2 کٛرِنْتُعٜنْ 1 - دٜڢْتٜرٜ اَللَّه ڢُلْڢُلْدٜ عَدَمَوَ

کٛوڢْنغٛلْ

¹ مِنْ ݠٛلْ نٜلَاطٛ عِيسَى اَلْمَسِيحُ ڢٛدّٜ مُويٛ اَللَّه، مِنْ بٜى تِمٛتٜ، دٜىٰرْطِرَاوٛ مٜىٰطٜنْ، مِنْ طٛنْ مبِنْدَنَ عٛنْ، عٛنٛنْ يِمْࢡٜ جَمَعَارٜ اَللَّه وٛنْࢡٜ حَا کٛرِنْتُ عٜ سٜنَاࢡٜ ندٜرْ لٜسْدِ عَکَيَ ڢُو‏:

² اَللَّه، بَابِرَاوٛ مٜنْ عٜ عِيسَى اَلْمَسِيحُ، جَوْمِرَاوٛ مٜنْ، ندٛکَّ عٛنْ مٛعّٜرٜ عٜ سَلَامَنْ؞

يٜتّٛورٜ ݠٛلْ حَا اَللَّه

³ مَنغْتٛورٜ لَاتَنٛ اَللَّه، بَابِرَاوٛ جَوْمِرَاوٛ مٜىٰطٜنْ عِيسَى اَلْمَسِيحُ، بَابِرَاوٛ کٜىٰوْطٛ عٜنْطَمْ، عٛ اَللَّه مٛ طٛنْ دٜعِّتِنَ يِمْࢡٜ ڢٛرٛيْ؞

⁴ عٛطٛنْ دٜعِّتِنَ مِنْ ندٜرْ ࢡِلَّاجٜ عَمِنْ ڢُو، نغَمْ حَا مِنِنْ بٛو مِنْ مبَاوَ دٜعِّتِنغٛ يَرَنْࢡٜ بٛنٜىٰجِ ڢٜىٰرٜ ڢٜىٰرٜىٰجِ بٜى دٜعِّتِنْکِ کِ مِنْ کٜࢡِ حَا مَاکٛ؞

⁵ بَنَ نٛ بٛنٜىٰجِ طِ مِنْ نجَرِ دَلِيلَ اَلْمَسِيحُ طٛنْ طُوطَنِ مِنْ، بَنَ نٛنْ دٜعِّتِنْکِ عِوْکِ حَا اَلْمَسِيحُ بٛو طٛنْ طُوطَنِ مِنْ؞

⁶ تٛ مِنْ طٛنْ نجَرَ بٛنٜ، طُمْ لَاتٛتٛ نغَمْ حَا عٛنْ ندٜعِّتَ، عٛنْ کِسَ؞ تٛ اَللَّه دٜعِّتِنِ مِنْ بٛو، طُمْ لَاتٛتٛ نغَمْ عٛنْ شٜمْبِطَ، عٛنْ مُࢩَنَ عِرِنْ بٛنٜىٰجِ طِ مِنْ نجَرَتَ؞

⁷ مِنْ طٛنْ تَمّٛ ڢَکَتْ، نغَمْ مِنْ عَنْدِ ندٜ نِي عٛنْ طٛنْ کَوْتَ بٜى عَمِنْ ندٜرْ بٛنٜىٰجِ، عٛنْ کَوْتَنْ بٛو بٜى عَمِنْ ندٜرْ دٜعِّتِنْکِ بٛو؞

⁸ دٜىٰرْطِرَاࢡٜ، مِنْ نغِطِ عَنْدِنْغٛ عٛنْ ࢡِلَّاجٜ کٜࢡْطٜ مِنْ ندٜرْ لٜسْدِ عَسِيَ؞ طٜ تٜدَّنِ مِنْ مَسِنْ حَا ࢡُرِ سٜمْبٜ عَمِنْ؞ مِنْ تَمَّاکِنٛ مِنْ نغٜىٰطَنْ ڢَحِنْ؞

⁹ مِنْ مَاتِ ندٜرْ ࢡٜرْطٜ عَمِنْ بَنَ مِنْ ندٛعَّاࢡٜ کِيتَ مبَرٜىٰغٛ؞ نٛنْ طُمْ لَاتٛرِ نغَمْ تَا مِنْ کٛولٛ کٛعٜ عَمِنْ، عَمَّا مِنْ کٛولٛ اَللَّه، عُمِّتِنٛووٛ مَايْࢡٜ؞

¹⁰ کَنغْکٛ حِسْنِ مِنْ جٛوتٜ مَايْدٜ عِرِنْ ندٜعٜ، عٛحِسْنَنْ مِنْ ڢَحِنْ؞ مِنْ طٛنْ تَمّٛرٛ مٛ عٛحِسْنَنْ مِنْ يٜىٰسٛ ڢَحِنْ؞

¹¹ عٛنٛنْ بٛو عٛنْ طٛنْ مبَلَّ مِنْ بٜى دٛعَاجٜ مٛوطٛنْ؞ اَللَّه وٛونَنَنْ مِنْ نغَمْ دَلِيلَ دٛعَاجٜ يِمْࢡٜ طُوطْࢡٜ؞ طُوطْࢡٜ بٛو نغٜتَّنْ مٛ نغَمْ عَمِنْ؞

دَلِيلَ کَ ݠٛلْ ڢَاسِتِنِ جَحَانغَلْ مُمْ

¹² نُمٛوجِ ࢡٜرْطٜ عَمِنْ طٛنْ شٜىٰدَنٛ مِنْ، مِنْ نجٛوطِ ندٜرْ غٛونغَاکُ عٜ لَاࢡٜىٰنغَ ندٜرْ دُنِيَارُ، سَکّٛمَا شَکَ مٛوطٛنْ؞ کَنْجُمْ عِوِ حَا اَللَّه، کَنْجُمْ مِنْ مَنْتٛرْتٛ؞ مِنْ ندَرَاکِ دٛوْ ڢَامُ يِمْࢡٜ، سٜيْ دٛوْ مٛعّٜرٜ اَللَّه؞

^13-14 وَلَا غٛطُّمْ سَاوِ ندٜرْ بَتَاکٜىٰجِ عَمِنْ، سٛنَا کٛ عٛنْ نجَنغَتَ، کٛ عٛنْ ݠَامَتَ؞ مِطٛنْ تَمّٛ عٛنْ ݠَامَنْ ندٜرْ تِمِّدِدْطُمْ کٛ ݠَامٛتٛنْ جٛنْتَ دٛوْ دٛوْ‏: ࢩَلَادٜ لٛرَاکِ عِيسَى، جَوْمِرَاوٛ مٜىٰطٜنْ، عٛنْ شٜيٛرْتٛ مِنْ بَنَ مِنِنْ بٛو مِنْ شٜيٛرْتٛ عٛنْ؞

¹⁵ ندٜ نِي مِنُطِّنِ طُمْ، مِيٜلِنٛ يَالُغٛ حَا مٛوطٛنْ ندٜرْ جَحَانغَلْ عَمْ نغَمْ حَا کٜࢡٛنْ مٛعّٜرٜ اَللَّه طِطَوْرٜ؞

¹⁶ دِغَ مٛوطٛنْ مِيَحَنّٛ مَکٜدٛنِيَ، ندٜنْ مِلٛرٛتٛنٛ ڢَحِنْ دِغَ مَکٜدٛنِيَ حَا مٛوطٛنْ، نغَمْ حَا عٛنْ مبَلَّمِّ ندٜرْ حَاجٜ جَحَانغَلْ عَمْ يَحُغٛ يَحُدِيَ؞

¹⁷ ندٜ مِوَطْنٛ عَنِّيَ کَعَ، مِنُمَايْنٛ بٜى حَکِّيلٛ عَمْ نَ؟ مَلَّ تٛ مِوَطِ عَنِّيَ، مِوَطِ طُمْ بَنَ نٛ يِمْࢡٜ دُنِيَارُ مبَارَتَ، حَا مِوِعَ «عٛوحٛ» وَرْتَ مِوِعَ ڢَحِنْ «عَاعَ» نَ؟

¹⁸ ڢَکَتْ اَللَّه عٛ کٛولْنِيطٛ، کٛ مِنْ مبِعَتَ عٛنْ لَاتَاکِ عٛوحٛ بٜى عَاعَ طِطِ ڢُو؞

¹⁹ عِيسَى اَلْمَسِيحُ، ࢡِطّٛ اَللَّه مٛ مِنْ عَنْدِنِ عٛنْ، مِنْ عٜ سِلَسْ عٜ تِمٛتٜ، کَنغْکٛ عٛلَاتَاکِ عٛوحٛ بٜى عَاعَ، سٜيْ عٛوحٛ تَنْ؞

²⁰ نغَمْ کَنغْکٛ وٛنِ عٛوحٛ مٛ تَبِتِنِ کٛ اَللَّه عِينِ ڢُو؞ نغَمْ دَلِيلَ مَاکٛ بٛو مبِعٜتٜنْ «عَامِينَ» نغَمْ تٜدِّنْغٛ اَللَّه؞

²¹ اَللَّه بٜى حٛورٜ مُمْ تَبِتِنْتَ عٜنْ ندٜرْ کَوْتَلْ بٜى عِيسَى اَلْمَسِيحُ؞ کَنغْکٛ سُࢡِ عٜنْ،

²² عٛوَطَنِ عٜنْ لَمْبَ مَاکٛ، عٛحٛکِّ عٜنْ رُوحُ مَاکٛ ندٜرْ ࢡٜرْطٜ مٜىٰطٜنْ بَنَ جٜنغِنَ حَيْرُوجِ طِ عٛرٜسَنِ عٜنْ؞

²³ اَللَّه وٛنِ شٜىٰدٛووٛ يَمْ، عٛحِيتٛ يَمْ تٛ مِڢٜوِ‏! مِلٛرَاکِ حَا کٛرِنْتُ، نغَمْ تَا مِسَاتَنَ عٛنْ؞

²⁴ مِنْ نغِطَا دٛولُغٛ عٛنْ نُطِّنْغٛ کٛو طُمٜ، نغَمْ عٛنْ طٛنْ تَبِتِ ندٜرْ نُطِّنْکِ؞ عَمَّا مِنْ نغِطِ حُووْدُغٛ بٜى مٛوطٛنْ نغَمْ حَا سٜيٛ مٛوطٛنْ ࢡٜسْدٛ؞