2 لَامِيبٜٔ 1 - دٜڢْتٜرٜ اَللَّه ڢُلْڢُلْدٜ عَدَمَوَ

مَايْدٜ عَحَزِيَ

¹ ࢡَاوٛ مَايْدٜ عَکَبْ، مٛعَبِعٜنْ تُورْتَنِ إِسْرَاءِيلَ؞

² ࢩَنْدٜ ڢٜىٰرٜ، لَامِيطٛ عَحَزِيَ دٛعِّ غَلْ وُرْدٜرٜ شَبِّ غَاڢِنْدِرَاطِ حَا سُودُ مُوطُمْ دٛوْرُ حَا سَمَرِيَ، عٛنَاوْنِ؞ ندٜنْ عٛنٜلِ نٜلَاࢡٜ حَا ࢡٜنجَحَ ࢡٜࢨَمَ بَعَلْ-زٜبُبْ، لَوْرُ حَا بٜرْنِوٛلْ عٜکُرُونْ، نغَمْ عَنْدُغٛ تٛ عٛيَمْطِتَنْ عٜ نَاوْنٜرٜ دٛعّٜرٜ ندٜعٜ؞

³ عَمَّا مَلَاعِکَاجٛ جَوْمِرَاوٛ وَرِ وٛلْوَنِ إِلْيَاسُ تِسْبٜىٰجٛ، وِعِمٛ‏: «عُمَّ، يَحْ ڢٛتُّ بٜى نٜلَاࢡٜ لَامِيطٛ سَمَرِيَ؞ يٜشُّ ࢡٜ‏: کَدِ اَللَّه وَلَا حَا إِسْرَاءِيلَ نَ؟ کٛنِ نجَحٛتٛنْ ࢨَمُغٛ بَعَلْ-زٜبُبْ، لَوْرُ عٜکُرُونْعٜنْ؟

⁴ نغَمْ مَاجُمْ، ندَا نِي جَوْمِرَاوٛ وِعِ‏: عَعُمَّتَاکٛ دِغَ بٜعِّتّٜ طٜ مبَالِيطَ، عَمَايَنْ ڢَکَتْ؞» ندٜنْ إِلْيَاسُ دِلِّ؞

⁵ نٜلَاࢡٜ نغَرْتِ حَا لَامِيطٛ؞ عٛࢨَمِ ࢡٜ‏: کٛنِ نغَرْتُطٛنْ؟

⁶ ࢡٜنجَابِمٛ‏: «غٛطّٛ وَرِ، ڢٛتِّ بٜى عَمِنْ، وِعِ‏: لٛرْتٜ حَا لَامِيطٛ نٜلْطٛ عٛنْ؞ مبِعٜ مٛ‏: ندَا نِي جَوْمِرَاوٛ وِعِ‏: اَللَّه وَلَا حَا إِسْرَاءِيلَ نَ؟ کٛنِ عَنٜلِ نٜلَاࢡٜ حَا ࢡٜࢨَمَنٜ بَعَلْ-زٜبُبْ، لَوْرُ عٜکُرُونْعٜنْ؟ نغَمْ مَاجُمْ عَعُمَّتَاکٛ دِغَ بٜعِّتّٜ طٜ مبَالِيطَ، عَمَايَنْ ڢَکَتْ؞»

⁷ عٛࢨَمِ ࢡٜ‏: «غٛطّٛ ݠٛتُّطٛ بٜى مٛوطٛنْ، بٛلْوَنْطٛ عٛنْ بٛلّٜ طٜعٜ، عٛ مٛيٜىٰجٛ؟»

⁸ ࢡٜنجَابِمٛ‏: «عٛ ࢡٛرْنِيطٛ لِمْشٜ غَاسَ، عٛ تَادِيطٛ بٜى تَادٛرْغٛلْ لَرَلْ حَا کٜىٰشِ مَاکٛ؞» لَامِيطٛ وِعِ‏: «طُمْ إِلْيَاسُ تِسْبٜىٰجٛ؞»

⁹ ندٜنْ عٛنٜلِ عَرْدِيطٛ دٛوْ حٛنٛوࢡٜ شَݠَّنْطٜ نجٛوٛ بٜى يِمْࢡٜ مُوطُمْ شَݠَّنْطٜ نجٛوٛ حَا إِلْيَاسُ؞ عَرْدِيطٛ غٛ وَعِّ حَا مَاکٛ، کَنغْکٛ عٛطٛنْ جٛوطِ حَا يٜىٰرٜىٰرٜ حٛوسٜىٰرٜ؞ عٛوِعِمٛ‏: «عَنْ، غٛطّٛ اَللَّه، لَامِيطٛ وِعِ سٜيْ عَجِݠّٛ؞»

¹⁰ إِلْيَاسُ جَابِ‏: «ندٜ مِ غٛطّٛ اَللَّه، سٜيْ يِيتٜ دٛعّٛ دِغَ عَسَمَ، نغٜ ࢩَامٜ عَنْ عٜ حٛنٛوࢡٜ مَ شَݠَّنْطٜ نجٛوٛ ڢُو؞» سَاعِ مَنْ ندٜنْ يِيتٜ اَللَّه دٛعِّ دِغَ عَسَمَ، ࢩَامِمٛ بٜى حٛنٛوࢡٜ مَاکٛ شَݠَّنْطٜ نجٛوٛ غٛ ڢُو؞

¹¹ لَامِيطٛ نٜلِ عَرْدِيطٛ ڢٜىٰرٜ حَا إِلْيَاسُ بٜى حٛنٛوࢡٜ مُوطُمْ شَݠَّنْطٜ نجٛوٛ؞ عَرْدِيطٛ مَنْ وِعِ‏: «عَنْ غٛطّٛ اَللَّه، لَامِيطٛ وِعِ‏: يَاوْطَ جِݠَّاغٛ؞»

¹² إِلْيَاسُ جَابِ‏: «ندٜ مِ غٛطّٛ اَللَّه، سٜيْ يِيتٜ دٛعّٛ دِغَ عَسَمَ، نغٜ ࢩَامٜ عَنْ عٜ حٛنٛوࢡٜ مَ شَݠَّنْطٜ نجٛوٛ ڢُو؞» سَاعِ مَنْ ندٜنْ يِيتٜ اَللَّه دٛعِّ دِغَ عَسَمَ، ࢩَامِمٛ بٜى حٛنٛوࢡٜ مَاکٛ شَݠَّنْطٜ نجٛوٛ غٛ ڢُو؞

¹³ ڢَحِنْ لَامِيطٛ نٜلِ عَرْدِيطٛ تَتَࢡٛ بٜى حٛنٛوࢡٜ مُوطُمْ شَݠَّنْطٜ نجٛوٛ؞ عَرْدِيطٛ نٜلَاطٛ تَتَࢡٛ عٛو وَعِّ، تُغِّ کٛݠِّ يٜىٰسٛ إِلْيَاسُ، تٛرِمٛ، وِعِ‏: «عُسٜنِ، عَنْ غٛطّٛ اَللَّه، سَمْطِنْ يٛنغْکِ عَمْ عٜ يٛنغْکِيجِ يِمْࢡٜ عَمْ شَݠَّنْطٜ نجٛوٛ ࢡٜعٜ؞

¹⁴ مِعَنْدِ يِيتٜ دٛعِّ دِغَ عَسَمَ، ࢩَامِ عَرْدِيࢡٜ طِطٛ عَارْتُࢡٜ بٜى يِمْࢡٜ مَࢡّٜ ڢُو؞ عَمَّا مِتٛرَکٜ مَ، عُسٜنِ حِسْنُ يٛنغْکِ عَمْ؞»

¹⁵ مَلَاعِکَاجٛ جَوْمِرَاوٛ وِعِ إِلْيَاسُ‏: «جِݠَّ بٜى مَاکٛ، تَا حُلْ مٛ‏!» ندٜنْ عٛعُمِّ، عٛجِݠّٛدِ بٜى مَاکٛ حَا لَامِيطٛ؞

¹⁶ عٛوِعِمٛ‏: «ندَا نِي جَوْمِرَاوٛ وِعِ‏: عَنٜلِ نٜلَاࢡٜ نغَمْ ࢨَمُغٛ حَبَرُ حَا بَعَلْ-زٜبُبْ، لَوْرُ عٜکُرُونْعٜنْ، بَنَ تٛ اَللَّه وَلَا حَا إِسْرَاءِيلَ نغَمْ ࢨَمُغٛ کٛنغٛلْ مُوطُمْ؞ نغَمْ مَاجُمْ عَعُمَّتَاکٛ دِغَ بٜعِّتّٜ طٜ مبَالِيطَ، عَمَايَنْ ڢَکَتْ؞»

¹⁷ عَحَزِيَ مَايِ ڢٛدّٜ وٛلْدٜ جَوْمِرَاوٛ ندٜ إِلْيَاسُ وِعْنٛ؞ يٜحٛرَمْ دٜىٰرْطِيکٛ لَامِ حَا ݠٜلّٜلْ مَاکٛ، نغَمْ عَحَزِيَ وٛودَا ࢡِطّٛ؞ طُمْ وَطِ ندٜرْ ندُوࢡُ لَامُ يٜحٛرَمْ ࢡِي يُسَڢَتْ، لَامِيطٛ يَحُودَ طِطَࢡُ؞

¹⁸ لُتُّطُمْ حَالَ عَحَزِيَ عٜ کُوطٜ مُمْ، طُمْ وِنْدَامَ ندٜرْ دٜڢْتٜرٜ حَبَرُوجِ ࢩَلَاطٜ ندٜ لَامِيࢡٜ إِسْرَاءِيلَ؞