2 سَمُيِلَ 1 - دٜڢْتٜرٜ اَللَّه ڢُلْڢُلْدٜ عَدَمَوَ

دَاوُدَ نَنِ کُبَرْ مَايْدٜ سَوُلُ

¹ ࢡَاوٛ مَايْدٜ سَوُلُ، دَاوُدَ جَالِنٛوطٛ عَمَلٜکِعٜنْ وَرْتِ شِکِلَکْ، عٛڢَࢡِّ تٛنْ ࢩَلْطٜ طِطِ؞

² ࢩَنْدٜ تَتَࢡْرٜ غٛطّٛ عِوِ دِغَ سَنغٜىٰرٜ کٛنُ سَوُلُ، وَرِ حَا دَاوُدَ، لِمْشٜ مَاکٛ طٛنْ شٜىٰکِ، مبُلْوُلْدِ طٛنْ دٛوْ حٛورٜ مَاکٛ؞ عٛتُغِّ کٛݠِّ، عٛوَالِ، عٛحِݠِّ يٜىٰسٛ دَاوُدَ؞

³ دَاوُدَ ࢨَمِمٛ‏: «دِغَ تٛيْ نغَرْطَا؟» عٛجَابِ‏: «مِدَطِ، مِوَرِ دِغَ سَنغٜىٰرٜ کٛنُ إِسْرَاءِيلَ؞»

⁴ دَاوُدَ ࢨَمِمٛ‏: «نٛيْ کُبَرْ؟ يٜشَّمْ طُمْ‏!» عٛوِعِ‏: «جَمَعَارٜ إِسْرَاءِيلَ دٛغِّ، طُوطْࢡٜ ندٜرْ يِمْࢡٜ مٜنْ بٛو مَايِ؞ سَوُلُ عٜ ࢡِيُمْ يٛنَتَنْ، کَمْࢡٜ بٛو ࢡٜمَايِ؞»

⁵ دَاوُدَ ࢨَمِمٛ ڢَحِنْ‏: «نٛيْ عَنْدِرْطَ سَوُلُ عٜ ࢡِيُمْ يٛنَتَنْ مَايِ؟»

⁶ عٛجَابِ‏: «مِ طٛنّٛ دٛوْ حٛوسٜىٰرٜ غِلْبٛعَ؞ مِيِعِ سَوُلُ طٛنْ تُغِّ دٛوْ لَبّٛ مُمْ، مٛوتَاجِ ݠُشِّ ڢِلِسْتِعٜنْ عٜ وَعِّيࢡٜ ݠُشِّ طٛنْ تَاسْنَ مٛ، ࢡٜندَايَاکِ سَمْ؞

⁷ عٛوَيْلِتِ، عٛيِعِ يَمْ، عٛعٜوْنِ يَمْ؞ مِنٛوتِ‏: نَعَمْ؞

⁸ عٛࢨَمِ يَمْ‏: عَنْ مٛيْ؟ مِجَابِ‏: مِ عَمَلٜکِيجٛ؞

⁹ عٛوِعِ يَمْ‏: ࢡَدِتَ، مبَرَمْ‏! غِيلٛلْ نَنغِ يَمْ، عَمَّا ݠٛوڢْطٜ عَمْ تَعَايْ تَوٛنْ؞

¹⁰ مِعَنْدِ عٛيٜىٰطَتَا ࢡَاوٛ کٛنّٜعٜنْ نجَالِمٛ؞ نغَمْ مَاجُمْ مِࢡَدِتِمٛ، مِمبَرِمٛ؞ مِحٛوعِ وٛرٛنْدٜ لَامُ وٛنْدٜ دٛوْ حٛورٜ مَاکٛ عٜ جَوٛ حَا جُنغٛ مَاکٛ؞ ندَا، مِوَدَّنِ مَ طُمْ، بَرْکَامَ؞»

¹¹ دَاوُدَ سٜىٰکِ لِمْشٜ مُمْ، کَنغْکٛ عٜ وٛرْࢡٜ وٛنْدُࢡٜ بٜى مَاکٛ ڢُو؞

¹² ࢡٜمبٛيِ، ࢡٜࢩَلِّ سُومَاغٛ نغَمْ دَلِيلَ سَوُلُ عٜ ࢡِيُمْ يٛنَتَنْ عٜ إِسْرَاءِيلَعٜنْ، عُمَّاتٛورٜ جَوْمِرَاوٛ، مبَرَاࢡٜ حَا کٛنُ ڢُو؞

¹³ دَاوُدَ ࢨَمِ سُکَ غَدُّطٛ کُبَرْ غٛ‏: «تٛيْ عِوْطَا؟» عٛجَابِ‏: «مِ ࢡِي عَمَلٜکِيجٛ کٛطٛ ندٜرْ إِسْرَاءِيلَ؞»

¹⁴ دَاوُدَ تٜلْࢡَنِمٛ، وِعِ‏: «عَسٜى، عَحُلَايْ مبَرُغٛ شُࢡَاطٛ اَللَّه‏!»

¹⁵ دَاوُدَ عٜوْنِ غٛطّٛ ندٜرْ سُکَعٜنْ مُمْ، عُمْرِمٛ مبَرُغٛ عَمَلٜکِيجٛ؞ سُکَ ڢِيِمٛ، عٛمَايِ؞

¹⁶ دَاوُدَ وِعِ عَمَلٜکِيجٛ‏: «عَيْبٜ مَايْدٜ مَ طٛنْ دٛوْ حٛورٜ مَ؞ بٛلّٜ مَ کَࢡِّ مَ، نغَمْ عَوِعِ عَمبَرِ لَامِيطٛ مٛ جَوْمِرَاوٛ سُࢡِنٛ؞»

دَاوُدَ وٛيِ سَوُلُ عٜ يٛنَتَنْ

¹⁷ دَاوُدَ وَطِ غِمٛلْ بٛيْکِ دٛوْ سَوُلُ عٜ ࢡِيُمْ يٛنَتَنْ،

¹⁸ عٛعِنْدِ نغٛلْ «غِمٛلْ لَغَاوَلْ»، نغٛلْ طٛنْ وِنْدِ ندٜرْ دٜڢْتٜرٜ غٛونغَاجٛ؞ دَاوُدَ عُمْرِ يِمْࢡٜ يَحُودَ ندُرْسٛ نغٛلْ؞ ندَا نِي عٛيِمِ‏:

¹⁹ «يَا إِسْرَاءِيلَ، حٛنٛوࢡٜ مَ ࢡُرْدُࢡٜ سٜمْبٜ ندٛعَّکٜ دٛوْ کٛوسٜىٰجٜ مَ، حٛنٛوࢡٜ مَ مَنغْتَاࢡٜ بٛو مَايِ؞

²⁰ تَا عَنْدِنٜ طُمْ حَا غَاتْ، تَا نغٛويْنٜ طُمْ حَا لَابِ عَسْکَلٛنْ، نغَمْ تَا رٜوْࢡٜ ڢِلِسْتِعٜنْ شٜيٛ، تَا ࢡِࢡّٜ سَادٛونِعٜنْ رٜوْࢡٜ مبٜلْمبٜلْتَ؞

²¹ عٛنٛنْ کٛوسٜىٰجٜ غِلْبٛعَ، تَا سَاوَوْرٜ وَطَ دٛوْ مٛوطٛنْ، تَا عِيٜىٰندٜ بٛو تٛࢡَ دٛوْ مٛوطٛنْ، تَا غٜسٜ دِمٛوجٜ شُدَّ عٛنْ؞ نغَمْ بَوَرْطٜ سٜمْبِطْࢡٜ نغُدِنَامَ تٛنْ، وَوَرْدٜ سَوُلُ سٛࢡِ حَا ڢٛرٛيْ؞

²² «لَغَاوَلْ يٛنَتَنْ وٛوڢَايْ سَمْ، کَاڢَحِ سَوُلُ لٛرْتَاکِ مٜىٰرٜ، عَمَّا کِ حٜىٰوِ ࢨِيࢨَمْ مبَرَاࢡٜ، کِ سِمْتِ ࢡٜلّٜرٜ سٜمْبِطْࢡٜ؞

²³ سَوُلُ عٜ يٛنَتَنْ، وٜلْࢡٜ عٜ يِطَاࢡٜ، ࢡٜشٜىٰدَايْ ندٜرْ نغٜىٰندَمْ عٜ مَايْدٜ ڢُو؞ ࢡٜࢡُرْدُنٛ دُتٜ جَاوَلْ، بَرٛوطٜ بٛو سٜمْبٜ؞

²⁴ عٛنٛنْ رٜوْࢡٜ إِسْرَاءِيلَعٜنْ، مبٛيٜ سَوُلُ‏! کَنغْکٛ عٛجَاغْنِرِ عٛنْ لِمْشٜ بٛطٜىٰجٜ، کَنغْکٛ عٛڢَوْنِرِ عٛنْ کَنغّٜىٰرِ؞

²⁵ «حٛنٛوࢡٜ ࢡُرْدُࢡٜ سٜمْبٜ مَايِ، ࢡٜمبَرَامَ ندٜرْ حَࢡْرٜ؞ يٛنَتَنْ بٛو مَايِ، عٛطٛنْ وَالِ حَا تٛوْندِيجٜ؞

²⁶ کَيْتٛ دٜىٰرْطِرَاوٛ عَمْ يٛنَتَنْ، ࢡٜرْندٜ عَمْ طٛنْ نَاوَ نغَمْ مَاطَ؞ عَنْ وٛنّٛ سٛوبَاجٛ عَمْ غِطَاطٛ، يِيدٜ مَ ࢡُرَنِ يَمْ وٛوطُغٛ دٛوْ يِيدٜ رٜوْࢡٜ ڢُو؞

²⁷ عَيّٜ‏! حٛنٛوࢡٜ ࢡُرْدُࢡٜ سٜمْبٜ مَايِ‏! بَلْمِ مَࢡّٜ نَتِّ، مٜىٰتَتَا نَڢُغٛ‏!»