1 تِمٛتٜ 1 - دٜڢْتٜرٜ اَللَّه ڢُلْڢُلْدٜ عَدَمَوَ

کٛوڢْنغٛلْ

¹ مِنْ ݠٛلْ نٜلَاطٛ عِيسَى اَلْمَسِيحُ ڢٛدّٜ عُمْرٛورٜ اَللَّه، کِسْنٛووٛ مٜنْ عٜ عِيسَى اَلْمَسِيحُ، لَاتِيطٛ تَمُّندٜ مٜىٰطٜنْ،

² مِطٛنْ وِنْدَنٜ تِمٛتٜ، ࢡِطّٛ عَمْ ندٜرْ نُطِّنْکِ بٜى غٛونغَ‏: اَللَّه بَابِرَاوٛ عٜ جَوْمِرَاوٛ مٜنْ عِيسَى اَلْمَسِيحُ ندٛکّٜ مٛعّٜرٜ عٜ حِنُّيٜ عٜ سَلَامَنْ؞

دٜىٰنْتِنْکِ دٛوْ عٜکِّتِنٛلْجِ ݠٜوٛوجِ

³ سَاعِ مِ طٛنّٛ دِلَّ مَکٜدٛنِيَ، مِوَسِ مَ عَجٛوطٛ حَا عٜڢٜسُسْ، نغَمْ حَا عَعُمْرَ يِمْࢡٜ وٛطْࢡٜ ࢡٜعَشَّ عٜکِّتِنْغٛ عٜکِّتِنٛلْجِ ݠٜوٛوجِ؞

⁴ سٜيْ ࢡٜعَشَّ سُکْلَنَاغٛ کِشَّاجِ عٜ دٜڢْتٜ عَسْلِ طٜ تِمَّتَا سَمْ؞ نغَمْ طُمْ عُمِّنَنْ غَابٛتِرَلْ مٜىٰرٜ، طُمْ حٜبِّتِنْتَا نُڢَيٜىٰرٜ اَللَّه بٜى نُطِّنْکِ؞

⁵ تِيتٛرْدٜ عُمْرٛورٜ ندٜعٜ، طُمْ يِيدٜ عِوْندٜ حَا ࢡٜرْندٜ لَاࢡْندٜ عٜ نُمٛ ࢡٜرْندٜ لَاࢡْنغٛ عٜ نُطِّنْکِ کِ وَلَا نَاڢِکَارٜ؞

⁶ وٛطْࢡٜ شٜلِ لَاوٛلْ دَرْنُنغٛلْ نغٛعٛلْ، طٛنْ تٛکّٛ حَالَاجِ بَاطِّ؞

⁷ ࢡٜنغِطِ لَاتَاغٛ جَنغِنٛوࢡٜ عُمْرٛوجٜ اَللَّه، عَمَّا ࢡٜݠَامَتَا کٛ ࢡٜمبِعَتَ مَلَّ کٛ ࢡٜتَبِتِنْتَ بٜى سٜمْبٜ؞

⁸ عٜنٜنْ کَمْ عٜنْ عَنْدِ تَوْرٜىٰتَ وٛوطِ، تٛ غٛطّٛ طٛنْ حُووْتِنِرَ کَ بَنَ نٛ حَانْدِ،

⁹ عٜنْ عَنْدِ عُمْرٛوجٜ تَوْرٜىٰتَ مبَطَاکَ نغَمْ عَدِلِعٜنْ، عَمَّا نغَمْ يٜوٛوࢡٜ طٜ عٜ تُورْتٛوࢡٜ، يٜدُّࢡٜ اَللَّه عٜ حَکّٜعٜنْ، يِمْࢡٜ ࢡٜتٜدِّنْتَا اَللَّه عٜ شَمْطِنْتَا شٜنِيطُمْ، مبَرٛوࢡٜ بَابَ عٜ دَادَ عٜ مبَرٛوࢡٜ کٛعٜ ڢُو،

¹⁰ نغَمْ دَاکَارٜعٜنْ عٜ لُوطُعٜنْ، نغَمْ سٛورّٛوࢡٜ مَشُّࢡٜ، نغَمْ ڢٜوٛوࢡٜ عٜ حُنٛرْتٛوࢡٜ ڢٜوْرٜ عٜ وَطٛوࢡٜ کٛ لُوتِ عٜکِّتِنٛلْ غٛونغَوٛلْ؞

¹¹ عٜکِّتِنٛلْ نغٛعٛلْ عِوِ حَا لِنْجِيلَ کَ اَللَّه مَرْطٛ تٜدُّنغَلْ کٜعِيطٛ مَنغْتٜىٰغٛ حَلْڢِنِ يَمْ؞

يٜتّٛورٜ نغَمْ عٜنْطَمْ اَللَّه

¹² مِيٜتِّ جَوْمِرَاوٛ مٜنْ عِيسَى اَلْمَسِيحُ مٛ حٛکِّ يَمْ سٜمْبٜ حُووُغٛ کُوغَلْ عَمْ، نغَمْ عٛلَارِ يَمْ بَنَ کٛولَاطٛ، عٛنَسْتِنِ يَمْ ندٜرْ کُوغَلْ مَاکٛ؞

¹³ مِنْ، بٛلْوُنٛوطٛ کَلُّکَ دٛوْ مَاکٛ، تٛوࢩِينٛوطٛ يِمْࢡٜ مَاکٛ، مِتٛرِّنٛ ࢡٜ بٜى شَاتَلْ؞ عَمَّا عٛعٜنْطِ يَمْ، نغَمْ مِوَطْنٛ طُمْ ندٜرْ سٛويْندٜ ڢَامُ عٜ سٛويْندٜ نُطِّنْکِ؞

¹⁴ جَوْمِرَاوٛ مٜنْ مٛعَّنِ يَمْ طُوطُّمْ مَسِنْ، حٛکِّ يَمْ نُطِّنْکِ عٜ يِيدٜ عِوْندٜ حَا عِيسَى اَلْمَسِيحُ؞

¹⁵ ندَا وٛلْدٜ حٛولْنِيندٜ، حٜعِيندٜ جَࢡٜىٰغٛ بِلَا سٜکٛ‏: عِيسَى اَلْمَسِيحُ وَرِ ندٜرْ دُنِيَارُ نغَمْ حِسْنُغٛ حَکّٜعٜنْ؞ مِنْ وٛنِ تُلُّطٛ ࢡٜ،

¹⁶ عَمَّا اَللَّه عٜنْطِ يَمْ، نغَمْ حَا عِيسَى اَلْمَسِيحُ وَنغِنَ مُࢩَلْ مُمْ طُوطْنغَلْ بٜى عَمْ، مِنْ تُلُّطٛ ࢡٜ غٛ، حَا طُمْ لَاتٛ مِسَالُ نغَمْ نُطِّنَنْࢡٜ مٛ، حٜࢡَنْࢡٜ نغٜىٰندَمْ ندُومِيطَمْ؞

¹⁷ حٛرْمُ عٜ تٜدُّنغَلْ لَاتَنٛ اَللَّه غٛوتٛ، لَامِيطٛ دُومِيطٛ، مٛ مَايَتَا، مٛ يِعَتَاکٜ حَا عَبَدَ عَبَدِنْ؞ عَامِينَ‏!

¹⁸ عَنْ تِمٛتٜ، ࢡِنغٜلْ عَمْ، مِحَلْڢِنِ مَ عُمْرٛورٜ ندٜعٜ؞ سِڢْتٛرْ عَنَّبَاکُوجِ غَطَاطِ دٛوْ مَاطَ نَانٜ، طِ شٜمْبِطِنٜ نغَمْ حَا عَحَࢡَ حَࢡْرٜ وٛوندٜ،

¹⁹ عَجٛغَ نُطِّنْکِ مَ عٜ نُمٛ ࢡٜرْندٜ مَ لَاࢡْنغٛ؞ نُمٛ نغٛعٛ، وٛطْࢡٜ نغُدِنِ نغٛ، نُطِّنْکِ مَࢡّٜ وَاتِ؞

²⁰ حِمٜنٜيُسْ عٜ عَلٜکْسَنْدِرٜ طٛنْ ندٜرْ مَࢡّٜ؞ مِيٛوڢِ ࢡٜ حَا سَيْطَانُ نغَمْ حَا ࢡٜعٜکِّتٛ ࢡٜعَشَّ وٛلْوُغٛ کَلُّکَ؞