَاعِکَعٜنْ مَاکٛ سٜمْبِطْࢡٜ؞

⁸ عٛوَرْدَنْ بٜى يِيتٜ حُࢡَّنْنغٜ نغَمْ حِيتَاغٛ حٜىٰڢٜىٰرْࢡٜ ࢡٜعَنْدَا اَللَّه عٜ ࢡٜطٛوْتَنَاکِ لِنْجِيلَ جَوْمِرَاوٛ مٜىٰطٜنْ عِيسَى؞

⁹ ࢡٜ حَلْکٜتٜىٰࢡٜ حَلْکٜرٜ دُومِيندٜ، ࢡٜ سٜنْدٜتٜىٰࢡٜ دَايِيطُمْ بٜى جَوْمِرَاوٛ عٜ بَاوْطٜ مُمْ تٜدُّطٜ؞

¹⁰ طُمْ لَاتٛتٛ ࢩَلَادٜ ندٜ عٛوَرَتَ؞ ندٜنْ سٜنَاࢡٜ تٜدِّنَنْ مٛ، نُطِّنْࢡٜ مٛ ڢُو کَيْطِنَنْ لَارُغٛ مٛ؞ عٛنٛنْ بٛو عٛنْ نُطِّنِ سٜىٰدَمْکُ عَمِنْ؞

¹¹ نغَمْ مَنْ مِنْ طٛنْ تٛرَنٛ عٛنْ ڢٛرٛيْ، نغَمْ حَا اَللَّه مٜىٰطٜنْ تَوَ عٛنْ حٜࢨِيࢡٜ نغَمْ عٜوْنَاندُ ندُ عٛعٜوْنٛرِ عٛنْ؞ بٜى بَاوْطٜ مَاکٛ، عٛوَلَّ عٛنْ حٜبِّتِنغٛ عَنِّيَاجِ مٛوطٛنْ بٛوطِّ ڢُو، عٛتِمِّتِنَ کُوغَلْ نُطِّنْکِ مٛوطٛنْ ڢُو بٛو؞

¹² بَنَ نِي عِنْدٜ جَوْمِرَاوٛ مٜىٰطٜنْ عِيسَى تٜدِّنِرْتٜ ندٜرْ مٛوطٛنْ، عٛنٛنْ بٛو عٛنْ تٜدِّنْتٜ ندٜرْ مَاکٛ؞ طُمْ ڢُو طُمْ لَاتٛتٛ دَلِيلَ مٛعّٜرٜ اَللَّه مٜىٰطٜنْ عٜ جَوْمِرَاوٛ مٜىٰطٜنْ عِيسَى اَلْمَسِيحُ؞