2 حَبَرُوجِ ࢩَلَاطٜ 1 - دٜڢْتٜرٜ اَللَّه ڢُلْڢُلْدٜ عَدَمَوَ

سُلَيْمَـٰنُ تٛرِ حِکْمَ حَا اَللَّه

¹ سُلَيْمَـٰنُ ࢡِي دَاوُدَ تَبِتِنِ لَامُ مُوطُمْ؞ اَللَّه جَوْمِرَاوٛ وٛنْدِ بٜى مَاکٛ، مَوْنِنِ مَنغُ مَاکٛ مَسِنْ؞

² سُلَيْمَـٰنُ حَوْتِ يِمْࢡٜ إِسْرَاءِيلَ ڢُو، عَرْدِيࢡٜ دٛوْ حٛنٛوࢡٜ عُجِنٜىٰرٜ عٜ عَرْدِيࢡٜ دٛوْ حٛنٛوࢡٜ تٜىٰمٜرّٜ عٜ حِيتٛوࢡٜ عٜ عَرْدِيࢡٜ إِسْرَاءِيلَ ڢُو، وَاتٛ بَابَ-شِعٜعٜنْ ڢُو؞

³ ندٜنْ ࢡٜنجٜحِ حَا نٛکُّورٜ تٛوْندٜ حَا غِبِيٛنْ، سُلَيْمَـٰنُ عٜ جَمَعَارٜ ڢُو؞ لَيْمَارُ ڢٛتِّرْدٜ اَللَّه ندُ مُوسَى جَغِّيطٛ جَوْمِرَاوٛ وَطْنٛ طُمْ ندٜرْ لَدّٜ طٛنْ تٛنْ؞

⁴ عَمَّا سُنْدُکْرُ عَلْکَوَلْ اَللَّه، دَاوُدَ يَحْرُنٛ ندُ دِغَ کِرِيَتْ-يٜعَرِمْ حَا عُرُسَلِيمَ حَا نٛکُّورٜ ندٜ عٛتَاسْکَنِنٛ ندُ؞ عٛدَرْنُنٛ سُودُ لَيْمَارُ نغَمْ مَارُ تٛنْ؞

⁵ حِرْسِرْدٜ نجَمْندِ مبٛطٜىٰرِ ندٜ بٜشَلٜىٰلْ ࢡِي عُورِ ࢡِي حُورُ وَطْنٛ طُمْ، طٛنْ دَرِ حَا غِبِيٛنْ يٜىٰسٛ جٛوطٛرْدٜ جَوْمِرَاوٛ؞ سُلَيْمَـٰنُ عٜ جَمَعَارٜ ڢُو نجٜحِ تٛنْ نغَمْ ࢨَمُغٛ جَوْمِرَاوٛ؞

⁶ سُلَيْمَـٰنُ وَعِّ دٛوْ حِرْسِرْدٜ مَنْ، لِيعَنِ جَوْمِرَاوٛ غُلٜتٜىٰطِ عُجِنٜىٰرٜ؞

⁷ جٜمَّ مَنْ اَللَّه وَنغَنِ سُلَيْمَـٰنُ، وِعِمٛ‏: «تٛرَ کٛ نغِطَّ ڢُو، مِحٛکّٜتٜ‏!»

⁸ سُلَيْمَـٰنُ جَابِمٛ‏: «عَوٛونَنِ بَابَ عَمْ دَاوُدَ بٜى مبٛوطٜىٰنغَ طُوطْنغَ، عَلَامِنِ يَمْ حَا ݠٜلّٜلْ مَاکٛ بٛو؞

⁹ يَا جَوْمِرَاوٛ اَللَّه، تَبِتِنْ وٛلْدٜ ندٜ مبِعْطَ بَابَ عَمْ دَاوُدَ، نغَمْ عَلَامِنِ يَمْ دٛوْ عُمَّاتٛورٜ طُوطْندٜ بَنَ نجَارٜىٰندِ؞

¹⁰ حٛکَّمْ حِکْمَ عٜ حَکِّيلٛ نغَمْ طٛوُغٛ يِمْࢡٜ ࢡٜعٜ؞ نغَمْ مٛيْ ڢٛتِ لَامَنَاغٛ عُمَّاتٛورٜ مَ طُوطْندٜ ندٜعٜ؟»

¹¹ اَللَّه وِعِ سُلَيْمَـٰنُ‏: «ندٜ عَتٛرَکٜ طُعُمْ، عَتٛرَاکِ رِسْکُ عٜ جَوْدِ عٜ تٜدُّنغَلْ مَلَّ مبَرَنٜىٰغٛ وَࢩْࢡٜ مَ مَلَّ جُوتَلْ بَلْطٜ، عَمَّا عَتٛرِ حِکْمَ عٜ حَکِّيلٛ نغَمْ لَامَنَاغٛ يِمْࢡٜ عَمْ ࢡٜمبَطْمَامِ عَ لَامِيطٛ مُوطُمْعٜنْ،

¹² نغَمْ مَنْ عَحٜࢡَنْ حِکْمَ عٜ حَکِّيلٛ؞ مِحٛکّٜتٜ رِسْکُ عٜ جَوْدِ عٜ تٜدُّنغَلْ بٛو، طُمْ لَامِيࢡٜ عَارْتُࢡٜ مَ مٜىٰطَايْ حٜࢡُغٛ، ࢡَاوٛ مَاطَ بٛو، وَلَا کٜࢡَنْطٛ طُمْ؞»

¹³ ندٜنْ سُلَيْمَـٰنُ عُمِّ حَا لَيْمَارُ ڢٛتِّرْدٜ دٛوْ نٛکُّورٜ تٛوْندٜ حَا غِبِيٛنْ، وَرْتِ عُرُسَلِيمَ، ڢُطِّ لَامَنَاغٛ إِسْرَاءِيلَ؞

بَاوْطٜ عٜ رِسْکُ سُلَيْمَـٰنُ

¹⁴ سُلَيْمَـٰنُ مٛوࢡْتِ مٛوتَاجِ ݠُشِّ کٛنُ عٜ ݠُشِّ؞ طُمْ وَطِ مٛوتَاجِ عُجِنٜىٰرٜ عٜ تٜىٰمٜطّٜ نَيِ (1,400) عٜ ݠُشِّ عُجِنٜ سَݠّٛ عٜ طِطِ (12,000)؞ ندٜنْ عٛجٛعِّنِ غٛطِّ ندٜرْ بٜرْنِيجِ شِغٛرْطِ مَاجِ، غٛطِّ بٛو حَا عُرُسَلِيمَ، حَا کٛمْبِ مَاکٛ؞

¹⁵ عٛطُطِّنِ شَرْدِ عٜ کَنغّٜىٰرِ حَا عُرُسَلِيمَ بَنَ کَاعٜ، عٛطُطِّنِ لٜطّٜ شٜمْبِطّٜ بٛو بَنَ دُنْدٜىٰجٜ حَا لٜسْدِ تٛوْندِيجٜ؞

¹⁶ ࢡٜنغَدَّنِ سُلَيْمَـٰنُ ݠُشِّ دِغَ مِصْرَ عٜ کُوٜ، ڢِلٛوࢡٜ لَامِيطٛ کٜࢡٛيِ طِ حَا کُوٜ بٜى سَمَنْ شٛغُّ؞

¹⁷ حَا مِصْرَ ࢡٜنجٜحِ، ࢡٜشٛودٛيِ مٛوتَاجِ ݠُشِّ، نغٛوتَ ڢُو بَاکِنْ شٜىٰدٜ شَرْدِ تٜىٰمٜطّٜ جٛوٜىٰغٛ (600)، ݠُشِّ بٛو، نغٛوتُ ڢُو بَاکِنْ تٜىٰمٜرّٜ عٜ شَݠَّنْطٜ جٛوِ (150)؞ ࢡٜشٛودَنِ بٛو لَامِيࢡٜ حٜتِعٜنْ ڢُو عٜ لَامِيࢡٜ سِرِيَ بٛو؞

سُلَيْمَـٰنُ طٛنْ تَاسْکَ مَحُغٛ حَيْکَلِيرُ

¹⁸ سُلَيْمَـٰنُ وَطِ عَنِّيَ ࢩِࢡُغٛ سُودُ نغَمْ تٜدِّنْغٛ عِنْدٜ جَوْمِرَاوٛ عٜ سُودُ لَامُ نغَمْ حٛورٜ مُمْ؞