1 سَمُيِلَ 1 - دٜڢْتٜرٜ اَللَّه ڢُلْڢُلْدٜ عَدَمَوَسَکْلٜرٜ سَارٜ عٜلْکَانَ 1 ࢡٛويْمَ وٛودِ غٛطّٛ حَا رَمَتَيِمْ-شٛڢِمْ ندٜرْ کٛوسٜىٰجٜ عٜڢْرَيِمْ؞ عِنْدٜ مَاکٛ عٜلْکَانَ ࢡِي يٜرٛحَمْ ࢡِي عٜلِحُ ࢡِي تٛکُ ࢡِي شُوڢْ، ندٜرْ لٜࢩٛلْ عٜڢْرَيِمْ؞ 2 عٜلْکَانَ وٛودِ رٜوْࢡٜ طِطٛ؞ عِنْدٜ عٛو حَنَّ، عِنْدٜ عٛيَ بٛو ݠٜنِنَّ؞ ݠٜنِنَّ وٛودِ ࢡِکّٛيْ، عَمَّا حَنَّ وٛودَا ࢡِکّٛيْ؞ 3 حِتَاندٜ ڢُو عٜلْکَانَ طٛنْ يَحَ بٜى سَارٜ مُمْ حَا سِلٛ نغَمْ سُجِدَنْغٛ جَوْمِرَاوٛ حٛنٛوࢡٜ عَسَمَ عٜ لِيعَنغٛ مٛ کِرْسٜتٜىٰنغَ؞ زَمَنُ مَنْ حٛڢْنِ عٜ ݠِنٜحَسْ، ࢡِࢡّٜ عٜىٰلِ نغٛنّٛ لِمَنْعٜنْ جَوْمِرَاوٛ تٛنْ؞ 4 ندٜ ࢡٜکَوْتِ نغَمْ ࢩَامُغٛ کُسٜلْ ندَبَّاوَ کِرْسَانغَ ڢُو، عٜلْکَانَ طٛنْ حٛکَّ ݠٜنِنَّ، دٜبّٛ مُمْ عٜ ࢡِࢡّٜ مُمْ وٛرْࢡٜ عٜ رٜوْࢡٜ ڢُو غٜطَلْ غٛوتَلْ؞ 5 عَمَّا حَنَّ، عٛطٛنْ حٛکَّ مٛ غٜطٜ طِطِ، نغَمْ عٛيِطِمٛ مَسِنْ، کٛو ندٜ جَوْمِرَاوٛ لَاتِنِمٛ دِمَرٛ؞ 6 نَوْلِيکٛ ࢡِلِّمٛ تُمْ نغَمْ مٜتِّنْغٛ مٛ نغَمْ عٛ دِمَرٛ؞ 7 بَنَ نِي طُمْ لَاتٛرِ حِتَاندٜ ڢُو تٛ حَنَّ يٜحِ حَا سُودُ جَوْمِرَاوٛ؞ ݠٜنِنَّ مٜتِّنِمٛ حَا عٛوٛيِ، عٛسَلِ ࢩَامُغٛ؞ 8 غٛرِيکٛ ࢨَمِمٛ: «کٛ وَطِ عَطٛنْ وٛيَ، عَࢩَامَتَا؟ کٛ سَکْلِ مَ؟ مِࢡُرَنْتَا مَ ࢡِࢡّٜ وٛرْࢡٜ سَݠّٛ نَ؟» حَنَّ عٜ عٜىٰلِ 9 ࢡَاوٛ ࢡٜࢩَامِ عٜ ࢡٜنجَرِ حَا سِلٛ، حَنَّ عُمِّ؞ عٜىٰلِ، لِمَنْجٛ طٛنْ جٛوطِ دٛوْ کٛرٛمْوَلْ مُمْ بَنغٜ نَسْتِرْدٜ سُودُ جَوْمِرَاوٛ؞ 10 ࢡٜرْندٜ حَنَّ مٜتِّ مَسِنْ، عٛتٛرِ جَوْمِرَاوٛ بٜى بٛجِّ طُوطِّ؞ 11 عٛتٛغِ تٛغَيٜىٰرٜ، عٛوِعِ: «يَا جَوْمِرَاوٛ حٛنٛوࢡٜ عَسَمَ، لَارْ بٛنٜ کٛرْطٛ مَ، سِڢْتٛرَمْ، عِتَّنَمْ مبُسْتُ نغُعُ! تٛ عَحٛکِّ يَمْ ࢡِطّٛ غٛرْکٛ، ڢَکَتْ مِحٛکِّتِتّٜ مٛ بَلْطٜ نغٜىٰندَمْ مَاکٛ ڢُو؞ غَاسَ حٛورٜ مَاکٛ مٜىٰطَتَا لَࢡٜىٰغٛ؞» 12 حَنَّ نٜىٰࢡِ تٛرَاغٛ جَوْمِرَاوٛ، عٜىٰلِ بٛو طٛنْ لَارَ مٛ؞ 13 عٛيِعِ حُنْدُکٛ حَنَّ طٛنْ دِمْبٛ، عَمَّا عٛنَنَايْ سَوْتُ نغَمْ حَنَّ طٛنْ وٛلْوَ ندٜرْ ࢡٜرْندٜ مُمْ؞ نغَمْ مَاجُمْ عٜىٰلِ تَمِّ عٛطٛنْ وُيْکِ؞ 14 عٛڢٜلِمٛ، عٛوِعِ: «حَا جٛنْتَ عَطٛنْ ندٜرْ وُيْکٜرٜ مَ؟ عِتُّ وُيْکٜرٜ مَ؞» 15 حَنَّ جَابِمٛ: «عَاعَ، بَرْکَامَ، مِيَرَايْ عِنَبٛوجَمْ مَلَّ نغُيْکِنٛوجَمْ سَمْ، عَمَّا مِ دٜبّٛ شُنِيطٛ؞ مِرُڢِ کٛ وٛنِ حَا ࢡٜرْندٜ عَمْ ڢُو يٜىٰسٛ جَوْمِرَاوٛ؞ 16 تَا نَنْدِنَمْ بٜى رٜوْࢡٜ مٜىٰرٜعٜنْ؞ ࢡٜرْندٜ عَمْ نَاوِ مَسِنْ، سُنٛ عٜ مٜتَّمْࢡٜرَمْ طُوطَنِ يَمْ؞ نغَمْ مَاجُمْ طُطِّنْمِ بٛلّٜ؞» 17 عٜىٰلِ وِعِمٛ: «يَحْ جَمْ؞ اَللَّه إِسْرَاءِيلَ جَࢡَ تٛرْندٜ ندٜ تٛرِيطَ مٛ؞» 18 حَنَّ جَابِ: «عُسٜنِ مٛعَّنْ کٛرْطٛ مَ ڢٛرٛيْ؞» ندٜنْ عٛدِلِّ، عٛࢩَامِ، ࢡَنْدُ مَاکٛ ڢٜرْتِ؞ دَࢩٜىٰکِ سَمُيِلَ 19 جَنغٛ مَاجُمْ عٜلْکَانَ عٜ يِمْࢡٜ سَارٜ مُمْ ندَوِ شُبْ حَا ࢡٜشُجِدَنَ جَوْمِرَاوٛ؞ ندٜ ࢡٜنغَرْتِ، ࢡٜنجٜحِ حَا رَمَ؞ عٜلْکَانَ حَوْتِ بٜى دٜبّٛ مُمْ، جَوْمِرَاوٛ جَࢡِ تٛرْندٜ حَنَّ؞ 20 حَنَّ رٜىٰدِ، دَࢩِ ࢡِطّٛ غٛرْکٛ؞ عٛوِعِ: «مِتٛرِمٛ حَا جَوْمِرَاوٛ؞» نغَمْ مَاجُمْ عٛعِنْدِمٛ سَمُيِلَ؞ 21 مَوْرِ مَاجُمْ عٜلْکَانَ يٜحِ ڢَحِنْ حَا سِلٛ، کَنغْکٛ عٜ يِمْࢡٜ سَارٜ مَاکٛ ڢُو، نغَمْ حَا عٛلِيعَنٛ جَوْمِرَاوٛ کِرْسٜتٜىٰنغَ حِتَاندٜ مَنْ عٜ کِرْسٜتٜىٰنغَ ڢٜىٰرٜ نغَ عٛتٛغِ طُمْ؞ 22 حَنَّ يَحْدَايْ بٜى مَࢡّٜ، عٛوِعِ غٛرِيکٛ: «تٛ مِعٜنْتِ ࢡِنغٜلْ، سَاعِ مَنْ مِيَحْرَنْ نغٜلْ حَا سُودُ جَوْمِرَاوٛ، نغٜلْ جٛوطٛ تٛنْ حَا ڢٛرٛيْ؞» 23 عٜلْکَانَ جَابِمٛ: «وَطْ کٛ ڢٛتَّنِ مَ، جٛوطَ حَا سَارٜ حَا تٛ عَعٜنْتِ نغٜلْ؞ جَوْمِرَاوٛ بٛو تَبِتِنْ وٛلْدٜ مُمْ ندٜ عٛوِعْنٛ دٛوْ مَاغٜلْ؞» بَنَ نِي حَنَّ جٛوطِ حَا سَارٜ، حَکِّلَنِ ࢡِيُمْ سَمُيِلَ؞ 24 ࢡَاوٛ حَنَّ عٜنْتِمٛ، عٛيَحْرِمٛ حَا سُودُ جَوْمِرَاوٛ حَا سِلٛ؞ عٛيَحْرِ بٛو نغَارِ ندِ دُوࢡِ تَتِ عٜ کُرٛورِ بُحُورٜ عٜ کَࢩَکَࢩَاوُ عِنَبٛوجَمْ؞ وَکَّتِ مَنْ سَمُيِلَ عٛ ࢡِنغٜلْ ݠَمَرٜلْ تَوٛنْ؞ 25 ندٜ سَارٛعٜنْ مَاکٛ کِرْسِ نغَارِ، ࢡٜنغَدِّ ࢡِنغٜلْ حَا عٜىٰلِ؞ 26 حَنَّ وِعِ: «بَرْکَامَ، عَطٛنْ سِڢْتٛرَ نَ؟ مِنْ وٛنِ دٜبّٛ دَرِنٛوطٛ حَا طٛ نغَمْ تٛرَاغٛ جَوْمِرَاوٛ؞ 27 ندَا ࢡِنغٜلْ نغٜلْ تٛرِيمِ حَا مَاکٛ، جَوْمِرَاوٛ حٛکِّ يَمْ کٛ مِࢨَمْنٛ مٛ؞ 28 مِنْ بٛو مِحٜبِّنَنْ تٛغَيٜىٰرٜ عَمْ: مِحٛکِّتَنْ جَوْمِرَاوٛ ࢡِطّٛ عَمْ، عٛلَاتٛ مٛ مَاکٛ بَلْطٜ نغٜىٰندَمْ مَاکٛ ڢُو؞» ندٜنْ ࢡٜشُجِدَنِ جَوْمِرَاوٛ؞ |
Fulfulde Bible Ajamiya © Bible Society of Cameroon, 2016.
Bible Society of Cameroon