1 تٜسَّلٛنِکِعٜنْ 1 - دٜڢْتٜرٜ اَللَّه ڢُلْڢُلْدٜ عَدَمَوَ

کٛوڢْنغٛلْ

¹ مِنْ ݠٛلْ، حَوْتَادٜ بٜى سِلَسْ عٜ تِمٛتٜ، مِنْ طٛنْ مبِنْدَنَ عٛنْ، عٛنٛنْ جَمَعَارٜ نُطِّنْࢡٜ حَا تٜسَّلٛنِيکِ، ࢡٜ اَللَّه بَابِرَاوٛ عٜ جَوْمِرَاوٛ مٜىٰطٜنْ عِيسَى اَلْمَسِيحُ‏: مٛعّٜرٜ عٜ سَلَامَنْ لَاتَنٛ عٛنْ‏!

نُطِّنْکِ عٜ جٛوندٜ تٜسَّلٛنِيکِعٜنْ

² مِنْ طٛنْ نغٜتَّ اَللَّه ڢٛرٛيْ نغَمْ مٛوطٛنْ، مِنْ طٛنْ شِڢْتٛرَ عٛنْ بٛو تُمْ ندٜرْ تٛرْندٜ عَمِنْ؞

³ مِنْ طٛنْ شِڢْتٛرَ نٛ عٛنْ کُووْرَتَ بٜى نُطِّنْکِ، نٛ عٛنْ تِينٛرِ ندٜرْ يِيدٜ عٜ نٛ تَمُّندٜ مٛوطٛنْ ندٜرْ جَوْمِرَاوٛ مٜىٰطٜنْ عِيسَى اَلْمَسِيحُ تَبِتِرِ؞

⁴ عٛنٛنْ دٜىٰرْطِرَاࢡٜ، مِنْ عَنْدِ اَللَّه يِطِ عٛنْ، عٛسُࢡِ عٛنْ؞

⁵ سَاعِ مِنْ نغَازِنِ عٛنْ لِنْجِيلَ، طُمْ لَاتَاکِ بٜى بٛلّٜ تَنْ، عَمَّا بٜى بَاوْطٜ اَللَّه عٜ بَلَّلْ رُوحُ شٜنِيطٛ؞ کَدِبٛو مِنْ کٛلِّ عٛنْ ڢَکَتْ کَ کٛولْنِيکَ؞ عٛنْ عَنْدِ نٛ مِنْ کُووْرِ شَکَ مٛوطٛنْ نغَمْ حَيْرُ مٛوطٛنْ بٛو؞

⁶ عٛنٛنْ بٛو، عٛنْ تٛکِّ مِسَالُ عَمِنْ عٜ مِسَالُ جَوْمِرَاوٛ؞ کٛو ندٜ عٛنْ ࢡِلِّيࢡٜ مَسِنْ، عٛنْ نجَࢡِ کُبَرْ مَاکٛ بٜى سٜيٛ نغٛ رُوحُ اَللَّه حٛکِّ عٛنْ؞

⁷ بَنَ نِي عٛنْ لَاتٛرِ مِسَالُ حَا نُطِّنْࢡٜ ندٜرْ لٜسْطٜ مَکٜدٛنِيَ عٜ عَکَيَ ڢُو؞

⁸ نَا نغَمْ وٛلْدٜ جَوْمِرَاوٛ سَنغْکِتِ دِغَ مٛوطٛنْ، يٜحِ حَا وٛنْࢡٜ ندٜرْ مَکٜدٛنِيَ عٜ عَکَيَ تَنْ، عَمَّا کٛو تٛيْ ڢُو يِمْࢡٜ نَنِ نٛ عٛنْ نُطِّنِرِ اَللَّه؞ وَلَا حَاجٜ مِنْ مبٛلْوَ حَالَ مَنْ؞

⁹ نغَمْ کَمْࢡٜ تٛکِّ يٜشُّغٛ نٛ عٛنْ نجَࢡِّرِ مِنْ عٜ نٛ عٛنْ عَشِّرِ لَبِّ حَا عٛنْ طٛوْتَنٛ اَللَّه غٜىٰتٛ، غٛونغَاجٛ،

¹⁰ حَا ندٜىٰنٛنْ لٛرَاکِ ࢡِطّٛ مَاکٛ دِغَ عَسَمَ، عِيسَى مٛ عٛعُمِّتِنِ دِغَ مَايْدٜ، کِسْنَنْطٛ عٜنْ تِکّٜرٜ اَللَّه وَرَنْدٜ؞